مجمع الزوائد ومنبع الفوائد

سیدنا جبیر بن مطعم رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب کوئی شخص سترہ کی طرف رُخ کر کے نماز ادا کرے تو وہ اس کے قریب ہو ، تاکہ شیطان اس کی نماز کو منقطع نہ کر سکے “ ۔
یہ روایت امام بزار نے اور امام طبرانی نے معجم کبیر میں نقل کی ہے ، تاہم انہوں نے یہ الفاظ نقل کیے ہیں : ” وہ اس کے قریب کھڑا ہو ، تاکہ شیطان اس کے اور اس سترے کے درمیان میں سے نہ گزرے “ ۔ امام بزار کی سند میں ایک راوی محمد بن عبداللہ بن عمیر ہے ، اور وہ ” ضعیف “ ہے امام طبرانی کی سند میں ایک راوی سلیمان بن ایوب صریفینی ہے میں نے کسی کو اس کا ذکر کرتے ہوئے نہیں پایا ہے طبرانی کے بقیہ رجال ” ثقہ “ ہیں ۔

سیدنا بریدہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب کوئی شخص سترہ کی طرف رُخ کر کے نماز ادا کرے ، تو وہ اس کے قریب ہو ، تاکہ شیطان اس کی نماز کو منقطع نہ کر سکے “ ۔
یہ روایت امام بزار نے نقل کی ہے میں یہ کہتا ہوں : سیدنا عبداللہ بن عباس رضی اللہ عنہما کے حوالے سے منقول حدیث آگے آئے گی ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : قبلہ کا دھیان رکھو !
یہ روایت امام ابویعلیٰ اور امام بزار نے نقل کی ہے ، اور اس کے رجال کی توثیق کی گئی ہے ۔

سیدنا سہل بن سعد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب کوئی شخص سترہ کی طرف رُخ کر کے نماز ادا کرے تو وہ اس کے قریب ہو ، تاکہ شیطان اس کی نماز کو منقطع نہ کرے “ ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا سہل بن حنظلیہ رضی اللہ عنہ کے بارے میں یہ بات منقول ہے : وہ ایک ایسے شخص کے پاس سے گزرے جو قبلہ ( کی سمت والی دیوار ) سے ذرا دور ہو کر نماز ادا کر رہا تھا تو سیدنا سہل رضی اللہ عنہ نے فرمایا : تم اپنی جائے نماز کی طرف ذرا آگے ہو جاؤ تاکہ شیطان تمہاری نماز کو منقطع نہ کرے میں تمہیں وہ بات بیان کر رہا ہوں جو میں نے نبی اکرم صلی اللہ علیہ وسلم کی زبانی سنی ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی بشر بن نمیر ہے ، اور وہ کذاب ہے ۔

سیدنا عبداللہ بن مسعود رضی اللہ عنہ فرماتے ہیں : کوئی بھی شخص ایسی حالت میں نماز ہرگز ادا نہ کرے ، کہ اس شخص کے اور قبلہ ( یعنی قبلہ کی سمت والی دیوار یا سترہ ) کے درمیان کشادگی ہو ۔
یہ روایت امام طبرانی نے معجم کبیر میں نقل کی ہے ابوعبیدہ نامی راوی نے اپنے والد سے سماع نہیں کیا ہے ۔