مجمع الزوائد ومنبع الفوائد

سیدنا عثمان غنی رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اس شخص نے عرض کی : یا رسول اللہ ! میں نماز ادا کر رہا تھا مجھے پتہ نہیں چلا کہ کیا میں نے جفت تعداد میں رکعات ادا کر لی ہیں ؟ یا طاق تعداد میں رکعات ادا کی ہیں ؟ نبی اکرم صلی اللہ علیہ وسلم نے ارشاد فرمایا : اس چیز سے بچو کہ شیطان تمہاری نماز کے حوالے سے تمہارے ساتھ کھیلے تم میں سے جو شخص نماز ادا کر رہا ہو اور اسے یہ پتہ نہ چلے کہ کیا اس نے جفت تعداد میں رکعات ادا کی ہیں یا طاق تعداد میں ادا کی ہیں ؟ تو اسے ۔ دو مرتبہ سجدہ کر لینا چاہیے یہ دونوں اس کی نماز کو کمل کر دیں گے ۔
یہ روایت امام أحمد نے یزید بن ابوکبشہ کے حوالے سے سیدنا عثمان غنی رضی اللہ عنہ سے نقل کی ہے یزید نامی راوی نے سیدنا عثمان رضی اللہ عنہ سے سماع نہیں کیا ہے ، اس راوی سے اس کے بیٹے عبداللہ نے روایت نقل کی ہے ، اس نے یزید بن ابوکبشہ کے حوالے سے مردان کے حوالے سے سیدنا عثمان رضی اللہ عنہ سے اسے نقل کیا ہے ، اور اس کی مانند روایت نقل کی ہے : ان دونوں طرق کے رجال ” ثقہ “ ہیں ۔

عطاء بیان کرتے ہیں : سیدنا عبداللہ بن زبیر رضی اللہ عنہما نے مغرب کی نماز ادا کرتے ہوئے دو رکعات کے بعد سلام پھیر دیا پھر وہ اٹھے تاکہ حجر اسود کا استلام کریں تو لوگوں نے سبحان اللہ کہنا شروع کر دیا انہوں نے دریافت کیا : تمہارا کیا معاملہ ہے پھر انہوں نے باقی رہ جانے والے نماز ادا کی اور دو مرتبہ سجدہ کیا اس بات کا تذکرہ سیدنا عبداللہ بن عباس رضی اللہ عنہما کے سامنے کیا گیا تو انہوں نے فرمایا : وہ اپنے نبی کی سنت سے نہیں ہٹے ہیں
یہ روایت امام أحمد اور امام بزار نے ، امام طبرانی نے معجم کبیر میں اور معجم اوسط میں نقل کی ہے ، امام أحمد کے رجال ” صحیح “ کے رجال ہیں ۔

