مجمع الزوائد ومنبع الفوائد

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جمعہ کے دن فرشتے مساجد کے دروازوں پر بیٹھ جاتے ہیں ان کے پاس صحیفے ہوتے ہیں وہ لوگوں کے نام نوٹ کرتے ہیں جب امام آ جاتا ہے ، تو صحیفے لپیٹ دیے جاتے ہیں“ ۔ راوی بیان کرتے ہیں : میں نے کہا: اے سیدنا ابوامامہ ! جو شخص امام کے آنے کے بعد آتا ہے کیا اس کا جعہ نہیں ہوتا ہے ؟ انہوں نے فرمایا : ہوتا ہے ، لیکن یہ ان افراد میں شامل نہیں ہوتا جن کے نام صحیفے میں نوٹ کیے جاتے ہیں ۔
یہ روایت امام أحمد نے نقل کی ہے ، اور امام طبرانی نے معجم کبیر میں نقل کی ہے ، اس کی سند میں ایک راوی مبارک بن فضالہ ہے ، جسے ایک جماعت نے ” ثقہ “ قرار دیا ہے ، اور دیگر حضرات نے اسے ضعیف قرار دیا ہے ۔

سیدنا ابوامامہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ( جمعہ کے دن ) فرشتے مساجد کے دروازوں پر بیٹھ جاتے ہیں اور درجہ بدرجہ پہلے آنے والے لوگوں کے نام نوٹ کرتے ہیں یہاں تک کہ امام آ جاتا ہے ، تو وہ صحیفے اٹھا لیتے ہیں “ ۔
یہ روایت امام أحمد نے اور امام طبرانی نے معجم کبیر میں اس کی مانند نقل کی ہے امام أحمد کے رجال ” ثقہ “ ہیں ۔

سیدنا علی بن ابوطالب رضی اللہ عنہ بیان کرتے ہیں : جب جمعہ کا دن آتا ہے ، تو شیاطین نکلتے ہیں ، اور لوگوں کو بازار کی طرف لے کر جاتے ہیں ان شیاطین کے پاس جھنڈے ہوتے ہیں ، جبکہ فرشتے مساجد کے دروازوں پر بیٹھ جاتے ہیں ، اور وہ لوگوں کی منزلت ( یعنی آمد کی ترتیب ) کے اعتبار سے ان کے نام نوٹ کرتے ہیں کہ پہلے کون آیا اس کے بعد کون آیا یہاں تک کہ جب امام آ جاتا ہے ، تو جو شخص امام کے قریب ہو اور خاموش رہے ، اور غور سے خطبہ سنے اور کوئی لغو حرکت نہ کرے تو اسے اجر کے دو کفل ملتے ہیں ، اور جو شخص امام سے دور ہو اور غور سے خطبہ سنے اور کوئی لغو حرکت نہ کرے تو اسے اجر کا ایک کفل ملتا ہے ، جو شخص امام کے قریب ہو اور لغو حرکت کرے اور خاموش نہ رہے ، اور غور سے خطبہ نہ سنے تو اسے گناہ کے دو کفل ملتے ہیں ، اور جو شخص امام سے دور ہو اور لغو حرکت کرے اور خاموش بھی نہ رہے اور غور سے خطبہ بھی نہ سنے تو اسے گناہ کا ایک کفل ملتا ہے ، اور جو شخص ( کسی دوسرے شخص کو یہ کہے : تم خاموش رہو ، تو اس نے کلام کیا اور جس شخص نے کلام کیا ہو اس کا جمعہ نہیں ہوتا ۔ اس کے بعد انہوں نے یہ بات بیان کی کہ میں نے تمہارے نبی کو اسی طرح ارشاد فرماتے ہوئے سنا ہے : ( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس روایت کا کچھ حصہ نقل کیا ہے ۔
یہ روایت امام أحمد نے نقل کی ہے ، اور اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب جمعہ کا دن ہوتا ہے ، تو فرشتے مساجد کے دروازوں پر بیٹھ جاتے ہیں ، اور لوگوں کے نام ان کی آمد کی ترتیب کے حساب سے نوٹ کرتے ہیں تو کوئی شخص یوں ہوتا ہے جیسے اس نے اونٹ صدقہ کیا ہو ، کوئی شخص یوں ہوتا ہے ، جیسے اس نے گائے صدقہ کی ہو کوئی شخص یوں ہوتا ہے جیسے اس نے بکری صدقہ کی ہو کوئی شخص یوں ہوتا ہے جیسے اس نے مرغی صدقہ کی ہو کوئی شخص یوں ہوتا ہے جیسے اس نے انڈا صدقہ کیا ہو نبی اکرم صلی اللہ علیہ وسلم فرماتے ہیں : جب مؤذن اذان دیتا ہے ، اور امام منبر پر بیٹھ جاتا ہے ، تو صحیفے لپیٹ دیے جاتے ہیں ، اور فرشتے مسجد میں داخل ہو کر ذکر ( یعنی خطبہ ) غور سے سنتے ہیں “ ۔
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔

