مجمع الزوائد ومنبع الفوائد

ایوب بیان کرتے ہیں : میں نے سیدنا انس بن مالک رضی اللہ عنہ اور حسن بصری کو دیکھا ہے کہ وہ عید کے دن امام کے آنے سے پہلے ( نفل ) نماز ادا کرتے تھے ۔ راوی بیان کرتے ہیں : میں نے محمد بن سیرین کو دیکھا ہے کہ وہ آ کر بیٹھ گئے تھے انہوں نے ( نفل نماز ) ادا نہیں کی تھی ۔
یہ روایت امام ابویعلیٰ نے نقل کی ہے ، اور امام طبرانی نے معجم کبیر میں یہ نقل کیا ہے : کہ سیدنا انس رضی اللہ عنہ نے چار رکعات ادا کی تھیں ۔ امام ابویعلیٰ کی روایت کے رجال ” صحیح “ کے رجال ہیں ۔

امام طبرانی رحمہ اللہ نے (المعجم) الکبیر میں روایت کیا ہے : ” سیدنا انس رضی اللہ عنہ چار رکعتیں پڑھا کرتے تھے “ ، اور (مسند) ابویعلیٰ کے راوی صحیح بخاری و مسلم کے راوی ہیں ۔

ابن سیرین اور قتادہ بیان کرتے ہیں : سیدنا عبداللہ بن مسعود رضی اللہ عنہ نے اس کے بعد چار ، یا شاید آٹھ رکعات ادا کی تھیں ، وہ اس ( یعنی نماز عید ) سے پہلے نوافل ادا نہیں کرتے تھے ۔
یہ روایت امام طبرانی نے معجم کبیر میں مستند اسانید کے ساتھ نقل کی ہے ، تاہم یہ روایت مرسل ہے ۔

سیدنا ابومسعود صلی اللہ علیہ وسلم فرماتے ہیں : عید کے دن امام کے آنے سے پہلے نفل پڑھنا سنت نہیں ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

فائدہ ابوورقاء بیان کرتے ہیں : میں سیدنا عبداللہ بن ابواوفی رضی اللہ عنہ کو ساتھ لے کر عید کے دن میدان کی طرف جا رہا تھا انہوں نے فرمایا : تم مجھے منبر کے قریب لے جانا ، جب میں نے انہیں قریب کر دیا تو وہ بیٹھ گئے اور انہوں نے نماز عید سے پہلے ، یا اس کے بعد نوافل ادا نہیں کیے ، اور یہ بات بیان کی : کہ نبی اکرم صلی اللہ علیہ وسلم اس سے پہلے یا اس کے بعد ( نفل ) نماز ادا نہیں کرتے تھے ۔
یہ روایت امام طبرانی نے معجم کبیر میں نقل کی ہے فائد نامی راوی متروک ہے ۔

ابن سیرین بیان کرتے ہیں : سیدنا عبداللہ بن مسعود رضی اللہ عنہ اور سیدنا حذیفہ رضی اللہ عنہ لوگوں کو منع کرتے تھے ( راوی کو شک ہے شاید یہ الفاظ ہیں : ) ان افراد کو بٹھا دیتے تھے ، جنہیں وہ امام کے آنے سے پہلے نوافل پڑھتے ہوئے دیکھتے تھے ایسا عید کے دن ہوتا تھا ) ۔
یہ روایت امام طبرانی نے معجم کبیر میں مختلف اسانید کے ساتھ نقل کی ہے جن میں سے بعض میں یہ بات مذکور ہے : مجھے یہ بات بتائی گئی کہ سیدنا عبداللہ بن مسعود رضی اللہ عنہ اور سیدنا حذیفہ رضی اللہ عنہ ( ایسا کرتے تھے ) تو
یہ روایت ” مرسل “ ہے ، اور سند کے اعتبار سے صحیح ہے ۔

