مجمع الزوائد ومنبع الفوائد

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جنت میں ایک دروازہ ہے ، جس کا نام ” چاشت “ ہے ، جب قیامت کا دن ہو گا ، تو ایک منادی پکار کر یہ کہے گا : وہ لوگ کہاں ہیں ؟ جو باقاعدگی سے چاشت کی نماز ادا کیا کرتے تھے ، یہ تم لوگوں کا مخصوص دروازہ ہے ، تم اللہ تعالی کی رحمت کے ساتھ ، اس میں داخل ہو جاؤ ! “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سلیمان بن داؤد یمامی ابو أحمد ہے ، اور وہ متروک ہے ۔

ابراہیم نخعی بیان کرتے ہیں : سیدنا عبداللہ رضی اللہ عنہ سے ایسے شخص کے بارے میں دریافت کیا گیا : جو چاشت کی دو رکعات کے وقت اپنا پہلو رکھ دیتا ہے ، تو انہوں نے فرمایا : تم میں سے کسی ایک شخص کا کیا معاملہ ہے ؟ کہ وہ گدھے کی طرح لوٹ پوٹ ہو جاتا ہے ۔
یہ روایت امام طبرانی نے معجم کبیر میں نقل کی ہے ، ابراہیم نامی راوی نے سیدنا عبداللہ رضی اللہ عنہ سے سماع نہیں کیا ہے ۔