مجمع الزوائد ومنبع الفوائد

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ اور اس کے فرشتے پہلی صف والوں پر رحمت نازل کرتے ہیں لوگوں نے عرض کی : یا رسول اللہ ! اور دوسری صف پر بھی ؟ نبی اکرم صلی اللہ علیہ وسلم نے ارشاد فرمایا : بے شک اللہ تعالیٰ اور اس کے فرشتے پہلی صف والوں پر رحمت نازل کرتے ہیں لوگوں نے عرض کی : یا رسول اللہ ! اور دوسری صف پر بھی ؟ نبی اکرم صلی اللہ علیہ وسلم نے فرمایا : دوسری پر بھی ، نبی اکرم صلی اللہ علیہ وسلم نے ارشاد فرمایا : تم لوگ صفیں درست رکھو کندھے برابر رکھو اور اپنے بھائیوں کے ہاتھوں میں نرم ہو جاؤ خلل کو ختم کر دو کیونکہ شیطان تمہارے درمیان یوں داخل ہو جاتا ہے جیسے وہ چھوٹی بکری ہو “ ۔ راوی کہتے ہیں : اس سے مراد یہ ہے کہ جیسے وہ چھوٹی بکری کی اولاد ہو ۔
یہ روایت امام أحمد نے اور امام طبرانی نے معجم کبیر میں نقل کی ہے امام أحمد کے رجال کی توثیق کی گئی ہے ۔

سیدنا نعمان بن بشیر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالی اور اس کے فرشتے پہلی صف والوں پر ( راوی کو شک ہے شاید یہ الفاظ ہیں : ) پہلی صف والوں پر رحمت نازل کرتے ہیں “ ۔
یہ روایت امام أحمد اور امام بزار نے نقل کی ہے ، اور اس کے رجال ” ثقہ “ ہیں ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ اور اس کے فرشتے پہلی صف والوں پر رحمت نازل کرتے ہیں “ ۔
یہ روایت امام بزار نے نقل کی ہے ، اس کی سند میں ایک راوی عبداللہ بن محمد بن بن عقیل ہے ، جس کے بارے میں کلام کیا گیا ہے ایک جماعت نے اسے ” ثقہ “ قرار دیا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے پہلی صف کے لئے تین مرتبہ دوسری صف کے لئے دو مرتبہ اور تیسری صف کے لئے ایک مرتبہ دعائے مغفرت کی تھی ۔
یہ روایت امام بزار نے نقل کی ہے ، اس کی سند میں ایک راوی ایوب بن عتبہ ہے ، جسے اس کے حافظے کے حوالے سے ضعیف قرار دیا گیا ہے ۔