مجمع الزوائد ومنبع الفوائد

سیدنا انس بن مالک رضی اللہ عنہ بیان کرتے ہیں : انہوں نے کبھی بھی نبی اکرم صلی اللہ علیہ وسلم کو چاشت کے وقت نماز ادا کرتے ہوئے نہیں دیکھا ، البتہ اگر آپ کسی سفر پر تشریف لے جانے لگتے ، یا سفر سے واپس تشریف لاتے ( تو اُس وقت نماز ادا کر لیتے تھے ) ۔
یہ روایت امام أحمد اور امام ابویعلیٰ نے نقل کی ہے ، تاہم انہوں نے یہ الفاظ نقل کیے ہیں : نبی اکرم صلی اللہ علیہ وسلم چاشت کی نماز ادا نہیں کرتے تھے ، البتہ اگر آپ کسی سفر سے تشریف لاتے ، یا سفر پر تشریف لے جانے لگتے ، تو ایسا کر لیتے تھے ۔ یہ دونوں روایات عبداللہ بن رواحہ نے نقل کی ہیں ، وہ بیان کرتے ہیں : سیدنا انس رضی اللہ عنہ نے مجھے حدیث بیان کی ہے ۔ ( علامہ ہیثمی فرماتے ہیں : ) میں یہ کہتا ہوں : میں نے کسی کو ان کا ذکر کرتے ہوئے نہیں پایا ہے ، اور شریف نے بھی اُن سے غفلت کی ہے ۔

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو صرف ایک مرتبہ چاشت کی نماز ادا کرتے ہوئے دیکھا ہے ۔
یہ روایت امام أحمد اور امام بزار نے نقل کی ہے ، تاہم انہوں نے یہ الفاظ نقل کیے ہیں : ” آپ صلی اللہ علیہ وسلم نے صرف ایک مرتبہ چاشت کی نماز ادا کی تھی “ ۔ اس کے رجال ” ثقہ “ ہیں ۔

ابوعبیدہ بن عبداللہ بن مسعود بیان کرتے ہیں : اُن کے والد ( یعنی سیدنا عبداللہ بن مسعود رضی اللہ عنہ ) چاشت کی نماز ادا نہیں کیا کرتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ، البتہ ابوعبیدہ نامی راوی نے ، اپنے والد ( سیدنا عبداللہ بن مسعود رضی اللہ عنہ ) سے سماع نہیں کیا ہے ۔

سیدنا ابوامامہ بن سہل بن حنیف رضی اللہ عنہ بیان کرتے ہیں : سب سے پہلے جس شخص نے چاشت کی نماز ادا کی تھی ، وہ نبی اکرم صلی اللہ علیہ وسلم کے اصحاب سے تعلق رکھنے والے ایک صاحب ہیں ، جن کی کنیت ” ابوزائد “ تھی ۔
یہ روایت امام طبرانی نے معجم کبیر میں نقل کی ہے ، اس کے رجال کی توثیق کی گئی ہے ، اس کے رجال میں ایک راوی معمر بن بکار ہے ، امام ذہبی کہتے ہیں : یہ کم درجہ کا صالح ہے ، ازدی کہتے ہیں : اس کی حدیث میں وہم پایا جاتا ہے ، ابن حبان نے اس کا ذکر کتاب ” الثقات“ میں کیا ہے ۔

سیدہ عائشہ صدیقہ رضی اللہ عننہا بیان کرتی ہیں : نبی اکرم صلی اللہ علیہ وسلم نے چاشت کی نماز کبھی ادا نہیں کی ، صرف فتح مکہ کے دن ادا کی تھی ۔
یہ روایت امام بزار نے نقل کی ہے ، اور اس کے رجال کی توثیق کی گئی ہے ، اس کے رجال کے بارے میں ایسا کلام کیا گیا ہے ، جو ضرر کا باعث نہیں ہے ۔

