مجمع الزوائد ومنبع الفوائد

عبدالرحمن بن غنم بیان کرتے ہیں : سیدنا ابومالک اشعری نے اپنی قوم کے افراد کو جمع کیا اور بولے : اے اشعر قبیلے کے افراد تم لوگ اکھٹے ہو جاؤ اور اپنی خواتین اور اپنے بچوں کو بھی اکھٹا کر لو تاکہ میں تمہیں نبی اکرم صلی اللہ علیہ وسلم کے نماز کے طریقے کی تعلیم دوں وہ لوگ اکھٹے ہو گئے انہوں نے اپنی خواتین اور بچوں کو بھی اکھٹا کر لیا تو سیدنا ابومالک اشعری نے انہیں کر کے دکھایا کہ نبی اکرم صلی اللہ علیہ وسلم کیسے وضو کرتے تھے انہوں نے وضو کے تمام اعضاء کا مکمل حساب رکھا یہاں تک کہ سایہ ڈھل گیا اور سایہ ٹوٹ گیا تو وہ کھڑے ہوئے انہوں نے اذان دی مردوں نے امام کے قریب ترین صف بنا لی پھر بچوں نے صف بنائی اور ان کے پیچھے خواتین نے صف بنائی جو بچوں کی صف کے پیچھے تھی پھر سیدنا ابومالک اشعری نے نماز پڑھائی وہ آگے بڑھے انہوں نے دونوں ہاتھ بلند کر کے تکبیر کہی اور سورہ فاتحہ پڑھی اور اس کے ساتھ ایک سورت پڑھی انہوں نے ان دونوں کو پست آواز میں پڑھا پھر انہوں نے تکبیر کہی اور رکوع میں چلے گئے اور سبحان اللہ و بحمدہ تین مرتبہ پڑھا پھر انہوں نے سمع الله لمن حمدہ پڑھا اور سیدھے کھڑے ہو گئے پھر انہوں نے تکبیر کہی اور سجدے میں چلے گئے پھر انہوں نے تکبیر کہی اور اپنے سر کو اٹھا لیا پھر تکبیر کہی اور سجدے میں چلے گئے پھر تکبیر کہی اور سیدھے کھڑے ہو گئے تو یوں ان کی پہلی رکعت میں چھ تکبیریں تھیں پھر جب وہ دوسری رکعت میں کھڑے ہوئے تو انہوں نے اس وقت بھی تکبیر کہی جب انہوں نے نماز مکمل کر لی تو انہوں نے لوگوں کی طرف رُخ کیا اور بولے : میرے تکبیر کہنے کو یاد رکھنا اور میرے رکوع اور سجود کے طریقے کا علم حاصل کر لو کیونکہ یہ نبی اکرم صلی اللہ علیہ وسلم کی نماز کا وہ طریقہ ہے ، جس طریقے کے مطابق آپ ہمیں دن کے وقت نماز پڑھایا کرتے تھے ۔ اس کے بعد راوی نے پوری حدیث ذکر کی ہے ، اس روایت کا بقیہ حصہ محبت سے متعلق باب میں زہد سے متعلق بیان میں آئے گا اگر اللہ نے چاہا
یہ روایت امام أحمد نے نقل کی ہے ۔

ان کی نقل کردہ ایک روایت میں یہ الفاظ ہیں : تو انہوں نے ظہر کی نماز ادا کی اور سورت فاتحہ کی تلاوت کی اور بائیس تکبیریں کہیں ۔

ان کی ایک اور روایت میں یہ الفاظ ہیں : کہ نبی اکرم صلی اللہ علیہ وسلم چاروں رکعات میں قرآءت اور قیام ایک جتنا کرتے تھے تاہم آپ پہلی رکعت کو باقیوں کی بہ نسبت طویل ادا کرتے تھے تاکہ لوگوں کی تعداد زیادہ ہو جائے جب بھی آپ سجدے میں جاتے تھے ، اور جب بھی آپ رکوع میں جاتے تھے تو تکبیر کہتے تھے ، اور جب آپ دو رکعات ادا کرنے کے بعد بیٹھنے کے بعد اٹھتے تھے تو اس وقت بھی تکبیر کہتے تھے یہ تمام روایات امام أحمد نے نقل کی ہیں امام طبرانی نے ان میں سے کچھ معجم کبیر میں نقل کی ہیں ان سب کی سند میں ایک راوی شہر بن حوشب ہے جن کے بارے میں کلام کیا گیا ہے ، اور وہ ” ثقہ “ ہے اگر اللہ نے چاہا ۔

