مجمع الزوائد ومنبع الفوائد

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب بندہ نماز کے بعد جائے نماز پر بیٹھا ہوتا ہے ، تو فرشتے اس کے لئے دعائے رحمت کرتے رہتے ہیں ، اور فرشتوں کی اس کے لئے دعائے رحمت یہ ہوتی ہے اے اللہ ! تو اس کی مغفرت کر دے اور اگر آدمی نماز کے انتظار میں بیٹھا ہوا ہوتا ہے ، تو فرشتے اس کے لئے دعائے رحمت کرتے ہیں ، اور ان کی اس شخص کے لئے دعا یہ ہوتی ہے : اے اللہ ! تو اس کی مغفرت کر دے اے اللہ ! تو اس پر رحم فرما “ ۔
یہ روایت امام أحمد نے نقل کی ہے ، اس کی سند میں ایک راوی عطاء بن سائب ہے ، اور وہ ” ثقہ “ ہے ، تاہم وہ عمر کے آخری حصے میں اختلاط کا شکار ہو گیا تھا ۔

سیدنا علی بن ابوطالب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” طبیعت کو ناگوار گزرنے کے وقت اچھی طرح وضو کرنا زیادہ قدم اٹھا کر مساجد کی طرف جانا اور ایک نماز کے بعد دوسری نماز کا انتظار کرنا گناہوں کو دھو دیتے ہیں “ ۔
یہ روایت امام ابویعلیٰ نے اور امام بزار نے نقل کی ہے ، اور اس کے رجال ” صحیح “ کے رجال ہیں امام بزار نے اس کے آغاز میں یہ الفاظ زائد نقل کیے ہیں : ” کیا میں تمہاری رہنمائی اس چیز کی طرف نہ کروں جس سے اللہ تعالیٰ گناہوں کو ختم کر دیتا ہے ؟ “ اور انہوں نے اس کی دو اسناد میں ایک شخص کا ذکر اضافی کیا ہے ، اور وہ ابوالعباس ہے وہ فرماتے ہیں : یہ مجہول ہے میں یہ کہتا ہوں : یہ لفظ ابوالعیاس ہے ، جس میں ” ی “ ہے ، اور ” س “ ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایک نماز کے بعد دوسری نماز کا انتظار کرنے والا شخص اس گھڑ سوار کی مانند ہے ، جس کا گھوڑا اس کو اپنی پشت پر سوار کر کے اللہ کی راہ میں دوڑتا ہے ، اور یہی بڑی پہرہ داری ہے “ ۔
یہ روایت امام أحمد نے اور امام طبرانی نے معجم اوسط میں نقل کی ہے ، اس کی سند میں ایک راوی نافع بن سلیمان قرشی ہے ، جسے ابوحاتم نے ” ثقہ “ قرار دیا ہے ، اس روایت کے بقیہ رجال ” صحیح “ کے رجال ہیں ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بندہ مسلسل نماز کی حالت میں شمار ہوتا ہے ، جب تک وہ جائے نماز پر بیٹھا ہوا نماز کا انتظار کرتا رہتا ہے فرشتے یہ کہتے ہیں : اے اللہ ! تو اس کی مغفرت کر دے اے اللہ ! تو اس پر رحم کر جب تک وہ بندہ وہاں سے اٹھ نہیں جاتا یا اسے حدث لاحق نہیں ہو جاتا “ ۔ راوی کہتے ہیں : میں نے ان سے دریافت کیا : حدث لاحق ہونے سے مراد کیا ہے ، تو استاد نے جواب دیا : میں نے سیدنا ابوسعید خدری رضی اللہ عنہ سے یہی سوال کیا تھا تو انہوں نے جواب دیا تھا کہ وہ آواز کے بغیر یا آواز کے ساتھ ہوا خارج کرے ۔
یہ روایت امام أحمد نے نقل کی ہے ، اور اس کی سند میں ایک راوی علی بن زید بن جدعان ہے ، جس سے استدلال کرنے کے بارے میں اختلاف کیا گیا ہے ۔ ابن حبان نے اس کا تذکرہ کتاب ” الثقات“ میں کیا ہے ، اور یہ بات بیان کی ہے یہ غریب روایات نقل کرتا ہے ۔

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں : نبی اکرم صلی اللہ علیہ وسلم نے ارشاد فرمایا : کیا میں تمہیں گناہوں کا کفارہ بننے والی چیزوں کے بارے میں نہ بتاؤں ؟ انہوں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے فرمایا : طبیعت پر ناگوار گزرنے کے وقت اچھی طرح وضو کرنا زیادہ قدموں کے ساتھ چل کر مساجد کی طرف جانا اور ایک نماز کے بعد دوسری نماز کا انتظار کرنا یہی رباط ( تیاری یا پہرہ داری ) ہے ۔
یہ روایت امام طبرانی نے نقل کی ہے امام بزار نے اس کی مانند نقل کی ہے امام بزار کے استاد خالد بن یوسف سمتی نے اپنے والد کے حوالے سے اسے نقل کیا ہے ، اور وہ ضعیف ہے ، اور اسحاق نامی راوی نے سیدنا عبادہ رضی اللہ عنہ کا زمانہ نہیں پایا ہے ۔