سیدنا علی بن ابوطالب رضی اللہ عنہ بیان کرتے ہیں : نبی اکرم صلی اللہ علیہ وسلم چاشت کی نماز ادا کیا کرتے تھے ۔
یہ روایت امام أحمد اور امام ابویعلیٰ نے نقل کی ہے ، تاہم انہوں نے یہ الفاظ نقل کیے ہیں : ” آپ صلی اللہ علیہ وسلم چاشت کی نماز ادا کیا کرتے تھے “ ۔ امام أحمد کے رجال ” ثقہ “ ہیں ۔

سیدنا عبداللہ بن عمرو بن العاص رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک جنگی مہم روانہ کی ، انہیں مال غنیمت حاصل ہوا ، اور وہ لوگ جلدی واپس آ گئے ، تو لوگوں نے اس بارے میں بات چیت کی کہ ان کی جنگ کی جگہ قریب تھی ، مال غنیمت زیادہ حاصل ہوا ، اور یہ لوگ جلدی بھی واپس آ گئے ، نبی اکرم صلی اللہ علیہ وسلم نے ارشاد فرمایا : ” کیا میں تمہاری رہنمائی اُس چیز کی طرف نہ کروں کہ جس میں زیادہ دور بھی نہیں جانا پڑتا ، غنیمت بھی زیادہ حاصل ہوتی ہے ، اور واپسی بھی جلدی ہو جاتی ہے ، جو شخص وضو کرنے کے بعد مسجد کی طرف جائے ، تاکہ چاشت کی نماز ادا کرے ، تو ایسے شخص کو زیادہ دور بھی نہیں جانا پڑتا ، غنیمت بھی زیادہ حاصل ہوتی ہے ، اور واپسی بھی جلدی ہو جاتی ہے “ ۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ، امام طبرانی کے رجال ” ثقہ “ ہیں ، البتہ انہوں نے ابن لہیعہ کی جگہ ، ابن وہب کا ذکر کیا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک مہم روانہ کی ، انہیں بہت سارا مال غنیمت حاصل ہوا ، اور وہ جلدی واپس بھی آ گئے ، تو ایک صاحب نے عرض کی : یا رسول اللہ ! ہم نے ایسی کوئی مہم نہیں دیکھی ، جو اتنی جلدی واپس آ گئی ہو ، جسے ان لوگوں سے زیادہ غنیمت حاصل ہوئی ہو ، نبی اکرم صلی اللہ علیہ وسلم نے ارشاد فرمایا : ” کیا میں تمہیں اس سے زیادہ جلدی واپسی والی ، اور اس سے زیادہ غنیمت والی چیز کے بارے میں نہ بتاؤں ؟ وہ شخص جو اپنے گھر میں وضو کرے اور اچھی طرح وضو کرے ، پھر وہ مسجد کی طرف جائے اور اس میں صبح کی نماز ادا کرے ’ پھر اُس کے بعد چاشت کی نماز ادا کرے ، تو وہ جلدی واپس آ جاتا ہے ، اور زیادہ غنیمت حاصل کرتا ہے “ ۔
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔

سیدنا عائذ بن عمرو رضی اللہ عنہ بیان کرتے ہیں : پانی تھوڑا تھا ، نبی اکرم صلی اللہ علیہ وسلم نے وضو کیا ، تو وہ پانی آپ نے ہمیں دے دیا ، راوی کہتے ہیں : ہم میں سے خوش نصیب وہ تھا ، جسے وہ پانی مل گیا ، اور اس ( پانی ) کے بارے میں ہمارا یہ خیال ہے کہ وہ تمام لوگوں کو مل گیا تھا ، راوی بیان کرتے ہیں : اُس کے بعد نبی اکرم صلی اللہ علیہ وسلم نے ہمیں چاشت کے وقت نماز پڑھائی ۔
یہ روایت امام أحمد نے اور امام طبرانی نے معجم کبیر میں نقل کی ہے ، تاہم انہوں نے یہ الفاظ نقل کیے ہیں : نبی اکرم صلی اللہ علیہ وسلم کے پاس ایک پیالہ ، یا ایک برتن لایا گیا ، جس میں تھوڑا پانی تھا ، نبی اکرم صلی اللہ علیہ وسلم نے وضو کیا ، پھر آپ صلی اللہ علیہ وسلم کے حکم کے تحت وہ لوگوں پر چھڑک دیا گیا ( چھڑکنے کے لئے لفظ کے بارے میں راوی کو شک ہے ) ۔ اس روایت کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا عتبان بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے اپنے گھر میں چاشت کے نوافل ادا کیے تھے ۔
( علامہ ہیثمی فرماتے ہیں : ) میں یہ کہتا ہوں : سیدنا عتبان رضی اللہ عنہ کے حوالے سے ” صحیح “ میں ایک حدیث منقول ہے ، جو اس حدیث کے علاوہ ہے ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔

سیدنا عقبہ بن عامر جہنی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ یہ فرماتا ہے : اے ابن آدم ! تم دن کے ابتدائی حصے میں چار رکعات میرے لئے ادا کر لو ، میں دن کے آخری حصے تک ، اس کی وجہ سے تمہاری کفایت کروں گا“ ۔
یہ روایت امام أحمد نے امام ابویعلیٰ نے نقل کی ہے ، اور اس کے رجال ” ثقہ “ ہیں ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اللہ تعالیٰ یہ فرماتا ہے : اے ابن آدم ! تم دن کے ابتدائی حصے میں چار رکعات سے عاجز نہ رہنا ، ( یعنی انہیں ادا کر لینا ) میں اُس ( دن ) کے آخری حصے تک تمہاری کفایت کروں گا “ ۔
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔

سیدنا ابومرہ طائفی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اللہ تعالیٰ فرماتا ہے : اے ابن آدم ! تم دن کے ابتدائی حصے میں ، میری خاطر چار رکعات ادا کرو میں اُس ( دن ) کے آخری حصے تک تمہاری کفایت کروں گا “ ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ فرماتا ہے : اے ابن آدم ! تم میری خاطر دن کے ابتدائی حصے میں دو رکعات ادا کرو ، میں اُس ( دن ) کے آخری حصے تک تمہیں ضمانت دیتا ہوں“ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی لیث بن ابوسلیم ہے ، اور وہ تدلیس کرنے والا ہے ۔

سیدنا نواس بن سمعان رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اللہ تعالیٰ فرماتا ہے : اے ابن آدم ! تم دن کے ابتدائی حصے میں چار رکعات ادا کرنے سے عاجز نہ رہ جانا ، میں اُس ( دن ) کے آخری حصے تک تمہاری کفایت کروں گا“ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ“ ہیں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ یہ فرماتا ہے : اے ابن آدم ! تم دن کے ابتدائی حصے میں ، میری خاطر چار رکعات ادا کر لینا ، میں اُس ( دن ) کے آخری حصے تک تمہاری کفایت کروں گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی سلمان بن سلمہ خبائری ہے ، اور وہ متروک ہے ۔

سیدنا سعد بن ابی وقاص رضی اللہ عنہ بیان کرتے ہیں : نبی اکرم صلی اللہ علیہ وسلم نے فتح مکہ کے دن ، مکہ میں آٹھ رکعات ادا کی تھیں ، جن میں آپ صلی اللہ علیہ وسلم نے طویل قرأت اور طویل رکوع کیا تھا ۔
یہ روایت امام بزار نے نقل کی ہے ، اس کی سند میں ایک راوی عبداللہ بن شعیب ہے ، اور وہ ” ضعیف“ ہے ۔

سیدنا عقبہ بن عامر رضی اللہ عنہ بیان کرتے ہیں : غزوہ تبوک کے موقع پر ، ایک دن وہ نبی اکرم صلی اللہ علیہ وسلم کے ساتھ نکلے ، نبی اکرم صلی اللہ علیہ وسلم بیٹھے ہوئے اپنے ساتھیوں کے ساتھ بات چیت کر رہے تھے ، آپ صلی اللہ علیہ وسلم نے ارشاد فرمایا : ” جو شخص اُس وقت کھڑا ہو ، جب سورج اُس کے سامنے آ چکا ہو ، اور وہ اچھی طرح وضو کرے ، پھر کھڑا ہو کر نماز ادا کرے ، تو اس کے گناہوں کی ( اللہ تعالیٰ ) مغفرت کر دیتا ہے ، اور وہ شخص یوں ہو جاتا ہے ، جیسے اُس دن تھا ، جب اُس کی والدہ نے اُسے جنم دیا تھا “ ۔
یہ روایت امام ابویعلیٰ نے نقل کی ہے ، اور اس کی سند میں ایک راوی ایسا ہے ، جس سے میں واقف نہیں ہوں ۔