ابن قاسم بیان کرتے ہیں : ہم سیدنا عبدالرحمن بن ابزی کے پاس بیٹھے تو انہوں نے فرمایا : کیا میں تمہیں نبی اکرم صلی اللہ علیہ وسلم کی نماز ( ادا کر کے ) نہ دکھاؤں راوی کہتے ہیں : ہم نے کہا: جی ہاں ! تو وہ کھڑے ہوئے انہوں نے تکبیر کہی پھر انہوں نے قرآءت کی پھر وہ رکوع میں گئے تو انہوں نے دونوں ہاتھ گھٹنوں پر رکھ لئے یہاں تک کہ ہر ہڈی اپنی جگہ پر آ گئی پھر وہ اٹھے یہاں تک کہ ہر ہڈی اپنی جگہ پر آ گئی پھر وہ سجدے میں گئے ، یہاں تک کہ ہر ہڈی اپنی جگہ پر آ گئی پھر انہوں نے سر اٹھایا یہاں تک کہ ہر ہڈی اپنی جگہ پر آ گئی پھر وہ سجدے میں گئے یہاں تک کہ ہر ہڈی اپنی جگہ پر آ گئی پھر وہ اٹھے اور انہوں نے دوسری رکعت بھی اسی طرح ادا کی جس طرح پہلی رکعت میں کیا تھا پھر انہوں نے بتایا نبی اکرم صلی اللہ علیہ وسلم کی نماز اس طرح ہوتی تھی
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔

سیدنا عبداللہ بن عباس رضی اللہ عنہما بیان کرتے ہیں : ایک شخص نے نبی اکرم صلی اللہ علیہ وسلم سے نماز سے متعلق کسی چیز کے بارے میں دریافت کیا : تو نبی اکرم صلی اللہ علیہ وسلم نے ارشاد فرمایا : اپنے دونوں ہاتھوں اور دونوں پاؤں کی انگلیوں کے درمیان خلال کرو راوی کہتے ہیں : یعنی اس سے مراد یہ ہے کہ اچھی طرح وضو کرو نبی اکرم صلی اللہ علیہ وسلم نے اس شخص کو جو فرمایا تھا اس میں یہ بات بھی تھی کہ جب تم رکوع میں جاؤ تو اپنی ہتھیلیاں اپنے گھٹنوں پر رکھو یہاں تک کہ تم اطمینان کی حالت میں آ جاؤ ( یہاں ایک لفظ کے بارے میں راوی کو شک ہے ) اور جب تم سجدے میں جاؤ تو اپنی پیشانی کو زمین پر جما کر رکھو یہاں تک کہ تمہیں زمین کی سختی محسوس ہو “ ( علامہ ہیثمی فرماتے ہیں : ) میں یہ کہتا ہوں : امام ترمذی نے اس روایت میں سے خلال کرنے والا حصہ نقل کیا ہے
یہ روایت امام أحمد نے نقل کی ہے ، اس کی سند میں ایک راوی عبدالرحمن بن ابوزناد ہے ، اور وہ ” ضعیف “ ہے ۔

سیدنا جابر بیان کرتے ہیں : نبی اکرم صلی اللہ علیہ وسلم ہر مرتبہ جھکتے ہوئے اور اٹھتے ہوئے تکبیر کہتے تھے ۔
یہ روایت امام بزار نے نقل کی ہے ، اور اس کے رجال ” ثقہ “ ہیں ۔

سیدنا عبداللہ بن مسعود رضی اللہ عنہ فرماتے ہیں : سب سے پہلے تکبیر میں کمی ولید بن عقبہ نے کی تو سیدنا عبداللہ رضی اللہ عنہ نے فرمایا : ان لوگوں نے کمی کی ہے اللہ تعالیٰ ان کو کمی نصیب کرے کیونکہ میں نے نبی اکرم صلی اللہ علیہ وسلم کو دیکھا ہے کہ جب بھی آپ رکوع میں جاتے تھے جب بھی سجدے میں جاتے تھے جب بھی اٹھتے تھے تو ہر مرتبہ تکبیر کہتے تھے
یہ روایت امام بزار نے نقل کی ہے ، اس کی سند میں ایک راوی ثویر بن ابوفاختہ ہے ، اور وہ ” ضعیف“ ہے ۔

سیدنا ابوموسی اشعری رضی اللہ عنہ بیان کرتے ہیں : سیدنا علی بن ابوطالب رضی اللہ عنہ نے ہمیں وہ نماز یاد کرا دی جو ہم نبی اکرم صلی اللہ علیہ وسلم کی اقتداء میں ادا کیا کرتے تھے ہم اسے بھولے نہیں ہیں ( راوی کو شک ہے شاید یہ الفاظ ہیں : ) ہم نے اسے ترک نہیں کیا ہے راوی بیان کرتے ہیں : وہ جب بھی رکوع میں گئے اور انہوں نے جب بھی رکوع سے سر اٹھایا تو انہوں نے تکبیر کہی ۔
یہ روایت امام بزار نے نقل کی ہے ، اور اس کے رجال ” ثقہ “ ہیں ۔