معدی بن سلیمان جو ایک ” ثقہ“ راوی ہیں وہ بیان کرتے ہیں : میں مطیر کے پاس آیا تاکہ ان سے سیدنا ذوالیدین کی نقل کردہ حدیث کے بارے میں دریافت کروں میں ان کے پاس آیا اور ان سے اس بارے میں دریافت کیا : وہ ایک بوڑھے عمر رسیدہ آدمی تھے عمر رسیدگی کی وجہ سے وہ بات پوری نہیں کر پاتے تھے ان کے بیٹے شعیب نے کہا: جی ہاں ! اے ابا جان آپ نے مجھے یہ حدیث بیان کی تھی کہ ذی خشب کے مقام پر آپ کی ملاقات سیدنا ذوالیدین سے ہوئی تھی اور انہوں نے آپ کو یہ حدیث بیان کی تھی کہ نبی اکرم صلی اللہ علیہ وسلم نے شام کی دو نمازوں میں سے ایک نماز ان لوگوں کو پڑھاتے ہوئے دو رکعات کے بعد سلام پھیر دیا ( راوی کہتے ہیں : وہ عصر کی نماز تھی ) جلد باز لوگ باہر نکل گئے حاضرین میں سیدنا ابوبکر رضی اللہ عنہ اور سیدنا عمر رضی اللہ عنہ بھی تھے ۔ سیدنا ذوالیدین نے عرض کی : کیا نماز مختصر ہو گئی ہے یا آپ بھول گئے ہیں ۔ نبی اکرم صلی اللہ علیہ وسلم نے ارشاد فرمایا نہ تو یہ مختصر ہوئی ہے ، اور نہ ہی میں بھولا ہوں پھر آپ سیدنا ابوبکر رضی اللہ عنہ اور سیدنا عمر رضی اللہ عنہ کی طرف متوجہ ہوئے اور دریافت کیا : ذولیدین کیا کہہ رہا ہے ان دونوں نے عرض کی : یا رسول اللہ ! یہ ٹھیک کہہ رہا ہے ، تو نبی اکرم صلی اللہ علیہ وسلم واپس گئے لوگ کھڑے ہو گئے نبی اکرم صلی اللہ علیہ وسلم نے انہیں دو رکعات پڑھائیں پھر آپ نے سلام پھیرا اور دو مرتبہ سجدہ سہو کیا ۔ ایک روایت میں یہ الفاظ ہیں : مطیر کے صاحبزادے شعیب نے مجھے یہ حدیث بیان کی ہے ، اور مطیر اس وقت وہاں موجود تھے اور انہوں نے اپنے صاحبزادے کے بیان کی تصدیق کی جب انہوں نے دریافت کیا : کہ میں نے تمہیں کیسے بیان کی تھی تو ان کے صاحبزادے نے کہا: اے ابا جان آپ کی ملاقات ذی خشب کے مقام پر سیدنا ذوالیدین سے ہوئی تھی ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق روایت نقل کی ہے : یہ دونوں روایات عبداللہ بن أحمد نے وہاں نقل کی ہیں جو انہوں نے مسند میں زوائد نقل کیے ہیں ، اس کی سند میں ایک راوی سعدی بن سلیمان ہے ، اور ابوحاتم کہتے ہیں : وہ بزرگ ہے امام نسائی رحمہ اللہ نے اسے ضعیف قرار دیا ہے ۔

قیس بن ابوحازم بیان کرتے ہیں : سیدنا سعد بن ابی وقاص رضی اللہ عنہ ہمیں نماز پڑھاتے ہوئے دو رکعات کے بعد کھڑے ہو گئے ہم نے ان کے لئے سبحان اللہ بھی کہا: لیکن وہ کھڑے رہے انہوں نے اپنے قیام کو جاری رکھا یہاں تک کہ جب وہ نماز سے فارغ ہوئے تو انہوں نے فرمایا : کیا تم لوگ یہ سمجھتے ہو کہ مجھے بیٹھ جانا چاہیے تھا میں نے اسی طرح کیا ہے ، جس طرح میں نے نبی اکرم صلی اللہ علیہ وسلم کو کرتے ہوئے دیکھا ہے ابوعثمان بن عمرو بن محمد ناقد بیان کرتے ہیں : ابومعاویہ کے علاوہ ہم نے کسی کو اس روایت کو ” مرفوع “ حدیث کے طور پر نقل کرتے ہوئے نہیں سنا ہے
یہ روایت امام ابویعلیٰ اور امام بزار نے نقل کی ہے ، اور اس کے رجال ” صحیح “ کے رجال ہیں ۔

قیس بن ابوحازم بیان کرتے ہیں : سیدنا سعد بن مالک ہمیں نماز پڑھا رہے تھے ۔ ۔ ۔ ۔ ۔ ۔ ۔ ۔ ۔ ۔ راوی بیان کرتے ہیں : اس کے بعد انہوں نے ابومعاویہ کی نقل کردہ روایت کی مانند روایت نقل کی ہے ، تاہم اس میں نبی اکرم صلی اللہ علیہ وسلم کا ذکر نہیں کیا
یہ روایت بھی امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” سہو کے دو سجدے ( نماز میں ) ہر کمی و بیشی کی جگہ کفایت کر جاتے ہیں “ ۔
یہ روایت امام ابویعلیٰ اور امام بزار نے اور امام طبرانی نے معجم اوسط میں نقل کی ہے ، اس کی سند میں ایک راوی حکیم بن نافع ہے ، جسے امام ابوزرعہ نے ضعیف قرار دیا ہے ، اور یحیی بن معین نے اسے ” ثقہ “ قرار دیا ہے ۔

