مجمع الزوائد ومنبع الفوائد

سیدنا عبداللہ بن مسعود رضی اللہ عنہ فرماتے ہیں : جب نبی اکرم صلی اللہ علیہ وسلم پر یہ آیت نازل ہوئی : ” جب اللہ تعالیٰ کی مدد اور فتح آ گئی “ ۔ نبی اکرم صلی اللہ علیہ وسلم جب بھی اس کو پڑھتے تو تکبیر کہہ کر رکوع میں چلے جاتے تھے ، اور یہ پڑھتے تھے : ” تو ہر عیب سے پاک ہے اے اللہ ! اور حمد تیرے لئے مخصوص ہے اے اللہ ! تو میری مغفرت کر دے بے شک تو توبہ قبول کرنے والا رحم کرنے والا ہے “ ۔
یہ روایت أحمد امام ابویعلیٰ امام بزار نے اور امام طبرانی نے معجم اوسط میں نقل کی ہے تینوں کی سند میں یہ بات مذکور ہے ، اسے ابوعبیدہ نے اپنے والد سے روایت کیا ہے حالانکہ انہوں نے اپنے والد سے سماع نہیں کیا ہے امام طبرانی کے رجال ” صحیح“ کے رجال ہیں صرف حماد نامی راوی کا معاملہ مختلف ہے وہ ” ثقہ “ ہے ، لیکن اختلاط کا شکار ہو گیا تھا ۔

سیدنا علی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے اس بات سے منع کیا گیا ہے کہ میں رکوع یا سجدے میں قرأت کروں جب تم لوگ رکوع کرو تو اللہ تعالیٰ کی عظمت کا اعتراف کرو اور جب تم سجدہ کرو تو اہتمام کے ساتھ دعا مانگو یہ اس لائق ہو گا کہ وہ تمہارے لئے قبول ہو“ ۔
یہ روایت عبداللہ نے اپنی زیادات میں نقل کی ہے امام ابویعلیٰ نے اسے ” موقوف “ روایت کے طور پر نقل کیا ہے امام بزار نے بھی اسے نقل کیا ہے ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا یہ حصہ مذکور ہے : ” مجھے اس بات سے منع کیا گیا ہے کہ میں رکوع اور سجدے میں قرأت کروں “ ۔ اس روایت کی سند میں ایک راوی عبدالرحمن بن اسحاق بن حارث ہے ، اور تمام حضرات کے نزدیک وہ ” ضعیف “ ہے ۔

سیدہ عائشہ صدیقہ رضی اللہ عنہا بیان کرتی ہیں : ایک مرتبہ انہوں نے نبی اکرم صلی اللہ علیہ وسلم کو بستر پر غیر موجود پایا تو اپنے ہاتھ کے ذریعے نبی اکرم صلی اللہ علیہ وسلم کو تلاش کیا سیدہ عائشہ رضی اللہ عنہا کا ہاتھ نبی اکرم صلی اللہ علیہ وسلم پر آیا تو آپ اس وقت سجدے کی حالت میں تھے ، اور یہ کہہ رہے تھے : ” اے میرے پروردگارا ! تو میرے نفس کو اس کا تقویٰ عطا کر دے اور اسے پاک کر دے بے شک تو سب سے بہتر ہے ، جو اس کو پاک کرے تو اس کا ولی ہے ، اور اس کا آقا ہے “ ۔
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم کا میرے ہاں رہنے کا مخصوص دن تھا نبی اکرم صلی اللہ علیہ وسلم بستر سے نکلے میں یہ سمجھی کہ شاید آپ اپنی کسی اور زوجہ محترمہ کے پاس جائیں گے میں بھی نکلی تو میں نے دیکھا کہ نبی اکرم صلی اللہ علیہ وسلم سجدے کی حالت میں ہیں یوں جیسے کپڑا ڈالا گیا ہوتا ہے میں نے آپ کو یہ پڑھتے ہوئے سنا : ” میرے وجود اور میرے خیال نے تیرے لئے سجدہ کیا ہے میرا دل تجھ پر ایمان لایا ہے اے میرے پروردگار ! یہ میرا ہاتھ ہے ، اور وہ ہے جو میں نے اپنے خلاف جس جرم کا ارتکاب کیا ہے اے عظیم ذات ہر عظیم چیز کے لئے تجھ سے امید رکھی جاتی ہے ، تو بڑے گناہ کی مغفرت کر دے سیدہ عائشہ رضی اللہ عنہا بیان کرتی ہیں : پھر نبی اکرم صلی اللہ علیہ وسلم نے اپنا سر اٹھایا اور دریافت کیا : تم کیوں باہر آئی ہو ؟ سیدہ عائشہ رضی اللہ عنہا نے عرض کی : ایک گمان میرے ذہن میں آیا تھا نبی اکرم صلی اللہ علیہ وسلم نے فرمایا : بعض گمان گناہ ہوتے ہیں تم اللہ تعالیٰ سے مغفرت طلب کرو جبرائیل میرے پاس آئے تھے انہوں نے مجھے یہ کہا: تھا کہ میں ان کلمات کو پڑھوں جو کلمات تم نے ابھی سنے ہیں تم بھی سجدے میں ان کو پڑھا کرو کیونکہ جو شخص ان کلمات کو پڑھے گا ، اس کے سر اٹھانے سے پہلے اس کی مغفرت ہو جائے گی ( یہاں ایک لفظ کے بارے میں راوی کو شک ہے ) ۔
یہ روایت امام ابویعلیٰ نے نقل کی ہے ، اس کی سند میں ایک راوی عثمان بن عطاء خراسانی ہے ، جسے دحیم نے ” ثقہ “ قرار دیا ہے امام بخاری رحمہ اللہ امام مسلم یحیی بن معین اور دیگر حضرات نے اسے ضعیف قرار دیا ہے ۔