سیدنا انس بن مالک رضی اللہ عنہ بیان کرتے ہیں : میں نے ایک سفر کے دوران نبی اکرم صلی اللہ علیہ وسلم کو دیکھا ، آپ صلی اللہ علیہ وسلم نے چاشت کے وقت آٹھ رکعات ادا کیں ، جب آپ صلی اللہ علیہ وسلم نے نماز مکمل کی ، تو آپ صلی اللہ علیہ وسلم نے ارشاد فرمایا : ” میں نے ایک ایسی نماز ادا کی ہے ، جس میں رغبت بھی پائی جاتی ہے ، اور اس میں ڈرنے کا پہلو بھی ہے ، میں نے اپنے پروردگار سے تین چیزیں مانگی تھیں ، تو اُس نے دو چیزیں مجھے عطا کر دیں ، اور ایک چیز مجھے عطا نہیں کی ، میں نے اُس سے یہ مانگا تھا ( اُس کے بعد اصل متن میں کچھ الفاظ نہیں ہیں : ) اور یہ کہ وہ میری امت کو قحط سالی میں مبتلاء نہیں کرے گا ، اور اُس کے دشمن کو ان پر غالب نہیں کرے گا ، تو اس نے ایسا ہی کیا ، اور میں نے اس سے یہ دعا کی : کہ وہ اُن کو مختلف گروہوں میں تقسیم نہیں کرے گا ، تو اُس نے میری یہ بات نہیں مانی “ ۔
( علامہ ہیثمی فرماتے ہیں : ) میں یہ کہتا ہوں : سیدنا انس رضی اللہ عنہ کے حوالے سے منقول حدیث امام ترمذی نے بھی نقل کی ہے ، لیکن وہ اس حدیث کے علاوہ ہے ،
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔

سیدنا عبداللہ بن عمر رضی اللہ عنہما فرماتے ہیں : میں نے سیدنا ابوذر غفاری رضی اللہ عنہ سے کہا: اے چچا جان ! آپ مجھے کوئی وصیت کیجیے ! انہوں نے فرمایا : تم نے مجھ سے اُس چیز کے بارے میں دریافت کیا ہے ، جس کے بارے میں ، میں نے نبی اکرم صلی اللہ علیہ وسلم سے سوال کیا تھا ، تو آپ نے ارشاد فرمایا : ” اگر تم چاشت کے وقت دو رکعات ادا کر لو ، تو تمہارا نام ” غافلین “ میں نوٹ نہیں کیا جائے گا ، اور اگر تم چار رکعات ادا کر لو ، تو تمہارا نام عبادت گزاروں میں نوٹ کیا جائے گا ، اور اگر تم چھ رکعات ادا کر لو ، تو تمہیں کوئی گناہ لاحق نہیں ہو گا ، اگر تم آٹھ رکعات ادا کر لو ، تو تمہارا شمار ” قانتین “ میں کیا جائے گا ، اگر تم بارہ رکعت ادا کر لو ، تو تمہارے لئے جنت میں گھر بنا دیا جائے گا ، رات اور دن کی ہر ایک گھڑی میں ، اللہ تعالیٰ صدقہ کرتا ہے ، جس کے ذریعے وہ اپنے بندوں میں سے جس پر چاہتا ہے احسان کرتا ہے ، اور اللہ تعالیٰ اپنے بندے پر کوئی ایسا احسان نہیں کرتا ، جو اس چیز کی مانند ہو کہ اللہ تعالی نے اس کو اپنے ذکر کی توفیق نصیب کی ہو “ ۔
یہ روایت امام بزار نے نقل کی ہے اس کی سند میں ایک راوی حسین بن عطاء ہے ، جسے ابوحاتم اور دیگر حضرات نے ضعیف قرار دیا ہے ، ابن حبان نے اس کا تذکرہ کتاب ” الثقات “ میں کیا ہے ، وہ فرماتے ہیں : یہ غلطی کرتا ہے ، اور تدلیس کرتا ہے ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص چاشت کے وقت دو رکعات ادا کرتا ہے ، اس کا شمار ” غافلین “ میں کیا جاتا ہے ، جو شخص چار رکعات ادا کرتا ہے ، اس کا شمار عبادت گزاروں میں کیا جاتا ہے ، جو شخص چھ رکعات ادا کرتا ہے ، اس دن میں اس کی کفایت ہو جاتی ہے ، جو شخص آٹھ رکعات ادا کرتا ہے ، اللہ تعالیٰ اس کا نام ” قانتین “ میں نوٹ کر لیتا ہے ، جو شخص بارہ رکعات ادا کرتا ہے ، اللہ تعالیٰ اس کے لئے جنت میں گھر بنا دیتا ہے ، اور رات اور دن میں ، ہر وقت اللہ تعالیٰ اپنے بندوں پر احسان کرتا ہے ، اور صدقہ کرتا ہے ، اور اللہ تعالیٰ اپنے بندوں میں سے کسی ایک پر کوئی ایسا فضل نہیں کرتا ، جو اس سے زیادہ فضیلت رکھتا ہو کہ اللہ تعالیٰ اُسے اپنے ذکر کی توفیق نصیب کر دے “ ۔
یہ روایت امام طبرانی نے معجم کبیر میں نقل کی ہے ، اور اس کی سند میں ایک راوی موسیٰ بن یعقوب زمعی ہے ، جسے یحیی بن معین اور ابن حبان نے ” ثقہ “ قرار دیا ہے ، علی بن مدینی اور دیگر حضرات نے اُسے ضعیف قرار دیا ہے ، اس روایت کے بقیہ رجال ” ثقہ “ ہیں ۔

