مجمع الزوائد ومنبع الفوائد

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” پروردگار فرماتا ہے : اگر میرے بندے میری اطاعت کریں ، تو میں انہیں رات کے وقت بارش کے ذریعے سیراب کروں گا ، اور دن کے وقت سورج کو طلوع کروں گا ، اور میں انہیں بجلی کی کڑک نہیں سنواؤں گا“ ۔
یہ روایت امام أحمد اور امام بزار نے نقل کی ہے ، انہوں نے اس میں یہ الفاظ زائد نقل کیے ہیں : ” نبی اکرم صلی اللہ علیہ وسلم نے فرمایا : اپنے ایمان کی تجدید کرو ! لوگوں نے عرض کی : یا رسول اللہ ! ہم اپنے ایمان کی تجدید کیسے کریں ؟ نبی اکرم صلی اللہ علیہ وسلم نے ارشاد فرمایا : لا الہ الا اللہ پڑھ کر اپنے ایمان کی تجدید کرو ! “ ۔ وہ بیان کرتے ہیں : نبی اکرم صلی اللہ علیہ وسلم کے حوالے سے
یہ روایت صرف اسی سند کے ساتھ منقول ہے ۔ ( علامہ ہیثمی فرماتے ہیں : ) میں یہ کہتا ہوں : اس روایت کا مدار صدقہ بن موسیٰ دقیقی پر ہے ، جسے یحیی بن معین اور دیگر حضرات نے ضعیف قرار دیا ہے ، مسلم بن ابراہیم کہتے ہیں : ہمیں صدقہ دقیقی نے حدیث بیان کی ، وہ صدوق ہیں ۔

سیدنا انس رضی اللہ عنہ بیان کرتے ہیں : جب تیز ہوا چلتی تھی ، تو پریشانی کے آثار نبی اکرم صلی اللہ علیہ وسلم کے چہرے پر پہچانے جاتے تھے ۔
یہ روایت امام أحمد نے نقل کی ہے ، اور اس کے رجال کی توثیق کی گئی ہے ۔

سیدنا معاویہ لیثی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” لوگ قحط سالی کا شکار ہوں گے ، تو اللہ تعالیٰ ان پر اپنے رزق میں سے رزق نازل کرے گا ، تو وہ لوگ مشرک ہو جائیں گے آپ کی خدمت میں عرض کی گئی : یا رسول اللہ ! یہ کیسے ہو گا ؟ نبی اکرم صلی اللہ علیہ وسلم نے فرمایا : وہ لوگ یہ کہیں گے : فلاں ، فلاں ستارے کی وجہ سے ہم پر بارش نازل ہوئی ہے “ ۔
یہ روایت امام أحمد امام بزار اور امام طبرانی نے معجم کبیر اور معجم اوسط میں نقل کی ہے ، اور اس کے رجال کی توثیق کی گئی ہے ۔

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانے میں بارش کا قحط ہو گیا ، ہم نے نبی اکرم صلی اللہ علیہ وسلم سے درخواست کی کہ آپ ہمارے لئے بارش کے نزول کی دعا کریں ، نبی اکرم صلی اللہ علیہ وسلم نے دعا کی اگلے دن نبی اکرم صلی اللہ علیہ وسلم تشریف لائے ، تو کچھ لوگ آپس میں یہ بات چیت کر رہے تھے ، کہ گزشتہ رات فلاں ستارے کی وجہ سے ہم پر بارش ہوئی ہے ، تو نبی اکرم صلی اللہ علیہ وسلم نے ارشاد فرمایا : ” جب بھی اللہ تعالیٰ کسی قوم کو نمت عطا کرتا ہے ، تو وہ اس ( نعمت ) کے حوالے سے کافر ہو جاتے ہیں“ ۔
یہ روایت امام بزار نے امام طبرانی نے معجم کبیر میں نقل کی ہے ، اس کی سند میں ایک راوی اسماعیل بن عیاش ہے ، اور اس کے بارے میں کلام کیا گیا ہے ۔