سیدنا جبیر بن مطعم رضی اللہ عنہ بیان کرتے ہیں : نبی اکرم صلی اللہ علیہ وسلم رکوع میں تین مرتبہ سُبْحَانَ رَبِّيَ الْعَظِيمِ پڑھا کرتے تھے ، اور سجدے میں تین مرتبہ سُبحَانَ رَبِّي الأغلى پڑھا کرتے تھے
یہ روایت امام بزار نے اور امام طبرانی نے معجم کبیر میں نقل کی ہے امام بزار بیان کرتے ہیں : سیدنا جبیر کے حوالے سے
یہ روایت صرف اسی سند کے ساتھ منقول ہے ، اس کی سند میں ایک راوی عبدالعزیز بن عبیداللہ ہے ، جو صالح ہے ، لیکن قوی نہیں ہے ۔

سیدنا ابوبکرہ رضی اللہ عنہ بیان کرتے ہیں : نبی اکرم صلی اللہ علیہ وسلم رکوع میں تین مرتبہ سُبْحَانَ رَبِّيَ الْعَظِيْمِ پڑھا کرتے تھے ، اور سجدے میں تین مرتبہ سبحَانَ رَبِّيَ الْأَعْلَی پڑھا کرتے تھے
یہ روایت امام بزار نے اور امام طبرانی نے معجم کبیر میں نقل کی ہے امام بزار کہتے ہیں : ہمارے علم کے مطابق سیدنا ابوبکرہ کے حوالے سے یہ حدیث صرف اسی سند کے ساتھ منقول ہے عبدالرحمن بن ابوبکرہ نامی راوی صالح الحدیث ہے ۔

سیدنا عبدالله بن مسود رضی اللہ عنہ فرماتے ہیں : سنت یہ ہے کہ آدمی رکوع میں تین مرتبہ سبحان ربی العظیم پڑھے اور سجدے میں تین مرتبہ «سُبْحَانَ رَبِّيَ الْأَعْلَی پڑھے ۔
یہ روایت امام بزار نے نقل کی ہے ، اور اس کی سند میں ایک راوی سری بن اسماعیل ہے ، اور وہ محدثین کے نزدیک ” ضعیف “ ہے ۔

سیدنا عبداللہ بن مسعود رضی اللہ عنہ فرماتے ہیں : نبی اکرم صلی اللہ علیہ وسلم جب سجدے میں جاتے تو سجدے میں یہ پڑھتے تھے : ” میری ذات اور میرے خیال نے تیرے لئے سجدہ کیا ہے میرا دل تجھ پر ایمان لایا ہے میں اپنے اوپر تیری نعمت کا اعتراف کرتا ہوں یہ میرا ہاتھ ہے ، اور وہ چیز ہے ، جو میں نے اپنے خلاف جرم کا ارتکاب کیا ہے “ ۔
یہ روایت امام بزار نے نقل کی ہے ، اور اس کے رجال ” ثقہ “ ہیں ۔

سیدنا ابومالک اشعری رضی اللہ عنہ بیان کرتے ہیں : نبی اکرم صلی اللہ علیہ وسلم نے نماز ادا کی جب آپ رکوع میں گئے تو آپ نے سبْحَانَ اللهِ وَبِحَمْدِهِ تین مرتبہ پڑھا پھر آپ نے اپنے سر کو اٹھایا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی شہر بن حوشب ہے ، جس کے بارے میں کچھ کلام کیا گیا ہے ایک سے زیادہ حضرات نے اس کو ثقہ قرار دیا ہے ۔