سیدنا جبیر بن مطعم رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” قدموں پر چل کر با جماعت نماز کی طرف جانا گناہوں کا کفارہ ہے سردی میں اچھی طرح وضو کرنا اور ایک نماز کے بعد دوسری نماز کا انتظار کرنا ( بھی گناہوں کا کفارہ بنتے ہیں ) “ ۔
یہ روایت امام طبرانی نے نقل کی ہے ، اس کی سند میں ایک راوی عبدالرحمن بن ابوبکر ملیکی ہے ، اور وہ ” ضعیف“ ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” خواب اللہ تعالیٰ کی طرف سے خوشخبری ہوتے ہیں ، اور یہ نبوت کے ستر اجزاء میں سے ایک ہیں ، اور تمہاری آگ جہنم کی تپش کے ستر اجزاء میں سے ایک جزء ہے ، جو شخص مسجد میں آتا ہے ، اور نماز کا انتظار کرتا ہے وہ نماز کی حالت میں شمار ہوتا ہے ، جب تک اسے حدث لاحق نہیں ہو جاتا اور جو شخص ایک نماز کے بعد دوسری نماز کا انتظار کرتا ہے وہ نماز کی حالت میں شمار ہوتا ہے ، جب تک اسے حدث لاحق نہیں ہوتا“ ۔
یہ روایت امام طبرانی نے نقل کی ہے ، اس کی سند میں ایک راوی عبید بن اسحاق عطار ہے ، اور وہ متروک ہے ابوحاتم نے اسے پسندیدہ قرار دیا ہے ، اور امام ابن حبان رحمہ اللہ نے اس کا تذکرہ کتاب ” الثقات “ میں کیا ہے ، اور یہ بات بیان کی ہے ۔ یہ غریب روایات نقل کرتا ہے ۔

بیعت کرنے والی ( یعنی نبی اکرم صلی اللہ علیہ وسلم کے دست اقدس پر اسلام قبول کرنے والی ) خواتین میں سے ایک خاتون بیان کرتی ہیں : نبی اکرم صلی اللہ علیہ وسلم ہمارے پاس تشریف لائے آپ کے ساتھ بنو سلمہ سے تعلق رکھنے والے آپ کے اصحاب بھی تھے ہم نے آپ کی خدمت میں کھانا پیش کیا آپ نے کھانا کھایا پھر ہم نے آپ کی خدمت میں وضو کا پانی پیش کیا آپ نے وضو کیا پھر آپ اپنے اصحاب کی طرف متوجہ ہوئے اور ارشاد فرمایا : کیا میں تمہیں گناہوں کا کفارہ بننے والی چیزوں کے بارے میں نہ بتاؤں ؟ لوگوں نے عرض کی : جی ہاں ! نبی اکرم صلی اللہ علیہ وسلم نے ارشاد فرمایا : طبیعت کو ناگوار گزرنے کے وقت اچھی طرح وضو کرنا زیادہ قدموں کے ساتھ ساجد کی طرف جانا اور ایک نماز کے بعد دوسری نماز کا انتظار کرنا ۔
یہ روایت امام أحمد نے نقل کی ہے ، اس کے رجال میں ایک شخص ایسا بھی ہے ، جس کا نام بیان نہیں کیا گیا ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” کیا میں تم لوگوں کی رہنمائی اس چیز کی طرف نہ کروں جس کے ذریعے اللہ تعالیٰ خطاؤں کو مٹا دیتا ہے ، اور اس کے ذریعے گناہوں کو ختم کر دیتا ہے ؟ لوگوں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے فرمایا : طبیعت کو ناگوار گزرنے کے وقت اچھی طرح وضو کرنا زیادہ قدموں کے ساتھ مساجد کی طرف جانا اور ایک نماز کے بعد دوسری نماز کا انتظار کرنا ، یہی رباط ( یعنی تیاری یا پہرہ داری ) ہے “ ۔
یہ روایت امام بزار نے نقل کی ہے ان صحابی کے حوالے کے حوالے سے ایک اور روایت بھی منقول ہے ، جو اس کی مانند ہے ، تاہم انہوں نے یہ الفاظ ” یہی رباط ہے “ کی جگہ یہ الفاظ نقل کیے ہیں : ” یہ جنت کا رباط ( یعنی تیاری ) ہے “ ۔ پہلی روایت کی سند میں ایک راوی شرحبیل بن سعد ہے ، اور وہ جمہور کے نزدیک ” ضعیف“ ہے ۔ ابن حبان نے اس کا تذکرہ کتاب ” التفات “ میں کیا ہے انہوں نے اپنی ” صحیح “ میں اس کے حوالے سے یہ حدیث نقل کی ہے دوسری روایت کی سند میں ایک راوی یوسف بن میمون صباغ ہے ، جسے ایک جماعت نے ضعیف قرار دیا ہے ۔ ابن حبان اور ابو أحمد بن عدی نے اسے ” ثقہ “ کہا: ہے امام بزار فرماتے ہیں : یہ صالح الحدیث ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا عباس رضی اللہ عنہ کے گھر میں یا شاید سیدنا حمزہ رضی اللہ عنہ کے گھر میں کھانا کھایا اور ارشاد فرمایا : ” میری امت سے تعلق رکھنے والے کچھ لوگ اس چیز کے بارے میں غور و فکر کر رہے ہیں ( یعنی اس مال کو حاصل کرنا چاہتے ہیں ) جو اللہ تعالیٰ نے اپنے رسول کو مال فئے کے طور پر عطا کیا ہے ، اُن لوگوں کا اس میں کوئی حصہ نہیں ہے ، اور گناہوں کا کفارہ ( یہ کام ہیں : ) اچھی طرح وضو کرنا زیادہ قدموں کے ساتھ چل کر مسجد کی طرف جانا اور ایک نماز کے بعد دوسری نماز کا انتظار کرنا “ ۔
یہ روایت امام بزار نے نقل کی ہے ، اور اس کی سند صحیح ہے ۔

