مجمع الزوائد ومنبع الفوائد

قبیصہ بن ذؤیب بیان کرتے ہیں : سیدہ عائشہ رضی اللہ عنہا نے سیدنا زبیر رضی اللہ عنہ کے گھرانے کے افراد کو یہ بات بتائی تھی کہ نبی اکرم صلی اللہ علیہ وسلم نے عصر کے بعد سیدہ عائشہ رضی اللہ عنہا کے گھر میں دو رکعات ادا کی تھیں ، تو وہ لوگ اُن دو رکعات کو ادا کرتے تھے ۔
قبیصہ نامی راوی بیان کرتے ہیں : تو سیدنا زید بن ثابت رضی اللہ عنہ نے فرمایا : اللہ تعالی سیدہ عائشہ رضی اللہ عنہا کی مغفرت کرے !
ہم نبی اکرم صلی اللہ علیہ وسلم کے بارے میں سیدہ عائشہ رضی اللہ عنہا سے زیادہ بہتر جانتے تھے ، اصل میں ہوا یہ تھا کہ کچھ دیہاتی لوگ نبی اکرم صلی اللہ علیہ وسلم کی خدمت میں دوپہر کے وقت حاضر ہوئے ، وہ بیٹھ کر آپ صلی اللہ علیہ وسلم سے سوالات کرتے رہے ، اور آپ انہیں شرعی احکام بیان کرتے رہے ، یہاں تک کہ آپ نے ظہر کی نماز ادا کر لی اور اس کے بعد کی سنتیں ادا نہیں کیں ، پھر آپ صلی اللہ علیہ وسلم بیٹھ کر ان لوگوں کو مسائل بیان کرتے رہے ، یہاں تک کہ عصر کی نماز کا وقت ہو گیا ، پھر آپ اپنے گھر تشریف لے گئے ، آپ کو یہ بات یاد آئی کہ آپ صلی اللہ علیہ وسلم نے ظہر کے بعد سنتیں ادا نہیں کی تھیں ، تو آپ نے وہ دو رکعات عصر کے بعد ادا کر لیں تھیں ، ہم نبی اکرم صلی اللہ علیہ وسلم کے بارے میں سیدہ عائشہ رضی اللہ عنہا سے زیادہ بہتر جانتے ہیں ، نبی اکرم صلی اللہ علیہ وسلم نے عصر کے بعد نماز ادا کرنے سے منع کیا ہے ۔
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ، امام طبرانی نے اس روایت کا آخری حصہ معجم کبیر میں نقل کیا ہے ۔

سیدنا زید بن ثابت رضی اللہ عنہ بیان کرتے ہیں : نبی اکرم صلی اللہ علیہ وسلم نے اُس وقت نماز ادا کرنے سے منع کیا ہے ، جب سورج کا کنارہ طلوع ہوتا ہے ، یا جب اس کا کنارہ غروب ہوتا ہے ، کیونکہ وہ ( یعنی سورج ) شیطان کے دو سینگوں کے درمیان طلوع ہوتا ہے ( یہاں ایک لفظ کے بارے میں راوی کو شک ہے ) “ ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا صفوان بن معطل رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم سے سوال کیا ، اور عرض کی : یا رسول اللہ ! میں آپ سے اس چیز کے بارے میں سوال کرنا چاہتا ہوں ، جس سے آپ واقف ہیں اور میں اُس سے ناواقف ہوں ، رات کی اور دن کی کون سی گھڑیاں ایسی ہیں ، جن میں نماز ادا کرنے کو آپ مکروہ قرار دیتے ہیں ؟ نبی اکرم صلی اللہ علیہ وسلم نے ارشاد فرمایا : ” جب تم صبح کی نماز ادا کر لو ، تو تم نماز ادا کرنے سے رک جاؤ ، یہاں تک کہ سورج طلوع ہو جائے ، جب وہ طلوع ہو جائے تو پھر تم نماز ادا کرو ، کیونکہ نماز میں حاضری ہوتی ہے ، اور وہ قبول ہوتی ہے ، ایسا اس وقت تک کر سکتے ہو ، جب تک ( سورج ) تمہارے سر پر نیزے کی مانند برابر نہیں ہو جاتا ( یعنی عین دوپہر کا وقت نہیں ہو جاتا ) جب وہ بالکل تمہارے سر پر آ جائے ، تو یہ وہ گھڑی ہے ، جس میں جہنم کو بھڑکایا جاتا ہے ، اور اس میں جہنم کے دروازے کھول دیے جاتے ہیں ، ایسا اُس وقت تک ہو گا ، جب تک وہ ( سورج ) ڈھل نہیں جاتا ، جب وہ ڈھل جائے تو تم نماز ادا کر سکتے ہو ، کیونکہ نماز میں حاضری ہوتی ہے ، اور وہ قبول ہوتی ہے ، اور تم نماز اس وقت تک ادا کر سکتے ہو ، جب تک تم عصر کی نماز ادا نہیں کر لیتے “ ۔
یہ روایت عبداللہ نے مسند أحمد کی ” زیادات “ میں نقل کی ہے ، اس کے رجال ” صحیح “ کے رجال ہیں ، البتہ مجھے نہیں معلوم کہ سعید مقبری نے ان سے سماع کیا ہے ، یا نہیں کیا ہے ؟ باقی اللہ بہتر جانتا ہے ۔ امام ابن ماجہ نے
یہ روایت سعید مقبری کے حوالے سے سیدنا ابوہریرہ رضی اللہ عنہ سے نقل کی ہے : ( وہ بیان کرتے ہیں : ) سیدنا صفوان بن معطل رضی اللہ عنہ نے عرض کی : یا رسول الله ! ۔