ابن اسحاق کے حوالے سے یہ بات منقول ہے : وہ بیان کرتے ہیں : انہوں نے مجھے یہ بات بیان کی کہ نبی اکرم صلی اللہ علیہ وسلم نماز کے درمیان میں اور نماز کے آخر میں کس طرح اپنے بائیں زانوں کو بچھاتے تھے ، اور کس طرح بائیں زانوں کے بل بیٹھتے تھے اور بایاں ہاتھ بائیں زانوں پر رکھتے تھے ، اور دائیں پاؤں کو کھڑا کر لیتے تھے ، اور دایاں ہاتھ دائیں زانوں پر رکھتے تھے پھر آپ اپنی شہادت کی انگلی کے ذریعے اشارہ کرتے ہوئے اپنے پروردگار کی وحدانیت کا اعتراف کرتے تھے عمران بن ابوانس کا تعلق بنو عامر بن لوئی سے ہے وہ ” ثقہ “ ہیں انہوں نے ابوالقاسم مقسم سے روایت نقل کی ہے ، جو عبداللہ بن حارث بن نوفل کا غلام ہے وہ بیان کرتے ہیں : اہل مدینہ سے تعلق رکھنے والے ایک شخص نے مجھے یہ حدیث بیان کی وہ فرماتے ہیں : میں نے بنوغفار کی مسجد میں نماز ادا کی نماز کے دوران جب میں بیٹھا تو میں نے بائیں ٹانگ کو بچا لیا اور بیٹھ گیا اور بایاں ہاتھ بائیں زانوں پر رکھ لیا میں نے دائیں پاؤں کا اگلا حصہ کھڑا کر لیا اور دایاں ہاتھ دائیں زانوں پر رکھ لیا اور پھر اپنے انگلی کے ذریعے اشارہ کیا ۔ ( یہاں عربی میں لفظ قدم استعمال ہوا ہے ) وہ صاحب بیان کرتے ہیں : سیدنا خفاف بن ایماء بن رحضہ رضی اللہ عنہ جنہیں نبی اکرم صلی اللہ علیہ وسلم کا صحابی ہونے کا شرف حاصل ہے انہوں نے مجھے ایسا کرتے ہوئے دیکھا جب میں نماز پڑھ کر فارغ ہوا تو انہوں نے فرمایا : اے میرے بیٹے ! تم نے اپنی انگلی کو کیوں اٹھایا تھا میں نے ان سے کہا: میں نے لوگوں کو ایسا کرتے ہوئے دیکھا ہے نہوں نے فرمایا : تم نے ٹھیک کیا ہے ۔ نبی اکرم صلی اللہ علیہ وسلم بھی اس طرح کیا کرتے تھے مشرکین یہ کہا: کرتے تھے : سیدنا محمد صلی اللہ علیہ وسلم اس انگلی کے ذریعے جادو کرتے ہیں حالانکہ وہ جھوٹ بولتے تھے کیونکہ نبی اکرم صلی اللہ علیہ وسلم ایسا اس لئے کرتے تھے تاکہ اس کے ذریعے اپنے پروردگار کی وحدانیت کا اظہار کریں
یہ روایت امام أحمد نے نقل کی ہے امام ابویعلیٰ نے اس کی مانند روایت نقل کی ہے : انہوں نے مبہم شخص کا نام حارث بیان کیا ہے میں نے کسی کو اس کے حالات بیان کرتے ہوئے نہیں پایا ہے امام أحمد نے بھی اس کا نام نقل نہیں کیا ہے ۔

ابوزبیر بیان کرتے ہیں : میں نے سیدنا جابر سے سجدے کے بارے میں دریافت کیا : تو انہوں نے فرمایا : میں نے نبی اکرم صلی اللہ علیہ وسلم کو یہ حکم دیتے ہوئے سنا ہے : کہ ہم سجدوں میں اعتدال سے کام لیں اور کوئی بھی شخص سجدے کے دوران اپنی کلائیوں کو بچھائے نہیں ۔
یہ روایت امام أحمد نے نقل کی ہے ، اور اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ۔

سیدنا سمرہ رضی اللہ عنہ بیان کرتے ہیں : اللہ کے رسول نے ہمیں یہ حکم دیا تھا کہ ہم سجدوں کے دوران اعتدال کریں اور ہم ( پاؤں کھڑا کر کے ) ایڑیوں کے بل نہ بیٹھیں ۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند میں ایک راوی سعید بن بشیر ہے ، جس سے استدلال کرنے کے بارے میں اختلاف کیا گیا ہے ۔

امام أحمد بیان کرتے ہیں : امام عبدالرزاق نے ہمیں یہ بات بیان کی ہے وہ فرماتے ہیں : اہل مکہ یہ کہتے ہیں : ابن جریج نے نماز کا طریقہ عطاء سے حاصل کیا ہے ، اور عطاء نے اس کو ابن زبیر سے حاصل کیا ہے ، اور ابن زبیر نے اسے سیدنا ابوبکر سے حاصل کیا ہے ، اور سیدنا ابوبکر نے اسے نبی اکرم صلی اللہ علیہ وسلم سے حاصل کیا ہے ۔ ( امام عبدالرزاق فرماتے ہیں : ) میں نے ابن جریج سے زیادہ اچھے طریقے سے نماز ادا کرتے ہوئے کسی کو نہیں دیکھا ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا عدی بن عمیرہ رضی اللہ عنہ بیان کرتے ہیں : نبی اکرم صلی اللہ علیہ وسلم جب سجدے میں جاتے تھے تو آپ کی بغلوں کی سفیدی دکھائی دے جاتی تھی پھر جب آپ سلام پھیرتے تھے تو اپنا چہرہ دائیں طرف پھیر لیتے تھے یہاں تک کہ آپ کے رخسار کی سفیدی نظر آ جاتی تھی پھر آپ بائیں طرف سلام پھیرتے تھے تو اپنا چہرہ اس طرف کر لیتے تھے یہاں تک کہ بائیں طرف سے آپ کے رخسار کی سفیدی نظر آ جاتی تھی
یہ روایت امام أحمد نے نقل کی ہے ، اور امام طبرانی نے اختصار کے ساتھ نقل کی ہے ، اور اس کے رجال ” ثقہ “ ہیں ۔