سیدنا عبداللہ بن عباس رضی اللہ عنہما ، نبی اکرم صلی اللہ علیہ وسلم تک ” مرفوع “ حدیث کے طور پر ، یہ بات نقل کرتے ہیں : آپ صلی اللہ علیہ وسلم نے ارشاد فرمایا ہے : ” انسان کے ہر ایک جوڑ پر ، روزانہ صدقہ دینا لازم ہے ، اور اُن سب کے حوالے سے ، چاشت کی دو رکعات کفایت کر جاتی ہیں “ ۔
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں ایک راوی ایسا ہے ، جس کے حالات میں نے نہیں پائے ہیں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب سورج اپنے طلوع ہونے کے مقام سے اتنا طلوع ہو جاتا ہے ، جس طرح وہ عصر کی نماز کے وقت ، مغرب کی طرف ہوتا ہے ، اس وقت اگر کوئی شخص دو رکعات ادا کر لے اور چار سجدے کر لے ، تو اسے اس دن کا اجر مل جاتا ہے ، راوی کہتے ہیں : میرا خیال ہے ، روایت میں یہ الفاظ بھی ہیں : کہ اُس کی خطائیں اور اس کے گناہ اس سے دور ہو جاتے ہیں ، راوی کہتے ہیں : میرا خیال ہے آپ نے یہ بھی ارشاد فرمایا تھا : اگر وہ اس دن میں انتقال کر جائے ، تو جنت میں داخل ہو گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی میمون بن زید ہے ، امام ذہبی فرماتے ہیں : امام ابوحاتم نے اسے کمزور قرار دیا ہے ۔ ابن حبان نے اس کا تذکرہ کتاب ” الثقات “ میں کیا ہے وہ فرماتے ہیں : یہ غلطی کرتا ہے ، اس روایت کے بقیہ رجال کی توثیق کی گئی ہے ، تاہم ان میں ایک راوی لیث بن ابوسلیم ہے ، اور اس کے بارے میں کلام کیا گیا ہے ۔

