مجمع الزوائد ومنبع الفوائد

سیدنا زید بن خالد جہنی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ کی کنیزوں کو مساجد میں جانے سے منع نہ کرو البتہ وہ خوش لگائے بغیر نکلیں گی “ ۔
یہ روایت امام أحمد امام بزار نے اور امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا عمر بن خطاب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ کی کنیزوں کو اللہ تعالیٰ کی مساجد سے منع نہ کرو “ ۔
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔

امام أحمد نے سالم کے حوالے سے یہ بات نقل کی ہے وہ بیان کرتے ہیں : سیدنا عمر رضی اللہ عنہ تیز مزاج کے آدمی تھے ایک مرتبہ وہ نماز کے لئے نکلے ، تو عاتکہ بنت زید ( جو ان کی اہلیہ تھیں ) وہ ان کے پیچھے آئیں سیدنا عمر اس خاتون کے نکلنے کو ناپسند کرتے تھے ، اور اسے منع کرنے کو بھی ناپسند کرتے تھے وہ یہ حدیث بیان کرتے تھے : ” جب تمہاری خواتین نماز کے لئے جانے کے لئے تم سے اجازت مانگیں تو تم انہیں منع نہ کرو “ ۔ سالم نامی راوی نے سیدنا عمر بھی رضی اللہ عنہ سے سماع نہیں کیا ہے ۔

سیدنا انس بن مالک رضی اللہ عنہ کے بارے میں یہ بات منقول ہے : ان سے بوڑھی عورتوں کے بارے میں دریافت گا گیا : کیا وہ نبی اکرم صلی اللہ علیہ وسلم کے ساتھ نماز با جماعت میں شریک ہوتی تھیں ؟ انہوں نے جواب دیا : جی ہاں ! اور جوان عورتیں بھی شریک ہوتی تھیں ۔
یہ روایت امام بزار نے اور امام طبرانی نے معجم اوسط میں نقل کی ہے ، اور انہوں نے یہ الفاظ زائد نقل کیے ہیں : ” وہ ہمارے پیچھے ( کھڑی ہو کر ) نبی اکرم صلی اللہ علیہ وسلم کی اقتداء میں نماز میں شریک ہوتی تھیں “ ۔ اس روایت کی سند میں ایک راوی یوسف بن خالد سمتی ہے ، اور وہ ” ضعیف “ ہے ۔

ام سلمہ بنت حکیم بیان کرتی ہیں : میں نے عمر رسیدہ خواتین کو پایا ہے ، جو نبی اکرم صلی اللہ علیہ وسلم کی اقتداء میں فرض نماز میں شریک ہوا کرتی تھیں “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالکریم بن ابوالمخارق ہے ، اور وہ ” ضعیف“ ہے ۔

سیدنا ابوہریرہ رضی اللہ عنہ بیان کرتے ہیں : خواتین نبی اکرم صلی اللہ علیہ وسلم کی اقتداء میں صبح کی نماز میں شریک ہوتی تھیں ۔ اور پھر وہ چادروں میں منہ چھپا کر نکل جاتی تھیں ۔
یہ روایت امام طبرانی نے معجم اوسط میں محمد بن عمرو بن علقمہ کے حوالے سے نقل کی ہے ، جس سے استدلال کرنے کے بارے میں اختلاف کیا گیا ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” خواتین کی جماعت ( یا اکٹھے ہونے ) میں بھلائی نہیں ہے البتہ مسجد میں ( ان کے باجماعت نماز ادا کرنے کا ) معاملہ مختلف ہے یا کسی مقتول کے جنازے میں ( ان کے اکھٹے ہونے ) کا معاملہ مختلف ہے “ ۔
یہ روایت امام أحمد نے اور امام طبرانی نے معجم اوسط میں نقل کی ہے ، تاہم انہوں نے یہ الفاظ نقل کیے ہیں : ” خواتین کی جماعت ( یا اکٹھے ہونے ) میں کوئی بھلائی نہیں ہے البتہ با جماعت نماز والی مسجد کا معاملہ مختلف ہے “ ۔ اس روایت کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

سیدہ ام سلمہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” خواتین کی مساجد میں سب سے بہتر ، اُن کے گھر کا اندرونی حصہ ہے “ ۔
یہ روایت امام أحمد نے اور امام ابویعلیٰ نے نقل کی ہے ان کی روایت کے الفاظ یہ ہیں : خواتین کی سب سے بہتر نماز وہ ہے ، جو گھر کے انتہائی اندورنی حصے میں ادا کی جائے “ ۔ یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ۔