عبدالملک بن کعب بن عجرہ بیان کرتے ہیں : میں عید کے دن سیدنا کعب بن عجرہ رضی اللہ عنہ کے ساتھ عیدگاہ کی طرف گیا ، وہ امام کے آنے سے پہلے بیٹھ گئے ، اور انہوں نے ( کوئی نفل نماز ) ادا نہیں کی ، یہاں تک کہ امام اور لوگوں نے نماز عید ادا کر لی ، تو وہ لوگ مسجد کی طرف یوں روانہ ہوئے ، جیسے وہ ” عنق “ ( شاید یہاں مراد ہر اول دستہ ہے ) ہوں ، میں نے کہا: کہ آپ نے ملاحظہ فرمایا ہے ؟ انہوں نے فرمایا : یہ بدعت ہے ، اور سنت کو ترک کرنا ہے ۔ ایک روایت میں یہ الفاظ ہیں : بہت سی چیزیں جو ہم دیکھتے ہیں ، وہ زیادتی ہوتی ہیں ، اور علم کی کمی کا نتیجہ ہوتی ہیں ، آج کے دن میں یہ دو رکعات ہی نفل ہیں ، یہاں تک کہ یہی نماز تمہیں بلائے ( یعنی تمہیں صرف اسی نماز کی ادائیگی کے لیے آنا چاہیے ) ۔
یہ دونوں روایات امام طبرانی نے معجم کبیر میں نقل کی ہیں ، عبدالملک کا ذکر ابن حبان نے کتاب ” الثقات “ میں کیا ہے ۔

ولید بن سریع بیان کرتے ہیں : ہم لوگ امیرالمؤمنین سیدنا علی بن ابوطالب رضی اللہ عنہ کے ہمراہ عید کے دن ( نماز عید کی ادائیگی کے لئے نکلے ) آپ کے ساتھیوں میں سے کچھ لوگوں نے آپ سے سوال کرتے ہوئے عرض کی : اے امیرالمؤمنین ! عید کے دن نماز عید سے پہلے ، یا اس کے بعد ( نفل ) نماز ادا کرنے کے بارے میں آپ کی کیا رائے ہے ؟ سیدنا علی رضی اللہ عنہ نے ان لوگوں کو کوئی جواب نہیں دیا ، پھر کچھ اور لوگ آئے انہوں نے بھی پہلے لوگوں کی مانند سوال کیا ، تو سیدنا علی رضی اللہ عنہ نے انہیں بھی کوئی جواب نہیں دیا ، جب ہم عیدگاہ پہنچے تو انہوں نے لوگوں کو نماز پڑھاتے ہوئے سات اور پانچ تکبیریں کہیں ، پھر انہوں نے لوگوں کو خطبہ دیا اور پھر منبر سے نیچے اترے اور سوار ہو گئے ، لوگوں نے عرض کی : اے امیرالمؤمنین ! یہ کچھ لوگ ( نفل ) نماز ادا کر رہے ہیں ، تو سیدنا علی رضی اللہ عنہ نے فرمایا : میں کیا کر سکتا ہوں ؟ تم لوگوں نے مجھ سے سنت کے بارے میں دریافت کیا ، تو نبی اکرم صلی اللہ علیہ وسلم نے اس نماز سے پہلے ، یا اس نماز کے بعد کوئی نفل نماز ادا نہیں کی ہے ، جو شخص چاہے وہ ایسا کرے اور جو شخص چاہے وہ اسے ترک کر دے ، کیا تم لوگ میرے بارے میں یہ رائے رکھتے ہو ؟ کہ میں نماز پڑھنے والوں کو منع کروں گا ، اور میں اس شخص کی مانند ہو جاؤں گا ( جس کا ذکر قرآن میں ہے ) کہ اس نے بندے کو روکا ، جب وہ نماز پڑھ رہا تھا ۔
یہ روایت امام بزار نے نقل کی ہے ، وہ فرماتے ہیں : یہ روایت سیدنا علی رضی اللہ عنہ کے حوالے سے صرف اسی سند کے ساتھ منقول ہے ( علامہ ہیثمی فرماتے ہیں : ) میں یہ کہتا ہوں : اس کی سند میں ایک راوی ایسا ہے ، جس سے میں واقف نہیں ہوں ۔

سیدنا ابورافع رضی اللہ عنہ بیان کرتے ہیں : نبی اکرم صلی اللہ علیہ وسلم عیدین کی نماز کے لئے پیدل چل کر جاتے تھے اور آپ اذان اور اقامت کے بغیر نماز عید ادا کرتے تھے ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام این ماجہ نے نقل کی ہے ، تاہم انہوں نے یہ الفاظ نقل نہیں کیے ہیں : ” آپ اذان اور اقامت کے بغیر نماز ادا کرتے تھے “ ۔
یہ روایت امام طبرانی نے معجم کبیر میں محمد بن عبداللہ بن ابورافع کے حوالے سے نقل کی ہے ایک جماعت نے اسے ضعیف قرار دیا ہے ۔ ابن حبان نے اس کا تذکرہ کتاب ” اثقات “ میں کیا ہے ۔

