مجمع الزوائد ومنبع الفوائد

عروہ بن زبیر بیان کرتے ہیں : سیدنا عمر رضی اللہ عنہ لوگوں کے پاس تشریف لائے اور انہیں عصر کے بعد دو رکعات ادا کرنے پر ، ان کی پٹائی کی ، یہاں تک کہ اُن کا گزر سیدنا تمیم داری رضی اللہ عنہ کے پاس سے ہوا ، تو سیدنا تمیم داری رضی اللہ عنہ نے کہا: میں ان دونوں رکعات کو ترک نہیں کروں گا ، کیونکہ میں نے یہ دونوں رکعات ، اُس ہستی کے ساتھ ادا کی ہیں ، جو آپ سے بہتر ہیں ، اور وہ اللہ کے رسول ہیں ، تو سیدنا عمر رضی اللہ عنہ نے فرمایا : اگر لوگ تمہاری مانند ہو جائیں ، تو پھر میں اس کی پرواہ نہیں کروں گا“ ۔
یہ روایت امام أحمد نے نقل کی ہے ، روایت کے یہ الفاظ ان کے نقل کردہ ہیں ، عروہ نامی راوی نے سیدنا عمر رضی اللہ عنہ سے سماع نہیں کیا ہے ،
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ، امام طبرانی نے اسے معجم کبیر اور معجم اوسط میں نقل کیا ہے ۔

عروہ بیان کرتے ہیں : سیدنا تمیم داری رضی اللہ عنہ نے مجھے یہ بات بتائی : ( راوی کو شک ہے ، یا شاید یہ الفاظ ہیں : ) مجھے یہ بات بتائی گئی : کہ سیدنا تمیم داری رضی اللہ عنہ نے سیدنا عمر بن خطاب رضی اللہ عنہ کے عصر کے بعد نماز ادا کرنے سے منع کرنے کے باوجود ، دو رکعات ادا کیں ، سیدنا عمر رضی اللہ عنہ اُن کے پاس آئے اور انہیں درے کے ذریعے مارنے لگے ، تو سیدنا تمیم داری رضی اللہ عنہ نے انہیں اشارہ کیا کہ آپ بیٹھ جائیں ، سیدنا تمیم داری رضی اللہ عنہ اس وقت نماز ادا کر رہے تھے ، سیدنا عمر رضی اللہ عنہ بیٹھ گئے ، جب سیدنا تمیم داری رضی اللہ عنہ نماز سے فارغ ہوئے ، تو انہوں نے سیدنا عمر رضی اللہ عنہ سے کہا: آپ نے مجھے کیوں مارا ؟ سیدنا عمر رضی اللہ عنہ نے فرمایا : کیونکہ تم نے یہ دو رکعات ادا کی ہیں ، اور میں نے ان سے منع کیا ہے ، تو سیدنا تمیم داری رضی اللہ عنہ نے کہا: میں نے یہ دو رکعات اُس ہستی کے ہمراہ ادا کی ہیں ، جو آپ سے بہتر ہیں ، اور وہ اللہ کے رسول ہیں ، تو سیدنا عمر رضی اللہ عنہ نے فرمایا : اے لوگو ! مجھے تمہارے ساتھ کوئی واسطہ نہیں ہے ، مجھے یہ اندیشہ ہے کہ میرے بعد ایسے لوگ آئیں گے جو عصر کے بعد سے لے کر مغرب کے وقت تک نمازیں ادا کرتے رہیں گے ، یہاں تک کہ وہ اس گھڑی میں بھی نماز ادا کر لیں گے جس گھڑی میں ، نماز ادا کرنے سے نبی اکرم صلی اللہ علیہ وسلم نے منع کیا ہے ، جس طرح کچھ لوگ ظہر اور عصر کو ملا دیتے ہیں اور پھر یہ کہتے ہیں : کہ ہم نے فلاں اور فلاں کو دیکھا کہ وہ عصر کے بعد بھی نماز ادا کر رہا تھا ۔
اس کی سند میں ایک راوی عبداللہ بن صالح ہے ، جس کے بارے میں عبدالملک بن شعیب نے یہ کہا: ہے : یہ ” ثقہ “ اور مامون ہے امام أحمد اور دیگر حضرات نے اسے ضعیف قرار دیا ہے ۔

