مجمع الزوائد ومنبع الفوائد

ابوتمیم جیشانی بیان کرتے ہیں : میں نے سیدنا عمرو بن العاص رضی اللہ عنہ کو یہ بیان کرتے ہوئے سنا : نبی اکرم صلی اللہ علیہ وسلم کے اصحاب میں سے ، ایک صاحب نے مجھے یہ بات بتائی : کہ نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے تمہیں مزید ایک نماز عطا کی ہے ، تو تم اسے عشاء سے لے کر ، صبح کی نماز کے درمیان میں ادا کرو ، وہ وتر ہے ، وتر ہے “ ۔ خبردار ! وہ راوی سیدنا ابوبصرہ غفاری رضی اللہ عنہ تھے ۔ ابوتمیم کہتے ہیں : ایک مرتبہ میں اور سیدنا ابوذر غفاری رضی اللہ عنہ بیٹھے ہوئے تھے ، سیدنا ابوذر غفاری رضی اللہ عنہ نے میرا ہاتھ پکڑا ، پھر ہم چلتے ہوئے سیدنا ابوبصرہ رضی اللہ عنہ کے پاس گئے ، تو ہم نے انہیں اس دروازے کے پاس پایا ، جو سیدنا عمرو رضی اللہ عنہ کے دروازے کے قریب تھا ، سیدنا ابوذر غفاری رضی اللہ عنہ نے کہا: اے ابوبصرہ ! کیا آپ نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالیٰ نے تمہیں مزید ایک نماز عطا کی ہے ، تو تم اسے عشاء سے لے کر ، صبح کی نماز کے درمیان میں ادا کرو ، وہ وتر ہے ، وتر ہے “ ۔ تو سیدنا ابوبصرہ رضی اللہ عنہ نے جواب دیا : جی ہاں ! سیدنا ابوذر غفاری رضی اللہ عنہ نے دریافت کیا : آپ نے خود نبی اکرم صلی اللہ علیہ وسلم کی زبانی یہ بات سنی ہے ؟ انہوں نے جواب دیا : جی ہاں !
یہ روایت امام أحمد نے اور امام طبرانی نے معجم کبیر میں نقل کی ہے ، امام أحمد نے اس کو دو اسناد کے ساتھ نقل کیا ہے ، جن میں سے ایک سند کے رجال ” صحیح “ کے رجال ہیں ، البتہ امام أحمد کے استاد علی بن اسحاق سلمی کا معاملہ مختلف ہے ، ویسے وہ ” ثقہ “ ہیں ۔

عبدالرحمن بن رافع تنوخی ، جو افریقہ کے قاضی ہیں ، وہ بیان کرتے ہیں : سیدنا معاذ بن جبل رضی اللہ عنہ شام تشریف لائے ، اہل شام وتر ادا نہیں کرتے تھے ، سیدنا معاذ رضی اللہ عنہ نے سیدنا معاویہ رضی اللہ عنہ سے کہا: کیا وجہ ہے ؟ میں نے اہل شام کو وتر ادا کرتے ہوئے نہیں دیکھا ، تو سیدنا معاویہ رضی اللہ عنہ نے دریافت کیا : کیا یہ اُن پر واجب ہیں ؟ سیدنا معاذ رضی اللہ عنہ نے جواب دیا : جی ہاں ! میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میرے پروردگار نے مجھے ایک مزید نماز عطا کی ہے ، اور وہ وتر ہیں ، جو عشاء سے لے کر صبح صادق تک کے درمیانی وقت میں ادا کی جائے گی “ ۔
یہ روایت امام أحمد نے نقل کی ہے ، اس کی سند میں ایک راوی عبیداللہ بن زحر ہے اور وہ ضعیف ہے ، اور اس پر تہمت عائد کی ہے سیدنا معاویہ رضی اللہ عنہ سیدنا معاذ رضی اللہ عنہ کی زندگی میں ، امیر نہیں بنے تھے ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ نے تم لوگوں کو ایک مزید نماز عطا کی ہے ، تو تم اسے باقاعدگی سے ادا کرو ، وہ وتر ہیں “ ۔
یہ روایت امام أحمد نے نقل کی ہے ۔

امام أحمد نے ، سیدنا عبداللہ رضی اللہ عنہ کے حوالے سے ، یہ روایت بھی نقل کی ہے : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے میری امت پر شراب ، جوئے ، مزر ( مخصوص قسم کی شراب ، جو گندم ، جو ، یا شہد کے ذریعے بنائی جاتی ہے ، ) قنین ( اس سے مراد ” عود “ یعنی مخصوص قسم کا ساز ہے ) ، کو بہ ( ایک قول کے مطابق اس سے مراد چوسر ہے ، اور ایک قول کے مطابق اس سے مراد ، ڈھول ہے ) کو حرام قرار دیا ہے ، اور مجھے وتر کی نماز مزید عطا کی ہے “ ۔
اس روایت کے دونوں طرق مستند نہیں ہیں ، تاہم پہلی سند میں ایک راوی مثنی بن صباح ہے ، اور وہ ضعیف ہے ، جب کہ دوسری سند میں ایک راوی ابراہیم بن عبدالرحمن بن رافع ہے ، اور وہ مجہول ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص وتر ادا نہیں کرتا ، وہ ہم میں سے نہیں ہے “ ۔
یہ روایت امام أحمد نے نقل کی ہے ، اس کی سند میں ایک راوی خلیل بن مرہ ہے ، جسے امام بخاری رحمہ اللہ اور امام ابوحاتم نے ضعیف قرار دیا ہے ، ابوزرعہ کہتے ہیں : یہ بزرگ اور صالح ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” وتر ، ہر مسلمان پر واجب ہیں “ ۔
یہ روایت امام بزار نے نقل کی ہے ، اس کی سند میں ایک راوی جابر جعفی ہے ، جس کے بارے میں بہت زیادہ کلام کیا گیا ہے سفیان ثوری نے اسے ” ثقہ “ قرار دیا ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم تشریف لائے ، خوشی کے آثار آپ صلی اللہ علیہ وسلم کے چہرے پر نمایاں تھے آپ صلی اللہ علیہ وسلم نے ارشاد فرمایا : بے شک اللہ تعالیٰ نے تمہیں مزید ایک نماز عطا کی ہے ، اور وہ وتر ہے “ ۔
یہ روایت امام بزار نے اور امام طبرانی نے معجم کبیر میں نقل کی ہے ، اس کی سند میں ایک راوی نضر ابوعمر ہے ، اور وہ انتہائی ” ضعیف “ ہے ۔