سیدنا براء بن عازب رضی اللہ عنہ بیان کرتے ہیں : نبی اکرم صلی اللہ علیہ وسلم نے عیدالاضحی کے دن اذان اور اقامت کے بغیر نماز ادا کی ، پھر آپ نے مردوں کو خطبہ دیا ، پھر آپ خواتین کی طرف تشریف لے گئے انہیں خطبہ دیا اور انہیں صدقہ کرنے کی ترغیب دی ، یہاں تک کہ سیدنا بلال رضی اللہ عنہ کے پاس بہت سا سامان اکٹھا ہو گیا ۔ ( علامہ ہیثمی فرماتے ہیں : ) میں یہ کہتا ہوں : سیدنا براء رضی اللہ عنہ کے حوالے سے ” صحیح “ اور دوسری کتابوں میں ایک حدیث منقول ہے ، جو اس حدیث کے علاوہ ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبیداللہ بن عمر بن ابان ہے اور میں اس سے واقف نہیں ہوں ۔

سیدنا سعد بن ابی وقاص رضی اللہ عنہ بیان کرتے ہیں : نبی اکرم صلی اللہ علیہ وسلم نے اذان اور اقامت کے بغیر عید کی نماز ادا کی تھی ، آپ صلی اللہ علیہ وسلم نے دو خطبے ارشاد فرمائے تھے ، جن کے درمیان آپ نے بیٹھ کر فصل کیا تھا ۔
یہ روایت امام بزار نے ” وجادہ “ کے طور پر نقل کی ہے ، اور اس کی سند میں ایک راوی ایسا ہے ، جس سے میں واقف نہیں ہوں ۔

سیدنا عبداللہ بن عباس رضی اللہ عنہما فرماتے ہیں : نبی اکرم صلی اللہ علیہ وسلم عید کی نماز میں دو رکعات ادا کرتے تھے آپ ان دونوں میں صرف سورت فاتحہ پڑھتے تھے ، مزید کچھ نہیں پڑھتے تھے ۔
یہ روایت امام أحمد نے نقل کی ہے ، اس کی سند میں ایک راوی شہر بن حوشب ہے ، اس کے بارے میں کلام کیا گیا ہے اور اس کی توثیق بھی کی گئی ہے ۔

سیدنا سمرہ بن جندب رضی اللہ عنہ بیان کرتے ہیں : نبی اکرم صلی اللہ علیہ وسلم عیدین کی نماز میں سورت الاعلیٰ اور سورت الغاشیہ کی تلاوت کرتے تھے ۔
یہ روایت امام أحمد نے اور امام طبرانی نے معجم کبیر میں نقل کی ہے ، امام أحمد کے رجال ” ثقہ “ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم عیدین کی نماز میں سورت عم یتسائلون او سورت والشمس کی تلاوت کرتے تھے ۔
یہ روایت امام بزار نے نقل کی ہے ، اس کی سند میں ایک راوی ایوب بن سیار ہے ، اور وہ ” ضعیف“ ہے ۔

حارث نے سیدنا علی رضی اللہ عنہ کا یہ قول نقل کیا ہے : عید کی نماز میں بلند آواز سے تلاوت کرنا سنت ہے ۔
یہ روایت امام طبرانی نے معجم اوسط میں نقل کی ہے حارث نامی راوی ” ضعیف“ ہے ۔

سیدنا عبدالرحمن بن عوف رضی اللہ عنہ بیان کرتے ہیں : عیدین کے موقع پر ، نبی اکرم صلی اللہ علیہ وسلم کے لئے ایک نیزہ لے جایا جاتا تھا ، جس کی طرف رُخ کر کے آپ صلی اللہ علیہ وسلم نماز ادا کرتے تھے ، آپ تیرہ تکبیریں کہتے تھے ، سیدنا ابوبکر رضی اللہ عنہ اور سیدنا عمر رضی اللہ عنہ بھی ایسا ہی کیا کرتے تھے ۔
یہ روایت امام بزار نے نقل کی ہے ، اس کی سند میں ایک راوی حسن بن حماد بجلی ہے ، اسے کسی نے ضعیف قرار نہیں دیا ، اور کسی نے اس کی توثیق نہیں کی ، مزی نے اس کا ذکر امتیاز کے لئے کیا ہے ، اس روایت کے بقیہ رجال ” ثقہ “ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم عیدین کی نمازوں میں بارہ تکبیریں کہا: کرتے تھے ، پہلی رکعت میں سات تکبیریں کہتے تھے ، اور دوسری میں پانچ تکبیریں کہتے تھے ، آپ ایک راستے سے تشریف لے جاتے تھے ، اور دوسرے راستے سے واپس تشریف لاتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی سلیمان بن ارقم ہے ، اور وہ ” ضعیف“ ہے ۔