سیدنا بریدہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : اے بریدہ جب تم نماز کا آغاز کرو تو یہ پڑھو : ” تو ہر عیب سے پاک ہے اے اللہ ! حمد تیرے لئے مخصوص ہے اللہ تعالیٰ کی مدد کے بغیر کچھ نہیں ہو سکتا تیرے علاوہ اور کوئی معبود نہیں ہے میں نے اپنے اوپر ظلم کیا ہے ، تو میری مغفرت کر دے بے شک گناہوں کی مغفرت صرف تو ہی کر سکتا ہے “ ۔ ( نبی اکرم صلی اللہ علیہ وسلم نے ارشاد فرمایا : ) پھر جو قرآن تمہیں آتا ہو ، تم اس کو پڑھو پھر تم رکوع میں جاؤ اور تین مرتبہ سبحَانَ رَبِّيَ العظیم پڑھو جب تم رکوع سے اٹھو تو یہ پڑھو : ” اللہ تعالیٰ نے اس شخص کی بات سن لی جس نے اس کی حمد بیان کی اے اللہ ! اے ہمارے پروردگار حمد تیرے ہی لئے مخصوص ہے ، جو اتنی ہو جو آسمانوں کو بھر دے اور زمین کو بھر دے اور ان کے بعد جس چیز کو تو چاہے ، اسے بھر دے “ ۔ ( نبی اکرم صلی اللہ علیہ وسلم نے فرمایا : ) پھر جب تم سجدے میں جاؤ تو تین مرتبہ سبحَانَ رَبِّيَ الْأَعْلَى پڑھو ( اور یہ پڑھو ) : ” میرا چہرہ اس ذات کے سامنے سجدے میں ہے ، جس نے اسے پیدا کیا اسے سماعت اور بصارت عطا کی اللہ تعالیٰ کی ذات برکت والی ہے ، جو سب سے بہترین خالق ہے “ ۔ جب تم سجدے سے سر اٹھاؤ تو یہ پڑھو : ” اے میرے پروردگار ! تو میری مغفرت کر دے تو مجھ پر رحم کر تو مجھے ہدایت پر ثابت قدم رکھ تو مجھے رزق عطا فرما تو میری طرف جو بھلائی نازل کرے گا میں اس کا محتاج ہوں “ ۔ جب تم نماز کے دوران بیٹھو تو تم یہ ترک نہ کرو کہ اس بات کی گواہی دو کہ اللہ تعالیٰ کے علاوہ اور کوئی معبود نہیں ہے ، اور میں اللہ کا رسول ہوں ، اور مجھ پر اور اللہ کے تمام انبیاء پر درود بھیجو اور اللہ تعالیٰ کے تمام نیک بندوں پر سلام بھیجو ۔
یہ روایت امام بزار نے نقل کی ہے ، اس کی سند میں ایک راوی عباد بن أحمد عرزمی ہے ، جسے امام دارقطنی رحمہ اللہ نے ضعیف قرار دیا ہے ، اس کی سند میں ایک راوی جابر جعفی ہے ، اور وہ ” ضعیف“ ہے ۔

