مجمع الزوائد ومنبع الفوائد

عطاء بیان کرتے ہیں : انہوں نے سیدنا عبداللہ بن عباس رضی اللہ عنہما کو یہ فرماتے ہوئے سنا ہے : اگر تم سے ہو سکے ، تو تم عیدالفطر کے دن کچھ کھانے سے پہلے ( نماز عید کی ادائیگی کے لیے ) نہ نکلنا ، عطاء فرماتے ہیں : جب سے میں نے سیدنا عبداللہ بن عباس رضی اللہ عنہما کی زبانی یہ بات سنی ہے ، میں نکلنے سے پہلے ضرور کچھ کھا لیتا ہوں ، یہاں تک کہ میں باریک روٹی کا کنارہ کھا لیتا ہوں ، دودھ ، یا پانی پی لیتا ہوں ، میں نے دریافت کیا : اُن کا اس کے ذریعے مقصد کیا تھا ؟ تو انہوں نے بتایا : میرا خیال ہے کہ میں نے انہیں نبی اکرم صلی اللہ علیہ وسلم کے حوالے سے یہ بات نقل کرتے ہوئے سنا ہے : وہ بیان کرتے ہیں : ” وہ لوگ اس وقت تک نہیں نکلتے تھے ، جب تک دن چڑھ نہیں جاتا تھا اور وہ لوگ یہ کہتے تھے : ہم کچھ کھا لیتے ہیں ، تاکہ ہمیں اپنی نماز کے دوران کوئی پریشانی نہ ہو “ ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ، اسے امام طبرانی نے روایت کیا ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم عیدالفطر کے دن نکلنے سے پہلے کچھ کھا لیتے تھے ۔
یہ روایت امام ابویعلیٰ ، امام أحمد ، امام بزار اور امام طبرانی نے معجم اوسط میں نقل کی ہے ، اُن کی روایت کے الفاظ یہ ہیں : ” نبی اکرم صلی اللہ علیہ وسلم عیدالفطر کے دن ( نماز کے لئے ) جانے سے پہلے کچھ کھا لیتے تھے ، اور لوگوں کو بھی اس بات کا حکم دیتے تھے “ ۔ امام طبرانی کی سند میں ، ایک راوی واقدی ہے ، جس کے بارے میں بہت زیادہ کلام کیا گیا ہے ، اور اس سے پہلے عبداللہ بن محمد بن عقیل ہے ، اس کے بارے میں بھی کلام کیا گیا ہے ، ویسے اُس کی توثیق کی گئی ہے ۔

سیدنا عبداللہ بن عباس رضی اللہ عنہما فرماتے ہیں : سنت یہ ہے کہ تم ( نماز عید کی ادائیگی کے لیے ) نکلنے سے پہلے کچھ کھا لو ، خواہ ایک کھجور ہی کیوں نہ ہو ۔
یہ روایت امام بزار نے ، اور امام طبرانی نے معجم اوسط اور معجم کبیر میں نقل کی ہے ، اُن کے الفاظ یہ ہیں : ” سنت یہ ہے کہ تم عیدالفطر کے دن ، اُس وقت تک نہ نکلو ، جب تک تم صدقہ فطر ادا نہیں کر دیتے اور نکلنے سے پہلے کچھ کھا نہیں لیتے “ ۔ امام طبرانی کی سند حسن ہے ، اور امام بزار کی سند میں ایک راوی ایسا ہے ، جس سے میں واقف نہیں ہوں ۔

سیدنا جابر بن سمرہ رضی اللہ عنہ بیان کرتے ہیں : عیدالفطر کے دن نبی اکرم صلی اللہ علیہ وسلم ( نماز کے لئے ) جانے سے پہلے سات کھجوریں کھایا کرتے تھے ، لیکن عیدالاضحی کے دن آپ ( نماز سے پہلے ) کچھ نہیں کھاتے تھے ۔
یہ روایت امام بزار نے نقل کی ہے ، اسے امام طبرانی نے معجم کبیر میں نقل کیا ہے ، اس کی سند میں ایک راوی ابوعبداللہ ناصح بن عبداللہ حائک ہے ، اور وہ متروک ہے ۔

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم عیدالفطر کے دن ، عید گاہ کی طرف جانے سے پہلے کچھ کھا لیتے تھے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سوار بن مصعب ہے ، اور وہ انتہائی ” ضعیف “ ہے ۔

سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم عیدالفطر کے دن اس وقت تک نہیں نکلتے تھے ، جب تک کچھ کھا نہیں لیتے تھے ، البتہ قربانی کے دن ، آپ صلی اللہ علیہ وسلم واپس تشریف لانے سے پہلے کچھ نہیں کھاتے تھے ، اور ( نماز پڑھ کر آنے کے بعد ) ذبیحہ کا گوشت کھاتے تھے ۔
( علامہ ہیثمی فرماتے ہیں : ) میں یہ کہتا ہوں : یہ روایت امام ترمذی نے نقل کی ہے ، تاہم انہوں نے یہ الفاظ نہیں کیے ہیں : ” آپ ذبیحہ کا گوشت کھاتے تھے “ ۔
یہ روایت امام طبرانی نے معجم اوسط میں نقل کی ہے ، اور امام أحمد نے بھی نقل کی ہے ، اس کی سند میں ایک راوی عقبہ بن عبداللہ رفاعی ہے ، اور وہ ” ضعیف “ ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم عید کے لئے تشریف لے جاتے تھے ، تو آپ صلی اللہ علیہ وسلم کے ساتھ نیزہ اور ڈھال ہوتے تھے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابوکرز ہے ، اور وہ ” ضعیف “ ہے ۔

سیدنا سعد بن عمار القرظ رضی اللہ عنہ ، جو نبی اکرم صلی اللہ علیہ وسلم کے مؤذن ہیں ، وہ بیان کرتے ہیں : عیدین کے موقع پر نبی اکرم صلی اللہ علیہ وسلم جب خطبہ دیتے تھے تو آپ صلی اللہ علیہ وسلم کمان کو پکڑ کر خطبہ ارشاد فرماتے تھے ۔ ( علامہ ہیثمی فرماتے ہیں : ) میں یہ کہتا ہوں : ان کے حوالے سے امام ابن ماجہ نے یہ روایت نقل کی ہے : ” جب آپ صلی اللہ علیہ وسلم جنگ کے موقع پر خطبہ دیتے تھے ، تو کمان ہاتھ میں پکڑ کر خطبہ دیتے تھے “ ۔
یہ روایت امام طبرانی نے معجم صغیر میں نقل کی ہے ، اس سے پہلے جمعہ سے متعلق باب میں ایک اور حدیث گزر چکی ہے ، جو ان صحابی کے حوالے سے منقول ہے ، اور معجم کبیر میں نقل ہوئی ہے ، یہ دونوں روایات ضعیف ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم عید کے دن تشریف لے جاتے تھے ، اور اپنے اہل خانہ کو بھی لے جاتے تھے ۔
یہ روایت امام أحمد نے نقل کی ہے ، اس کی سند میں ایک راوی حجاج بن ارطاۃ ہے ، اور اس کے بارے میں کلام کیا گیا ہے ۔ اس کے بقیہ رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم کے زمانہ اقدس میں ، عیدین کے موقع پر پردہ دار لڑکیاں بھی ( نماز کی ادائیگی کے لئے ) نکلتی تھیں ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔

سیدنا عبداللہ بن رواحہ رضی اللہ عنہ کی بہن ، نبی اکرم صلی اللہ علیہ وسلم کے بارے میں یہ بات نقل کرتی ہیں : آپ صلی اللہ علیہ وسلم نے ارشاد فرمایا : ” ہر بڑی عمر کی لڑکی پر نکلنا لازم ہے “ ۔
یہ روایت امام أحمد نے نقل کی ہے ، اور امام ابویعلیٰ نے نقل کی ہے ، انہوں نے یہ الفاظ زائد نقل کیے ہیں : ” عیدین کے موقع پر “
یہ روایت امام طبرانی نے معجم کبیر میں نقل کی ہے ، اس کی سند میں ایک تابعی خاتون ہے ، جن کا نام ذکر نہیں کیا گیا ہے ۔