ابوملیح بن اسامہ نے اپنے والد کے حوالے سے یہ بات نقل کی ہے ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : یا رسول اللہ ! میں آپ کے سامنے وسوسے کی شکایت کرنا چاہتا ہوں ، جو میں اپنے سینے میں پاتا ہوں جب میں نماز شروع کرتا ہوں تو مجھے یہ پتہ نہیں چلتا کہ میں نے جفت رکعات کے بعد رکعات ختم کی ہے یا طاق رکعات کے بعد کی ہے ۔ نبی اکرم صلی اللہ علیہ وسلم نے ارشاد فرمایا : جب تم یہ صورت حال پاؤ تو اپنے دائیں ہاتھ کی شہادت کی انگلی کو بلند کرو اور اسے اپنے بائیں زانوں پر چبھو دو ! یہ چیز شیطان کو لگنے والی چھری ہے
یہ روایت امام طبرانی نے معجم کبیر میں اور امام بزار نے نقل کی ہے ، لیکن انہوں نے اس حدیث کا سیاق اچھی طرح سے نقل نہیں کیا ہے شاید یہ نسخے کی خامی ہو سکتی ہے باقی اللہ بہتر جانتا ہے ، اس کی سند میں یہ بات مذکور ہے ، اسے مہاجر بن منیب نے ابوالملیح سے روایت کیا ہے ، اور وہ مجہول ہے ۔

سیده میمونہ بنت سعد رضی اللہ عنہا بیان کرتی ہیں : انہوں نے عرض کی : یا رسول اللہ ! آپ ہمیں ایسے شخص کے بارے میں حکم بیان کیجئے جو نماز میں بھول کا شکار ہو جاتا ہے ، اور اسے یہ پتہ نہیں چلتا کہ اس نے کتنی نماز ادا کی ہے ، تو نبی اکرم صلی اللہ علیہ وسلم نے ارشاد فرمایا : وہ نماز ختم نہیں کرے گا وہ نماز میں قیام کرے گا یہاں تک کہ اسے یہ پتہ چل جائے اس نے کتنی نماز ادا کی ہے کیونکہ یہ وسوسے درپیش ہوتے رہتے ہیں ، اور آدمی کو اس کے نماز کے حوالے سے غافل کر دیتے ہیں“ ۔
یہ روایت امام طبرانی نے معجم کبیر میں نقل کی ہے ، اور اس کی سند میں مجہول راوی ہیں ۔