طلحہ بن عبداللہ بن عوف بیان کرتے ہیں : میں نے سیدنا عبداللہ بن عباس رضی اللہ عنہما سے نماز استسقاء کے سنت طریقے کے بارے میں دریافت کیا ، تو انہوں نے فرمایا : نماز استقاء کا طریقہ وہی ہے ، جو نماز عید کا طریقہ ہے ۔ نبی اکرم صلی اللہ علیہ وسلم بارش کے نزول کے لیے دعا کرنے کے لیے ) تشریف لے گئے تھے ، آپ صلی اللہ علیہ وسلم نے دو رکعات ادا کی تھیں ، ان دونوں میں قرأت کی تھی ، پہلی رکعت میں سات تکبیریں کہی تھیں ، اور دوسری رکعت میں پانچ تکبیریں کہی تھیں ۔
( علامہ ہیثمی فرماتے ہیں : ) میں یہ کہتا ہوں :
یہ روایت ” سنن “ میں مذکور ہے ، تاہم اس میں تکبیروں کا ذکر نہیں ہے ۔
یہ روایت بزار نے نقل کی ہے ، اس کی سند میں ایک راوی محمد بن عبدالعزیز بن عمر زہری ہے ، اور وہ متروک ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں بارش نہیں ہوئی ، مسلمان آپ کی خدمت میں حاضر ہوئے ، انہوں نے عرض کی : یا رسول اللہ ! بارش کا قحط ہو گیا ہے ، درخت خشک ہو گئے ہیں ، مویشی ہلاکت کا شکار ہو رہے ہیں اور لوگ بیمار ہو رہے ہیں ، آپ اپنے پروردگار سے ہمارے لئے بارش کی دعا کیجئے نبی اکرم صلی اللہ علیہ وسلم نے ارشاد فرمایا : جب فلاں دن آئے گا ، تو تم لوگ نکلنا اور تم لوگ اپنے ساتھ اپنے صدقات لے کے آنا ، جب وہ مخصوص دن آیا تو نبی اکرم صلی اللہ علیہ وسلم اور لوگ نکلے ، نبی اکرم صلی اللہ علیہ وسلم بھی پیدل چلتے ہوئے تشریف لے گئے اور لوگ بھی پیدل گئے ، ان سب لوگوں پر سکینت اور وقار تھا ، یہاں تک کہ وہ لوگ عید گاہ آئے نبی اکرم صلی اللہ علیہ وسلم آگے بڑھے ، آپ نے اُن لوگوں کو دو رکعات پڑھائیں ، جن میں آپ نے بلند آواز میں قرأت کی ، نبی اکرم صلی اللہ علیہ وسلم عیدین کی نماز میں اور استقاء کی نماز میں پہلی رکعت میں ، سورہ فاتحہ اور سورت الاعلیٰ پڑھتے تھے ، اور دوسری رکعت میں سورت فاتحہ اور سورت الغاشیہ پڑھتے تھے ، جب آپ نے نماز مکمل کی ، تو آپ نے لوگوں کی طرف رخ کیا ، اور اپنی چادر کو الٹا لیا ، پھر آپ گھٹنوں کے بل جھک گئے ، دونوں ہاتھ بلند کر لئے اور بارش کے نزول کی دعا کرنے سے پہلے آپ نے تکبیر کہی ، پھر آپ صلی اللہ علیہ وسلم نے یہ دعا کی : ” اے اللہ ! تو ہمیں ایسے بادل کے ذریعے سیراب فرما ! جو برسنے والا ہو ، وسیع ہو ، پیداوار کرنے والا ہو ، بھر پور ہو ، زیادہ بارش والا ہو ، تہوں والا ہو ، سیراب کرنے والا ہو ، عام ہو ، سر سبز و شاداب کر دے ، گھاس پھوس پیدا کرنے والا ہو ، موسلا دھار ہو ، شامل ہو ، لٹکانے والا ہو ، تیزی سے چلنے والا ہو ، مستقل ہو ، لبریز ہو ، نفع بخش ہو ، نقصان دہ نہ ہو ، جلدی ہو تاخیر سے نہ ہو ، اے اللہ ! تو اُس کے ذریعے شہروں کو زندگی دے دے ، اور بندوں کی مدد کر دے ، تو اسے ہم میں سے شہریوں اور باہر سے آنے والوں کے لئے سہولت کا باعث بنا دے ، اے اللہ ! ہم پر ہماری زمین میں اس کی زینت نازل کر دے ، اور ہم پر ہماری زمین میں اس کی سکینت نازل کر دے ، اے اللہ ! ہم پر آسمان سے پاک پانی نازل کر دے ، اور اس کے ذریعے بنجر شہر کو زندگی دے دے ، اور اسے سیراب کر دے اور اس کے ذریعے جانوروں کو اور بہت سے لوگوں کو جنہیں تو نے پیدا کیا ہے ، سیراب کر دے “ ۔ راوی بیان کرتے ہیں : ابھی وہ لوگ اسی حالت میں تھے کہ اس دوران بادل کا ایک ٹکڑا آیا ، پھر وہ ٹکڑے ایک دوسرے سے مل گئے ، پھر ان لوگوں پر مسلسل سات دن بارش ہوتی رہی ، جو مدینہ منورہ میں رکی نہیں ۔
( علامہ ہیثمی فرماتے ہیں : ) میں یہ کہتا ہوں : اس کے بعد انہوں نے اس کی مانند حدیث ذکر کی ہے ، جو ” صحیح “ میں منقول ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی مجاشع بن عمرو ہے ، یحیی بن معین کہتے ہیں : اس کے بارے میں میری یہ رائے ہے کہ وہ جھوٹے لوگوں میں سے ایک ہے ۔

