مجمع الزوائد ومنبع الفوائد

سیدنا زید بن خالد جہنی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اپنے گھروں میں نماز ادا کرو ! اور انہیں قبرستان نہ بناؤ “ ۔
یہ روایت امام أحمد ، امام بزار نے ، اور امام طبرانی نے معجم کبیر میں نقل کی ہے امام أحمد کے رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” اپنے گھروں میں نماز ادا کرو ، تم انہیں اپنے لئے قبرستان نہ بناؤ “ ۔
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ، اس روایت کے بقیہ رجال ” صحیح“ کے رجال ہیں ۔

سیدنا صہیب بن نعمان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” آدمی کے اپنے گھر میں نماز ادا کرنے کو ، اُس کے ایسی جگہ نماز ادا کرنے ، جہاں اُسے لوگ دیکھ رہے ہوں ، پر اس طرح فضیلت حاصل ہے ، جو فرض نماز کو نفل نماز پر حاصل ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن مصعب قرقسانی ہے ، اسے یحیی بن معین اور دیگر حضرات نے ضعیف قرار دیا ہے ، امام أحمد نے اسے ” ثقہ “ کہا: ہے ۔

سیدنا امام حسن بن علی بن ابوطالب رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اپنے گھروں میں ( نفل ) نماز ادا کرو اور انہیں قبرستان نہ بناؤ اور میرے گھر کو عید نہ بنانا مجھ پر درود اور سلام بھیجنا تمہارا درود اور تمہار اسلام مجھ تک پہنچے گا ، خواہ تم جہاں کہیں بھی ہو“ ۔
یہ روایت امام ابویعلیٰ نے نقل کی ہے ، اس کی سند میں ایک راوی عبداللہ بن نافع ہے ، اور وہ ” ضعیف“ ہے ۔