مجمع الزوائد ومنبع الفوائد

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عشاء کی نماز اور صبح کی نماز ( با جماعت ) میں شریک نہ ہونے والوں کو اگر پتہ چل جائے کہ ان دونوں کا اجر کتنا زیادہ ہے ، تو وہ ان دونوں میں شریک ہوں خواہ وہ گھسٹ کر چل کر آئیں “ ۔
یہ روایت امام أحمد نے نقل کی ہے ، اور اس کے رجال کی توثیق کی گئی ہے ۔

ابوعمیر بن انس نے اپنے چچاؤں کے حوالے سے ، جو نبی اکرم صلی اللہ علیہ وسلم کے اصحاب میں سے ہیں ، یہ بات نقل کی ہے : آپ صلی اللہ علیہ وسلم نے ارشاد فرمایا ہے : ان دونوں ( یعنی عشاء اور فجر کی باجماعت نمازوں ) میں کوئی منافق شریک نہیں ہو گا ۔ راوی بیان کرتے ہیں : نبی اکرم صلی اللہ علیہ وسلم کی مراد عشاء اور صبح کی نمازیں تھیں ابوبشر کہتے ہیں : اس سے مراد یہ ہے کہ وہ ان دونوں کو باقاعدگی سے ادا نہیں کرے گا ۔
یہ روایت امام أحمد نے نقل کی ہے ، اس کی سند میں ایک راوی ابوعمیر بن انس ہے ابوبشیر جعفر بن ابووحشیہ کے علاوہ اور کسی کو میں نے اس راوی سے روایت نقل کرتے ہوئے نہیں دیکھا ہے ، اس روایت کے بقیہ رجال کی توثیق کی گئی ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا ہے : ” اگر لوگوں کو پتہ چل جائے کہ بدھ کی رات عشاء کی نماز ( با جماعت ) شریک ہونے میں کتنا اجر ہے ، تو وہ اس میں ضرور شریک ہوں خواہ وہ گھسٹ کر چل کر آئیں “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی زکریا بن منصور ہے ، اور وہ ” ضعیف “ ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص عشاء کی نماز با جماعت ادا کرتا ہے ، اور پھر مسجد سے باہر جانے سے پہلے چار رکعات ادا کر لیتا ہے ، تو یہ شب قدر کے برابر ہو گا “ ۔
یہ روایت امام طبرانی نے معجم اوسط میں نقل کی ہے ، اور اس کی سند میں ضعیف راوی ہے ، جس پر جھوٹا ہونے کا الزام عائد نہیں کیا گیا ہے ۔

نخع سے تعلق رکھنے والے ایک صاحب بیان کرتے ہیں : میں نے سیدنا ابودرداء رضی اللہ عنہ کو سنا جب ان کی وفات کا وقت قریب آیا تو انہوں نے ارشاد فرمایا : میں تم لوگوں کو ایک حدیث بیان کرنے لگا ہوں جو میں نے نبی اکرم صلی اللہ علیہ وسلم کی زبانی سنی ہے آپ صلی اللہ علیہ وسلم نے ارشاد فرمایا ہے : ” تم اللہ تعالی کی یوں عبادت کرو جیسے تم اسے دیکھ رہے ہو اور اگر تم اسے نہیں دیکھ رہے ہو ، تو وہ تمہیں دیکھ رہا ہے تم اپنا شمار مردوں میں کرو اور مظلوم کی بددعا سے بچ کے رہنا کیونکہ وہ مستجاب ہوتی ہے تم میں سے جو شخص اس بات کی استطاعت رکھتا ہو کہ وہ دو نمازوں عشاء اور صبح ( کی با جماعت نمازوں ) میں شریک ہو سکتا ہو ، تو اسے ایسا کرنا چاہیے ، خواہ وہ گھسٹ کر چل کر جائے “ ۔
یہ روایت امام طبرانی نے معجم کبیر میں نقل کی ہے نخع سے تعلق رکھنے والے شخص کا ذکر کرتے ہوئے میں نے کسی کو نہیں پایا ہے انہوں نے اس شخص کا نام جابر بیان کیا ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” منافقین کے لئے کوئی بھی نماز عشاء اور فجر کی نمازوں سے زیادہ بوجھل نہیں ہے اگر انہیں ان دونوں کی فضیلت کا پتہ چل جائے تو وہ ان دونوں میں ضرور شریک ہوں خواہ وہ گھسٹ کر چل کر آئیں “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عمر رضی اللہ عنہما فرماتے ہیں : جب ہم فجر اور عشاء کی نمازوں میں کسی شخص کو غیر موجود پاتے تھے تو اس کے بارے میں برا گمان رکھتے تھے ۔
یہ روایت امام طبرانی نے معجم کبیر میں نقل کی ہے ، اسے امام بزار نے بھی نقل کیا ہے امام طبرانی کے رجال کی توثیق کی گئی ہے ۔