سیدنا سعد بن ابی وقاص رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” دو نمازیں ہیں ، جن کے بعد کوئی نماز ادا نہیں کی جائے گی ، صبح کی نماز ، جب تک سورج نکل نہیں آتا ، اور عصر کی نماز ، جب تک سورج غروب نہیں ہو جاتا “ ۔
یہ روایت امام أحمد نے اور امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔

سیدنا مرہ بن کعب رضی اللہ عنہ یا شاید سیدنا کعب بن مرہ سلمی رضی اللہ عنہ بیان کرتے ہیں : یہاں شعبہ نامی راوی نے یہ بات بیان کی ہے : کہ منصور نے ، سالم کے حوالے سے ، مرہ کے حوالے سے ، یا شاید کعب کے حوالے سے یہ بات نقل کی ہے : وہ بیان کرتے ہیں : میں نے نبی اکرم صلی اللہ علیہ وسلم سے دریافت کیا : رات کے کون سے حصے میں ( دعا ) زیادہ سنی جاتی ہے ؟ نبی اکرم صلی اللہ علیہ وسلم نے ارشاد فرمایا : آخری نصف حصہ ، پھر آپ صلی اللہ علیہ وسلم نے ارشاد فرمایا : ” نماز مقبول ہوتی ہے ، یہاں تک کہ صبح صادق ہو جائے ، پھر ( فجر کے فرضوں اور سنتوں کے علاوہ ) کوئی نماز ادا نہیں کی جائے گی ، جب تک سورج طلوع نہیں ہو جاتا ، اور جب تک وہ ایک یا دو نیزے جتنا بلند نہیں ہو جاتا ، پھر نماز مقبول ہو گی ، یہاں تک کہ سایہ نیزے کی جگہ پر کھڑا ہو جائے ، پھر اُس وقت تک کوئی نماز ادا نہیں کی جائے گی ، جب تک سورج ڈھل نہیں جاتا ، پھر نماز مقبول ہو گی یہاں تک کہ عصر کی نماز ادا کر لی جائے ، پھر کوئی نماز ادا نہیں کی جائے گی ، جب تک سورج غروب نہیں ہو جاتا “ ۔ ۔ ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔
یہ روایت امام أحمد نے دو حوالوں سے نقل کی ہے ، جن میں سے ایک یہ ہے ، اور دوسری سند سالم کے حوالے سے ، ایک شخص کے حوالے سے کعب بن مرہ بہزی سے منقول ہے ، جو کسی شک کے بغیر ہے ، وہ بیان کرتے ہیں : ” یہاں تک کہ صبح کی نماز ادا کر لی جائے “ ۔ یہ ان الفاظ کی جگہ ہے : ” یہاں تک کہ صبح ( صادق ) طلوع ہو جائے “ ۔
یہ روایت امام طبرانی نے معجم کبیر میں اسی طرح نقل کی ہے ، اور اس کے رجال ” صحیح “ کے رجال ہیں ، البتہ دوسری سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” سورج طلوع ہونے کے وقت نماز ادا نہ کرو ، کیونکہ وہ شیطان کے دو سینگوں کے درمیان طلوع ہوتا ہے ، اور ہر کافر اس کے لئے سجدہ کرتا ہے ، اور اُس کے غروب ہونے کے وقت بھی نماز ادا نہ کرو ، کیونکہ وہ شیطان کے دو سینگوں کے درمیان غروب ہوتا ہے ، اور ہر کافر اس کے لئے سجدہ کرتا ہے ، اور نصف النہار کے وقت بھی نماز ادا نہ کرو ، کیونکہ یہ جہنم کے بھڑکائے جانے کا وقت ہے “ ۔
یہ روایت امام أحمد نے اور امام طبرانی نے معجم کبیر میں اس کی مانند نقل کی ہے ، اور اس کی سند میں ایک راوی لیث بن ابوسلیم ہے ، جس کے بارے میں بہت زیادہ کلام کیا گیا ہے ،
یہ روایت امام طبرانی نے معجم کبیر میں سیدنا ابوامامہ رضی اللہ عنہ کے حوالے سے ، یا سیدنا ابوامامہ رضی اللہ عنہ کے بھائی کے حوالے سے نبی اکرم صلی اللہ علیہ وسلم سے اس کی مانند نقل کی ہے ، انہوں نے اس روایت کو ابوسابط کے حوالے سے نقل کیا ہے ۔ ” پھر سیدنا ابوامامہ رضی اللہ عنہ نے نبی اکرم صلی اللہ علیہ وسلم سے سوال کیا : کون سے وقت میں نماز ادا کرنا مکروہ ہے ؟ تو نبی اکرم صلی اللہ علیہ وسلم نے ارشاد فرمایا : صبح صادق ہو جانے کے بعد سے لے کر سورج کے ایک یا دو نیزوں جتنا بلند ہونے تک ، اور اُس وقت جب سورج زرد ہو چکا ہو ، اُس کے وقت سے لے کر ، اُس کے غروب ہونے تک “ ۔
اس روایت کے رجال ” ثقہ “ ہیں ، تاہم یہ روایت ” مرسل “ ہے ۔