سیدنا سمرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : جمعہ میں شریک ہو امام کے قریب رہو کیونکہ ایک شخص جو اہل جنت سے تعلق رکھتا ہے وہ اگر جمعہ سے پیچھے رہ جائے تو وہ جنت سے پیچھے رہ جاتا ہے حالانکہ وہ اس کے اہل میں سے ہوتا ہے “ ۔
یہ روایت امام طبرانی نے معجم صغیر میں نقل کی ہے ، اس کی سند میں ایک راوی حکم بن عبدالملک ہے ، اور وہ ” ضعیف“ ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص جمعہ کے دن غسل کرے اور سر دھوئے اور جلدی جائے اور قریب رہے ، اور غور سے سنے اور خاموش رہے ، تو اسے اجر کے دو کفل ملتے ہیں“ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عفیر بن معدان ہے ، جس کے ضعیف ہونے پر محدثین کا اتفاق ہے ۔

انہوں نے اس سند کے ساتھ سیدنا ابوامامہ کے حوالے سے نبی اکرم صلی اللہ علیہ وسلم کا یہ فرمان نقل کیا ہے : “” “” جمعہ کے لئے جلدی جانے والا اونٹ کی قربانی کرنے والے کی مانند ہے ، اس کے بعد والا بیل کی قربانی ( یعنی صدقہ ) کرنے وانے کی مانند ہے ، اس کے بعد والا بکری کی قربانی کروانے کی مانند ہے ، اس کے بعد والا مرغی کی قربانی کرنے والے کی مانند ہے “ ۔

سیدنا واثلہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ جمعہ کے دن فرشتوں کو مساجد کے دروازوں پر بھیجتا ہے ، جو لوگوں میں پہلے دوسرے نمبر پر تیسرے نمبر پر چوتھے نمبر پر پانچویں نمبر پر اور چھٹے نمبر پر آنے والے لوگوں کے نام نوٹ کرتے ہیں جب وہ ساتویں نمبر پر پہنچتے ہیں تو وہ چڑیوں کے ایک ساتھ چلنے کی مانند ہو جاتے ہیں “ ۔
یہ روایت امام طبرانی نے معجم کبیر میں بشیر بن عون قرشی کی نقل کردہ روایت کے طور پر نقل کی ہے ۔ ابن حبان کہتے ہیں : اس نے تقریبا ایک سو احادیث روایت کی ہیں ، اور وہ ایجاد کی ہوئی ہیں ۔

سیدنا شداد بن اوس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص جمعہ کے دن غسل کرنے اور سر دھوئے اور جلدی جائے اور امام کے قریب بیٹھے اور غور سے خطبہ سنے اور خاموش رہے ، تو اسے اپنے اٹھائے ہوئے ہر ایک قدم کے عوض میں ایک سال کے عمل کا یعنی سال بھر کے روزوں اور قیام کا ثواب ملتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالوہاب بن ضحاک ہے ، اور وہ متروک ہے ۔

سیدنا ابوطلحہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص ( جمعہ کے دن ) غسل کرے اور سر کو دھوئے اور جائے اور جلدی جائے اور امام کے قریب رہے ، اور خاموش رہے ، اور جمعہ کے دن کوئی لغو حرکت نہ کرے تو اس کے مسجد کی طرف اٹھائے جانے والے ہر ایک قدم کے عوض میں اللہ تعالیٰ اس کے لئے ایک سال کے روزوں اور قیام کا ثواب نوٹ کرتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابراہیم بن محمد بن جناح ہے میں نے کسی کو اس کا ذکر کرتے ہوئے نہیں پایا ہے ، اس روایت کے بقیہ رجال ” ثقہ “ ہیں ۔

ابوعبیدہ بیان کرتے ہیں : سیدنا عبداللہ فرماتے ہیں : جمعہ کی طرف جلدی جاؤ کیونکہ اللہ تعالیٰ ہر جمعہ کے دن اہل جنت کے سامنے کافور کے بنے ہوئے ٹیلے پر آئے گا ، اور وہ اللہ تعالیٰ کی بارگاہ میں اسی حساب سے مقرب ہوں گے جتنی جلدی وہ جمعہ کے لئے جایا کرتے تھے اللہ تعالی ان کے ساتھ بات چیت کرے گا یہ ایک ایسی عزت افزائی ہو گی کہ انہوں نے اس جیسی کوئی چیز اس سے پہلے نہیں دیکھی ہو گی پھر جب وہ لوگ اپنے اہل خانہ کی طرف واپس جائیں گے تو انہیں یہ بتائیں گے کہ اللہ تعالی نے ان پر کیا انعام و اکرام کیا ہے راوی بیان کرتے ہیں : ایک مرتبہ سیدنا عبداللہ مسجد میں داخل ہوئے تو جمعہ کے دن اُن سے پہلے دو افراد آ چکے تھے تو سیدنا عبداللہ رضی اللہ عنہ نے فرمایا : دو آدمی پہلے آ گئے ہیں ( میں تیسرا ہوں ) اگر اللہ نے چاہا تو وہ تیسرے میں بھی برکت رکھے گا ( علامہ ہیثمی فرماتے ہیں : ) میں یہ کہتا ہوں : ان کے حوالے سے منقول ایک حدیث امام ابن ماجہ نے بھی نقل کی ہے ، جو ” مرفوع “ روایت ہے ، اور اس سے زیادہ مختصر ہے ۔
یہ روایت امام طبرانی نے معجم کبیر میں نقل کی ہے ابوعبیدہ نامی راوی نے اپنے والد سے سماع نہیں کیا ہے ۔