سیدنا جابر بن عبداللہ انصاری رضی اللہ عنہ بیان کرتے ہیں : سیدنا معاذ بن جبل نبی اکرم صلی اللہ علیہ وسلم کے پاس سے اٹھ کر جاتے تھے جب وہ آتے تھے تو اپنی قوم کی امامت کرتے تھے بنوسلمہ سے تعلق رکھنے والا ایک شخص جس کا نام سیم تھا وہ سیدنا معاذ کی اقتداء میں نماز ادا کیا کرتا تھا ایک مرتبہ سیدنا معاذ کو ان لوگوں کے پاس آنے میں دیر ہو گئی سلیم نے اکیلے نماز ادا کی اور چلا گیا جب سیدنا معاذ آئے تو انہیں یہ بات بتائی گئی کہ سلیم نے اکیلے نماز ادا کر لی اور چلا گیا سیدنا معاذ نے نبی اکرم صلی اللہ علیہ وسلم کو یہ بات بتائی نبی اکرم صلی اللہ علیہ وسلم نے سلیم کو پیغام بھیج کر اس سے اس بارے میں دریافت کیا : تو اس نے کہا: میں ایک ایسا شخص ہوں کہ میں دن بھر کام کرتا رہا یہاں تک کہ شام ہو گئی شام کے وقت مجھے اونگھ آ رہی ہوتی ہے ، اس وقت ہمارے پاس سیدنا معاذ آ جاتے ہیں اس دن سیدنا معاذ کو ہمارے پاس آنے میں تاخیر ہو گئی جب انہیں آنے میں تاخیر ہو گئی ، تو میں نے نماز ادا کی اور اپنے گھر واپس چلا گیا نبی اکرم صلی اللہ علیہ وسلم نے دریافت کیا : جب تم نے نماز ادا کی تھی تو تم نے کیا کیا تھا اس نے جواب دیا : میں نے سورت فاتحہ اور ایک اور سورت پڑھی پھر میں بیٹھ گیا میں تشہد پڑھا میں نے جنت کی دعا مانگی ، اور جہنم سے پناہ مانگی میں نے نبی اکرم صلی اللہ علیہ وسلم پر درود بھیجا اور پھر نماز ختم کر دی میں آپ کی طرح اور سیدنا معاذ کی طرح خوبصورت دعا نہیں کر سکتا راوی کہنے ہیں ۔ نبی اکرم صلی اللہ علیہ وسلم ہنس پڑے آپ نے ارشاد فرمایا : میں اور معاذ بھی یہی دعا کرتے ہیں کہ ہم جنت میں داخل ہو جائیں اور ہمیں جہنم سے بچا لیا جائے پھر نبی اکرم صلی اللہ علیہ وسلم نے سیدنا معاذ کو پیغام بھیجا کہ تم آزمائش کا شکار کرنے والے نہ بنو کہ تم لوگوں کو آزمائش میں مبتلا کر دو تم ان کی طرف واپس جاؤ اور انہیں نماز پڑھا دیا کرو اس سے پہلے کہ وہ سو جائیں پھر سلیم نے کہا: اے معاذ کل آپ دیکھیں گے کہ جب ہم دشمن کا سامنا کریں گے تو آپ کا کیا عالم ہوتا ہے ، اور میرا کیا عالم ہوتا ہے ۔ راوی کہتے ہیں : غزوہ احد کے موقع پر سیدنا سلیم آئے تو انہوں نے تلوار لہرائی ہوئی تھی ۔ انہوں نے کہا: اے معاذ آگے بڑھیں لیکن سیدنا معاذ رضی اللہ عنہ آگے نہیں ہوئے سلیم آگے بڑھے انہوں نے جنگ میں حصہ لیا یہاں تک کہ شہید ہو گئے جب کبھی بھی سیدنا معاذ رضی اللہ عنہ کے سامنے ان کا ذکر کیا جاتا تھا تو سیدنا معاذ رضی اللہ عنہ یہ فرماتے تھے سلیم نے اللہ تعالیٰ کے ساتھ سچ کہا: اور معاذ نے غلط بیانی کی ۔ ( علامہ ہیثمی فرماتے ہیں : ) میں یہ کہتا ہوں : سیدنا جابر کے حوالے سے منقول حدیث ” صحیح “ میں مذکور ہے ، لیکن وہ اس کے علاوہ ہے ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں صرف معاذ بن عبداللہ بن حبیب نامی راوی کا معاملہ مختلف ہے وہ ” ثقہ “ ہے اس کے بارے میں کلام نہیں کیا گیا ہے ۔

