مجمع الزوائد ومنبع الفوائد

سیدنا علی بن ابوطالب رضی اللہ عنہ بیان کرتے ہیں : نبی اکرم صلی اللہ علیہ وسلم جب مسجد میں داخل ہوتے تھے تو یہ پڑھتے تھے : ” اے اللہ ! تو میرے لئے اپنی رحمت کے دروازے کھول دے “ ۔ ( اور جب آپ مسجد سے ) باہر تشریف لاتے تھے تو یہ پڑھتے تھے ۔ ” اے اللہ ! میرے لئے اپنے فضل کے دروازے کھول دے “ ۔
یہ روایت امام ابویعلیٰ نے نقل کی ہے ، اس کی سند میں ایک راوی صالح بن موسیٰ ہے ، اور وہ متروک الحدیث ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا امام حسن بن علی رضی اللہ عنہ کو اس بات کی تعلیم دی کہ جب وہ مسجد میں داخل ہوں تو نبی اکرم صلی اللہ علیہ وسلم پر درود بھیجیں اور یہ پڑھیں : ” اے اللہ ! تو ہمارے گناہوں کی مغفرت کر دے اور ہمارے لئے اپنی رحمت کے دروازے کھول دے “ ۔ اور جب وہ مسجد سے باہر آئیں تو نبی اکرم صلی اللہ علیہ وسلم پر درود بھیجیں اور یہ پڑھیں : اے اللہ ! تو ہمارے لئے اپنے فضل کے دروازے کھول دے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سالم بن عبدالاعلیٰ ہے ، اور وہ متروک ہے ۔