سیدنا ابوہریرہ رضی اللہ عنہ نے یہ بات نقل کی ہے ۔ نبی اکرم صلی اللہ علیہ وسلم ان لوگوں کو عصر یا شاید ظہر کی نماز پڑھائی تو آپ دو رکعات کے بعد ( تشہد میں بیٹھنے کی بجائے ) کھڑے ہو گئے لوگوں نے آپ کو سبحان اللہ کہا: لیکن آپ نے نماز جاری رکھی جب آپ نے نماز مکمل کی تو دو مرتبہ سجدہ کر کے سلام پھیر دیا
یہ روایت امام بزار نے نقل کی ہے ، اور اس کے رجال ” ثقہ “ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ان لوگوں کو عصر کی نماز میں تین رکعات پڑھانے کے بعد سلام پھیر دیا ) پھر آپ کسی زوجہ محترمہ کے گھر تشریف لے گئے آپ کے اصحاب میں سے ایک صاحب جنہیں ذوشمالین کہا: جاتا تھا وہ آپ کی خدمت میں حاضر ہوئے انہوں نے عرض کی : یا رسول اللہ ! کیا نماز کم ہو گئی ۔ نبی اکرم صلی اللہ علیہ وسلم نے دریافت کیا : کیا ہوا ہے انہوں نے عرض کی : آپ نے تین رکعات ادا کی ہیں تو نبی اکرم صلی اللہ علیہ وسلم اٹھے اور آپ ان کا ہاتھ پکڑ کر نکلے اور لوگوں کے پاس تشریف لائے جنہوں نے آپ کی اقتداء میں نماز ادا کی تھی آپ نے دریافت کیا : کیا ذوالیدین ٹھیک کہہ رہا ہے لوگوں نے عرض کی : کیا ہوا ہے ؟ نبی اکرم صلی اللہ علیہ وسلم نے فرمایا : اس کا یہ کہنا ہے کہ میں نے تین رکعات پڑھائیں ہیں لوگوں نے عرض کی : یہ ٹھیک کہہ رہا ہے ہم تو یہ سمجھے تھے کہ شاید آپ کو اس بارے میں کوئی حکم دیا گیا ہے ( راوی بیان کرتے ہیں ) تو نبی اکرم صلی اللہ علیہ وسلم نے ان لوگوں کو مزید ایک رکعت پڑھائی اور پھر تشہد کے بعد دو مرتبہ سجدہ سہو کر لیا
یہ روایت امام بزار نے اور امام طبرانی نے معجم کبیر میں نقل کی ہے ، اس کی سند میں ایک راوی اسماعیل بن ابان غنوی عامری ہے ، اور وہ متروک ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ہمیں تین رکعات پڑھانے کے بعد سلام پھیر دیا تو سیدنا ذوشمالین نے آپ کی خدمت میں عرض کی : یا رسول اللہ ! کیا نماز کم ہو گئی ہے ۔ نبی اکرم صلی اللہ علیہ وسلم نے دریافت کیا : اے ذوالیدین کیا اسی طرح ہے انہوں نے عرض کی : جی ہاں ! نبی اکرم صلی اللہ علیہ وسلم نے پھر ایک رکعت ادا کی اور دو سجدے کیے ( یہاں ایک لفظ کے بارے میں راوی کو شک ہے ) ۔
یہ روایت امام بزار نے اور امام طبرانی نے معجم کبیر میں نقل کی ہے ، اس کی سند میں ایک راوی جابر جعفی ہے ، جسے شعبہ سفیان ثوری نے ” ثقہ “ قرار دیا ہے ، اور لوگوں نے اسے ضعیف کہا: ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے عصر کی نماز میں پانچ رکعات پڑھا دیں تو آپ نے وہم کے دو سجدے ( یعنی سجدہ سہو ) کیے جب آپ بیٹھے ہوئے تھے ۔
یہ روایت امام بزار نے اور امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی سعید بن بشیر ہے وہ ” ثقہ “ ہے ، لیکن وہ اختلاط کا شکار ہو گیا تھا ۔

ابوخلدہ بیان کرتے ہیں : میں نے ابن سیرین سے دریافت کیا : میں نماز ادا کرتا ہوں ، اور مجھے پتہ نہیں چلتا کہ میں نے دو رکعات ادا کی ہیں یا چار رکعات ادا کی ہیں تو انہوں نے بتایا سیدنا ابوالعریان نے مجھے یہ حدیث بیان کی ہے ایک دن نبی اکرم صلی اللہ علیہ وسلم نے نماز ادا کی پھر آپ گھر تشریف لے گئے حاضرین میں سے ایک صاحب ایسے تھے جن کے ہاتھ لمبے تھے نبی اکرم صلی اللہ علیہ وسلم نے انہیں ذوالیدین کا نام دیا ہوا تھا ۔ سیدنا ذوالیدین نے عرض کی : یا رسول اللہ ! کیا نماز مختصر ہو گئی ہے یا آپ بھول گئے ہیں ۔ نبی اکرم صلی اللہ علیہ وسلم نے فرمایا : یہ نہ تو مختصر ہوئی ہے نہ ہی میں بھولا ہوں انہوں نے عرض کی : جی نہیں آپ شاید نماز کو بھول گئے ہیں راوی بیان کرتے ہیں : تو نبی اکرم صلی اللہ علیہ وسلم آگے بڑھے آپ نے ان لوگوں کو دو رکعات پڑھائیں پھر آپ نے سلام پھیرا پھر آپ نے تکبیر کہی اور پھر اپنے عام سجدوں جتنا یا شاید اس سے کچھ لمبا سجدہ کیا پھر آپ نے تکبیر کہی اور آپ نے اپنے سر کو اٹھایا محمد نامی راوی کو یہ بات یاد نہیں ہے کہ روایت میں یہ ذکر ہے کہ آپ نے بعد میں سلام پھیرا کہ ذکر نہیں ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن مسعود رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم نے ہمیں نماز پڑھائی پھر آپ گھر تشریف لے گئے حاضرین میں سے ایک صاحب نے دریافت کیا : کیا نماز میں اضافہ ہو گیا ہے ۔ نبی اکرم صلی اللہ علیہ وسلم نے فرمایا : کیا ہوا ہے انہوں نے عرض کی : آپ نے پانچ رکعات پڑھائیں پھر آپ نے ان صاحب کا ہاتھ پکڑا اور آپ مسجد میں تشریف لائے وہاں ایک حلقہ موجود تھا جس میں سیدنا ابوبکر رضی اللہ عنہ اور سیدنا عمر رضی اللہ عنہ بھی تھے نبی اکرم صلی اللہ علیہ وسلم نے ارشاد فرمایا : ذوالیدین جو کہہ رہا ہے کیا وہ ٹھیک ہے لوگوں نے عرض کی : یا رسول اللہ ! جی ہاں ! تو نبی اکرم صلی اللہ علیہ وسلم نے قبلہ کی طرف رُخ کیا پھر آپ نے دو مرتبہ سجدے کیے ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا کچھ حصہ مذکور ہے ، جس میں سیدنا ذوالیدین کا واقعہ نقل ہوا ہے
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن ابان جعفی ہے ، اور وہ ” ضعیف “ ہے ۔