سیدنا جابر بن عبداللہ رضی اللہ عنہما اور سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم جب بارش کے نزول کے لئے دعا مانگتے تھے ، تو یہ دعا کرتے تھے : ” اے اللہ ! تو ہمیں ایسے طریقے سے سیراب کر دے ، جو اطمینان بخش ہو ، جس کے ذریعے تو اموال ( یعنی جانوروں ) اور نفوس ( یعنی انسانوں ) کو سیراب کر دے ، ایسا بادل ہو ، جو سیر کر دے ، پیاس ختم کر دے ، تہہ دار ہو ، زمین میں نباتات پیدا کر دے ، جس کے ذریعے ہمارے دیہاتوں اور شہروں کے لوگوں کو سہولت حاصل ہو ، تو اس کے ذریعے آسان کی برکتیں نازل فرما ، اور اس کے ذریعے ہمارے لئے زمین کی برکتیں نکال دے اور اس وقت تو ہمیں شکر کرنے والوں میں سے بنا دینا ، بے شک تو دعا کو سننے والا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی موسیٰ بن محمد بن ابراہیم حارث تیمی ہے ، اور وہ ” ضعیف “ ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے بارش کے نزول کے دعا کرتے ہوئے یہ دعا کی : ” اے اللہ ! تو ہمیں سیراب کرنے والے بادل سے سیراب کر دے ، جو سبزہ پیدا کرنے والا ہو ، تہہ دار ہو ، جلدی آئے ، تاخیر سے نہ آئے ، نفع بخش ہو ، نقصان دہ نہ ہو “ ۔
( راوی بیان کرتے ہیں : ) اس کے بعد زیادہ دیر نہیں گزری تھی ، کہ ہم پر بارش نازل ہونے لگی ، یہاں تک کہ ہر چیز بہنے لگی ، یہاں تک کہ لوگ نبی اکرم صلی اللہ علیہ وسلم کی خدمت میں حاضر ہوئے اور عرض کی : ہم ڈوب رہے ہیں ، نبی اکرم صلی اللہ علیہ وسلم نے ارشاد فرمایا : اے اللہ ! ہمارے آس پاس ( بارش ہو ) اور ہم پر نہ ہو !
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن ابولیلی ہے ، جس کے بارے میں بہت زیادہ کلام کیا گیا ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم چاشت کے وقت مسجد میں کھڑے ہوئے ، آپ نے تین تکبیریں کہیں ، پھر آپ نے یہ دعا کی : ” اے اللہ ! تو ہمیں سیراب کر دے ( یہ کلمہ آپ نے تین مرتبہ فرمایا ، اور پھر یہ کہا: ) اے اللہ ! تو ہمیں گھی ، دودھ ، چربی اور گوشت نصیب فرما دے ! “ ۔ راوی بیان کرتے ہیں : ہمیں آسمان میں کوئی بادل دکھائی نہیں دے رہا تھا ، پھر ہوا چلی ، غبار اڑا اور بادل اکٹھا ہو گیا اور بارش شروع ہو گئی ، یہاں تک کہ بازار کے لوگوں نے چیخ و پکار شروع کی اور مسجد کی چھت کے نیچے اور گھروں کی طرف لپکے ، نبی اکرم صلی اللہ علیہ وسلم کھڑے ہوئے تھے ، اسی دوران راستوں میں پانی بہنے لگا ، اور ہم نے اس بارش کو نبی اکرم صلی اللہ علیہ وسلم کے بالوں کے کناروں پر اور آپ کے کندھوں پر دیکھا کہ وہ بارش کے قطرے موتیوں کی طرح تھے ، نبی اکرم صلی اللہ علیہ وسلم واپس تشریف لے گئے ، میں بھی آپ کے ساتھ چلتا ہوا واپس آیا ، آپ یہ کہہ رہے تھے : یہ تمہارے پروردگار کی بارگاہ سے آئی ہے ۔ سیدنا ابوامامہ رضی اللہ عنہ بیان کرتے ہیں : میں نے ایسا کوئی سال نہیں دیکھا ، جس میں اُس سال سے زیادہ لوگوں کی صحت ہوئی ہو ، زیادہ دودھ ، زیادہ چربی ، زیادہ گوشت ( کی پیداوار ہوئی ) ہو ، یہ چیزیں راستے میں پڑی ہوتی تھیں ، اور انہیں خریدنے والا کوئی نہیں ہوتا تھا ، اس کے بعد نبی اکرم صلی اللہ علیہ وسلم لوگوں کی طرف مڑے آپ نے انہیں وعظ و نصیحت کی ، آپ نے انہیں منع کیا ، پھر آپ خواتین کی طرف تشریف لے گئے ، آپ نے انہیں وعظ کیا ، اور آپ نے انہیں ریشم اور سونے کے حوالے سے شدید تاکید کی ، بنو عامر سے تعلق رکھنے والا ایک شخص آگے آیا ، اُس نے عرض کی : یا رسول اللہ ! ہم تک یہ روایت پہنچی ہے کہ آپ ریشم اور سونا پہنے کے بارے میں شدید تاکید کرتے ہیں ( کہ اس کو نہیں پہننا ) اس ذات کی قسم ! جس ذات نے آپ کو حق کے ہمراہ مبعوث کیا ہے ، میں جمال کو پسند کرتا ہوں ، اور جمال کو پسند کرنے میں یہ چیز بھی شامل ہے کہ میری اس چھڑی کا غلاف چیتے کی کھال کا ہو ، تو نبی اکرم صلی اللہ علیہ وسلم نے ارشاد فرمایا : اللہ تعالیٰ جمیل ہے ، وہ جمال کو پسند کرتا ہے ، تکبر یہ ہے کہ کوئی شخص حق سے ناواقف رہے ، اور لوگوں کو اپنی نظر میں کم تر سمجھے “ ۔
یہ روایت امام طبرانی نے معجم کبیر میں نقل کی ہے ، اس کی سند میں یہ مذکور ہے ، اسے عبیداللہ بن زحر نے علی بن یزید سے روایت کیا ہے ، اور یہ دونوں راوی ضعیف ہیں ۔