سیدنا ابوواقد لیثی رضی اللہ عنہ اور سیدہ عائشہ صدیقہ رضی اللہ عنہا بیان کرتیں ہیں : نبی اکرم صلی اللہ علیہ وسلم نے لوگوں کو عیدالفطر اور عیدالاضحی کے دن عید کی نماز پڑھاتے ہوئے پہلی رکعت میں سات تکبیریں کہی تھیں اور سورت ق کی تلاوت کی تھی ، جب کہ دوسری رکعت میں پانچ تکبیریں کہی تھیں ، اور سورت اقتربت الساعۃ کی تلاوت کی تھی ۔
( علامہ ہیثمی فرماتے ہیں : ) میں یہ کہتا ہوں : سیدنا ابوواقد رضی اللہ عنہ کے حوالے سے منقول حدیث ” صحیح “ میں مذکور ہے ، اور اس میں تلاوت کا ذکر ہے ، تکبیر کا ذکر نہیں ہے ، سیدہ عائشہ صدیقہ رضی اللہ عنہا کے حوالے سے منقول حدیث کو امام ابوداؤد اور دیگر حضرات نے نقل کیا ہے ، اور انہوں نے قرأت کا ذکر نہیں کیا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

کردوس بیان کرتے ہیں : ولید نے سیدنا عبداللہ بن مسعود رضی اللہ عنہ سیدنا حذیفہ رضی اللہ عنہ سیدنا ابوموسی اشعری رضی اللہ عنہ اور سیدنا ابومسعود رضی اللہ عنہ کو شام ہو جانے کے بعد پیغام بھیجا ؟ اُس نے کہا: اب مسلمانوں کی عید آ گئی ہے ، تو نماز کیسے ادا کی جائے ؟ تو ان حضرات نے کہا: تم ابوعبدالرحمن ( یعنی سیدنا عبداللہ بن مسعود رضی اللہ عنہ ) سے سوال کرو ! اس نے اُن سے سوال کیا ، تو سیدنا عبداللہ بن مسعود رضی اللہ عنہ نے فرمایا : وہ کھڑا ہو کر چار تکبیریں کہے گا ، پھر سورت فاتحہ کی اور مفصل سورتوں سے تعلق رکھنے والی ایک سورت کی تلاوت کرے گا ، پھر وہ چار تکبیریں کہے گا ، جن میں سے آخری تکبیر کے ساتھ وہ رکوع میں چلا جائے گا ، تو یہ عیدین میں نو تکبیریں ہوں گی ، تو اُن حضرات میں سے کسی نے بھی اس کا انکار نہیں کیا ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

ابراہیم نخعی بیان کرتے ہیں : ولید بن عقبہ مسجد میں داخل ہوا ، سیدنا عبداللہ بن مسعود رضی اللہ عنہ سیدنا حذیفہ رضی اللہ عنہ اور سیدنا ابوموسیٰ اشعری مسجد کے صحن میں موجود تھے ، ولید نے کہا: عید آ گئی ہے ، تو مجھے کیا کرنا چاہیے ؟ تو سیدنا عبداللہ بن مسعود رضی اللہ عنہ نے فرمایا : تم یہ پڑھو : اللہ اکبر ، پھر تم اللہ تعالیٰ کی حمد بیان کرو ، اُس کی ثنا بیان کرو ، نبی اکرم صلی اللہ علیہ وسلم پر درود بھیجو ! اللہ تعالیٰ سے دعا کرو ، پھر تم اللہ تعالیٰ کی کبریائی بیان کرو ، اس کی حمد بیان کرو ، اس کی ثناء بیان کرو ، نبی اکرم صلی اللہ علیہ وسلم پر درود بھیجو ! پھر تم اللہ تعالیٰ سے دعا کرو ، پھر تم اللہ تعالیٰ کی کبریائی بیان کرو ، اس کی حمد بیان کرو ، اس کی ثناء بیان کرو ، نبی اکرم صلی اللہ علیہ وسلم پر درود بھیجو ! اور اللہ تعالیٰ سے دعا کرو ، پھر تم اللہ تعالیٰ کی کبریائی بیان کرو ، اس کی حمد بیان کرو ، اس کی ثناء بیان کرو ، نبی اکرم صلی اللہ علیہ وسلم پر درود بھیجو اور دعا کرو ! پھر تم تکبیر کہو اور سورت فاتحہ اور ایک سورت کی تلاوت کرو پھر تم تکبیر کہو اور رکوع میں چلے جاؤ اور سجدہ کرو پھر تم اٹھو اور سورت فاتحہ اور ایک سورت کی تلاوت کرو پھر تکبیر کہو اس کی حمد بیان کرو اس کی ثناء بیان کرو نبی اکرم صلی اللہ علیہ وسلم پر درود بھیجو اور اللہ تعالیٰ سے دعا کرو پھر تکبیر کہو اس کی حمد بیان کرو اس کی ثناء بیان کرو نبی اکرم صلی اللہ علیہ وسلم پر درود بھیجو اور رکوع میں چلے جاؤ اور سجدہ کرو ! راوی بیان کرتے ہیں : تو سیدنا حذیفہ رضی اللہ عنہ اور سیدنا ابوموسیٰ اشعری رضی اللہ عنہ نے فرمایا : انہوں نے ٹھیک کہا: ہے ۔
یہ روایت امام طبرانی نے معجم کبیر میں نقل کی ہے ، ابراہیم نامی راوی نے ان صحابہ کرام میں سے کسی کا زمانہ بھی نہیں پایا ہے ،
یہ روایت مرسل ہے ، اور اس کے رجال ” ثقہ “ ہیں ۔

