مجمع الزوائد ومنبع الفوائد

سیدنا عبداللہ بن عباس رضی اللہ عنہما فرماتے ہیں : تم پر پہلی صف میں جانا لازم ہے ، اور اس میں بھی دائیں طرف رہنا لازم ہے ، اور تم اس بات سے بچو کہ ستونوں کے درمیان صف بناؤ ۔
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی اسماعیل بن مسلم مکی ہے ، اور وہ ” ضعیف “ ہے ۔

سیدنا ابوبردہ اسلمی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اگر تم سے ہو سکے تو تم امام کے پیچھے کھڑے ہو ، ورنہ اس کے دائیں طرف کھڑے ہو“ ۔
یہ روایت امام طبرانی نے معجم اوسط میں نقل کی ہے ، اس کی سند میں ایسا راوی ہے ، جس کا ذکر میں نے نہیں پایا ہے ۔

سیدنا حکم بن عمیر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : پہلی صف کو دیگر صفوں پر فضیلت حاصل ہوتی ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یحی بن یعلی اسلمی ہے ، اور وہ ” ضعیف“ ہے ۔

عبدالعزیز بن رفیع بیان کرتے ہیں : عامر بن مسعود قرشی نے مجھے حدیث بیان کی سیدنا عبداللہ بن زبیر رضی اللہ عنہما کے زمانے میں ان کی مکہ میں مجھ سے ملاقات ہوئی تھی یہ ملاقات مقام ابراہیم کے پاس ہوئی تھی اور پہلی صف میں ہوئی تھی راوی کہتے ہیں : میں نے ان سے دریافت کیا : کیا یہ بات کہی جاتی ہے کہ پہلی صف زیادہ بہتر ہوتی ہے ؟ انہوں نے جواب دیا : جی ہاں ! اللہ کی قسم نبی اکرم صلی اللہ علیہ وسلم نے یہ بات ارشاد فرمائی ہے : اگر لوگوں کو یہ پتہ چل جائے کہ پہلی صف کا کیا اجر و ثواب ہے ، تو اس صف میں لوگ صرف قرعہ اندازی کے ذریعے شامل ہو سکیں گے “ ۔ ( یہاں ایک لفظ کے بارے میں راوی کو شک ہے ، تاہم اس کا مفہوم یہی ہے ) ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں صرف عامر بن مسعود کا معاملہ مختلف ہے ان کے صحابی ہونے کے بارے میں اختلاف کیا گیا ہے ۔

سیدنا عبداللہ بن مسعود رضی اللہ عنہ فرماتے ہیں : بے شک اللہ تعالیٰ اور اس کے فرشتے آگے کی صفوں والوں پر رحمت نازل کرتے ہیں ۔ راوی کہتے ہیں : اس سے مراد پہلی صف ہے ۔
یہ روایت امام طبرانی نے معجم کبیر میں ” موقوف “ روایت کے طور پر نقل کی ہے ، اور اس کی سند میں ایک راوی ایسا ہے ، جس کا نام بیان نہیں کیا گیا ہے ۔