سیدنا سمرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم لوگ اس وقت نماز ادا نہ کرو ، جب سورج طلوع ہوتا ہے ، اور نہ ہی اس وقت ادا کرو ، جب وہ غروب ہوتا ہے ، کیونکہ وہ شیطان کے دو سینگوں کے درمیان طلوع ہوتا ہے ، اور شیطان کے دو سینگوں کے درمیان غروب ہوتا ہے “ ۔
یہ روایت امام أحمد ، امام بزار ، امام طبرانی نے معجم کبیر میں نقل کی ہے ، یہ مختلف طرق کے ساتھ منقول ہے ، جن میں سے بعض اس کی مانند ہیں ، اور بعض میں یہ الفاظ ہیں : ” نبی اکرم صلی اللہ علیہ وسلم ہمیں اس بات کا حکم دیتے تھے کہ ہم رات اور دن کی کسی بھی گھڑی میں نماز ادا کر سکتے ہیں ، البتہ آپ ہمیں یہ حکم دیتے تھے کہ ہم سورج کے طلوع ہونے کے وقت اور اس کے غروب ہونے کے وقت نماز ادا کرنے سے اجتناب کریں ، آپ یہ فرماتے تھے : جب یہ غروب ہوتا ہے ، تو شیطان بھی اُس کے ہمراہ غروب ہو جاتا ہے ، اور جب یہ طلوع ہوتا ہے ، تو شیطان بھی اُس کے ہمراہ طلوع ہوتا ہے “ ۔ امام أحمد کے رجال ” ثقہ “ ہیں ۔

سیدنا سلمہ بن اکوع رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ سفر کرتا رہا ہوں ، میں نے آپ صلی اللہ علیہ وسلم کو کبھی بھی عصر کے بعد ، یا صبح کی نماز کے بعد کوئی نماز ادا کرتے ہوئے نہیں دیکھا ۔
یہ روایت امام أحمد نے ، اور امام طبرانی نے معجم اوسط میں نقل کی ہے ، امام أحمد کے رجال ” صحیح “ کے رجال ہیں ۔