سیدنا زید بن خالد جہنی رضی اللہ عنہ بیان کرتے ہیں : سیدنا عمر بن خطاب رضی اللہ عنہ نے انہیں دیکھا جو اس وقت خلیفہ تھے کہ انہوں نے عصر کے بعد دو رکعات ادا کیں ، سیدنا عمر رضی اللہ عنہ چلتے ہوئے ان کے پاس آئے اور انہیں درہ مارا ، وہ مسلسل نماز ادا کرتے رہے ، جب وہ نماز پڑھ کر فارغ ہوئے ، تو سیدنا زید رضی اللہ عنہ نے کہا: اے امیر المؤمنین ! اللہ کی قسم ! نبی اکرم صلی اللہ علیہ وسلم کو ان دونوں رکعت کو ادا کرتے ہوئے دیکھ لینے کے بعد ، میں انہیں کبھی بھی ترک نہیں کروں گا ، راوی بیان کرتے ہیں : تو سیدنا عمر رضی اللہ عنہ ان کے بیٹھ گئے اور بولے : اے زید بن خالد ! مجھے اس بات کا اندیشہ ہے کہ لوگ اس چیز کو نماز کے لئے سیڑھی بنا لیں گے ، یہاں تک کہ رات ہو جایا کرے گی ( یعنی وہ مغرب ہونے تک مسلسل نماز ادا کرتے رہیں گے ) میں ان دو رکعات کی وجہ سے پٹائی نہیں کرتا ہوں ۔
یہ روایت امام أحمد نے اور امام طبرانی نے معجم کبیر میں نقل کی ہے ، اور اس کی سند میں حسن ہے ۔

سیدنا ابوموسی اشعری رضی اللہ عنہ کے بارے میں یہ بات منقول ہے : انہوں نے نبی اکرم صلی اللہ علیہ وسلم کو عصر کے بعد دو رکعات ادا کرتے ہوئے دیکھا ہے ۔
یہ روایت امام طبرانی نے معجم اوسط اور معجم کبیر میں نقل کی ہے ، انہوں نے یہ الفاظ زائد نقل کیے ہیں : ابودارس بیان کرتے ہیں : میں نے سیدنا ابوموسی اشعری رضی اللہ عنہ کے صاحبزادے ابوبکر کو یہ دونوں رکعت ادا کرتے ہوئے دیکھا ہے ، اُن کا یہ کہنا ہے : میں نے سیدنا ابوموسی اشعری رضی اللہ عنہ کو ان دونوں کو ادا کرتے ہوئے دیکھا ہے ، اُن کا یہ کہنا ہے : کہ نبی اکرم صلی اللہ علیہ وسلم سیدہ عائشہ رضی اللہ عنہا کے گھر میں یہ دو رکعات ادا کیا کرتے تھے ۔ اس روایت کے رجال ” صحیح “ کے رجال ہیں ، صرف ابودارس کا معاملہ مختلف ہے ، اس کے بارے میں یحیی بن معین نے یہ کہا: ہے : کہ اس میں کوئی حرج نہیں ہے ۔

