مجمع الزوائد ومنبع الفوائد

مطلب بن عبداللہ رضی اللہ عنہ بیان کرتے ہیں : لوگوں نے ظہر اور عصر کی نماز میں قرأت کے بارے میں بحث شروع کی تو انہوں نے مجھے خارجہ بن زید کے پاس بھیجا انہوں نے بتایا : سیدنا ابی بن کعب نے یہ بات بیان کی ہے ۔ نبی اکرم صلی اللہ علیہ وسلم طویل قیام کرتے تھے ، اور اپنے ہونٹوں کو حرکت دیتے تھے جس سے مجھے پتہ چلا تھا کہ یہ قرأت کی وجہ سے ہوتا تھا تو میں بھی ایسا ہی کرتا ہوں۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند کی ایک راوی کثیر بن زید ہے ، جس سے استدلال کرنے کے بارے میں اختلاف کیا گیا ہے ۔

نبی اکرم صلی اللہ علیہ وسلم کے ایک صحابی بیان کرتے ہیں : ظہر کی نماز میں نبی اکرم صلی اللہ علیہ وسلم کی قرأت کا اندازہ آپ کی داڑھی کی حرکت کے ذریعے ہو جاتا تھا ۔
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔

یزید بن براء بیان کرتے ہیں : سیدنا ابی نے فرمایا تم لوگ اکھٹے ہو جاؤ تاکہ میں تمہیں دکھاؤں کہ نبی اکرم صلی اللہ علیہ وسلم کس طرح وضو کرتے تھے ، اور کس طرح آپ نماز ادا کرتے تھے کیونکہ مجھے نہیں معلوم کہ میں تمہارے ساتھ اور کتنا عرصہ رہوں گا ۔ راوی بیان کرتے ہیں : پھر انہوں نے اپنے بچوں اور اپنے اہل خانہ کو اکھٹا کیا وضو کے لئے پانی منگوایا کلی کی ناک میں پانی ڈالا اپنے چہرے کو تین مرتبہ دھویا دائیں بازو کو تین مرتبہ دھویا بائیں بازو کو تین مرتبہ دھویا پھر فرمایا ( نبی اکرم صلی اللہ علیہ وسلم کے وضو کا طریقہ ) اس طرح تھا میں نے تمہیں یہ دکھانے میں کوئی کوتاہی نہیں کی کہ نبی اکرم صلی اللہ علیہ وسلم کس طرح وضو کرتے تھے پھر وہ اپنے گھر میں داخل ہوئے انہوں نے نماز ادا کی ہمیں نہیں معلوم کہ وہ کون سی نماز تھی پھر وہ باہر نکلے پھر انہوں نے نماز کے لیے حکم دیا تو اقامت کہی گئی ، تو انہوں نے ہمیں ظہر کی نماز پڑھائی میرا خیال ہے میں نے ان کی زبانی سورت یسین کی دس آیات سنی تھیں پھر انہوں نے عصر کی نماز پڑھائی پھر انہوں نے ہمیں مغرب کی نماز پڑھائی پھر انہوں نے ہمیں عشا کی نماز پڑھائی پھر انہوں نے فرمایا : میں نے اس بارے میں کوئی کوتاہی نہیں کی ہے کہ میں تمہیں یہ دکھاؤں کہ نبی اکرم صلی اللہ علیہ وسلم کس طرح وضو کرتے تھے ، اور آپ کس طرح نماز ادا کرتے تھے ۔
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے ابوالعالیہ کے حوالے سے تیس صحابہ کے حوالے سے روایت گزر چکی ہے ، جو اس سے پہلے والے باب میں گزری ہے ۔

سیدنا براء رضی اللہ عنہ بیان کرتے ہیں : ہم نے نبی اکرم صلی اللہ علیہ وسلم کے ساتھ ظہر کی نماز ادا کی تو ہم نے یہ گمان کیا کہ آپ نے اس میں سورت تنزیل السجدہ کی تلاوت کی ہے ۔
یہ روایت امام ابویعلیٰ نے نقل کی ہے ، اس کی سند میں ایک راوی یحیی بن عقبہ بن ابوالعیزار ہے ، اور وہ منکرالحدیث ہے ۔

عبدالعزیز بن ابوسکین بیان کرتے ہیں : میں سیدنا انس بن مالک رضی اللہ عنہ کی خدمت میں حاضر ہوا میں نے کہا: آپ مجھے نبی اکرم صلی اللہ علیہ وسلم کی نماز کے بارے میں بتائیے تو انہوں نے اپنے اہل خانہ کی امامت کرتے ہوئے ہمیں ظہر اور عصر کی نمازیں پڑھائیں انہوں نے پست آواز میں قرأت کی انہوں نے سورت مرسلات سورہ نازعات سورہ عم یتسالون اور اس جیسی دوسری سورتوں کی تلاوت کی ۔
یہ روایت ابویعلیٰ نے اور امام طبرانی نے معجم اوسط میں نقل کی ہے ، اس کی سند میں ایک راوی سکین بن عبدالعزیز ہے ، جسے امام ابوداؤد اور امام نسائی رحمہ اللہ نے ضعیف قرار دیا ہے وکیع یحیی بن معین ابوحاتم اور ابن حبان نے اسے ” ثقہ “ کہا: ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم ظہر اور عصر کی نمازوں میں سورہ الاعلی اور سورت الغاشیہ کی تلاوت کرتے تھے ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں
یہ روایت امام طبرانی نے معجم اوسط میں نقل کی ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے انہیں ظہر کی نماز پڑھاتے ہوئے بلند آواز میں تلاوت کی آپ نے سورت والشمس اور سورت والیل کی تلاوت کی سیدنا ابی بن کعب نے آپ کی خدمت میں عرض کی : یا رسول اللہ ! کیا آپ کو اس نماز کے بارے میں کوئی حکم دیا گیا ہے ۔ نبی اکرم صلی اللہ علیہ وسلم نے ارشاد فرمایا : جی نہیں میں نے یہ ارادہ کیا کہ میں تمہارے لئے متعین کر دوں ( کہ کتنی تلاوت ہونی چاہیے )
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابورجال انصاری بصری ہے اور وہ منکر الحدیث ہے ۔