سیدنا انس بن مالک رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو چاشت کی نماز میں چھ رکعات ادا کرتے ہوئے دیکھا ہے ، اس کے بعد میں نے کبھی ان رکعات کو ترک نہیں کیا ہے ۔ حسن بصری بیان کرتے ہیں : اس کے بعد میں نے بھی کبھی انہیں ترک نہیں کیا ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی مسلمہ اُموی ہے ، جسے امام بخاری رحمہ اللہ ، یحیی بن معین اور ایک جماعت نے ضعیف قرار دیا ہے ، جب کہ ابن حبان نے اس کا تذکرہ کتاب ” الثقات “ میں کیا ہے ، وہ فرماتے ہیں : یہ غلطی کر جاتا ہے ۔

سیدنا جابر بن عبدالله رضی اللہ عنہما بیان کرتے ہیں : میں نبی اکرم صلی اللہ علیہ وسلم کے ساتھ سفر کر رہا تھا ، آپ صلی اللہ علیہ وسلم نے مجھے اونٹ سواری کے لئے دیا ، آپ صلی اللہ علیہ وسلم کا گزر میرے پاس سے ہوا ، تو میں لوگوں میں سب سے پیچھے تھا اور اسے مار کر چلا رہا تھا ، نبی اکرم صلی اللہ علیہ وسلم نے اُسے اپنی چھڑی ماری ، تو وہ لوگوں سے آگے نکلنے لگا ، یہاں تک کہ جب ہم مکہ آ گئے ، تو میں نبی اکرم صلی اللہ علیہ وسلم کی خدمت میں حاضر ہوا ، میں وہ ( اونٹ ) آپ کو واپس کرنا چاہتا تھا ، تو میں نے نبی اکرم صلی اللہ علیہ وسلم کو پایا کہ آپ صلی اللہ علیہ وسلم نے اُس وقت چھ رکعات ادا کی تھیں ۔

ایک روایت میں یہ الفاظ ہیں : میں نبی اکرم صلی اللہ علیہ وسلم کی خدمت میں حاضر ہوا ، تاکہ آپ کے سامنے اپنا اونٹ پیش کروں ، تو میں نے آپ صلی اللہ علیہ وسلم کو دیکھا کہ آپ صلی اللہ علیہ وسلم نے چاشت کے وقت چھ رکعات ادا کی تھیں ۔
یہ دونوں روایات امام طبرانی نے معجم اوسط میں ، محمد بن قیس کے حوالے سے ، سیدنا جابر رضی اللہ عنہ سے منقول حدیث کے طور پر نقل کی ہے ۔ ابن حبان نے اس راوی کا ( یعنی محمد بن قیس کا ) تذکرہ کتاب ” الثقات “ میں کیا ہے ۔

سیدنا ابوموسیٰ اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص چاشت کے وقت چار رکعات ادا کرے ، اور ظہر سے پہلے چار رکعات ادا کرے ، اس کے لئے جنت میں گھر بنا دیا جاتا ہے “ ۔
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک جماعت ایسی ہے ، جو معروف نہیں ہے ۔

سیدنا جبیر بن مطعم رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو چاشت کی نماز ادا کرتے ہوئے دیکھا ہے ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا عبداللہ بن ابواوفی رضی اللہ عنہ کے بارے میں یہ بات منقول ہے : انہوں نے چاشت کے وقت دو رکعات ادا کیں ، تو ان کی اہلیہ نے اُن سے کہا: آپ نے دو رکعات ادا کی ہیں ؟ تو انہوں نے یہ بتایا : کہ نبی اکرم صلی اللہ علیہ وسلم کو جب فتح کی خوشخبری دی گئی تھی ، تو آپ صلی اللہ علیہ وسلم نے اس نماز میں دو رکعات ادا کی تھیں ، اور جب آپ کو ابوجہل کے سر کی خوشخبری دی گئی تھی ( تو اُس وقت بھی دو رکعات ادا کی تھیں ) ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے ، اس صحابی کے حوالے سے صرف
یہ روایت نقل کی ہے : کہ ” جب نبی اکرم صلی اللہ علیہ وسلم کو ابوجہل کے سر کی خوشخبری دی گئی ، تو آپ نے نماز ادا کی تھی “ ۔
یہ روایت امام بزار نے اور امام طبرانی نے معجم کبیر میں ، اس کا کچھ حصہ نقل کیا ہے ، اس کی سند میں ایک راوی شعشاء ہے ، میں نے کسی کو اس کی توثیق کرتے ہوئے نہیں پایا ہے ، اور نہ ہی اُس پر جرح کرتے ہوئے پایا ہے ۔

