مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جو شخص میرے ولی کو اذیت پہنچاتا ہے ، وہ میرے ساتھ جنگ کو حلال کر لیتا ہے ، اور میرا بندہ فرائض جیسی کسی چیز کے ذریعے میرا قرب حاصل نہیں کرتا ، اور بندہ نوافل کے ذریعے مسلسل میرا قرب حاصل کرتا رہتا ہے ، یہاں تک کہ میں اس سے محبت کرنے لگتا ہوں ، اگر وہ مجھ سے کچھ مانگتا ہے ، تو میں اسے عطا کرتا ہوں ، اگر وہ مجھ سے دعا مانگتا ہے ، تو میں اسے قبول کرتا ہوں ، اور مجھے کسی بھی چیز کے حوالے سے اتنا تردد نہیں ہوتا ، جتنا تردد بندے کی وفات سے ہوتا ہے ، کیونکہ وہ موت کو ناپسند کرتا ہے ، اور میں اس چیز کو ناپسند کرتا ہوں جو اسے بری لگتی ہے “ ۔
یہ روایت امام أحمد نے نقل کی ہے ، اس کی سند میں ایک راوی عبدالوحد بن قیس بن عروہ ہے ، جسے ابوزرعہ ، عجلی اور دو روایات میں سے ایک روایت کے مطابق یحیی بن معین نے ” ثقہ “ قرار دیا ہے ، دیگر حضرات نے اسے ضعیف قرار دیا ہے ، اس روایت کے بقیہ رجال ” صحیح“ کے رجال ہیں ۔
یہ روایت امام طبرانی نے معجم اوسط میں نقل کی ہے ، اور یہ الفاظ زائد نقل کیے ہیں : ” جب میں اُس سے محبت کرنے لگتا ہوں ، تو میں اس کی آنکھ بن جاتا ہوں ، جس کے ذریعے وہ دیکھتا ہے ، اور اس کے کان بن جاتا ہوں ، جن کے ذریعے وہ سنتا ہے ، اور اس کے ہاتھ بن جاتا ہوں ، جس کے ذریعے وہ پکڑتا ہے ، اور اس کے پاؤں بن جاتا ہوں جس کے ذریعے وہ چلتا ہے “ ۔
باقی روایت حسب سابق ہے اور اس کے رجال صحیح کے رجال ہیں ، صرف ان ( یعنی امام طبرانی ) کے استاد ہارون بن کامل کا معاملہ مختلف ہے ۔
یہ روایت امام بزار نے اس کی مانند نقل کی ہے ( علامہ ہیثمی فرماتے ہیں : ) اس روایت کے بقیہ طرق ، زہد سے متعلق کتاب میں ، باب : جو شخص ولی کو اذیت پہنچائے ، میں آئیں گے ۔

سیدنا ابوامامہ نبی اکرم صلی اللہ علیہ وسلم کا یہ فرمان نقل کرتے ہیں : ” اللہ تعالیٰ فرماتا ہے : میرا بندہ نوافل کے ذریعے مسلسل میرا قرب حاصل کرتا رہتا ہے ، یہاں تک کہ میں اُس سے محبت رکھنے لگتا ہوں ، اور میں اس کی سماعت بن جاتا ہوں ، جس کے ذریعے وہ سنتا ہے ، اس کی بصارت بن جاتا ہوں ، جس کے ذریعے وہ دیکھتا ہے ، اس کی زبان بن جاتا ہوں ، جس کے ذریعے وہ گفتگو کرتا ہے ، اس کا دل بن جاتا ہوں ، جس کے ذریعے وہ سمجھ بوجھ رکھتا ہے ، جب وہ مجھ سے دعا کرتا ہے ، تو میں اس کی دعا قبول کرتا ہوں ، جب وہ مجھے سے کچھ مانگتا ہے ، تو میں اسے عطا کرتا ہوں ، جب وہ مجھ سے مدد مانگتا ہے ، تو میں اس کی مدد کرتا ہوں ، اور میرا بندہ جس چیز کے ذریعے میری عبادت کرتا ہے ، اس میں میرے نزدیک سب سے زیادہ محبوب چیز ، میرے لیے ( اعتقاد کا ) خالص ہونا ہے “ ۔
یہ روایت امام طبرانی نے معجم کبیر میں نقل کی ہے ۔