سیدنا معاویہ بن ابوسفیان رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کی نماز کا بغور جائزہ لینا شروع کیا میں نے آپ کو غور سے سنا تو آپ زیادہ تر نمازوں میں سبحَانَ رَبِّ الْعَالَمِيْنَ پڑھا کرتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی صدقہ بن عبداللہ سمین ہے ، جسے امام بخاری رحمہ اللہ امام مسلم اور دیگر حضرات نے ضعیف قرار دیا ہے امام ابوحاتم اور دحیم اور دیگر حضرات نے اسے ” ثقہ “ قرار دیا ہے ۔

عبدالله بن زیاد اسدی بیان کرتے ہیں : انہوں نے سیدنا عبداللہ بن مسعود کو رکوع کے دوران یہ پڑھتے ہوئے سنا : لَا حَوْلَ وَلَا قُوَّةَ إِلَّا بِاللهِ
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

عبدالرحمن بن یزید بیان کرتے ہیں : سیدنا عبداللہ بن مسعود رضی اللہ عنہ ہاتھ کے ذریعے ایک مرتبہ کنکریاں برابر کرتے تھے جب وہ سجدے میں جانے لگتے تھے ، اور وہ سجدے میں یہ پڑھتے تھے : ” میں حاضر ہوں ، اور سعادت مندی تیری طرف سے حاصل ہو سکتی ہے “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

ابواسود اور شداد بن ازمع کے بارے میں یہ بات منقول ہے : ایک مرتبہ وہ سیدنا عبداللہ بن مسعود رضی اللہ عنہ کے ساتھ تھے راوی بیان کرتے ہیں : ان دونوں حضرات کا اختلاف ہوا ہے ابواسود کا یہ کہنا ہے کہ سیدنا عبداللہ بن مسعود رضی اللہ عنہ سجدے میں یہ پڑھتے تھے ” تو ہر عیب سے پاک ہے اے اللہ ! تیرے علاوہ اور کوئی رب نہیں ہے “ ۔ جب کہ شداد کہتے ہیں : وہ یہ پڑھا کرتے تھے ” تو ہر عیب سے پاک ہے تیرے علاوہ اور کوئی معبود نہیں ہے “ ۔
یہ روایت امام طبرانی نے معجم کبیر میں نقل کی ہے ابواسود کی روایت کے رجال ” صحیح“ کے رجال ہیں جب کہ شداد کو ابن حبان نے ” ثقہ “ قرار دیا ہے ۔

ابومالک نے اپنے والد کے حوالے سے نبی اکرم صلی اللہ علیہ وسلم کا یہ فرمان نقل کیا ہے : ” جو بھی بندہ سجدے میں جا کے یہ پڑھتا ہے : ” اے میرے پروردگار ! تو میری مغفرت کر دے “ ۔ اگر وہ تین مرتبہ یہ پڑھ لے تو اس کے سر کو اٹھانے سے پہلے اللہ تعالیٰ اس کی مغفرت کر دیتا ہے ۔
یہ روایت امام طبرانی نے معجم کبیر میں محمد بن جابر کی سیدنا ابومالک کے حوالے سے نقل کردہ روایت کے طور پر نقل کیا ہے ، اور میں نے کسی کو ان دونوں کا ذکر کرتے ہوئے نہیں دیکھا ہے ۔

عمروبن دینار بیان کرتے ہیں : سیدنا عبداللہ بن مسعود رضی اللہ عنہ یہ فرمایا کرتے تھے اپنی ضرورتوں کو فرض نمازوں پر لادا کرو ۔
یہ روایت امام طبرانی نے معجم کبیر میں نقل کی ہے عمرو بن دینار نے سیدنا عبداللہ بن مسعود رضی اللہ عنہ سے سماع نہیں کیا ہے ، اس روایت کے بقیہ رجال ” ثقہ “ ہیں ۔

ابوخالد جو سیدنا عبداللہ کے شاگردوں میں سے ایک ہیں وہ بیان کرتے ہیں : ایک شخص سیدنا عبداللہ کے پاس آیا اور بولا: اے ابوعبدالرحمن فلاں شخص رکوع کی حالت میں قرآن پڑھتا ہے ، جب وہ سجدے کی حالت میں ہوتا ہے ، تو اس وقت بھی قرآن پڑھتا ہے ، تو سیدنا عبداللہ رضی اللہ عنہ نے فرمایا : کچھ ایسے لوگ ہوں گے جو قرآن پڑھیں گے لیکن وہ ان کے حلق سے آگے نہیں جائے گا کہ وہ ( حلق سے آگے جا کر ) دل میں داخل ہوتا اور اس میں پختہ ہو جاتا اور نفع دیتا ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں البتہ ابوخالد نامی راوی کے حالات بیان کرتے ہوئے میں نے کسی کو نہیں پایا ہے ۔