کردوس بیان کرتے ہیں : سیدنا عبداللہ بن مسعود رضی اللہ عنہ عیدالفطر اور عیدالاضحی کی نماز میں نو ، نو تکبیریں کہتے تھے ، وہ سب سے پہلے آغاز میں چار تکبیریں کہتے تھے ، پھر تلاوت کرتے تھے ، پھر ایک تکبیر کہتے تھے ، اور اس کے ذریعے رکوع میں چلے جاتے تھے ، پھر دوسری رکعت میں کھڑے ہوتے تھے ، تو پہلے تلاوت کرتے تھے پھر چار تکبیریں تھے ، اور ان میں سے ایک تکبیر کے ذریعے وہ رکوع میں چلے جاتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا عبداللہ بن مسعود رضی اللہ عنہ فرماتے ہیں : ہر دو تکبیروں کے درمیان ایک کلمے جتنا وقفہ ہو گا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالکریم ہے ، اور وہ ” ضعیف“ ہے ۔

سیدنا عبداللہ رضی اللہ عنہ فرماتے ہیں : عیدین میں ، نماز جنازہ کی طرح چار تکبیریں کہی جائیں گی ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

ابوطرفہ عباد بن ریان لخمی حمصی بیان کرتے ہیں : میں سیدنا مقدام بن معدیکرب رضی اللہ عنہ کی خدمت میں حاضر ہوا ، جو حمص سے چند میل دور ایک گاؤں میں رہتے تھے ، یہ عید کے دن کی بات ہے ، ہم نے کہا: آپ تشریف لے جائیں اور ہمیں عید کی نماز پڑھائیں انہوں نے فرمایا : جی نہیں ! تم لوگ اکیلے ، اکیلے نماز ادا کر لو !
یہ روایت امام طبرانی نے معجم کبیر میں نقل کی ہے ، اور ابوطرفہ نامی راوی سے میں واقف نہیں ہوں ۔

امام شعبی بیان کرتے ہیں : سیدنا عبداللہ بن مسعود رضی اللہ عنہ فرماتے ہیں : جس شخص کی عید کی نماز فوت ہو جائے ، وہ چار رکعات ادا کرے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے عید کے دن اپنی سواری پر موجود رہ کر خطبہ دیا تھا ۔
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔

حبیب بن عمر انصاری بیان کرتے ہیں : میرے والد نے مجھے یہ بات بیان کی ہے : وہ بیان کرتے ہیں : عید کے دن میری ملاقات سیدنا واثلہ رضی اللہ عنہ سے ہوئی ، تو میں نے کہا: اللہ تعالیٰ ہماری اور آپ کی طرف سے قبول فرمائے ، تو انہوں نے فرمایا : جی ہاں ! اللہ تعالیٰ تمہاری اور ہماری طرف سے قبول فرمائے ۔
یہ روایت امام طبرانی نے معجم کبیر میں نقل کی ہے ، حبیب نامی راوی کے بارے میں امام ذہبی نے یہ کہا: ہے : کہ یہ مجہول ہے ، امام ابن حبان رحمہ اللہ نے اس کا ذکر کتاب ” الثقات “ میں کیا ہے ، اس کے والد سے میں واقف نہیں ہوں ۔