ام المؤمنین سیدہ عائشہ صدیقہ رضی اللہ عنہا بیان کرتی ہیں : میں نے نبی اکرم صلی اللہ علیہ وسلم سے دریافت کیا : کیا عید کے موقع پر خواتین بھی نکلیں گی ؟ نبی اکرم صلی اللہ علیہ وسلم نے ارشاد فرمایا : جی ہاں ! عرض کی گئی ، لڑکیاں بھی ؟ نبی اکرم صلی اللہ علیہ وسلم نے فرمایا : جی ہاں ! اگر کسی عورت کے پاس لباس ( یعنی سر پر اوڑھنے کے لیے چادر نہ ہو ) جسے وہ پہن سکتی ہو ، تو پھر وہ اپنی ساتھی عورت کی چادر لے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی مطیع بن میمون ہے ، ابن عدی کہتے ہیں : اس کے حوالے سے دو حدیثیں منقول ہیں ، اور وہ دونوں محفوظ نہیں ہیں ، علی بن مدینی کہتے ہیں : وہ ” ثقہ “ ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” خواتین کے لئے نکلنے میں کوئی حصہ نہیں ہے ، البتہ اگر وہ مجبور ہو تو معاملہ مختلف ہے ، اس سے مراد یہ ہے کہ اگر عورت کا خادم نہ ہو ، تو البتہ عیدالاضحی اور عیدالفطر دونوں عیدوں کا معاملہ مختلف ہے ، اور مردوں کو راستے میں ، صرف کنارے کا حق ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی سوار بن مصعب ہے ، اور وہ متروک الحدیث ہے ۔

عتبہ بن عبداللہ بن عمرو بیان کرتے ہیں : میرے والد نے ، میرے دادا کا یہ بیان نقل کیا ہے : ایک مرتبہ میں نبی اکرم صلی اللہ علیہ وسلم کے پاس عید کے دن موجود تھا ، آپ صلی اللہ علیہ وسلم نے ارشاد فرمایا : انصار کے سردار کو میرے پاس بلا کے لاؤ ! لوگوں نے سیدنا ابی بن کعب رضی اللہ عنہ کو بلایا نبی اکرم صلی اللہ علیہ وسلم نے ارشاد فرمایا : اے ابی ! تم عیدگاہ جاؤ اور وہاں جھاڑو دینے کا حکم دو ، اور لوگوں کو ہدایت کرو کہ وہ نکلیں ، جب وہ دروازے تک پہنچے ، تو واپس آ گئے اور بولے : یا رسول اللہ ! کیا خواتین بھی ؟ نبی اکرم صلی اللہ علیہ وسلم نے ارشاد فرمایا : جوان لڑکیاں اور حیض والی خواتین بھی لوگوں کے ساتھ ہوں گی ، اور وہ دعا میں شریک ہوں گی ۔
یہ روایت امام طبرانی نے معجم کبیر نقل کی ہے ، اس کی سند میں ایک راوی یزید بن شداد ہنائی ہے ، جو مجہول ہے ، اسی طرح عتبہ بن عبداللہ بن عمرو بن العاص نامی راوی بھی مجہول ہے ۔

سیدنا سعد بن ابی وقاص رضی اللہ عنہ بیان کرتے ہیں : نبی اکرم صلی اللہ علیہ وسلم عید کے لئے پیدل تشریف لے جاتے تھے ، اور واپس آتے ہوئے دوسرے راستے سے آتے تھے ، جو اس راستے سے مختلف ہوتا تھا ، جس سے آپ تشریف لے گئے تھے ۔
یہ روایت امام بزار نے نقل کی ہے ، اس کی سند میں ایک راوی خالد بن الیاس ہے ، اور وہ متروک ہے ۔

سیدنا عبدالرحمن بن حاطب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا آپ ( عید گاہ ) کے لئے تشریف لے گئے ، آپ تشریف ایک راستے سے لے کر گئے تھے ، اور دوسرے راستے سے واپس تشریف لائے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی خالد بن الیاس ہے ، اور وہ متروک ہے ، سیدنا عبداللہ بن عباس رضی اللہ عنہما سے منقول حدیث آگے آئے گی ۔

