مجمع الزوائد ومنبع الفوائد

سیدنا عقبہ بن عامر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب کوئی شخص طہارت حاصل کرے ( یعنی وضو کرے ) پھر وہ مسجد میں آئے اور نماز کا دھیان رکھے تو اس کے دونوں کاتب ( یعنی فرشتے یہاں ایک لفظ کے بارے میں راوی کو شک ہے ) اس کے لئے ہر ایک قدم کے عوض میں دس نیکیاں نوٹ کرتے ہیں ۔ نبی اکرم صلی اللہ علیہ وسلم نے یہ بھی ارشاد فرمایا ہے : بیٹھ کر نماز کا انتظار کرنے والا شخص کھڑے ہو کر نماز ادا کرنے والے کی مانند ہے ، اور اس کا شمار نمازیوں میں کیا جائے گا جب سے وہ اپنے گھر سے نکلا ہو اور اس وقت تک کیا جائے گا جب تک وہ واپس گھر نہیں چلا جاتا “ ۔
یہ روایت امام أحمد اور امام ابویعلیٰ نے نقل کی ہے ۔ امام طبرانی نے معجم کبیر اور معجم اوسط میں نقل کی ہے ، اس کی بعض اسناد میں ابن لہیعہ نامی راوی ہے ، اور اس کی بعض اسناد ” صحیح “ ہیں امام حاکم رحمہ اللہ نے اس حدیث کو ” صحیح “ قرار دیا ہے ۔

سیدنا عتبہ بن عبد بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو بھی بندہ صبح یا شام کے وقت اپنے گھر سے نکل کر مسجد کی طرف جاتا ہے ، تو وہ جو بھی قدم اٹھاتا ہے وہ کفارہ بن جاتا ہے ، اور ایک قدم درجہ ( میں اضافہ کا باعث بنتا ہے “ ۔
یہ روایت امام أحمد نے امام طبرانی نے معجم کبیر میں نقل کی ہے ، اس کی سند میں ایک راوی یزید بن زید جو جانی ہے ، جس کے حوالے سے محمد بن زیاد کے علاوہ اور کسی نے روایت نقل نہیں کی ہے ، اس کے بقیہ رجال کی توثیق کی گئی ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص با جماعت نماز والی مسجد کی طرف چل کر جاتا ہے ، تو ایک قدم اس کے گناہ کو مٹا دیتا ہے ، اور ایک قدم اس کے لئے نیکی نوٹ کرواتا ہے جاتے ہوئے بھی اور واپس آتے ہوئے بھی ( ایسا ہوتا ہے ) “
یہ روایت امام أحمد نے اور امام طبرانی نے معجم کبیر میں نقل کی ہے امام طبرانی کے رجال ” صحیح “ کے رجال ہیں امام أحمد کے رجال میں ایک راوی ابن لہیعہ ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو بھی مسلمان وضو کرتے ہوئے اچھی طرح وضو کرے اور پھر پیدل چل کر اللہ کے گھروں میں سے کسی گھر ( یعنی مسجد ) کی طرف جائے اور اس گھر میں فرض نماز ادا کرے تو اس شخص کے لئے ایک قدم کے عوض میں ایک نیکی نوٹ کی جاتی ہے ، اور دوسرے قدم کے عوض میں اس کا گناہ ختم کر دیا جاتا ہے ، اور تیسرے قدم کے عوض میں اس کا ایک درجہ بلند کیا جاتا ہے “ ۔
یہ روایت امام ابویعلیٰ نے نقل کی ہے ، اس کی سند میں ایک راوی عبدالاعلیٰ بن ابومساور ہے ، اور وہ ” ضعیف “ ہے ۔

سیدنا عبداللہ بن عمر نبی اکرم صلی اللہ علیہ وسلم کا یہ فرمان نقل کرتے ہیں : ” جب کوئی شخص وضو کرتے ہوئے اچھی طرح وضو کرے اور پھر مسجد کی طرف جائے اس کا مقصد صرف نماز کی ادائیگی ہو ، تو اس کا ہر بایاں قدم ایک گناہ مٹا دیتا ہے ، اور دوسرا قدم ایک نیکی کو ثابت کرتا ہے یہاں تک وہ شخص مسجد میں داخل ہو جائے “ ۔
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مساجد کی طرف صبح اور شام کے وقت جانا ، اللہ تعالیٰ کی راہ میں جہاد کرنے کا حصہ ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی قاسم بن عبدالرحمن ہے وہ ” ثقہ “ ہے ، اور اس میں اختلاف پایا جاتا ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تاریکیوں میں مساجد کی طرف چل کر جانے والوں کو قیامت کے دن مکمل نور کی خوشخبری دے دو “ ۔
یہ روایت امام ابویعلیٰ نے نقل کی ہے ، اس کی سند میں ایک راوی عبدالحکم بن عبداللہ ہے ، اور وہ ” ضعیف“ ہے ۔

سیدنا جابر رضی اللہ عنہ بیان کرتے ہیں : بنوسلمہ نے عرض کی : یا رسول اللہ ! کیا ہم اپنے گھر فروخت کر کے آپ کے پاسں منتقل نہ ہو جائیں ؟ کیونکہ ہمارے اور آپ کے درمیان ایک نشیبی علاقہ ہے ۔ نبی اکرم صلی اللہ علیہ وسلم نے ارشاد فرمایا : اپنی جگہ پر رہو ! کیونہ تم لوگ کیل ہو ، جو بھی بندہ نماز کی طرف قدم اٹھا کر چل کر جاتا ہے ، تو اللہ تعالی اس قدم کے عوض میں اس شخص کے لئے اجر نوٹ کرتا ہے ۔ علامہ ہیثمی فرماتے ہیں : ) میں یہ کہتا ہوں : سیدنا جابر رضی اللہ عنہ کے حوالے سے منقول حدیث ” صحیح “ میں بھی مذکور ہے ، تاہم وہ اس سیاق کے بغیر ہے ۔
یہ روایت امام بزار نے نقل کی ہے ، اور اس کے رجال ” ثقہ “ ہیں ۔

