مجمع الزوائد ومنبع الفوائد

سیدنا یعلی بن امیہ رضی اللہ عنہ بیان کرتے ہیں : نبی اکرم صلی اللہ علیہ وسلم سفر کر رہے تھے بارش ہو گئی لیکن ہمارے نیچے تری تھی اور اوپر بارش تھی اور وہ جگہ تنگ تھی نماز کا وقت ہو گیا نبی اکرم صلی اللہ علیہ وسلم نے سیدنا بلال رضی اللہ عنہ کو حکم دیا انہوں نے اذان دی اقامت کہی نبی اکرم صلی اللہ علیہ وسلم آگے بڑھے آپ نے اپنی سواری پر رہتے ہوئے اور لوگوں نے اپنی سواریوں پر رہتے ہوئے اشارے کے ساتھ نماز ادا کی تھی آپ سجدے میں رکوع کی بہ نسبت زیادہ جھک جاتے تھے ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابویعلیٰ نے سیدنا یعلی بن مرہ رضی اللہ عنہ کی نقل کردہ روایت کے طور پر نقل کی ہے ، اور یہاں یہ سیدنا یعلی بن امیہ کے حوالے سے منقول ہے ۔
یہ روایت امام طبرانی نے معجم کبیر میں نقل کی ہے ، اس کی سند امام ابوداؤد والی سند ہے ، اور اس کے رجال کی توثیق کی گئی ہے البتہ امام ابوداؤد نے یہ کہا: ہے
یہ روایت غریب ہے عمر بن رماح نامی راوی اس کو نقل کرنے میں منفرد ہے ۔

علقمہ بن عبداللہ مزنی اپنے والد کا یہ بیان نقل کرتے ہیں : نبی اکرم صلی اللہ علیہ وسلم نے ارشاد فرمایا : جب تم نرکل ( یعنی کانے والے علاقے ) یا برف ( یعنی برفانی علاقے ) یا کیچڑ میں ہو ، اور نماز کا وقت ہو جائے ، ( اور زمین پر نماز ادا نہ کی جا سکتی ہو ) تو اشارے کے ساتھ نماز ادا کر لو “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی محمد بن قضاء ہے ، اور وہ ” ضعیف “ ہے ۔

سیدنا عمرو بن یعلی رضی اللہ عنہ بیان کرتے ہیں : فرض نماز کے وقت میں موجود تھا ہم لوگ نبی اکرم صلی اللہ علیہ وسلم کے ساتھ سواریوں پر سوار تھے نبی اکرم صلی اللہ علیہ وسلم نے ہماری امامت کی آپ ہم سے آگے ہو گئے آپ نے ہماری امامت کی اور ہم نے اپنی سواریوں پر ہی نماز ادا کی
یہ روایت امام بزار نے نقل کی ہے ، اس کی سند میں ایک راوی عبدالاعلیٰ بن عامر ہے ، اور وہ ” ضعیف“ ہے ۔

انس بن سیرین بیان کرتے ہیں : ہم لوگ سیدنا انس بن مالک رضی اللہ عنہ کے ہمراہ کوفہ سے آ رہے تھے یہاں تک کہ جب ہم اطیط کے مقام پر پہنچے تو وہ جگہ ایسی تھی جہاں کیچڑ موجود تھا تو سیدنا انس رضی اللہ عنہ نے سواری پر رہتے ہوئے فرض نماز ادا کی پھر انہوں نے یہ بات بیان کی آج کے دن سے پہلے میں نے کبھی بھی فرض نماز سواری پر ادا نہیں کی ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

عزہ نامی خاتون جو پہلی خواتین میں سے ایک ہیں وہ بیان کرتی ہیں : سیدنا ابوبکر نے ہمیں خطبہ دیتے ہوئے یہ بات ارشاد فرمائی : تم لوگ ” برادع “ ( وہ چیز جو خچر یا گدھے کی پشت پر رکھی جاتی ہے ، جس طرح گھوڑے کی پشت پر زین رکھی جاتی ہے اس ) پر رہتے ہوئے نماز ادا نہ کرو !
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں اگرچہ عزہ نامی خاتون صحابیہ ہیں لیکن بظاہر یہ لگتا ہے کہ یہ ابوحازم کا بیان ہے ۔