سیدہ اُم حمید رضی اللہ عنہا جو سیدنا ابوحمید ساعدی رضی اللہ عنہ کی اہلیہ ہیں : وہ نبی اکرم صلی اللہ علیہ وسلم کی خدمت میں حاضر ہوئیں انہوں نے عرض کی : یا رسول اللہ ! میں آپ کی اقتداء میں نماز ادا کرنے کو پسند کرتی ہوں ۔ نبی اکرم صلی اللہ علیہ وسلم نے ارشاد فرمایا : مجھے اس بات کا پتہ ہے کہ تم میری اقتداء میں نماز ادا کرنے کو پسند کرتی ہو لیکن تمہارا اپنے گھر میں نماز ادا کرنا تمہارے لئے باہر والے کمرے میں نماز ادا کرنے سے بہتر ہے ، اور تمہارا باہر والے کمرے میں نماز ادا کرنا تمہارے لئے صحن میں نماز ادا کرنے سے زیادہ بہتر ہے ، اور تمہارا صحن میں نماز ادا کرنا تمہارے اپنی قوم کی مسجد میں نماز ادا کرنے سے زیادہ بہتر ہے ، اور تمہارا اپنی قوم کی مسجد میں نماز ادا کرنا میری مسجد میں نماز ادا کرنے سے زیادہ بہتر ہے ۔ راوی خاتون بیان کرتی ہیں : سیدہ ام حمید رضی اللہ عنہا نے حکم دیا ان کے لئے گھر کے انتہائی اندرونی اور تاریک ترین حصے میں نماز کے لئے جگہ مخصوص کی گئی وہ خاتون اللہ تعالیٰ کی بارگاہ میں حاضر ہونے تک اسی جگہ پر نماز ادا کرتی تھیں ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں صرف عبداللہ بن سوید انصاری کا معاملہ مختلف ہے ۔ ابن حبان نے اسے ” ثقہ “ قرار دیا ہے ۔

سیدہ ام حمید رضی اللہ عنہا بیان کرتی ہیں : میں نے عرض کی : یا رسول اللہ ! ہمارے شوہر ہمیں آپ کی اقتداء میں نماز ادا کرنے سے منع کرتے ہیں ، اور ہم خواتین آپ کی اقتداء میں نماز ادا کرنے کو پسند کرتی ہیں تو نبی اکرم صلی اللہ علیہ وسلم نے ارشاد فرمایا : تم خواتین کا اپنے گھروں میں نماز ادا کرنا تمہارے بیرونی کمرے میں نماز ادا کرنے سے زیادہ بہتر ہے ، اور تمہارا بیرونی کمرے میں نماز ادا کرنا تمہارے صحن میں نماز ادا کرنے سے زیادہ بہتر ہے ، اور تمہارا صحن میں نماز ادا کرنا تمہارے جماعت کے ساتھ نماز ادا کرنے سے زیادہ بہتر ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” عورت کا گھر کے اندورنی حصے میں نماز ادا کرنا اس کے بیرونی کمرے میں نماز ادا کرنے سے زیادہ بہتر ہے ، اور اس کا بیرونی کمرے میں نماز ادا کرنا اس کے صحن میں نماز ادا کرنے سے زیادہ بہتر ہے ، اور اس کا صحن میں نماز ادا کرنا اس کے گھر سے باہر نماز ادا کرنے سے زیادہ بہتر ہے “ ۔
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح “ کے رجال ہیں صرف زید بن مہاجر کا معاملہ مختلف ہے کیونکہ ابن ابوحاتم نے اس کے حوالے سے روایت کرنے والے کسی بھی شخص کا ذکر نہیں کیا صرف اس کے بیٹے محمد بن زید کا ذکر کیا ہے ۔

سیدنا عبداللہ بن مسعود رضی اللہ عنہ فرماتے ہیں : عورت کا اپنے گھر کے اندرونی حصے میں نماز ادا کرنا اس کے بیرونی کمرے میں نماز ادا کرنے سے زیادہ فضیلت رکھتا ہے ، اور اس کا بیرونی کمرے میں نماز ادا کرنا اس کے صحن میں نماز ادا کرنے سے زیادہ فضیلت رکھتا ہے ، اور اس کا صحن میں نماز ادا کرنا اس کے علاوہ کہیں ، اور نماز ادا کرنے سے زیادہ فضیلت رکھتا ہے پھر انہوں نے ارشاد فرمایا : جب عورت ( اپنے گھر سے باہر ) نکلتی ہے ، تو شیطان اسے جھانک کر دیکھتا ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سلیمان بن ابوحثمہ اپنی والدہ کا یہ بیان نقل کرتے ہیں : میں نے ان خواتین کو دیکھا ہے ، جو نبی اکرم صلی اللہ علیہ وسلم کی اقتداء میں مسجد میں نماز ادا کرتی تھیں ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالکریم بن ابومخارق ہے ، اور وہ ” ضعیف “ ہے ۔

اس خاتون کے حوالے سے یہ بات منقول ہے : وہ بیان کرتی ہیں : میں نے ان خواتین کو دیکھا ہے جنہوں نے نبی اکرم صلی اللہ علیہ وسلم کی اقتداء میں فرض نمازیں ادا کی ہیں ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن ابولیلیٰ ہے ، جس سے استدلال کرنے کے بارے میں اختلاف کیا گیا ہے ۔

ام سلیم بنت ابوحکیم بیان کرتی ہیں : میں نے ان خواتین کا زمانہ پایا ہے جنہوں نے نبی اکرم صلی اللہ علیہ وسلم کی اقتداء میں نماز ادا کی ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالکریم ہے ، اور وہ ” ضعیف “ ہے ۔