سیدنا عبداللہ بن ابواوفی رضی اللہ عنہ بیان کرتے ہیں : نبی اکرم صلی اللہ علیہ وسلم ہمیں ظہر کی نماز اس وقت پڑھاتے تھے جب سورج ڈھل جاتا تھا اگر تم اس کے دونوں پہلوؤں کو ریت میں ڈالتے تو وہ بھن جاتے ، اس وقت آپ پہلی رکعت طویل ادا کرتے تھے ، اور اس وقت تک قیام کی حالت میں رہتے تھے جب تک لوگوں کے جوتوں کی آہٹ سنتے رہتے تھے آپ تلاوت کرتے رہتے تھے پھر آپ رکوع میں چلے جاتے تھے پھر آپ دوسری رکعت میں کھڑے ہوتے تھے تو دوسری رکعت آپ پہلی کی بہ نسبت مختصر ادا کرتے تھے پھر آپ تیسری رکعت کو دوسری سے زیادہ مختصر ادا کرتے تھے ، اور چوتھی رکعت کو تیسری سے زیادہ مختصر ادا کرتے تھے آپ عصر کی نماز اس وقت ادا کر لیتے تھے جب سورج روشن اور چمک دار ہوتا تھا کہ کوئی شخص اتنی دیر میں دو یا تین فرسخ دور تک جا سکتا تھا آپ عصر کی پہلی رکعت طویل ادا کرتے تھے ، اور دوسری رکعت پہلی کی بہ نسبت مختصر ادا کرتے تھے مغرب کی نماز آپ اس وقت ادا کر لیتے تھے جب کہنے والا یہ کہتا تھا کہ کیا سورج غروب ہو چکا ہے کہ نہیں ؟ مغرب کی پہلی رکعت آپ طویل ادا کرتے تھے ، اور دوسری رکعت پہلی رکعت سے مختصر ادا کرتے تھے ، اور تیسری رکعت دوسری سے مختصر ادا کرتے تھے عشاء کی نماز آپ کچھ تاخیر سے ادا کرتے تھے ۔
یہ روایت بزار نے اور امام طبرانی نے معجم کبیر میں نقل کی ہے ، تاہم انہوں نے یہ الفاظ نقل کیے ہیں : ” اگر تم ایک پہلو “ ۔ اس کی سند میں ایک راوی طرفہ حضرمی ہے ازدی کہتے ہیں : اس کی نقل کردہ حدیث مستند نہیں ہوتی ہے اس روایت کی سند میں ایک راوی ایسا بھی ہے ، جس کے بارے میں یہ کہا: گیا ہے کہ یہ مجہول ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں ۔ کیا میں تمہاری رہنمائی اس چیز کی طرف نہ کروں جس کے ذریعے اللہ تعالی گناہوں کو ختم کر دیتا ہے ، اور نیکیوں میں اضافہ کرتا ہے لوگوں نے عرض کی : جی ہاں ! نبی اکرم صلی اللہ علیہ وسلم نے ارشاد فرمایا : طبیعت کو ناگوار گزرنے کے وقت اچھی طرح وضو کرنا زیادہ قدموں کے ساتھ چل کر مساجد کی طرف جانا اور ایک نماز کے بعد دوسری نماز کا انتظار کرنا فرشتے یہ کہتے ہیں : اے اللہ ! تو اس پر رحم کر نبی اکرم صلی اللہ علیہ وسلم نے ارشاد فرمایا : جب تم نماز کے لئے اٹھو تو اپنی صفیں برابر کر لو اور انہیں ٹھیک کر دو اور خالی جگہ پر کر دو کیونکہ میں تم لوگوں کو اپنی پشت کے پیچھے بھی دیکھتا ہوں جب امام اللہ اکبر کہے ، تو تم لوگ بھی اللہ اکبر کہو جب وہ رکوع کرے تو تم بھی رکوع کرو جب وہ سَمِعَ اللهُ لِمَنْ حَمِدَہ پڑھے تو تم اللَّهُم رَبَّنَا لَكَ الْحَمْدُ پڑھو نبی اکرم صلی اللہ علیہ وسلم نے یہ بھی ارشاد فرمایا ہے : مردوں کی سب سے بہتر صف سب سے پہلے والی ہے ، اور سب سے کم بہتر سب سے پیچھے والی ہے ، اور عورتوں کی سب سے بہتر صف سب سے پیچھے والی ہے ، اور سب سے کم بہتر سب سے آگے والی ہے “ ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت کا کچھ حصہ نقل کیا ہے یہ روایت امام بزار نے نقل کی ہے اس کی سند میں ایک راوی عبداللہ بن محمد بن عقیل ہے ، جس کے بارے میں کلام کیا گیا ہے امام أحمد نے
یہ روایت مکمل روایت کے طور پر نقل کی ہے ، اور امام ابویعلیٰ نے اختصار کے ساتھ نقل کی ہے یہ روایت پہلے گزر چکی ہے ۔