سعید بن نافع بیان کرتے ہیں : نبی اکرم صلی اللہ علیہ وسلم کے صحابی سیدنا ابوبشیر انصاری رضی اللہ عنہ نے مجھے دیکھا کہ میں سورج طلوع ہونے کے وقت چاشت کی نماز ادا کر رہا تھا ، تو انہوں نے اس کے حوالے سے مجھ پر اعتراض کیا اور مجھے اس سے منع کیا اور یہ بات بیان کی : نبی اکرم صلی اللہ علیہ وسلم نے ارشاد فرمایا ہے : ” تم اس وقت تک نماز ادا نہ کرو ، جب تک سورج بلند نہیں ہو جاتا ، کیونکہ وہ شیطان کے دو سینگوں کے درمیان طلوع ہوتا ہے “ ۔
یہ روایت امام أحمد نے ، امام ابویعلیٰ نے اور امام طبرانی نے معجم اوسط میں نقل کی ہے ، تاہم امام ابویعلیٰ نے یہ الفاظ نقل کیے ہیں : ” ابوہبیرہ نے مجھے دیکھا “ امام أحمد کے رجال ” ثقہ “ ہیں ۔

سعید بن نافع بیان کرتے ہیں : سیدنا ابوالیسر رضی اللہ عنہ نے مجھے دیکھا کہ میں چاشت کی نماز ادا کر رہا تھا ، انہوں نے مجھے منع کیا اور ارشاد فرمایا : نبی اکرم صلی اللہ علیہ وسلم نے ارشاد فرمایا ہے : ” تم لوگ اُس وقت تک نماز ادا نہ کرو ، جب تک سورج بلند نہیں ہو جاتا ، کیونکہ وہ شیطان کے دو سینگوں کے درمیان طلوع ہوتا ہے “ ۔
یہ روایت امام بزار نے نقل کی ہے ، اور اس کے رجال ” ثقہ “ ہیں ۔

سیدنا بلال رضی اللہ عنہ بیان کرتے ہیں : نبی اکرم صلی اللہ علیہ وسلم صرف سورج طلوع ہونے کے وقت نماز ادا کرنے سے منع کرتے تھے ، کیونکہ وہ شیطان کے دو سینگوں کے درمیان طلوع ہوتا ہے ۔
یہ روایت امام أحمد نے نقل کی ہے ، امام طبرانی نے معجم کبیر میں اس کے مفہوم والی روایت نقل کی ہے ، اور امام أحمد کے رجال ” صحیح “ کے رجال ہیں ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم نے خانہ کعبہ کے ساتھ ٹیک لگا کر خطبہ دیتے ہوئے یہ ارشاد فرمایا : ” عصر کے بعد کوئی نماز ادا نہیں کی جائے گی ، جب تک سورج غروب نہیں ہو جاتا“ ۔
( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے ” صحیح “ میں روایت منقول ہے ، جو سورج طلوع ہونے کے بعد نماز کی ممانعت کے بارے میں ہے ۔
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔

حیی بن یعلی بن امیہ بیان کرتے ہیں : میں نے سیدنا یعلی رضی اللہ عنہ کو سورج طلوع ہونے سے پہلے نماز ادا کرتے ہوئے دیکھا ، راوی بیان کرتے ہیں : ایک شخص نے اُن سے کہا: ( راوی کو شک ہے ، شاید یہ الفاظ ہیں : ) اُن سے کہا: گیا : آپ نبی اکرم صلی اللہ علیہ وسلم کے اصحاب سے تعلق رکھنے والے ایک فرد ہیں ، اور سورج طلوع ہونے سے پہلے نماز ادا کر رہے ہیں ؟ تو سیدنا یعلی رضی اللہ عنہ نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک سورج شیطان کے دو سینگوں کے درمیان طلوع ہوتا ہے “ ۔ سیدنا یعلی رضی اللہ عنہ نے فرمایا : اگر وہ ایسی حالت میں طلوع ہو کہ تم اللہ تعالیٰ کے حکم پر عمل پیرا ہو ( یعنی نماز ادا کر رہے ہو ، تو یہ اس سے بہتر ہے کہ وہ ایسی حالت میں طلوع ہو کہ تم غفلت کا شکار ہو ۔
یہ روایت امام أحمد نے نقل کی ہے ، اس کی سند میں ایک راوی حیی بن یعلی ہے ، اور وہ معروف نہیں ہے ۔

