مجمع الزوائد ومنبع الفوائد

سیدنا ابوسعید خدری رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص جمعہ کے دن روزہ رکھ لے بیمار کی عیادت کرے جنازے میں شریک ہو صدقہ کرے اور غلام آزاد کرے اس کے لئے جنت واجب ہو جاتی ہے “ ۔
یہ روایت امام ابویعلیٰ نے نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ۔

سیدنا ابوسعید خدری رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” پانچ کام ایسے ہیں جنہیں کوئی شخص ایک دن میں کر لے گا ، تو اللہ تعالیٰ اسے اہل جنت میں نوٹ کر لے گا ، جو شخص جمعہ کے دن روزہ رکھے جمعہ کی نماز ادا کرنے کے لئے جائے جنازے میں شریک ہو اور غلام آزاد کرے “ ۔ ( علامہ ہیثمی فرماتے ہیں : ) میں یہ کہتا ہوں : میرا خیال یہ ہے ، اس میں یہ ذکر نہیں ہوا : ” اور بیمار کی عیادت کرئے “ ۔
یہ روایت امام ابویعلیٰ نے نقل کی ہے ، اور اس کے رجال ” ثقہ “ ہیں ۔

سیدنا ابوامامہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص جمعہ کی نماز ادا کرے اس دن روزہ رکھے بیمار کی عیادت کرے جنازے میں شریک ہو نکاح میں شریک ہو اس کے لئے جنت واجب ہو جاتی ہے “ ۔
یہ روایت امام طبرانی نے معجم اوسط میں نقل کی ہے ، اس کے رجال میں ایک راوی محمد بن حفص اوصابی ہے ، اور وہ ” ضعیف “ ہے ۔ ابن حبان نے اس کا تذکرہ کتاب ” الثقات “ میں کیا ہے ، اور یہ بات بیان کی ہے یہ غریب روایات نقل کرتا ہے ۔

سیدنا ابوسعید خدری رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم نے ہمیں خطبہ دیتے ہوئے ارشاد فرمایا : بے شک اللہ تعالیٰ نے میرے اس جگہ کھڑے ہونے کے دوران اس گھڑی میں اس مہینے میں اس سال میں ( یعنی اس وقت سے لے کر ) قیامت کے دن تک کے لئے جمعہ تم لوگوں پر لازم قرار دے دیا ہے ، جو شخص کسی عذر کے بغیر اسے ترک کرے گا خواہ وہ عادل حکمران کے پیچھے یا ظالم حکمران کے پیچھے ہو ، تو اللہ تعالیٰ اس کے معاملات کو جمع نہیں کرے گا ، اس کے معاملے میں اس کے لئے برکت نہیں رکھی جائے گی خبردار اس شخص کی نماز نہیں ہو گی خبردار اس شخص کا حج نہیں ہو گا خبردار اس شخص کی کوئی نیکی قبول نہیں ہو گی خبردار اس شخص کا صدقہ قبول نہیں ہو گا“ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی موسیٰ بن عطیہ باہلی ہے میں نے کسی کو اس کے حالات بیان کرتے ہوئے نہیں پایا ہے ، اس روایت کے بقیہ رجال ” ثقہ “ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص اللہ تعالٰی اور آخرت کے دن پر ایمان رکھتا ہو اس پر جمعہ ادا کرنا لازم ہے البتہ غلام یا عورت یا بچے کا معاملہ مختلف ہے ، اور جو شخص دلچسپی کی کسی چیز یا تجارت کی وجہ سے اس سے بے نیازی اختیار کرے گا اللہ تعالی اس شخص سے بے نیازی اختیار کرے گا ، اور اللہ تعالیٰ بے نیاز ہے ، اور لائق حمد ہے “ ۔
یہ روایت امام طبرانی نے معجم اوسط میں عبدالعظیم بن رغبان کی ابومعشر سے نقل کردہ روایت کے طور پر نقل کی ہے ، اور ابومعشر نامی راوی ضعیف ہونے کے زیادہ قریب ہے ، اور عبدالعظیم نامی راوی کے حالات بیان کرتے ہوئے میں نے کسی کو نہیں پایا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جمعہ واجب ہے البتہ اس شخص کا معاملہ مختلف ہے ، جو کسی کی ملکیت ہو یا کسی علت ( یعنی بیماری ) کا شکار ہو“ ۔
یہ روایت امام طبرانی نے معجم کبیر میں نقل کی ہے ابوالبلاد نامی راوی کے بارے میں امام ابوحاتم نے یہ کہا: ہے ، اس سے استدلال نہیں کیا جائے گا ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جمعہ واجب ہے البتہ عورت یا بچے یا بیمار یا غلام یا مسافر کا معاملہ مختلف ہے ( یعنی ان پر واجب نہیں ہے ) “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ضرار ہے وہ تابعین سے روایات نقل کرتا ہے میرا خیال ہے کہ یہ ابن عمرو ملطی ہے ، اور وہ ” ضعیف“ ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” پانچ قسم کے لوگوں پر جمعہ لازم نہیں ہے عورت مسافر بچہ غلام اور دیہات کا رہنے والا فرد “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابراہیم بن حماد ہے ، جسے دارقطنی نے ضعیف قرار دیا ہے ۔

سیدنا ابوقتادہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” عورتوں پر جنگ میں حصہ لینا یا جمعہ ادا کرنا یا جنازے کے ساتھ جانا لازم نہیں ہے “ ۔
یہ روایت امام طبرانی نے معجم صغیر میں نقل کی ہے ، اس روایت کے تمام راوی سیدنا ابوقتادہ رضی اللہ عنہ کی اولاد سے تعلق رکھتے ہیں ، اور ان میں مجہول راوی بھی ہیں ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں یہ حکم دیا تھا کہ ہم جمعہ میں شریک ہوں ، اور اس سے غائب نہ رہیں آپ نے ارشاد فرمایا تھا : تم میں سے کوئی ایک اپنی جگہ کا زیادہ حق رکھتا ہو گا جب وہ اس کی طرف واپس آئے ۔
یہ روایت امام بزار نے نقل کی ہے ، اس کی سند میں ایک راوی یوسف بن خالد سمتی ہے ، اور وہ ” ضعیف“ ہے ۔ میں یہ کہتا ہوں : جمعہ ترک کرنے والے شخص کے بارے میں احادیث آگے آئیں گی ، اگر اللہ نے چاہا ۔