مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم کے دو کپڑے تھے جنہیں آپ جمعہ کے دن پہنتے تھے جب آپ نماز پڑھ کر واپس آتے تھے تو ہم انہیں اگلے جمعہ کے لئے لپیٹ کے رکھ دیتے تھے ۔
یہ روایت امام طبرانی نے معجم صغیر اور معجم اوسط میں نقل کی ہے اصل میں اس کے بعض رجال ساقط ہیں ، اور اس بات پر امام طبرانی کا کلام دلالت کرتا ہے ، جو لوگ ساقط ہیں ان میں ایک راوی واقدی ہے ، جس کے بارے میں بہت زیادہ کلام کیا گیا ہے ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ اور اس کے فرشتے جمعہ کے دن عمامہ باندھنے والوں پر رحمت نازل کرتے ہیں “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ایوب بن مدرک ہے یحیی بن معین کہتے ہیں : یہ کذاب ہے ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے والے باب میں یہ بات بیان کی جا چکی ہے کہ جمعہ کے لئے لباس میں سب سے عمدہ لباس پہننا چاہیے ۔