سیدنا عبداللہ بن عمر رضی اللہ عنہما بیان کرتے ہیں : جب ہم صبح کی نمازوں میں کسی شخص کو غیر موجود پاتے تھے تو اس کے بارے میں برا گمان رکھتے تھے ۔
یہ روایت امام بزار نے نقل کی ہے ، اور اس کے رجال ” ثقہ “ ہیں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص عشاء کی نماز با جماعت ادا کرتا ہے ، تو وہ گویا شب قدر میں سے اپنا حصہ حاصل کر لیتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی مسلمہ بن علی ہے ، اور وہ ” ضعیف“ ہے ۔

سیدنا قتادہ رضی اللہ عنہ بیان کرتے ہیں : ایک رات بہت زیادہ تاریک اور بارش والی تھی میں نے سوچا اگر میں آج کی رات یہ غنیمت حاصل کر لوں کہ نبی اکرم صلی اللہ علیہ وسلم کی اقتداء میں عشاء کی نماز میں شریک ہو جاؤں تو یہ مناسب ہو گا ، تو میں نے ایسا ہی کیا جب نبی اکرم صلی اللہ علیہ وسلم نے نماز مکمل کی تو آپ نے مجھے ملاحظہ فرمایا آپ کے ہاتھ میں ایک چھڑی تھی جس کے ساتھ ٹیک لگا کر آپ چلتے تھے آپ نے فرمایا : اے قتادہ ! کیا وجہ ہے تم اس وقت یہاں کیوں ہو ؟ میں نے عرض کی : اے اللہ کے نبی ! میں نے آپ کے ساتھ عشاء کی نماز میں حاضری کو غنیمت سمجھا تو نبی اکرم صلی اللہ علیہ وسلم نے وہ شاخ مجھے عطا کی اور فرمایا شیطان تمہارے پیچھے تمہارے گھر والوں کے پاس آ گیا تھا تم یہ شاخ لے جاؤ اور اسے اس وقت تک پکڑ کے رکھنا جب تک تم اپنے گھر نہیں پہنچ جاتے اور پھر اپنے گھر کے ہر ایک گوشے میں یہ شاخ مارنا ( سیدنا قتادہ رضی اللہ عنہ بیان کرتے ہیں : ) میں مسجد سے نکلا تو وہ شاخ یوں روشن ہو گئی جیسے شمع روشن ہوتی ہے ، میں اس کی روشنی میں چلتا ہوا اپنے گھر آیا جب میں اپنے گھر آیا تو میں نے اپنے گھر والوں کو پایا کہ وہ سو چکے تھے میں نے گھر کے ایک گوشے میں جائزہ لیا تو وہاں ایک قنفذ موجود تھا میں اُسے مسلسل چھڑی کے ذریعے مارتا رہا یہاں تک کہ وہ باہر چلا گیا ۔
یہ روایت امام طبرانی نے معجم کبیر میں نقل کی ہے آگے چل کر ایک حدیث آئے گی ، جسے امام أحمد نے نقل کیا ہے وہ اس سے زیادہ طویل حدیث ہے وہ جمعہ اور اس میں موجود مخصوص گھڑی سے متعلق باب میں آئے گی اگر اللہ نے چاہا اس روایت کے رجال کی توثیق کی گئی ہے ۔