عبداللہ بن رباح نے ، ایک صحابی کے حوالے سے یہ بات نقل کی ہے : نبی اکرم صلی اللہ علیہ وسلم نے عصر کی نماز ادا کر لی ، پھر ایک شخص کھڑا ہو کر نماز ادا کرنے لگا ، سیدنا عمر رضی اللہ عنہ نے اُسے ملاحظہ کیا ، تو اُس سے فرمایا : تم بیٹھ جاؤ ! کیونکہ اہل کتاب اس لئے ہلاکت کا شکار ہوئے تھے ، کہ اُن کی نماز کے لئے کوئی فصل نہیں ہوتی تھی ۔
یہ روایت امام أحمد نے اور امام ابویعلیٰ نے نقل کی ہے ، اور ان دونوں کے رجال ” صحیح “ کے رجال ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک سورج شیطان کے دو سینگوں کے درمیان طلوع ہوتا ہے “ ۔ راوی بیان کرتے ہیں : ہمیں سورج طلوع ہونے کے وقت اور اس کے غروب ہونے کے وقت اور نصف النہار کے وقت نماز ادا کرنے سے منع کیا گیا ہے ۔
یہ روایت امام ابویعلیٰ اور امام بزار نے نقل کی ہے ، اور ان دونوں کے رجال ” ثقہ “ ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” سورج طلوع ہونے کے وقت ، یا اس کے غروب ہونے کے وقت نماز ادا نہ کرو ، کیونکہ وہ شیطان کے سینگ پر طلوع ہوتا ہے ، اور غروب ہوتا ہے ، اُن کے درمیان تم جب بھی چاہو ، نماز ادا کر لو “ ۔
یہ روایت امام ابویعلیٰ نے نقل کی ہے ، اور اس کے رجال ” صحیح“ کے رجال ہیں ۔

یہ روایت امام بزار نے نقل کی ہے ، اور اس کے الفاظ یہ ہیں : نبی اکرم صلی اللہ علیہ وسلم نے عصر کی نماز کے بعد ، سورج غروب ہونے تک اور فجر کی نماز کے بعد سورج طلوع ہونے تک ، نماز ادا کرنے سے منع فرمایا ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم سورج طلوع ہونے کے وقت نماز ادا کرنے سے منع کرتے تھے ، جب تک وہ بلند نہیں ہو جاتا ، آپ صلی اللہ علیہ وسلم یہ ارشاد فرماتے تھے : ” یہ شیطان کے سینگ کے ساتھ طلوع ہوتا ہے “ ۔ اور آپ صلی اللہ علیہ وسلم اُس وقت نماز ادا کرنے سے بھی منع کرتے تھے ، جب سورج غروب ہونے کے قریب ہو ۔
یہ روایت امام ابویعلیٰ نے نقل کی ہے ، اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ، اس روایت کے بقیہ رجال ” صحیح“ کے رجال ہیں ۔

سیدنا عبدالرحمن بن عوف رضی اللہ عنہ بیان کرتے ہیں : نبی اکرم صلی اللہ علیہ وسلم سے سوال کیا گیا : رات کے کون سے حصے میں زیادہ سنا جاتا ہے ( یعنی دعا یا عبادت جلدی قبول ہوتی ہے ؟ ) نبی اکرم صلی اللہ علیہ وسلم نے ارشاد فرمایا : رات کا آخری نصف حصہ ، پھر نماز مقبول ہوتی ہے ، یہاں تک کہ صبح صادق ہو جائے ، پھر کوئی نماز ادا نہیں کی جائے گی ، جب تک سورج ایک نیزے یا دو نیزے جتنا بلند نہیں ہو جاتا ، پھر نماز مقبول ہوتی ہے ، یہاں تک کہ سایہ نیزے جتنا ہو جائے ، پھر کوئی نماز ادا نہیں کی جائے گی ، جب تک سورج ڈھل نہیں جاتا ، پھر نماز مقبول ہوتی ہے یہاں تک کہ سورج ایک نیزے یا دو نیزے جتنا رہ جائے ( یعنی غروب ہونے کے اتنا قریب ہو ) پھر کوئی نماز ادا نہیں کی جائے گی جب تک سورج غروب نہیں ہو جاتا “ ۔ اس کے بعد راوی نے پوری حدیث ذکر کی ہے ، یہ حدیث آگے چل کر غلام آزاد کرنے سے متعلق باب میں آئے گی ، اگر اللہ نے چاہا ۔
یہ روایت امام طبرانی نے معجم کبیر میں نقل کی ہے ، ابوسلمہ نامی راوی نے اپنے والد سے سماع نہیں کیا ہے ۔