عمر بن خارجہ بن سعد نے ، اپنے دادا سیدنا سعد رضی اللہ عنہ کے حوالے سے یہ بات نقل کی ہے : کچھ لوگوں نے نبی اکرم صلی اللہ علیہ وسلم کی خدمت میں بارش نہ ہونے کی شکایت کی ، نبی اکرم صلی اللہ علیہ وسلم نے انہیں یہ حکم دیا کہ وہ گھٹنوں کے بل کھڑے ہو جائیں ، تو وہ لوگ گھٹنوں کے بل کھڑے ہو گئے ، تو نبی اکرم صلی اللہ علیہ وسلم نے ارشاد فرمایا : تم لوگ یہ پڑھو : ” اے ہمارے پروردگار ! “ ۔ اُن لوگوں نے ایسا ہی کیا ، تو ان لوگوں پر بارش نازل ہونا شروع ہوئی ، ( اور اتنی دیر تک ہوتی رہی ) یہاں تک کہ انہوں نے یہ خواہش کی : کہ کاش کہ یہ بارش ختم ہو جائے ۔ روایت کے یہ الفاظ امام بزار کے نقل کردہ ہیں ، اسے امام طبرانی نے معجم اوسط میں نقل کیا ہے ، عامر بن خارجہ بن سعد نے اپنے والد کے حوالے سے ، اپنے دادا سیدنا سعد رضی اللہ عنہ کے حوالے سے یہ روایت نقل کی ہے : ” کچھ لوگوں نے نبی اکرم صلی اللہ علیہ وسلم کی خدمت میں بارش نہ ہونے کی شکایت کی ، تو آپ صلی اللہ علیہ وسلم نے ارشاد فرمایا : تم لوگ گھٹنوں کے بل جھک جاؤ اور یہ کہو : اے ہمارے پروردگار ! اے ہمارے پروردگار ! پھر نبی اکرم صلی اللہ علیہ وسلم نے شہادت کی انگلی آسمان کی طرف بلند کی ، تو لوگوں پر بارش نازل ہونا شروع ہو گئی ، ( اور اتنی دیر تک ہوتی رہی ) یہاں تک کہ لوگوں نے یہ خواہش کی : کہ اب یہ بارش ختم ہو جائے “ ۔
امام طبرانی کی نقل کردہ روایت درست ہے ، انہوں نے لفظ عام نقل کیا ہے وہ اس طرح ہے ، امام ذہبی نے عامر بن خارجہ کے حالات میں اس شخص کا ذکر اسی طرح کیا ہے ، اور اسے ضعیف قرار دیا ہے ۔