سیدنا ابوموسی اشعری نبی اکرم صلی اللہ علیہ وسلم کے حوالے سے یہ بات نقل کرتے ہیں : سفر کے دوران سواری کی پشت پر نماز اس ، اس طرح ادا کی جائے گی ۔
یہ روایت امام أحمد نے اور امام طبرانی نے معجم اوسط میں نقل کی ہے ، اس کی سند میں ایک راوی یونس بن حارث ہے ، جسے امام أحمد اور دیگر حضرات نے ضعیف قرار دیا ہے ۔ ابن حبان ابو أحمد ابن عدی اور ایک روایت کے مطابق یحیی بن معین نے اسے ” ثقہ “ قرار دیا ہے ۔

سیدنا ہرماس بن زیاد رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو اونٹ پر سوار ہو کر شام کی طرف رُخ کر کے نماز ادا کرتے ہوئے دیکھا ہے ۔
یہ روایت امام أحمد نے اور امام طبرانی نے معجم کبیر میں نقل کی ہے ، اور اس کی سند میں ایک راوی عبداللہ بن واقد حرانی ہے ، جسے امام أحمد اور ایک روایت کے مطابق یحیی بن معین نے ” ثقہ “ قرار دیا ہے امام بخاری رحمہ اللہ فرماتے ہیں : لوگوں نے اسے ترک کر دیا تھا ایک جماعت نے اس راوی کو ضعیف قرار دیا ہے ۔

سیدنا ابوسعید خدری رضی اللہ عنہ اور سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم اپنی سواری پر نفل نماز ادا کر لیتے تھے خواہ اس کا رخ جس بھی طرف ہو آپ اشارے کے ساتھ نماز ادا کرتے تھے ، اور سجدے میں رکوع کی بہ نسبت زیادہ جھک جاتے تھے ۔ ( علامہ ہیثمی فرماتے ہیں : ) میں یہ کہتا ہوں : سیدنا عبداللہ بن عمر سے منقول حدیث ” صحیح “ میں اختصار کے ساتھ منقول ہے ، جو کہ سیدنا ابوسعید خدری رضی اللہ عنہ سے منقول حدیث ہے امام أحمد اور امام بزار نے نقل کیا ہے ان دونوں کی سند میں ایک راوی محمد بن ابولیلیٰ ہے ، جس کے بارے میں کلام کیا گیا ہے ۔

سعید بن جبیر بیان کرتے ہیں : سیدنا عبداللہ بن عمر اپنی سواری پر نفل نماز ادا کر لیتے تھے جب انہوں نے وتر ادا کرنے ہوتے تو وہ سواری سے نیچے اتر کر زمین پر وتر ادا کرتے تھے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا شقران جو نبی اکرم صلی اللہ علیہ وسلم کے غلام ہیں وہ بیان کرتے ہیں : میں نے اپنی آنکھوں کے ساتھ نبی اکرم صلی اللہ علیہ وسلم کو دیکھا کہ آپ گدھے پر سوار تھے آپ کا رُخ خیبر کی طرف تھا اور آپ نے اشارے کے ساتھ نماز ادا کی تھی ۔
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی مسلم بن خالد زنگی ہے ، جسے امام أحمد اور دیگر حضرات نے ضعیف قرار دیا ہے ۔ امام شافعی ابن حبان اور امام ابو أحمد بن عدی نے اسے ” ثقہ “ قرار دیا ہے ۔

سعید بن جبیر بیان کرتے ہیں : سیدنا عبداللہ بن عمر اپنی سواری پر نفل نماز ادا کر لیتے تھے جب انہوں نے وتر ادا کرنے ہوتے تو وہ سواری سے نیچے اتر کر زمین پر وتر ادا کرتے تھے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم اپنے اونٹ پر وتر ادا کر لیتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی علاء بن کثیر لیثی ہے ، اور وہ انتہائی ” ضعیف “ ہے ۔