مجمع الزوائد ومنبع الفوائد

سیدہ عائشہ صدیقہ رضی اللہ عنہا جو نبی اکرم صلی اللہ علیہ وسلم کی زوجہ محترمہ ہیں ، وہ بیان کرتی ہیں : نبی اکرم صلی اللہ علیہ وسلم نے ارشاد فرمایا ہے : ” مسلمان کی نماز کو کوئی بھی چیز منقطع نہیں کرتی ہے البتہ گدھے ، کافر ، کتے اور عورت کا معاملہ مختلف ہے سیدہ عائشہ رضی اللہ عنہا نے عرض کی : یا رسول اللہ ! ہمیں ( یعنی خواتین کو ) برے جانوروں کے ساتھ ملا دیا گیا ہے ۔
یہ روایت امام أحمد نے نقل کی ہے ، اور اس کے رجال کی توثیق کی گئی ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” کتا ، گدھا اور عورت ( نمازی کے آگے سے گزر کر ) نماز کو منقطع کر دیتے ہیں “ ۔
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ۔

سیدنا حکم بن عمرو غفاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” کتا گدھا اور عورت ( نمازی کے آگے سے گزر کر ) نماز کو توڑ دیتے ہیں “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عمر بن دریح ہے ، جسے ابوحاتم نے ضعیف قرار دیا ہے یحیی بن معین اور ابن حبان نے اسے ” ثقہ “ قرار دیا ہے ، اس روایت کے بقیہ رجال ” ثقہ “ ہیں ۔

سیدنا عبداللہ بن زید رضی اللہ عنہ اور سیدنا ابوبشیر انصاری رضی اللہ عنہ سے یہ بات منقول ہے : ایک دن نبی اکرم صلی اللہ علیہ وسلم ان لوگوں کو نماز پڑھا رہے تھے میدان سے ایک عورت گزر رہی تھی نبی اکرم صلی اللہ علیہ وسلم نے اسے اشارہ کیا کہ تم پیچھے ہو جاؤ تو وہ واپس چلی گئی یہاں تک کہ نبی اکرم صلی اللہ علیہ وسلم نے جب نماز ادا کر لی تو پھر وہ گزری ۔
یہ روایت امام أحمد نے نقل کی ہے امام طبرانی نے اسے معجم کبیر میں نقل کیا ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ۔

سیدنا عبداللہ بن عمرو بن العاص رضی اللہ عنہ بیان کرتے ہیں : ایک مرتبہ ہم نبی اکرم صلی اللہ علیہ وسلم کے ساتھ وادی کے بالائی حصے میں موجود تھے ہمارا نماز ادا کرنے کا ارادہ تھا نبی اکرم صلی اللہ علیہ وسلم کھڑے ہوئے تو ہم بھی کھڑے ہو گئے اسی دوران شعب ابودب یعنی شعب ابوموسیٰ میں سے ایک گدھا نکل کر ہمارے سامنے آ گیا تو نبی اکرم صلی اللہ علیہ وسلم رک گئے آپ نے تکبیر نہیں کہی آپ نے یعقوب بن زمعہ کو اس کی طرف بھیجا انہوں نے اسے واپس کیا ۔
یہ روایت امام أحمد نے نقل کی ہے ، اور اس کے رجال کی توثیق کی گئی ہے ۔