سیدنا ابن مسعدہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ظہر یا شاید عصر کی نماز میں دو رکعات کے بعد سلام پھیر دیا تو سیدنا ذوالیدین نے عرض کی : کیا نماز مختصر ہو گئی ہے یا آپ بھول گئے ہیں ۔ نبی اکرم صلی اللہ علیہ وسلم نے دریافت کیا : ذوالیدین کیا کہہ رہا ہے لوگوں نے کہا: یہ ٹھیک کہہ رہا ہے ، تو نبی اکرم صلی اللہ علیہ وسلم نے انہیں دو رکعات مزید پڑھا کر نماز مکمل کروائی اور پھر جب آپ بیٹھے ہوئے تھے تو آپ نے سلام پھیرنے کے بعد دو مرتبہ سجدہ سہو کیا ۔
یہ روایت امام طبرانی نے معجم اوسط میں نقل کی ہے وہ بیان کرتے ہیں : سیدنا ابن مسعدہ کا نام عبداللہ ہے ، اور اس روایت کے رجال ” صحیح “ کے رجال ہیں صرف امام طبرانی کے استاد ابراہیم بن محمد بن برہ کا معاملہ مختلف ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا ذوالیدین کے واقعہ والے دن سجدہ سہو نہیں کیا تھا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عمری ہے ، جس سے استدلال کرنے میں اختلاف پایا جاتا ہے ۔

سیدنا عبادہ بن صامت رضی اللہ عنہ بیان کرتے ہیں : نبی اکرم صلی اللہ علیہ وسلم سے ایسے شخص کے بارے میں دریافت کیا گیا : جو اپنی نماز کے بارے میں سہو کا شکار ہو جاتا ہے ، اور اسے یہ پتہ نہیں چلتا کہ اس نے کتنی نماز ادا کی ہے ، تو نبی اکرم صلی اللہ علیہ وسلم نے ارشاد فرمایا : وہ اپنی نماز کو دہرا لے اور جب وہ بیٹھا ہوا ہو تو دو مرتبہ سجدہ سہو کر لے ۔
یہ روایت امام طبرانی نے معجم کبیر میں اسی طرح نقل کی ہے ، اسحاق نامی راوی نے سیدنا عبادہ سے سماع نہیں کیا ہے ۔ باقی اللہ بہتر جانتا ہے ۔

سیدہ عائشہ صدیقہ رضی اللہ عنہا بیان کرتی ہیں : میں نے نبی اکرم صلی اللہ علیہ وسلم سے نماز میں سو کی شکایت کی تو آپ نے ارشاد فرمایا : جب تم نماز ادا کرو اور یہ سمجھو کہ تم نے اپنی نماز مکمل کر لی ہے ، اور تم شک کی حالت میں ہو ، تو تم تشہد میں نماز ختم کرنے کے بعد دو مرتبہ سجدہ کر لو جب کہ تم بیٹھی ہوئی ہو اور پھر دوبارہ تشہد پڑھو اور پھر نماز ختم کر دو ۔ ( علامہ ہیثمی فرماتے ہیں : ) امام طبرانی نے
یہ روایت معجم اوسط میں اسی طرح نقل کی ہے وہ فرماتے ہیں : سیدہ عائشہ رضی اللہ عنہا کے حوالے سے
یہ روایت صرف اسی سند کے ساتھ منقول ہے مجھے نہیں معلوم کہ اصل کتاب میں بھی
یہ روایت اسی طرح ہے یا نسخے میں کوئی خامی ہے باقی اللہ بہتر جانتا ہے اس کی سند میں ایک راوی موسیٰ بن مطیر ہے ، اور متروک الحدیث ہے ، اس کی نسبت حدیث ایجاد کرنے کی طرف کی گئی ہے ۔