سیدنا ابوبکرہ رضی اللہ عنہ کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص صبح کی نماز با جماعت ادا کرتا ہے وہ اللہ تعالی کی پناہ میں ہوتا ہے ، اور جو شخص اللہ تعالیٰ کی پناہ کی خلاف ورزی کرتا ہے اللہ تعالیٰ اسے چہرے کے بل اوندھا کر کے جہنم میں ڈال دے گا“ ۔
یہ روایت امام طبرانی نے معجم کبیر میں ایک حدیث کے درمیان میں نقل کی ہے روایت کے یہ الفاظ ان کے نقل کردہ ہیں ، اور اس کے رجال ” صحیح “ کے رجال ہیں ۔ اس باب سے تعلق رکھنے والی کچھ احادیث آگے چل کر فتنوں سے متعلق باب میں آئیں گی اگر اللہ نے چاہا اور اس موضوع سے متعلق کچھ روایات نماز کی فضیلت سے متعلق باب میں گزر چکی ہیں ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص وضو کر کے مسجد آتا ہے ، اور پھر فجر سے پہلے دو رکعات ادا کرتا ہے پھر وہ بیٹھ جاتا ہے یہاں تک کہ فجر کی نماز ادا کرتا ہے ، تو اس کی نماز اس دن میں نیکوکاروں کی نماز میں نوٹ کی جاتی ہے ، اور اس کا شمار رحمان کے ملاقاتیوں ( یعنی مہمانوں ) میں ہوتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی قاسم ابوعبدالرحمن ہے ، جس سے استدلال کرنے کے بارے میں اختلاف کیا گیا ہے ۔

سیدنا بلال مؤذن رضی اللہ عنہ بیان کرتے ہیں : ایک سرد رات میں ، میں نے اذان دی تو کوئی شخص نہیں آیا پھر میں نے اذان دی تو پھر کوئی نہیں آیا تین مرتبہ ایسا ہوا تو نبی اکرم صلی اللہ علیہ وسلم نے دریافت کیا : لوگوں کو کیا ہوا ہے ؟ میں نے عرض کی : سردی کی وجہ سے وہ نہیں آ سکے ہیں ۔ نبی اکرم صلی اللہ علیہ وسلم نے دعا کی : اے اللہ ! ان سے سردی کو روک دے سیدنا بلال رضی اللہ عنہ کہتے ہیں : تو میں اس بات کی گواہی دیتا ہوں کہ میں نے لوگوں کو دیکھا کہ وہ خوشگوار موسم میں صبح کی نماز کے لئے آ رہے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ایوب بن سیار ہے ، اور وہ متروک ہے ۔

عنبسہ بن ازہر ، سماک کا بیان نقل کرتے ہیں : سیدنا حارث بن حسان رضی اللہ عنہ نے شادی کی انہیں صحابی ہونے کا شرف حاصل تھا تب یہ معمول تھا کہ جب کوئی شخص شادی کرتا تھا تو وہ کچھ دن تک صبح کی نماز با جماعت ادا کرنے کے لئے نہیں آیا کرتا تھا ان سے دریافت کیا گیا کیا آپ ( با جماعت نماز کی ادائیگی کے لیے ) جائیں گے جب کہ گزشتہ رات آپ نے اپنی اہلیہ کی رخصتی کروائی ہے ، تو انہوں نے فرمایا : اللہ کی قسم ! جو عورت مجھے صبح کی نماز با جماعت ادا کرنے سے روکے گی وہ تو بری عورت ہو گی ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