سعید بن اوس انصاری ، اپنے والد کا یہ بیان نقل کرتے ہیں : نبی اکرم صلی اللہ علیہ وسلم نے ارشاد فرمایا : ” جب عیدالفطر کا دن ہوتا ہے ، تو فرشتے راستوں میں ٹھہر جاتے ہیں اور وہ بلند آواز میں پکار کر کہتے ہیں : اے مسلمانوں کے گروہ ! اپنے معزز پروردگار کی طرف جاؤ ! جو بھلائی کا احسان کر رہا ہے ، اور اس کی جزا عطا کرے گا ، تمہیں رات کے وقت نوافل ادا کرنے کا حکم دیا گیا ، تم نے وہ ادا کیے ، تمہیں دن کے وقت روزے رکھنے کا حکم دیا گیا ، تم نے روزہ رکھا اور اپنے پروردگار کی اطاعت کی ، تو اب اپنا بدلہ وصول کر لو ! جب لوگ نماز ادا کر لیتے ہیں ، تو ایک منادی پکار کر یہ کہتا ہے : خبردار ! تمہارے پروردگار نے تمہاری مغفرت کر دی ہے ، تو اب تم ایسی حالت میں اپنے گھروں کو واپس جاؤ کہ تم ہدایت یافتہ ہو ، تو یہ بدلے کا دن ہے ، آسمان میں اس دن کو ” بدلے کا دن “ کہا: گیا ہے “ ۔ ایک روایت میں لفظ ” کریم پروردگار “ کی بجائے ” رحیم پروردگار “ کے الفاظ ہیں ، وہ فرماتا ہے : ” میں نے تم لوگوں کے تمام گناہوں کی مغفرت کر دی ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی جابر جعفی ہے ، جسے سفیان ثوری نے ” ثقہ “ قرار دیا ہے انہوں نے اس سے روایت بھی نقل کی ہے ، اور شعبہ نے بھی نقل کی ہے ، لوگوں نے اسے ضعیف قرار دیا ہے ، اور وہ متروک ہے ۔

سیدنا عبداللہ بن مسعود رضی اللہ عنہ فرماتے ہیں : نبی اکرم صلی اللہ علیہ وسلم عیدین کے موقع پر یہ دعا کرتے تھے : ” اے اللہ ! بے شک ہم تجھ سے یہ سوال کرتے ہیں : کہ ایسی زندگی ہو ، جو محفوظ ہو اور ایسی موت ہو ، جو ٹھیک ہو ، اور ایسی واپسی جس میں رسوائی نہ ہو اور شرمندگی نہ ہو ، اے اللہ ! تو ہمیں اچانک ہلاکت کا شکار نہ کرنا ، اور اچانک ہماری پکڑ نہ کرنا ، اور ہمیں اتنی جلدی موت نہ دینا ، کہ کوئی حق رہ گیا ہو ، یا وصیت نہ کی جا سکے ، اے اللہ ! بے شک ہم تجھ سے ۔ پاکدامنی کا ، خوشحالی ، پرہیزگاری ، ہدایت کا ، دنیا اور آخرت میں اچھے انجام کا سوال کرتے ہیں ، اور شک سے ، اختلاف سے ، اور تیرے دین کے بارے میں ریاکاری اور دکھاوے سے تیری پناہ مانگتے ہیں ، اے دلوں کو پھیرنے والے ! تو ہمیں ہدایت نصیب کرنے کے بعد ، ہمارے دلوں کو ٹیڑھا نہ کر دینا ، اور ہمیں اپنے فضل سے رحمت عطا کرنا ، بے شک تو بہت زیادہ عطا کرنے والا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی نہشل مستقل بن سعید ہے ، اور وہ متروک ہے ۔

وہب بن کیسان بیان کرتے ہیں : میں نے عید کے دن سیدنا عبداللہ بن زبیر رضی اللہ عنہما کو یہ فرماتے ہوئے سنا : جب انہوں نے خطبہ سے پہلے نماز ادا کی تھی ، اور پھر کھڑے ہو کر لوگوں کو خطبہ دیا تھا ( تو یہ فرمایا تھا : ) اے لوگو ! یہ سب اللہ تعالیٰ کی ( مقرر کردہ ) سنت ہے ، اور اس کے رسول کی سنت ہے ۔
یہ روایت امام أحمد نے نقل کی ہے ، اور اس کے رجال ” اللہ “ ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم سیدنا ابوبکر رضی اللہ عنہ اور سیدنا عمر رضی اللہ عنہ عید کے دن خطبہ سے پہلے نماز ادا کرتے تھے ۔

یہ روایت امام طبرانی نے معجم اوسط میں نقل کی ہے ، اور اس کے رجال ” ثقہ“ ہیں اور یہ ” صحیح“ میں ان الفاظ میں منقول ہے : ” قربانی کے دن ، نبی اکرم صلی اللہ علیہ وسلم نے نماز ادا کی ، پھر آپ نے خطبہ دیا“ ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم عیدالفطر اور عیدالاضحی کے دن پہلے نماز ادا کرتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ۔