مجمع الزوائد ومنبع الفوائد

سیدنا حارث بن غطیف رضی اللہ عنہ ( راوی کو شک ہے یا شاید یہ الفاظ ہیں : ) سیدنا غطیف بن حارث بیان کرتے ہیں : کچھ چیزیں ایسی ہیں جو میں نہیں بھولا ہوں اور میں یہ نہیں بھولا کہ میں نے نبی اکرم صلی اللہ علیہ وسلم کو نماز کے دوران اپنا دایاں ہاتھ بائیں ہاتھ پر رکھے ہوئے دیکھا ہے ۔
یہ روایت امام أحمد نے اور امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر ایک شخص کے پاس سے ہوا جو نماز ادا کر رہا تھا اس نے بایاں ہاتھ دائیں ہاتھ پر رکھا ہوا تھا تو نبی اکرم صلی اللہ علیہ وسلم نے انہیں الگ کیا اور دایاں ہاتھ بائیں ہاتھ پر رکھ دیا ۔
یہ روایت امام أحمد نے اور امام طبرانی نے معجم اوسط میں نقل کی ہے ، اور اس کے رجال ” صحیح “ کے رجال ہیں ۔

سیدنا شداد بن شرحبیل رضی اللہ عنہ بیان کرتے ہیں : میں نہیں بھولا اور میں یہ بات نہیں بھولا کہ میں نے نبی اکرم صلی اللہ علیہ وسلم کو کھڑے ہوئے دیکھا آپ نے اپنا دایاں ہاتھ بائیں ہاتھ پر رکھ کر اس کو پکڑا ہوا تھا ۔ راوی کہتے ہیں : یعنی نماز کے دوران ایسا کیا تھا ۔
یہ روایت امام بزار نے اور امام طبرانی نے معجم کبیر میں نقل کی ہے ، اس کی سند میں ایک راوی عباس بن یونس ہے میں نے کسی کو اس کے حالات بیان کرتے ہوئے نہیں پایا ہے امام بزار کہتے ہیں : شداد بن شرحبیل نے نبی اکرم صلی اللہ علیہ وسلم کے حوالے سے صرف یہی حدیث روایت کی ہے ۔

سیدنا عبداللہ بن عباس رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک ہمیں یعنی انبیاء کے گروہ کو اس بات کا حکم دیا گیا ہے کہ افطاری جلدی کریں سحری تاخیر سے کریں اور نماز کے دوران اپنے دائیں ہاتھ بائیں ہاتھوں پر رکھیں “ ۔ یہ ہدایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا یعلی بن مرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تین چیزیں ہیں جنہیں اللہ تعالی پسند کرتا ہے افطاری جلدی کرنا سحری تاخیر سے کرنا اور نماز کے دوران دونوں ہاتھ ایک دوسرے پر رکھنا ( یعنی دایاں ہاتھ بائیں ہاتھ پر رکھنا ) “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عمر بن عبداللہ بن یعلی ہے ، اور وہ ” ضعیف “ ہے ۔

سیدنا ابودرداء رضی اللہ عنہ ” مرفوع “ حدیث کے طور پر یہ بات نقل کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تین چیزیں نبوت کے اخلاق کا حصہ ہیں ، افطاری جلدی کرنا سحری تاخیر سے کرنا اور نماز کے دوران دایاں ہاتھ بائیں پر رکھنا “ ۔
یہ روایت امام طبرانی نے معجم کبیر میں ” مرفوع “ حدیث کے طور پر بھی نقل کی ہے ، اور سیدنا ابودرداء رضی اللہ عنہ پر ” موقوف “ روایت کے طور پر بھی نقل کی ہے ” موقوف “ ہونا مستند ہے ” مرفوع “ روایت کے رجال میں ایک ایسا شخص بھی کہ میں نے کسی کو اس کے حالات بیان کرتے ہوئے نہیں دیکھا ہے ۔ ( علامہ ہیثمی فرماتے ہیں : ) میں یہ کہتا ہوں : اس نوعیت کی دیگر احادیث روزوں سے متعلق باب میں آگے آئیں گی اگر اللہ نے چاہا ۔

عقبہ بن ابوعائشہ رضی اللہ عنہا بیان کرتے ہیں : سیدنا عبداللہ بن جابر بیاضی رضی اللہ عنہ جو نبی اکرم صلی اللہ علیہ وسلم کے صحابی ہیں ، میں نے دیکھا کہ انہوں نے نماز کے دوران ایک ہاتھ دوسری کلائی پر رکھا ہوا تھا ۔
یہ روایت امام طبرانی نے معجم کبیر میں نقل کی ہے اور اس کی سند حسن ہے ۔