ان صحابی کے حوالے سے ، ایک روایت میں یہ بات مذکور ہے : نبی اکرم صلی اللہ علیہ وسلم نے ارشاد فرمایا : ” جو شخص میرے ولی کی توہین کرتا ہے ، وہ میرے ساتھ دشمنی کا اظہار کرتا ہے ، اے ابن آدم ! میرے پاس جو موجود ہے ، تم اس تک صرف اس چیز کو ادا کرنے کے ذریعے پہنچ سکتے ہو ، جو میں نے تم پر فرض قرار دی ہے ، اور میرا بندہ نوافل کے ذریعے میری محبت حاصل کرنے کی کوشش کرتا رہتا ہے ، یہاں تک کہ میں اُس سے محبت کرنے لگتا ہوں“ ۔ اس کے بعد راوی نے حسب سابق روایت نقل کی ہے : دونوں روایات کی سند میں ایک راوی علی بن یزید ہے ، اور وہ ” ضعیف “ ہے ۔

سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم سردی کے موسم میں تشریف لائے ، پتے گر رہے تھے ، نبی اکرم صلی اللہ علیہ وسلم نے ایک درخت کی شاخ پکڑی تو اس کے پتے گرنے لگے ، آپ صلی اللہ علیہ وسلم نے ارشاد فرمایا : اے ابوذر ! میں نے عرض کی : یا رسول اللہ ! میں حاضر ہوں ۔ نبی اکرم صلی اللہ علیہ وسلم نے ارشاد فرمایا : ” مسلمان بندہ جب نماز ادا کرتا ہے ، اور اس نماز کے ذریعے اس کا مقصد اللہ تعالیٰ کی رضا کا حصول ہوتا ہے ، تو اس بندے کے گناہ یوں گرتے ہیں ، جس طرح اس درخت سے یہ پتے گر رہے ہیں “ ۔
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔

مطرف بیان کرتے ہیں : میں قریش سے تعلق رکھنے والے کچھ افراد کے پاس بیٹھا ہوا تھا ، اسی دوران ایک شخص آیا ، اس نے نماز ادا کرنا شروع کی ، وہ رکوع اور سجدے کر رہا تھا ، لیکن قعدہ نہیں کر رہا تھا ، میں نے کہا: اللہ کی قسم ! مجھے اس شخص کی سمجھ نہیں آ رہی کہ یہ جفت تعداد کے بعد نماز ختم کرے گا ؟ یا طاق تعداد کے بعد کرے گا ؟ اُن لوگوں نے کہا: تم اُٹھ کے اُس کے پاس جا کر ، اُس سے یہ بات کہ دو ! مطرف کہتے ہیں : میں اُٹھا میں نے کہا: اے اللہ کے بندے ! تمہارے بارے میں مجھے یہ اندازہ نہیں ہو رہا کہ تم جفت رکعت کے بعد نماز ختم کرو گے ؟ یا طاق رکعت کے بعد کرو گے ؟ اس نے جواب دیا : لیکن اللہ تعالیٰ کو تو یہ بات پتہ ہے ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اللہ تعالیٰ کے لئے ایک سجدہ کرتا ہے ، اللہ تعالٰی اس سجدے کی وجہ سے اس کے لئے ایک نیکی نوٹ کرتا ہے ، اور اس سجدے کی وجہ سے اس کے ایک گناہ کو ختم کر دیتا ہے ، اور اس سجدے کی وجہ سے اس کے ایک درجے کو بلند کرتا ہے “ ۔ مطرف کہتے ہیں : میں نے دریافت کیا : آپ کون ہیں ؟ انہوں نے جواب دیا : ابوذر میں اپنے ساتھیوں کے پاس واپس آیا ، میں نے کہا: اللہ تعالیٰ تمہیں ایسا بدلہ دے کہ جو برے ساتھیوں کو دیا جاتا ہے ، تم لوگوں نے مجھے یہ ہدایت کی تھی کہ میں نبی اکرم صلی اللہ علیہ وسلم کے اصحاب میں سے ایک صاحب کو تعلیم دوں ؟ ایک روایت میں یہ الفاظ ہیں : میں نے ان کو دیکھا کہ وہ طویل قیام کر رہے تھے ، اور بکثرت رکوع و سجود کر رہے تھے میں نے ان کے سامنے یہ بات ذکر کی ، تو انہوں نے فرمایا : میں نے اچھے طریقے سے نماز ادا کرنے میں کوئی کوتاہی نہیں کی ہے ، کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص ایک مرتبہ رکوع کرتا ہے ، یا ایک مرتبہ سجدہ کرتا ہے ، تو اس کے ذریعے اس کے درجے کو بلند کیا جاتا ہے ، اور اس کے ذریعے اس کے گناہ کو مٹا دیا جاتا ہے “ ۔
یہ تمام روایات امام أحمد نے نقل کی ہیں ، امام بزار نے اس کی مانند روایات مختلف اسانید کے ساتھ نقل کی ہیں ، ان میں سے بعض کے رجال ” صحیح “ کے رجال ہیں ،
یہ روایت امام طبرانی نے معجم اوسط میں نقل کی ہے ۔