سیدنا صفوان بن معطل سلمی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جب سورج طلوع ہوتا ہے ، تو شیطان کا سینگ اس کے ساتھ مل جاتا ہے ، جب وہ طلوع ہو جاتا ہے ، تو وہ سینگ اس سے الگ ہو جاتا ہے پھر جب وہ زوال کے قریب ہوتا ہے ، تو وہ سینگ پھر اس کے ساتھ مل جاتا ہے ، جب وہ ڈھل جاتا ہے ، تو وہ سینگ اس سے الگ ہو جاتا ہے ، جب وہ غروب ہونے کے قریب ہوتا ہے ، تو وہ سینگ اس کے ساتھ مل جاتا ہے ، جب وہ غروب ہو جاتا ہے ، تو وہ سینگ اُس سے الگ ہو جاتا ہے ۔
( راوی بیان کرتے ہیں : ) تو نبی اکرم صلی اللہ علیہ وسلم نے ان اوقات میں نماز ادا کرنے سے منع کیا ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ، اس سے پہلے سیدنا صفوان رضی اللہ عنہ کے حوالے سے منقول وہ حدیث گزر چکی ہے ، جسے امام أحمد نے روایت کیا ہے ۔

سیدنا ابواسید رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” عصر کے بعد ، نماز ادا نہیں کی جائے گی “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی فروہ بن ابوفروہ ہے ، میں نے کسی کو اس کا ذکر کرتے ہوئے نہیں پایا ہے ، اس روایت کے بقیہ رجال ” ثقہ “ ہیں ۔

کریب بیان کرتے ہیں : سیدنا عبداللہ بن عباس رضی اللہ عنہ سیدنا مسور بن مخرمہ رضی اللہ عنہ اور سیدنا عبدالرحمن بن ازہر رضی اللہ عنہ فرماتے ہیں : نبی اکرم صلی اللہ علیہ وسلم نے عصر کی نماز کے بعد نماز ادا کرنے سے منع کیا ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ، صرف امام طبرانی کے استاد یحیی بن منصور ابوسعد ہروی کا معاملہ مختلف ہے ، میں نے کسی کو اُس کے حالات بیان کرتے ہوئے نہیں پایا ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ہمیں سورج طلوع ہونے کے وقت اور اس کے غروب ہونے کے وقت نماز ادا کرنے سے منع کیا گیا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ضرار بن صرد ابونعیم ہے ، اور وہ انتہائی ” ضعیف“ ہے ۔

قبیصہ بن مہلب ، اپنے والد کے حوالے سے ، نبی اکرم صلی اللہ علیہ وسلم کے بارے میں یہ بات نقل کرتے ہیں : آپ صلی اللہ علیہ وسلم سے یہ سوال کیا گیا : کہ کیا کوئی ایسا وقت بھی ہے ، جو ہمیں نماز ادا کرنے سے روک دیتا ہے ؟ نبی اکرم صلی اللہ علیہ وسلم نے ارشاد فرمایا : ” جی نہیں ! البتہ سورج طلوع ہونے کے وقت اور اس کے غروب ہونے کے وقت ( نماز ادا نہیں کی جائے گی ) کیونکہ وہ شیطان کے دو سینگوں کے درمیان طلوع ہوتا ہے ، اور شیطان کے دو سینگوں کے درمیان غروب ہوتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن جابر سحیمی ہے ، جس کے بارے میں بہت زیادہ کلام کیا گیا ہے ، وہ اپنی ذات کے اعتبار سے صدوق ہے ، اور تحریر میں مستند ہے ، لیکن حافظے کے اعتبار سے برا ہے ، وہ تلقین کو قبول کرتا تھا ۔