مجمع الزوائد ومنبع الفوائد

سیدنا سعد بن ابی وقاص رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب تم نماز کی طرف آؤ تو وقار اور سکینت کے ساتھ اس کی طرف آؤ جتنی نماز تمہیں ملے اسے ادا کر لو جو گزر چکی ہوا سے قضاء کر لو ( یعنی بعد میں ادا کر لو ) “ ۔
یہ روایت امام طبرانی نے معجم اوسط میں ابوسری کی سیدنا سعد رضی اللہ عنہ سے نقل کردہ روایت کے طور پر نقل کی ہے میں نے کسی کو اس کا ( یعنی ابوسری ) کا ذکر کرتے ہوئے نہیں پایا ہے ، اس روایت کے بقیہ رجال کی توثیق کی گئی ہے ۔ ۔ )

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب تم نماز کے لئے آؤ تو تم ایسی حالت میں آؤ کہ تم پر سکون ہو جتنی نماز تمہیں ملے اسے ادا کر لو جو پہلے گزر چکی ہو اسے بعد میں ادا کر لو “ ۔
یہ روایت امام طبرانی نے معجم اوسط میں نقل کی ہے ، اور اس کے رجال کی توثیق کی گئی ہے یہ روایت ایک اور سند کے ساتھ بھی منقول ہے ، اس کے رجال ” صحیح “ کے رجال ہیں تاہم اس میں الفاظ ہیں حماد بیان کرتے ہیں : میرے علم کے مطابق انہوں نے نبی اکرم صلی اللہ علیہ وسلم تک ” مرفوع “ حدیث کے طور پر یہ بات نقل کی ہے ۔

سیدنا ابوقتادہ رضی اللہ عنہ بیان کرتے ہیں : ایک مرتبہ ہم نبی اکرم صلی اللہ علیہ وسلم کی اقتداء میں نماز ادا کر رہے تھے آپ نے اپنے پیچھے ( تیزی سے ) چل کر آنے کی آواز سنی جب آپ نے نماز مکمل کی تو دریافت کیا : تم لوگوں کا کیا معاملہ ہے ؟ لوگوں نے عرض کی : ہم نماز کی طرف جلدی آنا چاہ رہے تھے نبی اکرم صلی اللہ علیہ وسلم نے ارشاد فرمایا : تم ایسا نہ کرو تم میں سے کوئی شخص جتنی نماز اسے ملے وہ ادا کر لے اور جو پہلے گزر چکی ہو وہ بعد میں مکمل کر لے ۔
یہ روایت امام طبرانی نے معجم اوسط میں نقل کی ہے اور اس کے رجال ” صحیح “ کے رجال ہیں ، اور روایت کے یہ الفاظ متفق علیہ ہیں جو پہلے گزر چکی ہو اسے مکمل کر لو “ ۔

سیدنا زید بن ثابت رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ چلتا ہوا جا رہا تھا ہمارا نماز کا ارادہ تھا نبی اکرم صلی اللہ علیہ وسلم چھوٹے قدم اٹھا رہے تھے آپ نے دریافت کیا : کیا تم لوگ یہ بات جانتے ہو میں چھوٹے قدم کیوں اٹھا رہا ہوں ؟ میں نے عرض کی : اللہ اور اس کا رسول بہتر جانتے ہیں ۔ نبی اکرم صلی اللہ علیہ وسلم نے ارشاد فرمایا : ” بندہ مسلسل نماز کی حالت میں شمار ہوتا ہے ، جب تک وہ نماز کی طلب میں ہوتا ہے “ ۔ یہ روایت امام طبرانی نے معجم کبیر میں نقل کی ہے ان صحابی کے حوالے سے ایک اور روایت میں یہ الفاظ منقول ہیں : میں نے ایسا اس لئے کیا ہے تاکہ نماز کی طلب میں میرے قدم زیادہ ہو جائیں “ ۔
اس روایت کی سند میں ایک راوی ضحاک بن نبراس ہے ، اور وہ ” ضعیف “ ہے مصنف نے اسے سیدنا زید بن ثابت رضی اللہ عنہ پر ” موقوف “ روایت کے طور پر بھی نقل کیا ہے ، اور اس کے رجال ” صحیح “ کے رجال ہیں ۔

ثابت بیان کرتے ہیں : میں سیدنا انس بن مالک رضی اللہ عنہ کے ساتھ ” زاویہ “ میں چلتا ہوا جا رہا تھا انہوں نے اذان کی آواز سنی پھر چھوٹے قدم اٹھاتے ہوئے چل پڑے یہاں تک کہ میں مسجد میں داخل ہوا پھر انہوں نے بتایا ایک مرتبہ نبی اکرم صلی اللہ علیہ وسلم بھی اسی طریقے سے چلتے ہوئے تشریف لے گئے آپ نے دریافت کیا : اے انس ! کیا تم جانتے ہو ؟ میں اس طرح سے چل کے کیوں آیا ہوں ؟ میں نے عرض کی : اللہ اور اس کا رسول زیادہ بہتر جانتے ہیں ۔ نبی اکرم صلی اللہ علیہ وسلم نے فرمایا : تاکہ نماز کی طلب میں قدموں کی تعداد زیادہ ہو جائے ۔
یہ روایت امام طبرانی نے معجم کبیر میں نقل کی ہے انہوں نے اس میں سیدنا زید بن ثابت رضی اللہ عنہ کا ذکر نہیں کیا حالانکہ یہ روایت سیدنا انس رضی اللہ عنہ نے سیدنا زید بن ثابت رضی اللہ عنہ کے حوالے سے نقل کی ہے باقی اللہ بہتر جانتا ہے ، اس کی سند میں ایک راوی ضحاک بن نبر اس ہے ، اور وہ ” ضعیف“ ہے ۔

سلمہ بن کہیل بیان کرتے ہیں : سیدنا عبداللہ بن مسعود رضی اللہ عنہ نماز کی طرف تیزی سے چلتے ہوئے جا رہے تھے ان سے اس بارے میں دریافت کیا گیا تو انہوں نے فرمایا : کیا نماز ایسی چیز نہیں ہے ، جس کی طرف سب سے زیادہ تیزی کرنی چاہیے ۔
یہ روایت امام طبرانی نے معجم کبیر میں نقل کی ہے سلمہ نامی راوی نے سیدنا عبداللہ بن مسعود رضی اللہ عنہ سے سماع نہیں کیا ہے ۔

طے قبیلے سے تعلق رکھنے والے ایک صاحب اپنے والد کے حوالے سے یہ بات نقل کرتے ہیں : سیدنا عبداللہ بن مسعود رضی اللہ عنہ مسجد کی طرف جانے کے لئے نکلے ، تو تیز قدموں سے چلنے لگے ان سے کہا: گیا آپ ایسا کر رہے ہیں حالانکہ آپ خود اس سے منع کرتے ہیں تو انہوں نے فرمایا : میں نے یہ ارادہ کیا ہے کہ نماز کے آغاز اور تکبیر اولی میں پہنچ جاؤں ۔
یہ روایت امام طبرانی نے معجم کبیر میں نقل کی ہے ، اس کی سند میں ایسا راوی ہے ، جس کا نام بیان نہیں کیا گیا جیسا کہ آپ ملاحظہ فرما سکتے ہیں ۔ میں یہ کہتا ہوں ، نماز کی طرف چل کر جانے کے بارے میں احادیث کچھ ابواب کے بعد آگے آئیں گی اگر اللہ نے چاہا ۔