ابوامیہ ثقفی رضی اللہ عنہ بیان کرتے ہیں : سیدنا معاویہ رضی اللہ عنہ ظہر کی نماز کے وقت نکلے اور انہوں نے فرمایا : تم لوگ اپنی نماز کی جگہ پر رہو یہاں تک کہ میں تمہارے پاس آ جاؤں پھر وہ ہمارے پاس تشریف لائے جب انہوں نے عصر کی نماز ادا کر لی تو انہوں نے فرمایا : کیا میں تم لوگوں کو ایک ایسی چیز کے بارے میں نہ بتاؤں جو اللہ کے رسول کے اصحاب نے کی تھی ہم نے عرض کی : جی ہاں ! تو انہوں نے فرمایا : ان لوگوں نے نبی اکرم صلی اللہ علیہ وسلم کے ساتھ پہلی ( یعنی ظہر کی ) نماز ادا کی پھر وہ حضرات بیٹھے رہے پھر نبی اکرم صلی اللہ علیہ وسلم ان کے پاس تشریف لائے اور دریافت کیا : کیا تم اس کے بعد اسی حالت میں ہو ؟ لوگوں نے عرض کی : ہاں تو نبی اکرم صلی اللہ علیہ وسلم نے فرمایا : کاش کہ تم اپنے پروردگار کو دیکھتے کہ اس نے آسمان سے دروازہ کھولا اور فرشتوں کو تمہارا بیٹھنا دکھایا اور تم پر فخر کا اظہار کیا جب کہ تم نماز کا انتظار کر رہے تھے “ ۔ علامہ ہیثمی فرماتے ہیں : ) میں یہ کہتا ہوں : سیدنا معاویہ رضی اللہ عنہ کے حوالے سے ایک حدیث ” صحیح “ میں منقول ہے ، جو اس شخص کے بارے میں ہے ، جو اللہ کا ذکر کرنے کے لئے بیٹھتا ہے ، اس میں نماز کا انتظار کرنے کا ذکر نہیں ہے ۔
یہ روایت امام طبرانی نے معجم کبیر میں نقل کی ہے انہوں نے اسے ابوامیہ کے حوالے سے ایک شخص کے حوالے سے اس کے چچا سے نقل کیا ہے ۔ وہ بیان کرتے ہیں : سیدنا معاویہ رضی اللہ عنہ تشریف لائے ۔ ۔ ۔ ۔ ۔ ۔ ۔ ۔ یہ روایت امام بزار نے بھی نقل کی ہے ابوامیہ ثقفی نامی راوی کا ذکر کرتے ہوئے میں نے کسی کو بھی نہیں پایا ہے ۔

سیدنا عمران بن حصین رضی اللہ عنہ بیان کرتے ہیں : ان تک نبی اکرم صلی اللہ علیہ وسلم کا یہ فرمان پہنچا ہے آپ صلی اللہ علیہ وسلم نے ارشاد فرمایا ہے : ” تم میں سے کوئی ایک شخص مسلسل نماز کی حالت میں شمار ہوتا ہے ، جب تک نماز نے اسے روکا ہوا ہوتا ہے “ ۔
یہ روایت امام طبرانی نے معجم کبیر میں نقل کی ہے ، اور امام بزار نے بھی نقل کی ہے ، اس کی سند میں ایک راوی عبداللہ بن عیسیٰ خزاز ہے اور وہ ” ضعیف “ ہے ۔ میں یہ کہتا ہوں : اس سے پہلے طہارت سے متعلق باب میں اچھی طرح وضو کرنے سے متعلق احادیث گزر چکی ہیں جو نماز کا انتظار کرنے کی فضیلت پر دلالت کرتی ہیں ، اور تعیین سے متعلق باب میں کچھ احادیث آگے آئیں گی اگر اللہ نے چاہا ۔