مجمع الزوائد ومنبع الفوائد

سیدنا جابر بن عبداللہ رضی اللہ عنہما بیان کرتے ہیں : نبی اکرم صلی اللہ علیہ وسلم ایک بیار کی عیادت کرنے کے لئے تشریف لے گئے میں آپ کے ساتھ تھا نبی اکرم صلی اللہ علیہ وسلم نے اس شخص کو دیکھا کہ وہ نماز ادا کر رہا تھا اور تکیہ پر سجدہ کر رہا تھا تو نبی اکرم صلی اللہ علیہ وسلم نے اسے منع کر دیا آپ نے ارشاد فرمایا : اگر تم زمین پر سجدہ کرنے کی استطاعت رکھتے ہو ، تو سجدہ کر لو ورنہ اشارہ کر لو اور ( اشارہ کرتے ہوئے ) سجدے میں رکوع سے زیادہ جھک جاؤ ۔
یہ روایت امام بزار نے نقل کی ہے امام ابویعلیٰ نے اس کی مانند روایت نقل کی ہے ، تاہم انہوں نے یہ الفاظ بیان کیے ہیں : ” نبی اکرم صلی اللہ علیہ وسلم ایک بیمار کی عیادت کرنے کے لئے گئے آپ نے اسے ایک تکیہ پر نماز ادا کرتے ہوئے ( یعنی تکیہ پر سجدہ کرتے ہوئے ) ملاحظہ فرمایا تو تکیہ کو ایک طرف کر دیا وہ شخص لکڑی پکڑ کر اس کے سہارے نماز ادا کر رہا تھا تو آپ نے اسے بھی ایک طرف کر دیا “ ۔ امام بزار کے رجال ” صحیح“ کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم اپنے اصحاب میں سے ایک بیمار شخص کی عیادت کے لئے تشریف لے گئے میں آپ کے ساتھ تھا جب نبی اکرم صلی اللہ علیہ وسلم اس شخص کے پاس پہنچے تو وہ ایک لکڑی کے سہارے نماز ادا کر رہا تھا وہ اپنی پیشانی لکڑی پر رکھ دیتا تھا نبی اکرم صلی اللہ علیہ وسلم نے اسے اشارہ کیا تو اس نے لکڑی ایک طرف کر دی پھر اس نے تکیہ لے لیا تو نبی اکرم صلی اللہ علیہ وسلم نے اسے فرمایا اسے چھوڑ دو اگر تم زمین پر سجدہ کرنے کی استطاعت رکھتے ہو ، تو ٹھیک ہے ورنہ تم اشارہ کر لو اور سجدے میں رکوع کی بہ نسبت زیادہ جھک جاؤ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی حفص بن سلیمان بن منقری ہے اور وہ متروک ہے ، اس کی توثیق کے بارے میں امام أحمد سے مختلف روایات منقول ہیں صحیح روایت یہ ہے کہ انہوں نے اسے ضعیف قرار دیا ہے باقی اللہ بہتر جانتا ہے ۔ ابن حبان نے اس کا تذکرہ کتاب ” الثقات “ میں کیا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تم میں سے جو شخص سجدہ کرنے کی استطاعت رکھتا ہو وہ سجدہ کر لے اور جو شخص اس کی استطاعت نہ رکھتا ہو وہ اپنی پیشانی کی طرف کوئی چیز بلند نہ کرے تاکہ اس پر سجدہ کرے بلکہ اسے رکوع اور سجود اشارے کے ساتھ کرنے چاہئیں “ ۔
یہ روایت امام طبرانی نے معجم اوسط میں نقل کی ہے ، اور اس کے رجال کی توثیق کی گئی ہے ان کے بارے میں کوئی ایسا کلام نہیں کیا گیا جو نقصان دہ ہو باقی اللہ بہتر جانتا ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” بیمار شخص کھڑا ہو کر نماز ادا کرے گا اگر اسے مشقت لاحق ہوتی ہے ، تو وہ بیٹھ کر نماز ادا کرے گا اگر پھر بھی اسے مشقت لاحق ہوتی ہے ، تو وہ لیٹ کر نماز ادا کرے گا ، اور اپنے سر کے ذریعے اشارہ کر لے گا اگر اس میں بھی اسے مشقت لاحق ہوتی ہے ، تو پھر وہ تبیح پڑھ لے گا “ ۔
یہ روایت امام طبرانی نے معجم اوسط میں نقل کی ہے وہ بیان کرتے ہیں : ابن جریج کے حوالے سے اس روایت کو صرف حلس بن محمد ضبعی نے روایت کیا ہے ( علامہ ہیثمی فرماتے ہیں : ) میں یہ کہتا ہوں : میں نے کسی کو اس کے حالات بیان کرتے ہوئے نہیں پایا ہے ، اس روایت کے بقیہ رجال ” ثقہ “ ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے زمین پر بیٹھ کر فرض نماز ادا کی اور آپ نے نفل نماز زمین پر ادا کی اور اس میں اشارہ کیا ۔
یہ روایت امام ابویعلیٰ نے نقل کی ہے ، اس کی سند میں ایک راوی حفص بن عمر ہے ، جو حلب کا قاضی ہے ، اور وہ ” ضعیف“ ہے ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے وہ اپنے بھتیجے عتبہ کے ہاں گئے جو مسواک کے سہارے نماز ادا کر رہے تھے وہ اس مسواک کو اپنی پیشانی تک بلند کرتے تھے تو سیدنا عبداللہ بن مسعود رضی اللہ عنہ نے اس سے مسواک لے کر ایک طرف رکھ دی اور پھر یہ ارشاد فرمایا : تم اشارے کے ساتھ نماز ادا کرو اور تمہارے رکوع میں تم سجدے کی بہ نسبت ذرا بلند رہنا ( یعنی پیشانی کو زیادہ نہ جھکانا ) ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