سیدہ رقیقہ رضی اللہ عنہا بنت ابوصیفی بن ہاشم ، جو جناب عبدالمطلب کی والدہ ہیں ، وہ بیان کرتی ہیں : ” قریش پر یکے بعد دیگرے ( قحط سالی کے ) چند ایسے سال آئے ، جنہوں نے ( جانوروں کے ) تھن خشک کر دیے اور ہڈیاں کمزور کر دیں ، ایک مرتبہ میں پریشانی کے عالم میں سوئی ہوئی تھی ، ( یہاں ایک لفظ کے بارے میں راوی کو شک ہے ) کہ اسی دوران کسی ہاتف نے گونج دار آواز میں یہ کہا: اے قریش کے گروہ ! یہ نبی مبعوث ہو گئے ہیں ، ان کے زمانے نے تم پر سایہ کر دیا ہے ، اور ان کے ستارے ظاہر ہونے لگے ہیں ، تو سیرابی اور شادابی کی طرف آ جاؤ ، تم لوگ اپنے میں سے کوئی ایسا شخص تلاش کرو ، جو صحت مند اور مضبوط جسم ، اور سفید چمکدار رنگت کا مالک ہو ، بلند حیثیت کا ہو ، لمبی پلکوں والا ہو ، نرم رخساروں ، ستواں ناک والا ہو ، اس میں ایسی چیز ہو کہ وہ غصہ پر ق ابورکھتا ہو ، اور ایسی عمر رسیدگی ہو کہ اس کی طرف رجوع کیا جاتا ہو ، وہ اور اُس کی اولاد نکلیں ، اور ( قبیلے کی ) ہر شاخ میں سے ایک شخص نکلے ، وہ لوگ غسل کر لیں خوشبو لگا لیں ، رکن کا استلام کریں اور پھر جبل ابوقبیس پر چڑھ جائیں ، پھر وہ شخص دعا کرے ( اور باقی لوگ ) آمین کہیں ، تو تم جتنی چاہو گے ، بارش ہو جائے گی ۔
( سیدہ رقیقہ رضی اللہ عنہا بیان کرتی ہیں : ) جب صبح ہوئی ، تو میں حیران و پریشان تھی ، میں نے اپنا خواب بیان کیا ، میں مکہ میں مختلف جگہوں پر گئی ، تو ہر شخص نے یہی کہا: اس سے مراد ” شیبۃ الحمد “ ( یعنی جناب عبدالمطلب ) ہوں گے ، قریش کے اُمور انہی کے پاس لائے جاتے تھے ، تو ( قبیلے کی ) ہر ایک شاخ کا ایک فرد ان کے پاس آیا ، انہوں نے غسل کیا اور پیدل چل کے جا کر ، حجر اسود کا استلام کیا ، پھر وہ لوگ جبل ابوقیس پر چڑھ گئے ، دیگر لوگ جناب عبدالمطلب کے ارد گرد اکٹھے ہو گئے ، جتنا بھی وہ بھلائی میں پیش رفت کر سکتے تھے ، یہاں تک کہ جب پہاڑ کی چوٹی پر وہ سب لوگ پہنچ گئے ، تو جناب عبدالمطلب کھڑے ہوئے ، اُن کے ساتھ نبی اکرم صلی اللہ علیہ وسلم بھی تھے ، جو اس وقت نوجوان تھے ، یا اس کے قریب کی عمر کے تھے ، انہوں نے دونوں ہاتھ اٹھا کر یہ دعا کی : ” اے اللہ ! مشکل کو بند کرنے والے ، پریشانی کو ختم کرنے والے ! تو علم عطا کرنے والا ہے ، تجھ کو معلومات نہیں دی جاتی ہیں ، تجھ سے مانگا جاتا ہے ، تو بخل والا نہیں ہے ، یہ تیرے بندے اور تیری کنیزیں ہیں ، اور یہ تیرے حرم کی حدود میں موجود ہیں ، یہ تیری بارگاہ میں قحط سالی کی شکایت کر رہے ہیں ، ( جانوروں کے ) سینگ اور کھر رخصت ہو گئے ہیں ( یعنی جانور قحط سالی کی وجہ سے مر رہے ہیں ) ، اے اللہ ! تو ہم پر ایسی بارش نازل فرما ! جو زیادہ اور بھر پور ہو اور سرسبز و شاداب کر دے “ رب کعبہ کی قسم ! ابھی وہ لوگ واپس نہیں آئے تھے ، کہ آسمان سے بارش نازل ہونا شروع ہو گئی اور وادی میں پانی بہنے لگا ، میں نے قریش کے بزرگوں اور جلیل القدر افراد ، عبداللہ بن جدعان ، حرب بن امیہ ، اور ہشام بن مغیرہ کو جناب عبدالمطلب سے یہ کہتے ہوئے سنا : اے ابوبطحاء ! آپ کو مبارک ہو ! سیدہ رقیقہ رضی اللہ عنہا بنت ابوصیفی اس واقعہ کے بارے میں یہ ( اشعار ) کہتی ہیں : ” اے شبیہ الحمد ! اللہ تعالیٰ نے ہمارے شہر کو سیراب کر دیا ، پہلے ہم زندگی کو غیر موجود پاتے تھے ، لیکن پھر بھر پور بارش شروع ہو گئی ، پانی آ گیا اور اس نے نشیبی علاقے میں راستے بنا لیے ، جس نے جانوروں اور درختوں کو زندگی دیدی ، یہ اللہ تعالیٰ کی طرف سے احسان ہے ، جس کی آمد بابرکت ہے ، اور آج کے دن مضر ( قبیلے کے افراد کو ) دی جانے والی سب سے بہتر خوشخبری ہے ، وہ بابرکت معاملے والے ہیں ، ان کے وسیلے سے بارش مانگی گئی ، مخلوق میں کوئی بھی ان کے برابر کا نہیں اور نہ ہی ( کسی کے بارے میں ایسا سوچا جا سکتا ہے “
یہ روایت امام طبرانی نے معجم کبیر میں نقل کی ہے ، اس کی سند میں ایک راوی زحر بن حصن ہے ، امام ذہبی کہتے ہیں : یہ معروف نہیں ہے ۔

