مجمع الزوائد ومنبع الفوائد

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جمعہ پچاس افراد پر لازم ہوتا ہے پچاس سے کم افراد ہوں تو جمعہ لازم نہیں ہوتا“ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی جعفر بن زبیر ہے ، جو قاسم کا شاگرد ہے ، اور وہ انتہائی ” ضعیف “ ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب ہم میں سے ستر افراد جمعہ کے لئے جائیں تو وہ سیدنا موسیٰ کے ستر افراد کی مانند ہوں گے جو اپنے پروردگار کی بارگاہ میں وفد کے طور پر گئے تھے یا اُن سے زیادہ فضیلت رکھتے ہوں گے “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی أحمد بن بکر بالسی ہے ازدی کہتے ہیں : یہ حدیث ایجاد کرتا تھا ۔