مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : ایک مرتبہ نبی اکرم صلی اللہ علیہ وسلم نماز ادا کر رہے تھے اسی دوران ایک بکری آئی وہ آپ کے آگے سے گزرنے لگی تو نبی اکرم صلی اللہ علیہ وسلم نے اسے ایسا کرنے سے روکا ، یہاں تک کہ آپ نے اپنا پیٹ دیوار کے ساتھ لگا دیا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عمرو بن حکام ہے ، اور وہ ضعیف ہے ، اس سے پہلے سیدنا عبداللہ بن عمرو رضی اللہ عنہ سے منقول حدیث سترہ کے قریب ہونے سے متعلق باب میں گزر چکی ہے ، اور وہ صحیح حدیث ہو گی اگر اللہ نے چاہا اس موضوع سے متعلق کچھ احادیث اس سے پہلے والے باب میں گزر چکی ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم اس بلی کی طرف بڑھے ( یعنی آپ نے جلدی سے اس کو روک دیا ) جو نماز کے دوران آپ کے آگے سے گزرنا چاہتی تھی ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی مندل بن علی ہے ، اور وہ ” ضعیف“ ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نماز ادا کر رہے تھے ایک دیہاتی اپنی اونٹنی پر گزرا نبی اکرم صلی اللہ علیہ وسلم نے اسے اشارہ کیا لیکن اسے سمجھ نہیں آئی تو سیدنا عمر رضی اللہ عنہ نے اسے بلند آواز میں پکار کر کہا: اے دیہاتی پیچھے رہو جب نبی اکرم صلی اللہ علیہ وسلم نے سلام پھیرا تو آپ نے دریافت کیا : کلام کرنے والا شخص کون تھا ؟ تو لوگوں نے بتایا : سیدنا عمر رضی اللہ عنہ تو آپ نے ارشاد فرمایا : یہ کتنا سمجھ دار آدمی ہے ۔ میں یہ کہتا ہوں : اس کلام کو روایت نے دیہاتی کے حوالے سے نقل کیا ہے ۔ سیدنا عمر رضی اللہ عنہ کے حوالے سے نقل نہیں کیا ہے جیسا کہ میرا گمان ہے ، باقی اللہ بہتر جانتا ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عیسیٰ بن مسیب بجلی ہے ، جسے امام ابن حبان رحمہ اللہ نے ” ثقہ “ قرار دیا ہے ، اور امام حاکم رحمہ اللہ نے مستدرک میں ” ثقہ “ قرار دیا ہے ایک جماعت نے اسے ضعیف قرار دیا ہے ۔

سیدنا جابر بن سمرہ رضی اللہ عنہ بیان کرتے ہیں : ہم لوگوں نے نبی اکرم صلی اللہ علیہ وسلم کی اقتداء میں فرض نماز ادا کی نماز کے دوران نبی اکرم صلی اللہ علیہ وسلم نے ہاتھ ملا لئے جب آپ نے نماز مکمل کی تو ہم نے عرض کی : یا رسول اللہ ! کیا نماز کے بارے میں کوئی نیا حکم آیا ہے ؟ نبی اکرم صلی اللہ علیہ وسلم نے ارشاد فرمایا : جی نہیں ! یہ ہوا تھا کہ شیطان نے میرے آگے سے گزرنے کی کوشش کی تھی تو میں نے اس کا گلہ دبا دیا یہاں تک کہ میں نے اس کی زبان کی ٹھنڈک اپنے ہاتھوں پر محسوس کی اللہ کی قسم اگر میرے بھائی سلیمان پہلے دعا نہ کر چکے ہوتے تو اسے مسجد کے ستونوں میں سے ایک ستون سے باندھ دیا جانا تھا یہاں تک کہ اہل مدینہ کے بچوں نے اس کے گرد چکر لگانے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی مفضل بن صالح ہے ، جسے امام بخاری رحمہ اللہ اور امام ابوحاتم نے ضعیف قرار دیا ہے ۔

سیدنا عبداللہ بن مسعود رضی اللہ عنہ فرماتے ہیں : جب کوئی شخص تمہارے آگے سے گزرنے کا ارادہ کرے اور تم اس وقت نماز ادا کر رہے ہو ، تو تم اسے گزرنے نہ دو ! کیونکہ اس طرح وہ شخص تمہاری نصف نماز کو ضائع کر دے گا ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ایسا ہے جس کا نام بیان نہیں کیا گیا ہے ۔