سیدہ ام ہانی رضی اللہ عنہا بیان کرتی ہیں : فتح مکہ کے دن ، نبی اکرم صلی اللہ علیہ وسلم نے پانی منگوایا ، سیدہ ام ہانی رضی اللہ عنہا اور سیدنا انس بن مالک رضی اللہ عنہ کی والدہ سیدہ ام سلیم رضی اللہ عنہا نے ایک لحاف کے ذریعے پردہ تان لیا ، پھر نبی اکرم صلی اللہ علیہ وسلم سیدہ ام ہانی رضی اللہ عنہا کے گھر داخل ہوئے اور آپ صلی اللہ علیہ وسلم نے چاشت کے وقت چار رکعات ادا کیں ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال ” ثقہ “ ہیں ، سیدہ ام ہانی رضی اللہ عنہا کے حوالے سے ” صحیح “ میں ایک حدیث مذکور ہے ، جو اس حدیث کے علاوہ ہے ۔

اُنہى کے حوالے سے یہ بات منقول ہے : فتح مکہ کے دن ، نبی اکرم صلی اللہ علیہ وسلم ان کے ہاں تشریف لائے ، اور آپ صلی اللہ علیہ وسلم نے چاشت کے وقت چھ رکعات ادا کیں ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کی سند حسن ہے ، سیدہ ام ہانی رضی اللہ عنہا کے حوالے سے ” صحیح “ میں ایک حدیث مذکور ہے ، جس میں یہ ذکر ہے : کہ نبی اکرم صلی اللہ علیہ وسلم نے آٹھ رکعات ادا کی تھیں ۔

سیدنا عبداللہ بن عباس رضی اللہ عنہما بیان کرتے ہیں : پہلے میں یہ آیت « بالعشي والا شراق » تلاوت کیا کرتا تھا ، لیکن مجھے یہ پتہ نہیں چلتا تھا کہ اس سے مراد کیا ہے ؟ یہاں تک کہ سیدہ اُم ہانی بنت ابوطالب رضی اللہ عنہا نے مجھے یہ حدیث بیان کی : کہ نبی اکرم صلی اللہ علیہ وسلم ان کے ہاں تشریف لائے ، آپ صلی اللہ علیہ وسلم نے ایک برتن میں وضو کا پانی منگوایا ، جس میں مجھے آٹے کا نشان نظر آ رہا تھا ، نبی اکر صلی اللہ علیہ وسلم نے وضو کیا ، پھر آپ نے چاشت کے وقت نماز ادا کی ، پھر آپ صلی اللہ علیہ وسلم نے ارشاد فرمایا : اے اُم ہانی ! یہ نماز اشراق ہے ۔
( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح“ میں اس سیاق کے بغیر مذکور ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی حجاج بن نصیر ہے ، جسے علی بن مدینی اور ایک جماعت نے ضعیف قرار دیا ہے ، جب کہ یحیی بن معین اور ابن حبان نے اسے ” ثقہ“ قرار دیا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم سفر کے دوران ، یا اس کے علاوہ چاشت کی نماز ترک نہیں کرتے تھے ۔
یہ روایت امام بزار نے نقل کی ہے ، اور اس کی سند میں ایک راوی یوسف بن خالد سمتی ہے ، اور وہ ” ضعیف“ ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” چاشت کی نماز باقاعدگی سے صرف ” اوّاب “ ( یعنی توبہ کے ہمراہ اللہ تعالیٰ کی طرف بکثرت رجوع کرنے والا شخص ، اور ایک قول کے مطابق اس سے مراد ” مطیع “ شخص ہے ) ہی ادا کرے گا“ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن عمرو ہے ، جس کے بارے میں کلام کیا گیا ہے ، اس کی سند میں ایک راوی ایسا بھی ہے ، جس سے میں واقف نہیں ہوں ۔