زیاد بن ابوزیاد ، جو زیاد ، بنو مخزوم کے غلام ہیں ، وہ نبی اکرم صلی اللہ علیہ وسلم کے خادم کے حوالے سے یہ بات نقل کرتے ہیں : وہ خادم کوئی مرد تھا ، یا خاتون تھیں ، وہ بیان کرتے ہیں : نبی اکرم صلی اللہ علیہ وسلم خادم سے یہ دریافت کرتے تھے : کہ کیا تمہیں کوئی کام ہے ؟ یہاں تک کہ ایک دن اس خادم نے عرض کی : یا رسول اللہ ! مجھے ایک کام ہے ۔ نبی اکرم صلی اللہ علیہ وسلم نے دریافت کیا : تمہیں کیا کام ہے ، اس خادم نے عرض کی : مجھے یہ ضرورت ہے کہ آپ قیامت کے دن میری شفاعت کریں ، نبی اکرم صلی اللہ علیہ وسلم نے دریافت کیا : اس بارے میں تمہاری رہنمائی کس نے کی ہے ؟ خادم نے جواب دیا : میرے پروردگار نے ، نبی اکرم صلی اللہ علیہ وسلم نے فرمایا : ٹھیک ہے ، لیکن تم بکثرت سجدوں کے ذریعے میری مدد کرنا ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا ابوفاطمہ رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھ سے فرمایا : اے ابوفاطمہ ! اگر تم مجھ سے ( آخرت میں ) ملنا چاہتے ہو ، تو بکثرت سجدے کرو “ ۔
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” نماز بہترین چیز ہے ، جو شخص اس کو بکثرت ادا کر سکتا ہو اسے بکثرت ادا کرنی چاہیے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبد المنعم بن بشیر ہے ، اور وہ ” ضعیف “ ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر ایک قبر کے پاس سے ہوا ، آپ صلی اللہ علیہ وسلم نے ارشاد فرمایا : یہ قبر والا شخص کون ہے ؟ لوگوں نے عرض کی : فلاں شخص ہے ، نبی اکرم صلی اللہ علیہ وسلم نے ارشاد فرمایا : ” اس شخص کے نزدیک دو رکعات ادا کرنا ، تمہاری پوری دنیا سے زیادہ محبوب ہو گا“ ۔
یہ روایت امام طبرانی نے معجم اوسط میں نقل کی ہے ، اور اس کے رجال ” ثقہ “ ہیں ۔