سیدنا وائل بن حجر بیان کرتے ہیں : میں نبی اکرم صلی اللہ علیہ وسلم کے پاس موجود تھا آپ کے پاس ایک برتن لایا گیا جس میں کچھ پانی موجود تھا آپ نے اسے دائیں ہاتھ پر انڈیلا اور تین مرتبہ اسے دھویا پھر آپ نے اپنا دایاں ہاتھ برتن میں داخل کیا اور اس کے ذریعے بائیں ہاتھ کو تین مرتبہ دھویا پھر آپ نے اپنا بایاں ہاتھ برتن میں داخل کیا اور اس کے ذریعے پانی کا چلو لے کر تین مرتبہ کلی کی اور ناک میں پانی ڈالا آپ نے تین مرتبہ ناک صاف کیا پھر آپ نے اپنے دونوں ہاتھ برتن میں داخل کیے اور ان دونوں کو چہرے کی طرف بلند کر کے چہرے کو تین مرتبہ دھویا آپ نے کانوں کے اندرونی حصے کو بھی دھویا اور دو انگلیاں اندرونی حصے میں داخل کیں آپ نے گردن کے بیرونی حصے اور داڑھی کے نیچے والے حصے پر تین مرتبہ مسح کیا پھر آپ نے اپنا دایاں ہاتھ برتن میں داخل کیا اور اس کے ذریعے اپنا دایاں بازو دھویا یہاں تک کہ کہنیوں کے اوپر تک دھویا ایسا آپ نے تین مرتبہ کیا پھر آپ نے دائیں ہاتھ کے ذریعے بایاں بازو کہنیوں سے آگے تک تین مرتبہ دھویا پھر آپ نے اپنے سر پر تین مرتبہ مسح کیا کانوں کے بیرونی حصے پر تین مرتبہ مسح کیا اور گردن پر مسح کیا راوی کہتے ہیں : میرا خیال ہے انہوں نے یہ بات بھی بیان کی تھی داڑھی کے بیرونی حصے پر مسح کیا پھر آپ نے اپنا دایاں پاؤں دائیں ہاتھ کے ذریعے تین مرتبہ دھویا آپ نے اپنی انگلیوں کو کھلا کر کے ( اچھی طرح دھویا ) پھر آپ نے پانی بلند کیا یہاں تک کہ ٹخنوں سے اوپر تک لے گئے پھر آپ نے اسے بلند کیا اور پنڈلی تک لے گئے پھر آپ نے بائیں ٹانگ کے ساتھ بھی اسی طرح کیا پھر آپ نے پانی کا چلو لیا اس کے ذریعے اپنے دونوں ہاتھ بھرے اور پھر اسے اپنے سر پر ڈال لیا یہاں تک کہ وہ پانی آپ کے اطراف سے بہنے لگا آپ نے ارشاد فرمایا یہ مکمل وضو ہے راوی کہتے ہیں : میں نے آپ کو کپڑے کے ذریعے جسم خشک کرتے ہوئے نہیں دیکھا پھر آپ مسجد کی طرف تشریف لے گئے اور محراب میں داخل ہوئے راوی کہتے ہیں : یعنی اس جگہ پر جہاں اب محراب ہے لوگوں نے آپ کے پیچھے صف بنا لی آپ کے دائیں طرف اور بائیں طرف صف بنا لی پھر نبی اکرم صلی اللہ علیہ وسلم نے اپنے دونوں ہاتھ بلند کیے یہاں تک کہ آپ ان دونوں کو کانوں کی لو کے برابر تک لے آئے پھر آپ نے سینے کے پاس دائیں ہاتھ کو بائیں ہاتھ پر رکھ دیا اور تلاوت کرنی شروع کی آپ نے الحمدللہ سے بلند آواز میں تلاوت شروع کی جب آپ سورت فاتحہ پڑھ کر فارغ ہوئے تو آپ نے آمین کہا: یہاں تک کہ آپ کے پیچھے موجود افراد نے اس کی آواز سنی پھر آپ نے ایک اور سورت کی تلاوت کی پھر آپ نے تکبیر کہتے ہوئے دونوں ہاتھ بلند کیے یہاں تک کہ انہیں کانوں کی لو تک لے آئے پھر آپ رکوع میں گئے پھر آپ نے اپنے دونوں ہاتھ اپنے گھٹنوں پر رکھے اور اپنی انگلیوں کو کشادہ رکھا آپ رکوع میں ٹھہرے رہے ، یہاں تک کہ آپ کا ہر عضو برابر ہو گیا اور آپ کی پشت کی یہ حالت تھی کہ اگر اس پر پانی کا پیالہ رکھا جاتا تو وہ پانی نہ چھلکتا پھر آپ نے خشوع کے ساتھ اپنے سر کو اٹھایا اور سمع اللہ لمن حمدہ کہا: پھر آپ نے دونوں ہاتھ بلند کیے یہاں تک کہ انہیں کانوں کی لو تک لے آئے پھر آپ نے سجدے میں جانے کے لئے تکبیر کہتے ہوئے جھکے آپ نے دونوں ہاتھ بلند کیے یہاں تک کہ انہیں دونوں کانوں کی لو تک لے آئے پھر آپ نے اپنی پیشانی کو زمین پر جما کے رکھا یہاں تک کہ میں نے آپ کی ناک کو ریت میں دیکھا آپ نے اپنی کلائیوں کو قوس کی شکل میں کر لیا اور اپنے سر کو بھی رکھا آپ نے اپنے بائیں زانوں کو بچا لیا اور دائیں پاؤں کو کھڑا کر لیا جس طرح پاؤں کی انگلیوں کو کھڑا کیا جاتا ہے آپ سجدے میں زیادہ دیر نہیں رہے پھر آپ نے اپنے سر کو اٹھایا اور تکبیر کہتے ہوئے دونوں ہاتھ بلند کیے اور انہیں کانوں کی لو تک لے آئے آپ ذرا سی دیر کے لئے بیٹھے اور آپ نے اپنی دائیں ہتھیلی اپنے گھٹنے پر اور زانوں کے کچھ حصے پر رکھی آپ نے اپنی انگلی کے ذریعے حلقہ بنایا اور پھر آپ سجدے میں جانے کے لئے جھک گئے آپ نے اس کی مانند سجدہ کیا پھر آپ نے تکبیر کہتے ہوئے اپنے سر کو اٹھایا اور دونوں ہاتھ کانوں کی لو تک لے آئے یہاں تک کہ آپ قیام میں سیدھے کھڑے ہو گئے اور ہر ہڈی اپنی جگہ پر آ گئی آپ نے چار رکعات ادا کیں جن میں آپ نے اسی طرح کیا جس طرح پہلی رکعت میں کیا تھا پھر آپ تشہد میں بیٹھ گئے جو اس کی مانند تھا پھر آپ نے دائیں طرف سلام پھیرا یہاں تک کہ آپ کے بائیں رخسار کی سفیدی دکھائی دینے لگی پھر آپ نے بائیں طرف سلام پھیرا یہاں تک کہ آپ کے دائیں رخسار کی سفیدی دکھائی دینے لگی ۔ علامہ ہیثمی فرماتے ہیں : ) صحیح اور دیگر کتابوں میں اس کا کچھ حصہ منقول ہے
یہ روایت امام بزار نے نقل کی ہے ، اس کی سند میں ایک راوی محمد بن حجر ہے امام بخاری رحمہ اللہ فرماتے ہیں : اس میں غور و فکر کی گنجائش ہے امام ذہبی کہتے ہیں : اس کے حوالے سے منکر روایات منقول ہیں ۔

