مجمع الزوائد ومنبع الفوائد

نبی اکرم صلی اللہ علیہ وسلم کے اصحاب میں سے ایک صاحب سیدنا اغر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کے پیچھے نماز ادا کی تو آپ نے سورہ روم کی تلاوت کی ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا عبداللہ بن عمر رضی اللہ عنہما بیان کرتے ہیں : مفصل سورتوں سے تعلق رکھنے والی ہر چھوٹی اور بڑی سورت کو میں نے نبی اکرم صلی اللہ علیہ وسلم کو نماز میں تلاوت کرتے ہوئے سنا ہے “ ۔
یہ روایت امام طبرانی نے اسماعیل بن عیاش کی اہل حجاز سے نقل کردہ روایت کے طور پر نقل کی ہے ، اور
یہ روایت ” ضعیف “ ہے ۔

سیدنا عبداللہ بن عمرو رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو نماز میں آیات کو شمار کرتے ہوئے دیکھا ہے ۔
یہ روایت امام طبرانی نے نقل کی ہے ، اس کی سند میں ایک راوی نصر بن طریف ہے ، اور وہ متروک ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم کے اصحاب فرض نمازوں میں شروع سے لے کر آخر تک پورا قرآن پڑھ لیتے تھے
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سہیل بن ابوحزم ہے ، جسے ایک جماعت نے ضعیف قرار دیا ہے ، اس کے بعد انہوں نے یہ کہا: ہے یہ قوی نہیں ہے یحیی بن معین نے اسے ” ثقہ “ قرار دیا ہے ، اس روایت کے بقیہ رجال ” ثقہ “ ہیں ۔

ابوالعالیہ بیان کرتے ہیں : مجھے اس شخص نے یہ بات سنائی ہے ، جس نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” رکوع اور سجود میں ہر سورت کا مخصوص حصہ ہوتا ہے “ ۔ راوی بیان کرتے ہیں : بعد میں میری ان سے ملاقات ہوئی تو میں نے کہا: سیدنا عبداللہ بن عمر ایک رکعت میں مختلف سورتیں تلاوت کر لیتے تھے ؟ تو کیا آپ اس بارے میں جانتے ہیں آپ کو یہ حدیث کس نے بیان کی ہے انہوں نے فرمایا : میں انہیں جانتا ہوں ، اور مجھے یہ بھی پتہ ہے کہ انہوں نے کتنا عرصہ پہلے مجھے یہ حدیث بیان کی تھی انہوں نے پچاس سال پہلے مجھے یہ حدیث بیان کی تھی ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔

نافع بیان کرتے ہیں : بعض اوقات سیدنا عبداللہ بن عمر ہماری امامت کرتے ہوئے فرض نماز میں دو یا تین سورتیں پڑھ لیتے تھے۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

ابوالعالیہ بیان کرتے ہیں : تیس صحابہ کرام اکٹھے ہوئے اور بولے : جہاں تک اس چیز کا تعلق ہے کہ جن نمازوں میں نبی اکرم صلی اللہ علیہ وسلم بلند آواز میں قرأت کیا کرتے تھے تو ہمیں ان کا علم ہے ، اور ان کا پتہ ہے کہ جن میں آپ بلند آواز میں قرأت نہیں کیا کرتے تھے تو ہم اس پر قیاس نہیں کریں گے جن میں آپ بلند آواز میں قرأت کرتے تھے راوی بیان کرتے ہیں : تو ان حضرات کا اس بات پر اتفاق تھا ان میں سے دو افراد کی بھی رائے مختلف نہیں تھی کہ نبی اکرم صلی اللہ علیہ وسلم ظہر کی نماز میں پہلی دو رکعات میں سے ہر رکعت میں تقریبا تیس آیات کی تلاوت کرتے تھے ، اور آخری دو رکعات میں اس سے نصف تلاوت کرتے تھے ، اور عصر کی نماز میں آپ اس سے نصف تلاوت کرتے تھے جتنی تلاوت آپ ظہر کی پہلی دو رکعات میں کرتے تھے ، اور آخری دو رکعات میں ظہر کی آخری دو رکعات کی مقدار کی نصف تلاوت کرتے تھے۔
یہ روایت امام أحمد نے نقل کی ہے ، اس کی سند میں ایک راوی عبدالرحمن بن عبداللہ مسعودی ہے وہ ” ثقہ “ ہے ، لیکن اختلاط کا شکار ہو گیا تھا یہ بات کہی جاتی ہے یزید بن ہارون نے اس سے اس کے اختلاط کے دوران سماع کیا تھا باقی اللہ بہتر جانتا ہے ۔

سیدہ اسماء بنت ابوبکر رضی اللہ عنہما بیان کرتی ہیں : میں نے نبی اکرم صلی اللہ علیہ وسلم کو سنا آپ رکن کی طرف رُخ کر کے نماز ادا کر رہے تھے یہ ( قرآن مجید کے اس حکم کے نازل ہونے ) سے پہلے کی بات ہے کہ تم اس چیز کو جاری رکھو ، اس کا تمہیں حکم دیا گیا ہے ، اور ( اس وقت ) مشرکین یہ سن رہے تھے ” تم اپنے پروردگار کی کون کون سی نعمتوں کو جھٹلاؤ گے “ ۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ۔

سیدنا عبادہ بن صامت رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” سورت فاتحہ اور اس کے ہمراہ دو آیات کی تلاوت کے بغیر نماز نہیں ہوتی “ ۔
یہ روایت امام طبرانی نے معجم اوسط میں نقل کی ہے میں یہ کہتا ہوں : یہ ” صحیح “ میں مذکور ہے ، تاہم اس میں یہ الفاظ نہیں ہیں “ اس کے ہمراہ دو آیات “ ۔ اس روایت کی سند میں ایک راوی حسن بن یحیی خشنی ہے ، جسے امام نسائی رحمہ اللہ اور امام دارقطنی رحمہ اللہ نے ضعیف قرار دیا ہے دحیم ابن عدی اور ایک روایت کے مطابق یحیی بن معین نے اسے ” ثقہ “ قرار دیا ہے ۔

سیدنا جابر بن عبداللہ رضی اللہ عنہما بیان کرتے ہیں : نماز میں قرات کا سنت طریقہ یہ ہے کہ پہلی دو رکعات میں سورت فاتحہ اور ایک سورت پڑھی جائے اور آخری دو رکعات میں صرف سورت فاتحہ پڑھی جائے
یہ روایت امام طبرانی نے معجم اوسط میں نقل کی ہے ، اس میں امام طبرانی کے استاد ، اور ان کے استاد کے استاد میں نے کسی کو ان دونوں کا ذکر کرتے ہوئے نہیں پایا ہے ۔

سیدنا زید بن ثابت فرماتے ہیں : قرأت کرنا سنت ہے تم اپنی رائے کی بنیاد پر لوگوں کے برخلاف نہ کرو۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن ابوزناد ہے ، اور وہ ” ضعیف“ ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم تشریف لائے آپ نے دو رکعات ادا کیں اور آپ نے ان دونوں میں صرف سورت فاتحہ کی تلاوت کی ۔
یہ روایت امام أحمد امام ابویعلیٰ اور امام طبرانی نے معجم کبیر میں اور امام بزار نے نقل کی ہے ، اس کی سند میں ایک راوی حنظلہ سدوسی ہے ، جسے یحیی بن معین اور دیگر حضرات نے ضعیف قرار دیا ہے ، جب کہ ابن حبان نے اسے ” ثقہ “ قرار دیا ہے ۔