سیدنا جابر بن سمرہ رضی اللہ عنہ بیان کرتے ہیں : ایک نوجوان نبی اکرم صلی اللہ علیہ وسلم کی خدمت کرتا تھا اور اپنی ضروریات پوشیدہ رکھتا تھا ، نبی اکرم صلی اللہ علیہ وسلم نے دریافت کیا : مجھ سے اپنی کسی ضرورت کو مانگ لو ! اس نے عرض کی : آپ میرے لئے اللہ تعالیٰ سے جنت کی دعا کر دیں ، راوی کہتے ہیں ۔ نبی اکرم صلی اللہ علیہ وسلم نے اپنا سر اٹھایا سانس لی ، اور پھر ارشاد فرمایا : ٹھیک ہے ، لیکن تم بکثرت سجدوں کے ذریعے میری مدد کرنا ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی ناصح بن عبداللہ تیمی ہے ، اور وہ انتہائی ” ضعیف “ ہے ۔

سیدنا ربیعہ بن کعب رضی اللہ عنہ بیان کرتے ہیں : میں دن کے وقت نبی اکرم صلی اللہ علیہ وسلم کی خدمت کیا کرتا تھا ، رات کے وقت میں نبی اکرم صلی اللہ علیہ وسلم کے دروازے کے پاس آ جاتا ، اور وہاں رات گزار دیتا تھا ، میں آپ کو ”« سبحان الله سبحان الله سبحان الله سبحان ربي » پڑھتے سنتا رہتا ، یہاں تک کہ میں تھک جاتا ( راوی کو شک ہے ، شاید یہ الفاظ ہیں : ) میری آنکھ لگ جاتی ، اور میں سو جاتا ، ایک دن نبی اکرم صلی اللہ علیہ وسلم نے ارشاد فرمایا : اے ربیعہ ! تم مجھ سے مانگو ! میں تمہیں عطا کروں گا ، میں نے عرض کی : آپ مجھے موقع دیجے تاکہ میں غور کر لوں ، میں نے سوچا دنیا تو فنا ہونے والی ہے ، اور الگ ہو جانے والی ہے ، میں نے عرض کی : یا رسول اللہ ! میں آپ سے یہ مانگتا ہوں کہ آپ اللہ تعالیٰ سے یہ دعا کیجئے کہ وہ مجھے جہنم سے نجات عطا کر دے اور مجھے جنت میں داخل کر دے ، تو نبی اکرم صلی اللہ علیہ وسلم خاموش رہے ، پھر آپ صلی اللہ علیہ وسلم نے دریافت کیا : تمہیں کس نے یہ کہا: ہے ؟ میں نے عرض کی : مجھے کسی نے یہ نہیں کہا: ، لیکن مجھے اس بات کا پتہ ہے کہ دنیا الگ ہو جائے گی ، اور فنا ہو جائے گی ، اور آپ کو اللہ تعالیٰ کی بارگاہ میں جو مقام حاصل ہے ، وہ تو ہے ہی ، تو میں نے اس بات کو پسند کیا کہ آپ اللہ تعالیٰ سے دعا کریں ، نبی اکرم صلی اللہ علیہ وسلم نے ارشاد فرمایا : میں ایسا کر دوں گا ، تم بکثرت سجدوں کے ذریعے میری مدد کرنا “ ۔
( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا کچھ حصہ منقول ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن اسحاق ہے وہ ” ثقہ “ ہے ، لیکن تدلیس کرنے والا ہے ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میں وہ پہلا فرد ہوؤں گا ، جسے ( قیامت کے دن ) سر اٹھانے کی اجازت دی جائے گی ، میں اپنا سر اٹھاؤں گا ، اور پھر اپنے دائیں اور بائیں موجود اپنی امت کے افراد کو پہچان لوں گا ، عرض کی گئی : یا رسول اللہ ! آپ انہیں کیسے پہچانیں گے ؟ نبی اکرم صلی اللہ علیہ وسلم نے ارشاد فرمایا : وہ سجدوں کے آثار کی وجہ سے چمکدار پیشانیوں والے ہوں گے ، اور اُن کے بال بچے اُن کا نور ہوں گے ، جو اُن کے آگے موجود ہوں گے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابن لہیعہ ہے ، اس کی نقل کردہ حدیث حسن ہے ، اس روایت کے بقیہ رجال ” ثقہ “ ہیں اس روایت کے مختلف طرق ہیں ، جنہیں امام أحمد نے نقل کیا ہے ، میں نے یہ روایت ” دوبارہ زندہ کیے جانے “ سے متعلق باب میں ذکر کی ہے ۔