سیدنا ابولبابہ بن عبدالمنذر رضی اللہ عنہ بیان کرتے ہیں : نبی اکرم صلی اللہ علیہ وسلم نے بارش کے نزول کی دعا کی ، تو سیدنا ابولبابہ بن عبدالمنذر رضی اللہ عنہ نے عرض کی : یا رسول اللہ ! کھجوریں گوداموں میں پڑی ہوئی ہیں ۔ نبی اکرم صلی اللہ علیہ وسلم نے دعا کی : ” اے اللہ ! ہم پر اتنی بارش نازل فرما کہ ابولبابہ کو اضافی کپڑے اتار کر اپنے تہبند کے ذریعے گودام تک پانی کے راستے کو روکنا پڑے “ ۔ راوی بیان کرتے ہیں : آسمان میں کوئی بادل نظر نہیں آ رہا تھا ، پھر بارش نازل ہونا شروع ہوئی ، ( اور مسلسل ہوتی رہی ) لوگ اکھٹے ہو کر سیدنا ابولبابہ رضی اللہ عنہ کے پاس گئے اور انہوں نے یہ کہا: کہ یہ بارش اُس وقت تک نہیں رکے گی ، جب تک آپ اضافی کپڑے اتار کر اپنے تہبند کے ذریعے گودام تک پانی جانے کو نہیں روکیں گے ، انہوں نے ایسا ہی کیا ، تو بارش رک گئی ۔
یہ روایت امام طبرانی نے معجم صغیر میں نقل کی ہے ، اس روایت کی سند میں ایک راوی ایسا ہے ، جو معروف نہیں ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم جب بارش دیکھتے تھے ، تو یہ دعا کرتے تھے : ” اے اللہ ! یہ تیز بارش ہو اور نفع دینے والی ہو “ ۔
یہ روایت امام بزار نے نقل کی ہے ، اس کی سند میں ایک راوی علی بن عاصم بن صہیب ہے ، جس کے بارے میں کلام کیا گیا ہے ۔