سیدنا عبداللہ بن مسعود رضی اللہ عنہ بیان کرتے ہیں : ظہر اور عصر کی نمازوں میں نبی اکرم صلی اللہ علیہ وسلم کی قرأت کا علم آپ کی داڑھی کی حرکت کے ذریعے ہو جاتا تھا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی زید بن حریش ہے ، جس کا ذکر ابن ابوحاتم نے کیا ہے ، انہوں نے اس پر جرح بھی نہیں کی ہے ، اور اس کی توثیق بھی نہیں کی ہے ، اس روایت کے بقیہ جال ” ثقہ “ ہیں ۔

سیدنا ابومالک رضی اللہ عنہ بیان کرتے ہیں : نبی اکرم صلی اللہ علیہ وسلم ساری رکعات میں تلاوت کرتے تھے راوی کہتے ہیں : یعنی ظہر اور عصر کی چاروں رکعتوں میں تلاوت کرتے تھے
یہ روایت امام طبرانی نے معجم کبیر میں نقل کی ہے ، اس کی سند میں ایک راوی شہر بن حوشب ہے ، جس کے بارے میں کلام کیا گیا ہے ایک جماعت نے اسے ” ثقہ “ قرار دیا ہے ۔

سیدنا عدی بن حاتم کے بارے میں یہ بات منقول ہے : انہوں نے لوگوں کو ظہر اور عصر کی نمازیں پڑھائیں اور ان میں تقریباً سورت انشقاق کی تلاوت کی جب انہوں نے نماز مکمل کر لی تو وہ بولے : میں نے نبی اکرم صلی اللہ علیہ وسلم کے طریقے کے حوالے سے کوئی کوتاہی نہیں کی ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ایوب بن جابر ہے ، جسے یحیی بن معین علی اور دیگر حضرات نے ضعیف قرار دیا ہے ، جب کہ امام أحمد اور عمرو بن علی فلاس نے اسے ” ثقہ “ کہا: ہے ۔

عکرمہ فرماتے ہیں : ظہر اور عصر کی نماز میں قرأت نہیں ہو گی صرف سورت فاتحہ پڑھی جائے گی تو سیدنا عبداللہ بن عباس رضی اللہ عنہما نے فرمایا : اللہ کے رسول نے ہمیں یہ حکم دیا ہے کہ ہم تلاوت کریں اور اللہ کے رسول نے ان چیزوں کی تبلیغ کی ہے ، جو آپ کے پروردگار نے احکام آپ کی طرف نازل کیے تھے
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابراہیم بن حکم بن ابان ہے ، اور وہ انتہائی ” ضعیف “ ہے ۔

ابن سیرین بیان کرتے ہیں : سیدنا عبداللہ بن مسعود رضی اللہ عنہ ظہر اور عصر کی پہلی دو رکعات میں سورت فاتحہ اور ایک سورت کی تلاوت کرتے تھے جب کہ آخری دو رکعات میں صرف سورت فاتحہ پڑھتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں البتہ ابن سیرین نے سیدنا عبداللہ بن مسعود رضی اللہ عنہ سے سماع نہیں کیا ہے ۔

علقمہ بیان کرتے ہیں : میں نے سیدنا عبداللہ کے پہلو میں نماز ادا کی تو مجھے یہ پتہ نہیں چلا کہ آپ نے کچھ تلاوت کی ہے یہاں تک کہ میں نے انہیں یہ کہتے ہوئے سنا ” اے میرے پروردگار ! میرے علم میں اضافہ فرما “ تو مجھے اندازہ ہوا کہ وہ سورہ طہ پڑھ رہے ہیں۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

عبداللہ بن زیاد بیان کرتے ہیں : میں نے دن کی دو نمازوں میں سے ایک میں سیدنا عبداللہ تعالیٰ کی قرأت سنی تھی
یہ روایت امام طبرانی نے معجم کبیر میں نقل کی ہے ۔

انہوں نے عبداللہ بن زیاد کے حوالے سے
یہ روایت بھی نقل کی ہے وہ بیان کرتے ہیں : میں سیدنا عبداللہ کے پہلو میں ظہر اور عصر کی نمازوں میں کھڑا ہوا تو میں نے انہیں تلاوت کرتے ہوئے سنا اس کے رجال ” ثقہ “ ہیں ۔

حمید اور عثمان بتی فرماتے ہیں : ہم نے سیدنا انس رضی اللہ عنہ کے پیچھے ظہر اور عصر کی نمازیں ادا کیں تو ہم نے انہیں سورت الاعلی کی تلاوت کرتے ہوئے سنا ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