ابراہیم نخعی بیان کرتے ہیں : علقمہ اور اسود سیدنا عبداللہ بن مسعود رضی اللہ عنہ کی خدمت میں حاضر ہوئے ان دونوں نے عرض کی : اسود کی والدہ کو بٹھا دیا جاتا ہے پھر ان کے لئے ایک لکڑی رکھی جاتی ہے ، جس پر وہ سجدہ کرتی ہیں تو اس بارے میں آپ کی کیا رائے ہے ؟ سیدنا عبداللہ رضی اللہ عنہ نے فرمایا : میں یہ سمجھتا ہوں کہ شیطان اس لکڑی کے در پے ہوتا ہے ، اس عورت کو زمین پر سجدہ کرنا چاہیے اگر وہ اس کی استطاعت رکھتی ہو ، ورنہ اسے اشارے کے ساتھ سجدہ کرنا چاہیے ۔
یہ روایت امام طبرانی نے معجم کبیر میں نقل کی ہے ابراہیم نخعی نے سیدنا عبداللہ بن مسعود رضی اللہ عنہ کا زمانہ نہیں پایا ہے ، اس روایت کے بقیہ رجال ” ثقہ “ ہیں ۔

مختار بیان کرتے ہیں : میں نے سیدنا انس رضی اللہ عنہ سے بیمار شخص کی نماز کے بارے میں دریافت کیا : تو انہوں نے فرمایا : وہ فرض نماز میں بیٹھ کر رکوع اور سجود کرے گا
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔

سیدنا عبداللہ بن عمر نبی اکرم صلی اللہ علیہ وسلم کا یہ فرمان نقل کرتے ہیں : ” بیٹھ کر نماز ادا کرنے والے کی نماز کھڑے ہو کر نماز ادا کرنے والے کی نماز کا ( اجر و ثواب کے حساب سے ) نصف ہوتی ہے “ ۔
یہ روایت امام بزار نے اور امام طبرانی نے معجم کبیر میں نقل کی ہے ، اور اس کی سند حسن ہے ۔

سیدہ عائشہ صدیقہ رضی اللہ عنہا ” مرفوع “ حدیث کے طور پر یہ بات نقل کرتی ہیں : ( نبی اکرم صلی اللہ علیہ وسلم نے ارشاد فرمایا ہے : ) ” بیٹھ کر ( نماز ادا کرنے والے ) کی نماز کھڑے ہو کر ( نماز ادا کرنے والے ) کی نماز کا نصف ہوتی ہے “ ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔

سیدنا عبداللہ بن سائب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بیٹھنے والے کی نماز کھڑے ہونے والے کی نماز کا نصف ہوتی ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالکریم بن ابوالمخارق ہے ، اور وہ ” ضعیف “ ہے ۔

سیدنا مطلب بن ابوداعہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص کو بیٹھ کر نماز ادا کرتے ہوئے دیکھا تو ارشاد فرمایا : بیٹھ کر نماز ادا کرنے والے ) کی نماز کھڑے ہو کر ( نماز ادا کرنے والے ) کی نماز کا نصف ہوتی ہے “ ۔ تو لوگ اہتمام سے کھڑے ہونے لگے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی صالح بن ابواخضر ہے ، جسے جہور نے ضعیف قرار دیا ہے امام أحمد کہتے ہیں : اس کی حدیث کا اعتبار کیا جائے گا ۔

سیدنا عبداللہ بن شخیر بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا آپ بیٹھ کر بھی ( نفل ) نماز ادا کر لیتے تھے ، اور کھڑے ہو کر بھی ادا کر لیتے تھے
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ہے ، جس کا نام سعید ہے ، اس نے غیلان بن جریر سے روایت نقل کی ہے ، جب کہ اس سے زید بن حباب نے روایت نقل کی ہے : میں اس راوی سے واقف نہیں ہوں اس ردایت کے بقیہ رجال ” صحیح“ کے رجال ہیں ۔