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم جب نماز میں ہوتے تھے تو آپ دونوں ہاتھ کانوں کے برابر تک بلند کرتے تھے جب آپ تکبیر کہہ دیتے تھے تو ان دونوں کو چھوڑ دیتے تھے پھر آپ خاموش رہتے تھے بعض اوقات میں نے آپ کو ایسا کرتے ہوئے دیکھا کہ آپ اپنا دایاں ہاتھ بائیں ہاتھ پر رکھ لیتے تھے جب آپ سورت فاتحہ پڑھ کر فارغ ہوتے تھے تو خاموش رہتے تھے جب آپ سورت ختم کرتے تھے تو کچھ دیر کے لئے خاموش ہو جاتے تھے پھر آپ اپنے دونوں ہاتھ کانوں کے برابر تک بلند کرتے تھے پھر تکبیر کہتے ہوئے رکوع میں چلے جاتے تھے ہم اس وقت تک رکوع میں نہیں جاتے تھے جب تک ہم آپ کو رکوع کی حالت میں دیکھ نہیں لیتے تھے پھر آپ رکوع سے سیدھے کھڑے ہو جاتے تھے یہاں تک کہ ہر ایک عضو اپنی جگہ پر آ جاتا تھا پھر آپ اپنے دونوں ہاتھ کانوں کے برابر تک بلند کرتے تھے پھر آپ تکبیر کہتے ہوئے سجدے میں چلے جاتے تھے آپ پیشانی اور ناک کو زمین پر جما کر رکھتے تھے پھر آپ یوں اٹھتے تھے جیسے آپ کوئی تیر ہوں آپ اپنے ہاتھ کے ذریعے سہارا نہیں لیتے تھے جب آپ نماز کے آخر میں بیٹھتے تھے تو بائیں زانوں کو بچھا لیتے تھے دایاں ہاتھ دائیں زانوں پر رکھتے تھے ، اور انگلی کے ذریعے اشارہ کرتے تھے جب دعا کرتے تھے جب آپ سلام پھیر لیتے تھے تو جلدی سے کھڑے ہو جاتے تھے
یہ روایت امام طبرانی نے معجم کبیر میں نقل کی ہے ، اس کی سند میں ایک راوی خصیب بن جحدر ہے ، اور وہ کذاب ہے ۔

سیدنا وائل بن حجر بیان کرتے ہیں : نبی اکرم صلی اللہ علیہ وسلم جب رکوع میں جاتے تھے تو اپنی انگلیوں کو کشادہ رکھتے تھے ، اور جب آپ سجدے میں جاتے تھے تو آپ اپنی انگلیاں ملا کے رکھتے تھے
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم جب نماز ادا کرتے تھے تو اپنی انگلیوں کو کشادہ رکھتے تھے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی أحمد بن ولید ہے ، اور وہ ” ضعیف“ ہے ۔ ابن حبان نے اس کا تذکرہ کتاب ” الثقات “ میں کیا ہے ۔

سیدنا ابوہریرہ رضی اللہ عنہ بیان کرتے ہیں : میں نے سیدہ ام سلیم رضی اللہ عنہا کے صاحبزادے سے زیادہ بہتر طور پر ، نبی اکرم صلی اللہ علیہ وسلم کی نماز کے مطابق نماز ادا کرتے ہوئے کسی کو نہیں دیکھا سیدنا ابوہریرہ رضی اللہ عنہ کی مراد سیدنا انس بن مالک رضی اللہ عنہ تھے ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم ہمیں یہ حکم دیتے کہ جب ہم نماز ادا کر رہے ہوں ، اور سجدوں سے اپنے سر کو اٹھائیں تو ہم زمین پر اطمینان کے ساتھ بیٹھ جائیں ہم قدموں کے کناروں پر ایڑیوں کے بل نہ بیٹھیں ۔
یہ روایت امام طبرانی نے معجم کبیر میں مکمل روایت کے طور پر اسی طرح نقل کی ہے ، اور اس کی سند حسن ہے ازدی اور ابن حزم نے اس کے بعض رجال کے بارے میں کلام کیا ہے ، جو قدح کا باعث نہیں بنتا ہے ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے نماز میں اقعاء کے طور پر بیٹھنے سے منع کیا ہے
یہ روایت امام طبرانی نے معجم کبیر میں نقل کی ہے ، اس کی سند میں ایک راوی سلام بن ابوخبزہ ہے ، اور وہ متروک ہے ۔

عبدالرحمن بن یزید بیان کرتے ہیں میں نے سیدنا عبداللہ بن مسعود رضی اللہ عنہ کی نماز کا جائزہ لیا تو میں نے انہیں دیکھا کہ وہ اٹھتے تھے ، اور بیٹھتے نہیں تھے راوی کہتے ہیں : یعنی وہ پہلی رکعت کے بعد اور تیسری رکعت کے بعد اپنے قدموں کے اگلے حصے کے بل اٹھتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صیح “ کے رجال ہیں ۔