سیدنا زید بن حارثہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تاریکی میں مساجد کی طرف چل کر جانے والوں کو قیامت کے دن مکمل نور کی خوشخبری دے دو “ ۔
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی ابن لہیعہ ہے ، جس سے استدلال کرنے کے بارے میں اختلاف کیا گیا ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کے حوالے سے یہ بات نقل کرتی ہیں : ( آپ صلی اللہ علیہ وسلم نے ارشاد فرمایا ہے : ) ” تاریکی میں مساجد کی طرف چل کر جانے والوں کو قیامت کے دن مکمل نور ( نصیب ہونے ) کی خوشخبری دے دو “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی حسن بن علی شروی ہے امام ذہبی فرماتے ہیں : اس کی شناخت نہیں ہو سکی اس کی حدیث میں منکر ہونا پایا جاتا ہے ازدی کہتے ہیں : اس کی نقل کردہ حدیث کی متابعت نہیں کی گئی ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تاریکی میں مساجد کی طرف جانے والوں کو اللہ تعالی قیامت کے دن چہکتا ہوا نور عطا فرمائے گا “ ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تاریکیوں میں مساجد کی طرف چل کر جانے والوں کو قیامت کے دن مکمل نور ( نصیب ہونے ) کی خوشخبری دے دو “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عباس بن عامر ضبی ہے میں نے کسی کو اس کے حالات بیان کرتے ہوئے نہیں پایا ہے ، اس روایت کے بقیہ رجال کی توثیق کی گئی ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تاریکیوں میں مساجد کی طرف چل کر جانے والوں کو قیامت کے دن مکمل نور ( نصیب ہونے ) کی خوشخبری دے دو “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی داؤد بن زبرقان ہے ، جسے یحییٰ بن معین علی بن مدینی اور ابوزرعہ نے ضعیف قرار دیا ہے امام بخاری رحمہ اللہ فرماتے ہیں : یہ مقارب الحدیث ہے ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص رات کی تاریکی میں چل کر مسجد کی طرف جاتا ہے وہ قیامت کے دن نور کے ہمراہ اللہ تعالیٰ کی بارگاہ میں حاضر ہو گا “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا ابودرداء ہی کے حوالے سے امام طبرانی نے یہ روایت نقل کی ہے : ( نبی اکرم صلی اللہ علیہ وسلم نے ارشاد فرمایا ہے : ) ” جو شخص رات کی تاریکی میں چل کر مسجد کی طرف جاتا ہے قیامت کے دن اللہ تعالیٰ اسے نور عطا کرے گا“ ۔
اس روایت کی سند میں ایک راوی جنادہ بن ابوخالد ہے میں نے کسی کو اس کے حالات بیان کرتے ہوئے نہیں پایا ہے ، اس روایت کے بقیہ رجال ” ثقہ “ ہیں ۔

سیدنا ابوموسیٰ اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تاریکیوں میں مساجد کی طرف چل کر جانے والوں کو قیامت کے دن اللہ تعالیٰ کی بارگاہ کی طرف سے عظیم نور ( نصیب ہونے ) کی خوشخبری دے دو “ ۔
یہ روایت امام طبرانی نے معجم کبیر میں اور امام بزار نے نقل کی ہے ، اس کی سند میں ایک راوی محمد بن عبداللہ بن عمیر بن عبید ہے ، اور وہ منکرالحدیث ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تاریکیوں میں مساجد کی طرف جانے والوں کو قیامت کے دن نور کے منبر نصیب ہونے کی خوشخبری دے دو جب لوگ خوف زدہ ہوں گے ، تو یہ لوگ خوف زدہ نہیں ہوں گے “ ۔
یہ روایت امام طبرانی نے معجم کبیر میں نقل کی ہے ، اس کی سند میں یہ مذکور ہے : سلمہ عبسی نے اپنے کے اہل خانہ میں سے ایک شخص کے حوالے سے یہ روایت نقل کی ہے ، اور میں نے کسی کو ان دونوں کا ذکر کرتے ہوئے نہیں پایا ہے ۔

سیدنا سلمان فارسی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اپنے گھر میں وضو کرے اور اچھی طرح وضو کرے پھر وہ مسجد میں آئے تو وہ اللہ تعالیٰ کا مہمان ہوتا ہے ، اور میزبان کے ذمہ یہ بات لازم ہے کہ مہمان کی عزت افزائی کرنے “ ۔
یہ روایت امام طبرانی نے معجم کبیر میں نقل کی ہے ، اس کی دو اسناد میں سے ایک سند کے رجال ” صحیح“ کے رجال ہیں ۔

سیدنا ابوواقد رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اس نماز کی طرف ( یعنی مسجد کی طرف ) آتا جاتا ہے ، اس شخص کے گزشتہ گناہوں کی مغفرت ہو جاتی ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالعزیز بن محمد بن حسن بن زبالہ ہے ۔ ابن حبان کہتے ہیں : اس سے استدلال کرنا باطل ہے ۔