ابوعثمان نہدی بیان کرتے ہیں : سیدنا ابوموسیٰ اشعری اور ان کے ساتھی مکہ سے نکلے سیدنا ابوموسیٰ نے انہیں مغرب کی نماز میں دو رکعات پڑھا کر سلام پھیر دیا پھر وہ کھڑے ہوئے انہوں نے سورت نساء کی تین آیات کی تلاوت کی پھر رکوع میں گئے اور سجدہ کیا اور سلام پھیر دیا انہوں نے نبی اکرم صلی اللہ علیہ وسلم کے حوالے سے یہ بات ذکر کی ( کہ اس طرح کی صورت حال میں ایسا کرنا چاہیے )
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا عقبہ بن عامر کے بارے میں یہ بات منقول ہے : وہ نماز میں اس وقت کھڑے ہو گئے جب ان پر بیٹھنا لازم تھا لوگوں نے سبحان اللہ سبحان اللہ کہا: انہیں لوگوں کے ارادے کا پتہ چل گیا لیکن جب انہوں نے نماز مکمل کی تو دو مرتبہ سجدہ کیا جب وہ بیٹھے ہوئے تھے ( نماز سے فارغ ہونے کے بعد ) انہوں نے ارشاد فرمایا : میں نے تم لوگوں کو سبحان اللہ کہتے ہوئے سن لیا تھا جو اس لئے تھا کہ میں بیٹھ جاؤں لیکن یہ چیز سنت نہیں ہے سنت وہ ہے ، جو میں نے کیا ہے
یہ روایت امام طبرانی نے معجم کبیر میں زہری کی سیدنا عقبہ سے نقل کردہ روایت کے طور پر نقل کی ہے حالانکہ زہری نے ان سے سماع نہیں کیا ہے ، اس روایت کی سند میں ایک راوی عبداللہ بن صالح ہے ، اس سے استدلال کرنے کے بارے میں اختلاف کیا گیا ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم کو نماز مکمل کرنے سے پہلے سہو ہو گیا تو آپ نے سلام پھیرنے سے پہلے دو سجدہ سہو کیے آپ نے ارشاد فرمایا : جس شخص کو نماز مکمل کرنے سے پہلے سہو ہو جائے تو وہ سلام پھیرنے سے پہلے دو سجدہ سہو کر لے اور جب کسی کو نماز مکمل ہونے کے بعد سہو ہو تو وہ سلام پھیرنے کے بعد سجدہ سہو کرے ۔
یہ روایت امام طبرانی نے معجم اوسط میں اسی طرح نقل کی ہے ، اس کی سند میں ایک راوی عیسیٰ بن میمون ہے ، جس سے استدلال کرنے کے بارے میں اختلاف کیا گیا ہے اکثر حضرات نے اسے ضعیف قرار دیا ہے ۔

محمد بن صالح بن علی بن عبداللہ بن عبداللہ بن عباس رضی اللہ عنہما بیان کرتے ہیں : میں نے سیدنا انس بن مالک رضی اللہ عنہ کے پیچھے نماز ادا کی جس میں انہیں سہو ہو گیا تو انہوں نے سلام پھیرنے کے بعد سجدہ کیا ( نماز سے فارغ ہونے کے بعد ) وہ ہماری طرف متوجہ ہوئے اور بولے : میں نے صرف اسی طرح کیا ہے ، جس طرح میں نے نبی اکرم صلی اللہ علیہ وسلم کو کرتے ہوئے دیکھا ہے ۔
یہ روایت امام طبرانی نے معجم صغیر میں نقل کی ہے ، اور اس میں مجہول راوی ہے ۔