عبداللہ بن حارث بن نوفل بیان کرتے ہیں : سیدنا معاویہ بن ابوسفیان رضی اللہ عنہ نے ہمیں عصر کی نماز پڑھائی ، پھر انہوں نے سیدہ میمونہ رضی اللہ عنہا کی طرف پیغام بھیجا ، پھر ایک اور شخص اس کے پیچھے بھیجا ، سیدہ میمونہ نے بتایا : نبی اکرم صلی اللہ علیہ وسلم ایک مہم کو روانہ کرنے والے تھے ، آپ کے پاس صدقے کے اونٹ اتنے نہیں تھے ( کہ اُن کو روانہ کیا جا سکتا ) تو آپ صلی اللہ علیہ وسلم تشریف فرما ہوئے اور ان لوگوں کے درمیان تقسیم کرنے لگے ، اس وجہ سے آپ ( ظہر کے بعد کے نوافل یا سنتیں ) ادا نہیں کر پائے ، یہاں تک کہ عصر کا وقت ہو گیا ، نبی اکرم صلی اللہ علیہ وسلم عصر سے پہلے دو رکعات ادا کرتے تھے ، اور جو اللہ کو منظور ہوتا تھا ، وہ ادا کرتے تھے ، نبی اکرم صلی اللہ علیہ وسلم نے عصر کی نماز ادا کی ، پھر آپ واپس تشریف لائے اور وہ سنتیں ادا کیں ، جو آپ اُس سے پہلے ادا کیا کرتے تھے ، نبی اکرم صلی اللہ علیہ وسلم جب بھی کوئی نماز ادا کرتے تھے ، اور جب بھی کوئی کام کرتے تھے ، تو آپ صلی اللہ علیہ وسلم کو یہ بات پسند تھی کہ آپ صلی اللہ علیہ وسلم اسے باقاعدگی سے کریں ۔
یہ روایت امام أحمد نے نقل کی ہے ، اس کی سند میں ایک راوی حنظلہ سدوسی ہے ، اسے امام أحمد اور یحیی بن معین نے ضعیف قرار دیا ہے ، ابن حبان نے اسے ” ثقہ “ قرار دیا ہے ۔

سیدہ میمونہ رضی اللہ عنہا بیان کرتی ہیں : نبی اکرم صلی اللہ علیہ وسلم کی عصر کی دو رکعات رہ گئی تھیں ، تو وہ دونوں رکعت آپ صلی اللہ علیہ وسلم نے ( عصر کی نماز کے ) بعد ادا کی تھیں ۔
یہ روایت امام أحمد نے نقل کی ہے ، اور اس کی سند میں بھی ایک راوی حنظلہ ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم کی عصر سے پہلے کی دو رکعات رہ گئی تھیں ، جب آپ نے عصر کی نماز مکمل کی ، تو اُن دونوں رکعت کو ادا کر لیا ، اس کے بعد آپ صلی اللہ علیہ وسلم نے کبھی یہ دونوں رکعت ادا نہیں کی ہیں ۔ ( علامہ ہیثمی فرماتے ہیں : ) میں یہ کہتا ہوں : سیدہ عائشہ رضی اللہ عنہا کے حوالے سے ” صحیح “ میں ، اس کے علاوہ حدیث منقول ہے ، باقی اللہ بہتر جانتا ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابویحیی القتات ہے ، جسے امام أحمد نے اور ایک روایت کے مطابق یحیی بن معین نے ضعیف قرار دیا ہے ، جب کہ دوسری روایت کے مطابق انہوں نے اسے ” ثقہ “ قرار دیا ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے عصر کی نماز ادا کی ، پھر آپ گھر تشریف لے آئے ، آپ نے دو رکعات ادا کیں ، میں نے عرض کی : یا رسول اللہ ! آپ نے ایک ایسی نماز ادا کی ہے ، جو آپ پہلے ادا نہیں کرتے تھے ، تو نبی اکرم صلی اللہ علیہ وسلم نے ارشاد فرمایا : میرے پاس کچھ مال آ گیا تھا ، تو میں ظہر کے بعد والی دو رکعات ادا نہیں کر سکا ، وہ میں نے اب ادا کر لی ہیں ، میں نے عرض کی : یا رسول اللہ ! جب یہ دونوں رہ گئی تھیں ، تو کیا آپ نے ان کی قضاء ادا کی ہے ؟ نبی اکرم صلی اللہ علیہ وسلم نے ارشاد فرمایا : جی نہیں ! :
( علامہ ہیثمی فرماتے ہیں : ) میں یہ کہتا ہوں یہ روایت ” صحیح “ میں بھی منقول ہے ، تاہم اس میں یہ الفاظ نہیں ہیں : ” جب یہ دونوں رہ گئی تھیں ، تو کیا آپ نے ان کی قضاء ادا کی ہے ؟ تو نبی اکرم صلی اللہ علیہ وسلم نے فرمایا : جی نہیں ! “ ۔
یہ روایت امام أحمد نے اور امام ابن حبان رحمہ اللہ نے اپنی ” صحیح “ میں نقل کی ہے امام أحمد کے رجال ” صحیح“ کے رجال ہیں ۔