مجمع الزوائد ومنبع الفوائد

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” آدمی کا جماعت کے ساتھ نماز ادا کرنا اس کے تنہا نماز ادا کرنے پر ، بیس سے زیادہ درجہ فضیلت رکھتا ہے “ ۔ ایک روایت میں یہ الفاظ ہیں : ” پچیس درجہ فضیلت رکھتا ہے “ ۔ ایک روایت میں یہ الفاظ ہیں : ” وہ سب درجات اس کی نماز کی مانند ہوں گے “ ۔ ایک روایت میں یہ الفاظ ہیں : ” ان میں سے ہر ایک اس کے اپنے گھر میں نماز ادا کرنے کی مانند ہو گا“ ۔
یہ روایت امام أحمد امام ابویعلیٰ امام بزار نے اور امام طبرانی نے معجم کبیر اور معجم اوسط میں نقل کی ہے ، اور انہوں نے ہی یہ الفاظ نقل کیے ہیں : ” اس کے اپنے گھر میں “ انہوں نے یہ الفاظ معجم کبیر میں نقل کیے ہیں ، امام أحمد کے رجال ” ثقہ “ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جماعت کے ساتھ نماز ادا کرنا تنہا نماز ادا کرنے پر ستائیس درجہ فضیلت رکھتا ہے “ ۔ ( علامہ ہیثمی فرماتے ہیں : ) میں یہ کہتا ہوں : سیدنا ابوہریرہ رضی اللہ عنہ کے حوالے سے منقول حدیث ” صحیح “ میں مذکور ہے ، جس میں پچیس درجہ کا ذکر ہے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جماعت کے ساتھ نماز کو تنہا نماز ( راوی کو شک ہے شاید یہ الفاظ ہیں : ) آدمی کے اکیلے نماز ادا کرنے پر پچیس گنا فضیلت حاصل ہے “ ۔
یہ روایت امام بزار نے اور امام طبرانی نے معجم اوسط میں نقل کی ہے امام بزار کے رجال ” ثقہ “ ہیں ۔

سیدنا عبداللہ بن زید رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالی اور اس کے فرشتے ان لوگوں پر رحمت نازل کرتے ہیں جو صفیں ملاتے ہیں ، اور تنہا اور جماعت کے ساتھ ( نماز ادا کرنے ) کے درمیان پچیس درجہ کا فرق ہے “ ۔
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی موسیٰ بن عبیدہ ہے ، اور وہ ” ضعیف “ ہے ۔

سیدنا صہیب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” آدمی کا جماعت کے ساتھ نماز ادا کرنا اس کے اکیلے نماز ادا کرنے پر پچیس درجہ فضیلت رکھتا ہے “ ۔
یہ روایت امام طبرانی نے معجم کبیر میں نقل کی ہے ، اور اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا زید بن ثابت رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جماعت کے ساتھ نماز ادا کرنا آدمی کے اکیلے نماز ادا کرنے پر چوبیس درجہ فضیلت رکھتا ہے “ ۔ ( راوی بیان کرتے ہیں : ) یعنی اس کی نماز پچیس گنا ہو جائے گی “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ربیع بن بدر ہے ، اور وہ ” ضعیف “ ہے ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جماعت کے ساتھ نماز ادا کرنا آدمی کے اکیلے نماز ادا کرنے پر پیچیں درجہ فضیلت رکھتا ہے “ ۔
یہ روایت امام بزار نے نقل کی ہے ، اور امام طبرانی نے معجم کبیر میں نقل کی ہے ، اس کی سند میں ایک راوی عبدالحکیم بن منصور ہے ، اور وہ ” ضعیف “ ہے ۔

سیدنا عمر بن خطاب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالی با جماعت نماز ادا کرنے پر خوش ہوتا ہے “ ۔
یہ روایت امام أحمد نے نقل کی ہے ، اور اس کی سند حسن ہے ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالی با جماعت نماز پر خوش ہوتا ہے “ ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا قباث بن اشیم لیتی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” دو آدمی یوں نماز ادا کریں کہ ان میں سے ایک دوسرے کی امامت کر رہا ہو یہ اللہ تعالیٰ کے نزدیک چار افراد کے الگ ، الگ نماز ادا کرنے سے زیادہ پاکیزہ ہے ، اور چار آدمیوں کا یوں نماز ادا کرنا کہ ان میں سے کوئی ایک امامت کر رہا ہو یہ اللہ تعالیٰ کے نزدیک آٹھ آدمیوں کے الگ الگ نماز ادا کرنے سے زیادہ پاکیزہ ہے ، اور آٹھ آدمیوں کا یوں نماز ادا کرنا کہ ان میں سے کوئی ایک امامت کر رہا ہو یہ اللہ تعالیٰ کے نزدیک ایک سو افراد کے الگ الگ نماز ادا کرنے سے زیادہ پاکیزہ ہے “ ۔
یہ روایت امام بزار نے اور امام طبرانی نے معجم کبیر میں نقل کی ہے امام طبرانی کے رجال کی توثیق کی گئی ہے ۔

ابوسلمہ بن عبدالرحمن بیان کرتے ہیں : انہوں نے سیدنا ابوہریرہ رضی اللہ عنہ اور سیدنا عبداللہ بن عباس رضی اللہ عنہما کو یہ بیان کرتے ہوئے سنا ہے : وہ فرماتے ہیں : ہم نے نبی اکرم صلی اللہ علیہ وسلم کو اپنے آخری خطبے میں یہ ارشاد فرماتے ہوئے سنا : ” جو شخص یہ پانچ فرض نمازیں جماعت کے ساتھ باقاعدگی کے ساتھ ادا کرتا رہے گا وہ پل صراط پر سے پہلے گزرنے والے افراد میں شامل ہو گا ، جو بجلی کے چکنے کی طرح گزریں گے اور اللہ تعالیٰ اس کا حشر پیروی کرنے والوں کے پہلے گروہ میں کرے گا ، اور ان ( نمازوں ) کی حفاظت کرنے والے شخص کو دن اور رات میں ایک ہزار شہیدوں کی مانند اجر ملے گا جنہیں اللہ تعالیٰ کی راہ میں قتل کیا گیا ہو “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی بقیہ بن ولید ہے ، اور وہ تدلیس کرنے والا ہے ، اس نے اس روایت کو عنعنہ کے طور پر نقل کیا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص اس بات کو پسند کرتا ہو کہ کل وہ مسلمان ہونے کے عالم میں اللہ تعالیٰ کی بارگاہ میں حاضر ہو تو اسے پانچ نمازوں کو باقاعدگی سے ادا کرنا چاہیے جب ان کے لئے اذان دے دی جائے “ ۔
یہ روایت امام طبرانی نے معجم اوسط میں رجلہ کے حوالے سے نقل کی ہے ، جو عبدالکریم کی کنیز ہے ، اس کے حوالے سے یہ سیدنا عبداللہ بن عمر رضی اللہ عنہما سے منقول ہے میں نے ان دونوں ( یعنی رجلہ اور اس کے مالک عبدالکریم ) کے حالات بیان کرتے ہوئے کسی کو نہیں پایا ہے ۔