مجمع الزوائد ومنبع الفوائد

سیدنا عامر بن ربیعہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم میں تجربہ کار اور سمجھ دار لوگ میرے قریب ہوں پھر ان کے بعد ان کے بعد کے مرتبے والے ہوں ، پھر ان کے بعد ان کے بعد کے مرتبے والے ہوں “ ۔
یہ روایت امام بزار نے نقل کی ہے ، اس کی سند میں ایک راوی عاصم بن عبداللہ عمری ہے اکثر حضرات نے اسے ضعیف قرار دیا ہے ، اس سے استدلال کرنے کے بارے میں اختلاف کیا گیا ہے ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم مہاجرین کو یہ حکم دیتے تھے کہ وہ آگے آئیں اور آگے والی صفوں میں ہوں آپ یہ فرماتے تھے : لا علم لوگوں اور دیہاتیوں کے مقابلے میں یہ لوگ زیادہ علم رکھتے ہیں ، اور مجھے یہ بات پسند نہیں ہے کہ دیہاتی لوگ ان سے آگے کھڑے ہوں جنہیں یہ پتہ ہی نہیں ہے کہ نماز کیسے ادا کرنی ہے ؟
یہ روایت امام بزار نے اور طبرانی نے معجم کبیر میں نقل کی ہے ، اس کی سند ” ضعیف “ ہے ۔

سیدنا سمره رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” دیہاتیوں کو مہاجرین اور انصار کے پیچھے کھڑا ہونا چاہیے تاکہ وہ نماز میں ان لوگوں کی پیروی کریں “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی سعید بن بشیر ہے ، جس سے استدلال کرنے کے بارے میں اختلاف کیا گیا ہے ۔