مجمع الزوائد ومنبع الفوائد

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : اس امت میں سے جو چیز سب سے پہلے اٹھا لی جائے گی وہ خشوع ہے یہاں تک کہ تم اس ( امت ) میں کسی خشوع والے شخص کو نہیں دیکھو گے “ ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا شداد بن اوس رضی اللہ عنہ نے نبی اکرم صلی اللہ علیہ وسلم کا یہ فرمان نقل کیا ہے : ” لوگوں میں سے سب سے پہلے خشوع کو اٹھا لیا جائے گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عمران بن داؤد القطان ہے ، جسے یحیی بن معین اور امام نسائی رحمہ اللہ نے ضعیف قرار دیا ہے امام أحمد اور ابن حبان نے اسے ” ثقہ “ قرار دیا ہے ۔

ابوعبیدہ بیان کرتے ہیں : سیدنا عبداللہ جب نماز کے لئے کھڑے ہوتے تھے تو اس میں اپنی آواز ، ہاتھوں اور آنکھوں کو پست رکھتے تھے ابوعبیدہ نامی راوی نے اپنے والد ( یعنی سیدنا عبداللہ بن مسعود رضی اللہ عنہ ) سے سماع نہیں کیا ہے ۔

اعمش بیان کرتے ہیں : سیدنا عبداللہ جب نماز ادا کرتے تھے تو یوں محسوس ہوتا تھا جیسے کوئی کپڑا ڈال دیا گیا ہے
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے اعمش نامی راوی نے سیدنا عبداللہ بن مسعود رضی اللہ عنہ کا زمانہ نہیں پایا ہے ۔

سیدنا عبداللہ بن مسعود رضی اللہ عنہ فرماتے ہیں : نماز میں وقار کے ساتھ رہو وہ یہ فرماتے ہیں : تم لوگ پرسکون اور اطمینان کے ساتھ رہو
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

عطاء بیان کرتے ہیں : سیدنا عبداللہ بن زبیر جب نماز ادا کرتے تھے تو یوں محسوس ہوتا تھا جیسے وہ بے جان چیز ہیں ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح“ کے رجال ہیں میں یہ کہتا ہوں : نماز کی قبولیت کی علامات سے متعلق روایات آگے آئیں گی اگر اللہ نے چاہا ۔