مجمع الزوائد ومنبع الفوائد

سیدنا ابوامامہ باہلی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” امام ضامن ہوتا ہے ، اور مؤذن کو امین بنایا گیا ہے “ ۔
یہ روایت امام أحمد نے اور امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” امام ضامن ہوتا ہے ، اور مؤذن امین ہوتا ہے اے اللہ ! اماموں کی رہنمائی فرما اور اذان دینے والوں کی مغفرت کر دے لوگوں نے عرض کی : یا رسول اللہ ! آپ نے ہمیں ایسی حالت میں کر دیا ہے کہ آپ کے بعد ہم اذان کے بارے میں ایک دوسرے کے ساتھ مقابلہ کریں گے ، تو نبی اکرم صلی اللہ علیہ وسلم نے ارشاد فرمایا : میرے بعد ( راوی کو شک ہے شاید یہ الفاظ ہیں : ) تمہارے بعد ایسے لوگ آئیں گے جن کے مؤذن ان کے بے وقوف لوگ ہوں گے “ ۔
یہ روایت امام بزار نے نقل کی ہے ، اور اس کے تمام رجال کی توثیق کی گئی ہے ۔

سیدنا واثلہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” امام ضامن ہوتا ہے ، اور مؤذن امین ہوتا ہے اے اللہ مؤذنین کی مغفرت کر دے اور ائمہ کی رہنمائی فرما “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی جناح ہے ، جو ولید کا غلام ہے ازدی نے اسے ضعیف قرار دیا ہے امام ابن حبان رحمہ اللہ نے اس کا تذکرہ الثقات میں کیا ہے ۔

سیدنا ابومحذورہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” موذنین مسلمانوں کی افطاری اور سحری کے حوالے سے ان کے امین ہیں “ ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