سیدنا عبداللہ بن مسعود رضی اللہ عنہ فرماتے ہیں : عورت کسی بھی ایسی جگہ پر نماز ادا نہیں کرے گی جو اس کے لئے گھر کے انتہائی اندرونی حصے سے زیادہ بہتر ہو البتہ مسجد حرام یا مسجد نبوی کا معاملہ مختلف ہے البتہ اس عورت کا معاملہ مختلف ہے ، جو منتقل میں نکلتی ہے ۔ ( راوی بیان کرتے ہیں ) یعنی موزے پہن کر نکلتی ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

ان کے بارے میں یہ بات بھی منقول ہے : وہ حلف اٹھاتے تھے ، اور یمین کے طور پر اٹھاتے تھے کہ عورت کے لئے نماز ادا کرنے کی کوئی بھی جگہ اس کے گھر سے زیادہ بہتر نہیں ہے البتہ حج اور عمرے کا معاملہ مختلف ہے ، تاہم اس عورت کا معاملہ بھی مختلف ہے ، جو عمر رسیدگی کی وجہ سے مایوس ہو چکی ہو اور جو منقل میں چلے ۔ راوی بیان کرتے ہیں : میں نے دریافت کیا : اس کے منقل میں چلنے سے مراد کیا ہے ، استاد نے جواب دیا : ایسی بوڑھی عورت جو چھوٹے قدم اٹھاتی ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

ان کے بارے میں یہ بات منقول ہے : وہ فرماتے ہیں : عورت جو بھی نماز ادا کرتی ہے ، اس میں اللہ تعالی کے نزدیک سب سے زیادہ پسندیدہ نماز وہ ہے جو وہ اپنے گھر کے تاریک ترین حصے میں ادا کرے ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عورت پردے کی چیز ہے ، جب وہ نکلتی ہے ، تو شیطان اس کی طرف جھانک کر دیکھتا ہے ، اور وہ اللہ تعالی کے سب سے زیادہ قریب اس وقت ہوتی ہے ، جب وہ اپنے گھر کے انتہائی اندرونی حصے میں ہو“ ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدہ میمونہ بنت سعد رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” جب بھی کوئی عورت خوشبو لگا کر نکلتی ہے ، اور مرد اس کی طرف دیکھتے ہیں تو ایسی عورت مسلسل اللہ تعالیٰ کی ناراضگی کی حالت میں رہتی ہے ، جب تک وہ اپنے گھر واپس نہیں آ جاتی“ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی موسیٰ بن عبیدہ ہے ، اور وہ ” ضعیف“ ہے ۔

سیدنا عبداللہ بن مسعود رضی اللہ عنہ فرماتے ہیں : خواتین پردے کی چیز ہیں جب کوئی عورت اپنے گھر سے نکلتی ہے ، جب کہ اسے کوئی حرج نہ ہو ، تو شیطان اس کی طرف جھانک کر دیکھتا ہے ، اور یہ کہتا ہے تم جس بھی شخص کے پاس سے گزرو گی تم اسے اچھی لگو گی ، اور جب کوئی عورت عمدہ لباس پہنتی ہے ، اور اس سے کہا: جاتا ہے تم کہاں جانا چاہتی ہو وہ کہتی ہے : میں بیمار کی عیادت کرنا چاہتی ہوں یا جنازے میں شریک ہونا چاہتی ہوں یا مسجد میں نماز ادا کرنا چاہتی ہوں تو کوئی بھی عورت اپنے پروردگار کی عبادت اس کی مانند نہیں کرتی جس طرح کی عبادت وہ اپنے گھر میں کر سکتی ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

ابوعمرو شیبانی بیان کرتے ہیں : انہوں نے سیدنا عبداللہ رضی اللہ عنہ کو دیکھا کہ وہ جمعہ کے دن مسجد سے خواتین کو نکال رہے تھے ، اور یہ کہہ رہے تھے کہ تم نکل کر اپنے گھر چلی جاؤ یہ تمہارے لئے زیادہ بہتر ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا عبداللہ بن مسعود رضی اللہ عنہ فرماتے ہیں : بنی اسرائیل سے تعلق رکھنے والے مرد اور خواتین اکھٹے نماز ادا کیا کرتے تھے تو ایک عورت نے اونچی ایڑی والے جوتے بنوائے تاکہ اپنی ساتھی خاتون کے ساتھ کھڑی ہو کر اس سے زیادہ لمبی محسوس ہو ، تو اللہ تعالی نے ان عورتوں پر حیض مسلط کر دیا ۔ سیدنا عبدالله بن مسعود رضی اللہ عنہ فرماتے ہیں : ان عورتوں کو نکال دو جس طرح اللہ تعالیٰ نے انہیں نکال دیا ہے ۔ راوی بیان کرتے ہیں : میں نے ابوبکر نامی راوی سے دریافت کیا : قالبین سے مراد کیا ہے ؟ انہوں نے جواب دیا : لکڑی سے بنے ہوئے جوتے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