سیدنا عبدالله بن مسعود رضی اللہ عنہ فرماتے ہیں : کوئی بھی حالت اللہ تعالیٰ کے نزدیک اس سے زیادہ پسندیدہ نہیں ہے کہ وہ بندے کو ایسی حالت میں پائے کہ اُس نے اپنا چہرہ خاک پر رکھا ہوا ہو ( یعنی سجدہ کیا ہوا ہو ) ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عاصم بن ابونجود ہے ، جس کے بارے میں کلام کیا گیا ہے ۔

سیدنا ابوریحانہ رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، میں نے آپ کی خدمت میں یہ شکایت کی کہ مجھے قرآن یاد نہیں ہوتا ، اسے یاد کرنے میں مشقت پیش آتی ہے ، تو نبی اکرم صلی اللہ علیہ وسلم نے ارشاد فرمایا : تم اپنے اوپر وہ بوجھ نہ لادو ، جس کی تم میں طاقت نہیں ہے ، تم پر سجدے کرنا لازم ہے “ ۔
یہ روایت امام طبرانی نے معجم کبیر میں اپنے استاد ابراہیم بن محمد بن عرق بن حمصی سے نقل کی ہے ، امام ذہبی فرماتے ہیں : یہ غیر معتمد ہے ۔

سیدنا جبیر بن نوفل رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ کسی بھی بندے کی کسی بات کو اتنا پسند نہیں کرتا جتنی فضیلت دو رکعات ، یا اس سے زیادہ ( رکعات ) ادا کرنے کو حاصل ہے ، نیکی بندے کے سر پر چھڑکی جاتی رہتی ہے ، جب تک وہ نماز کی حالت میں رہتا ہے ، اور کوئی بھی بندہ اللہ تعالی کا قرب کسی ایسی چیز کے ذریعے حاصل نہیں کرتا ہے ، جو اس سے زیادہ فضیلت رکھتی ہو ، جو چیز اللہ تعالیٰ کی طرف سے آئی ہے ( راوی بیان کرتے ہیں : ) نبی اکرم صلی اللہ علیہ وسلم کی مراد قرآن تھا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی لیث بن ابوسلیم ہے ، اور اس کے بارے میں کلام کیا گیا ہے ۔

سیدنا سلمہ بن اکوع رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تم لوگ سیدھے رہو ، اور شمار نہ کرو ، اور یہ بات جان لو کہ تمہارے اعمال میں سب سے زیادہ فضیلت نماز کی ہے ، اور نماز کو باقاعدگی کے ساتھ کوئی مؤمن ہی ادا کرے گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی واقدی ہے ، اور وہ ” ضعیف“ ہے ۔

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم لوگ مستقیم رہو ! اور یہ اچھی بات ہے اگر تم مستقیم رہو ، اور تمہارے اعمال میں سب سے بہتر نماز ہے “ ۔
یہ روایت امام طبرانی نے معجم کبیر میں محمد بن عبادہ کے حوالے سے ، اُن کے والد سے نقل کی ہے ، میں نے کسی کو ان کے حالات بیان کرتے ہوئے نہیں پایا ہے ۔