سیدنا عمرو بن العاص رضی اللہ عنہ اور سیدنا عقبہ بن عامر جہنی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ نے تمہیں مزید ایک نماز عطا کی ہے ، تمہارے لئے سرخ اونٹوں سے زیادہ بہتر ہے ، اور وہ وتر ہے ، وہ عشاء کی نماز سے لے کر صبح صادق تک کے درمیانی وقت میں ادا کی جائے گی“ ۔
یہ روایت امام طبرانی نے جم کبیر اور منجم اوسط میں نقل کی ہے اس کی سند میں ایک راوی سوید بن عبدالعزیز ہے ، اور وہ متروک ہے ۔

سیدنا ابوایوب انصاری رضی اللہ عنہ ” مرفوع “ حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا ہے : ) ” وتر ہر مسلمان پر واجب ہیں ، جو شخص پانچ وتر ادا کرنے کی استطاعت رکھتا ہو ، وہ پانچ وتر ادا کرے ، جو پانچ وتر ادا کرنے کی استطاعت نہیں رکھتا ، وہ تین ادا کر لے ، اور جو شخص تین وتر ادا کرنے کی استطاعت نہیں رکھتا ، وہ ایک وتر ادا کر لے ، اور جو شخص ایک وتر ادا کرنے کی استطاعت نہیں رکھتا ، وہ اشارہ کر لے “ ۔
یہ روایت امام طبرانی نے معجم اوسط اور معجم کبیر میں نقل کی ہے ۔

ان صحابی کے حوالے سے معجم کبیر میں یہ روایت منقول ہے : ” وتر حق ہیں ، جو شخص چاہے ، وہ سات وتر ادا کر لے ۔ ۔ ۔ ۔ ۔ ۔ ۔ ۔ ۔ “ اس کے بعد راوی نے حسب سابق روایت ذکر کی ہے ۔
( علامہ ہیثمی فرماتے ہیں : ) میں یہ کہتا ہوں : اس کی سند میں ایک راوی اشعث بن سوار ہے ، جسے امام أحمد اور ایک جماعت نے ضعیف قرار دیا ہے ، جب کہ یحیی بن معین نے اسے ” ثقہ “ کہا ہے ۔
یہ روایت امام ابوداؤد نے بھی نقل کی ہے ، تاہم انہوں نے یہ الفاظ نقل نہیں کیے ہیں : ” جو شخص ایک وتر ادا کرنے کی استطاعت نہیں رکھتا ، وہ اشارہ کر لے “ ۔ ( علامہ ہیثمی فرماتے ہیں : ) میں یہ کہتا ہوں : امام أحمد کی روایت ، جو وتر کی تعداد کے بارے میں ہے ، وہ آگے آئے گی ، اگر اللہ نے چاہا ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ وتر ہے ، اور وہ وتر کو پسند کرتا ہے “ ۔ نافع بیان کرتے ہیں : سیدنا عبداللہ بن عمر رضی اللہ عنہما وتر کے علاوہ اور کوئی کام نہیں کرتے تھے ۔
یہ روایت امام أحمد نے اور بزار نے نقل کی ہے ، اور اس کے رجال کی توثیق کی گئی ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اہل قرآن پر ، وتر لازم ہیں “ ۔
یہ روایت امام طبرانی نے معجم صغیر میں نقل کی ہے ، اس کی سند میں ایک راوی عمران خیاط ہے ، امام ذہبی کہتے ہیں : یہ معروف نہیں ہے ۔

سیدنا سلیمان بن صرد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مسواک کرو ! پاکیزگی حاصل کرو وتر ادا کرو ، بے شک اللہ تعالی وتر ہے ، اور وتر کو پسند کرتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی اسماعیل بن عمرو بجلی ہے ، جسے امام حاتم ، امام دارقطنی رحمہ اللہ اور ابن عدی نے ضعیف قرار دیا ہے ، ابن حبان نے اسے ” ثقہ “ قرار دیا ہے ، ابراہیم بن اور مہ نے اس کا ذکر کرتے ہوئے اس کی تعریف بیان کی ہے ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص چاشت کی نماز ادا کرے ، اور ہر مہینے میں تین دن روزہ رکھے ، اور سفر اور حضر کے دوران وتر ترک نہ کرے ، اُس شخص کے لئے شہید کا اجر نوٹ کیا جاتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ایوب بن نہیک ہے ، جسے ابوحاتم اور دیگر حضرات نے ضعیف قرار دیا ہے ، ابن حبان نے اسے ” ثقہ “ کہا: ہے ، اور یہ بات بیان کی ہے : کہ یہ غلطی کرتا ہے ۔