سیدنا سمرہ بن جندب رضی اللہ عنہ بیان کرتے ہیں : نبی اکرم صلی اللہ علیہ وسلم جب بارش کے نزول کی دعا کرتے تھے ، تو یہ کہتے تھے : ” اے اللہ ! ہماری زمین میں ، اس کی برکت ، اس کی زینت اور اس کا سکون نازل فرما ! “ ۔ ایک روایت میں یہ الفاظ ہیں : ” تو ہمیں رزق نصیب فرما ! بے شک تو بہترین رزق دینے والا ہے “ ۔
یہ دونوں روایات امام طبرانی نے معجم کبیر میں نقل کی ہیں ، امام بزار نے اسے اختصار کے ساتھ نقل کیا ہے ، اس کی سند حسن ہے یا صحیح ہے ۔

سیدہ شفاء أم سلیمان رضی اللہ عنہما بیان کرتی ہیں : نبی اکرم صلی اللہ علیہ وسلم نے جمعہ کے دن مسجد میں بارش کے نزول کی دعا کی ، آپ نے دونوں ہاتھ بلند کیے اور آپ نے ارشاد فرمایا : تم لوگ اپنے پروردگار سے مغفرت طلب کرو ، بے شک وہ بہت زیادہ مغفرت کرنے والا ہے پھر آپ اپنی چادر کو پلٹا دیا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی خالد بن الیاس ہے ، وہ ضعیف ہے ، اور وہ کوئی چیز نہیں ہے ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم خطبہ دینے کے دوران دونوں ہاتھ بلند کرتے تھے ، یہاں تک کہ آپ کی بغلوں کی سفیدی نظر آتی تھی ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ، البتہ میں نے راشد اصبہانی نامی راوی ( کا تذکرہ ) نہیں پایا ، جو امام طبرانی کے استاد ہیں ۔

عبدالله بن یزید خطیمی بیان کرتے ہیں : سیدنا عبداللہ بن زبیر رضی اللہ عنہما لوگوں کے لئے بارش کے نزول کی دعا کرنے کے لئے نکلے انہوں نے خطبہ دیا ، پھر اذان اور اقامت کے بغیر نماز پڑھائی ، جب کہ لوگوں میں اس وقت سیدنا براء بن عازب رضی اللہ عنہ اور سیدنا زید بن ارقم رضی اللہ عنہ بھی موجود تھے ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

سیدنا ابوہریرہ رضی اللہ عنہ بیان کرتے ہیں : جب لوگوں کو مدینہ منورہ میں بارش لاحق ہوئی ، اور پرنالے بہنے لگے ، تو نبی اکرم صلی اللہ علیہ وسلم نے ارشاد فرمایا : اس سال تم پر شدت ( یعنی قحط سالی کی پریشانی ) نہیں آئے گی ۔
یہ روایت امام بزار نے اور امام طبرانی نے معجم اوسط میں نقل کی ہے ، اس کی سند میں ایک راوی ابراہیم بن قدامہ ہے ۔ ابن حبان نے اس کا تذکرہ کتاب ” الثقات “ میں کیا ہے ، امام بزار کہتے ہیں : جب یہ کسی حدیث کو نقل کرنے میں منفرد ہو ، تو پھر اس سے استدلال نہیں کیا جائے گا ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک تیز بارش یہاں سے ہوتی ہے “ آپ صلی اللہ علیہ وسلم نے اپنے دست مبارک کے ذریعے آسمان کی طرف اشارہ کر کے یہ بات ارشاد فرمائی ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ۔