مالک بن قیس بیان کرتے ہیں : سیدنا عقبہ بن عامر رضی اللہ عنہ ، سیدنا معاویہ رضی اللہ عنہ کے پاس تشریف لائے ، جو ایلیاء میں موجود تھے ، تھوڑی دیر کے بعد وہ تشریف لے گئے ، انہیں تلاش کیا گیا ، تو وہ نہیں ملے ( راوی کو شک ہے ، شاید یہ الفاظ ہیں : ) ہم نے انہیں تلاش کیا ، تو ہم نے انہیں نہیں پایا ، پھر ہم ان کے پاس آئے وہ اس وقت ایک کھلی جگہ پر نماز ادا کر رہے تھے ، انہوں نے دریافت کیا : تم لوگ کیوں آئے ہو ؟ لوگوں نے بتایا : ہم اس لئے آئے ہیں تاکہ آپ سے دوبارہ ملیں اور آپ کا جو حق ہے اس کو ادا کریں ( یعنی آپ سے استفادہ کریں ) ، انہوں نے فرمایا : میرے پاس تمہاری ضرورت کی چیز ہے ، ایک مرتبہ ہم لوگ نبی اکرم صلی اللہ علیہ وسلم کے ساتھ سفر کر رہے تھے ، ہم میں سے ہر ایک شخص کے ذمہ اونٹ کی ایک دن کی دیکھ بھال لازم تھی ، جب میرا مخصوص دن آیا ، جس دن میں ، میں نے اونٹ کو چرانا تھا ، تو میں اونٹوں کو چرانے کے لئے لے گیا ، جب میں نبی اکرم صلی اللہ علیہ وسلم کے پاس آیا ، تو نبی اکرم صلی اللہ علیہ وسلم کے اصحاب آپ کے پاس آ جا رہے تھے ، اور آپ بات چیت کر رہے تھے ، میری توجہ اونٹوں سے ہٹ گئی اور نبی اکرم صلی اللہ علیہ وسلم کی طرف مبذول ہو گئی ، جب میں آپ کے پاس آیا تو آپ یہ ارشاد فرما رہے تھے : ” جو شخص وضو کرتے ہوئے اچھی طرح وضو کرے ، پھر دو رکعات نماز ادا کرے اور ان دونوں کے ذریعے وہ اللہ تعالیٰ کی رضا کا ارادہ کرے ، تو اللہ تعالیٰ اس کے پہلے کے گناہوں کی مغفرت کر دے گا “ ۔ میں نے اللہ اکبر کہا: ، تو کسی صاحب نے میرے کندھے پر ہاتھ مارا میں نے مڑ کر دیکھا تو وہ سیدنا ابوبکر رضی اللہ عنہ تھے ، انہوں نے فرمایا : اے عامر کے صاحبزادے ! اس سے پہلے نبی اکرم صلی اللہ علیہ وسلم نے جو بات ارشاد فرمائی تھی وہ زیادہ فضیلت رکھتی ہے ، میں نے دریافت کیا : اس سے پہلے کیا بات تھی ؟ انہوں نے بتایا : نبی اکرم صلی اللہ علیہ وسلم نے ارشاد فرمایا : ” جو شخص اس بات کی گواہی دے کہ اللہ تعالیٰ کے علاوہ اور کوئی معبود نہیں ہے ، اور اس کا دل اس کی زبان کی تصدیق کرے ، وہ شخص جنت کے جس بھی دروازے میں سے چاہے گا ، اندر داخل ہو جائے گا“ ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس صحابی کے حوالے سے ایک حدیث منقول ہے ، جو اس روایت کے علاوہ ہے ۔
یہ روایت امام ابویعلیٰ نے نقل کی ہے ، مالک بن قیس نامی راوی کا ذکر کرتے ہوئے میں نے کسی کو نہیں پایا ہے ، اس روایت کی سند میں ایک راوی عبدالرحمن بن زیاد بن انعم ہے اور اس کے بارے میں بہت زیادہ کلام کیا گیا ہے بعض حضرات نے اسے ” ثقہ “ قرار دیا ہے ۔