مجمع الزوائد ومنبع الفوائد

عاصم بن عبیداللہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” میرے بعد عنقریب ایسے حکمران آئیں گے جو نماز کو کبھی وقت پر ادا کریں گے اور کبھی مخصوص وقت سے مؤخر کر دیں گے تم لوگ ان کی اقتداء میں نماز ادا کرنا وہ لوگ نماز اپنے وقت پر ادا کریں تو تم ان لوگوں کے ساتھ وہ نماز ادا کر لینا تمہیں بھی اجر ملے گا ، اور انہیں بھی اجر ملے گا ، اور اگر وہ اس کو تاخیر کے ساتھ ادا کریں تو تم اس نماز کو ان کے ساتھ ادا کرنا تمہیں اجر ملے گا ، اور انہیں گناہ ہو گا ، جو شخص جماعت سے علیحدگی اختیار کرتا ہے وہ زمانہ جاہلیت کی موت مرتا ہے ، اور جو شخص عہد کو توڑنے والا ہو گا جب وہ قیامت کے دن آئے گا ، تو اس شخص کی کوئی حجت نہیں ہو گی“ ۔ راوی بیان کرتے ہیں : میں نے اپنے استاد سے دریافت کیا : آپ کو یہ روایت کس نے بیان کی ہے ، تو انہوں نے بتایا : مجھے ۔
یہ روایت عبداللہ بن عامر بن ربیعہ نے اپنے والد سیدنا عامر بن ربیعہ رضی اللہ عنہ کے حوالے سے نقل کی ہے ۔ سیدنا عامر رضی اللہ عنہ نے انہیں نبی اکرم صلی اللہ علیہ وسلم کے حوالے سے یہ بات بتائی تھی ۔ یہ روایت امام أحمد نے اور امام طبرانی نے معجم کبیر میں اس کی مانند نقل کی ہے ، اس کی سند میں ایک راوی عاصم بن عبیداللہ ہے ، اور وہ ضعیف ہے ، تاہم امام مالک نے اس سے روایت نقل کی ہے ۔

عبدالرحمن بن عبداللہ بن مسعود اپنے والد کے بارے میں یہ بات نقل کرتے ہیں : ایک مرتبہ ولید بن عقبہ نے نماز کے لئے تاخیر کر دی تو سیدنا عبداللہ بن مسعود رضی اللہ عنہ کھڑے ہوئے انہوں نے نماز کے لئے اقامت کہی اور لوگوں کو نماز پڑھا دی ولید نے انہیں پیغام بھیجا کہ آپ نے جو کیا ہے ایسا کیوں کیا ہے کیا آپ کے پاس امیرالمؤمنین کی طرف سے کوئی حکم آیا ہے ، تو پھر تو آپ نے اچھا کیا ہے یا پھر آپ نے بدعت اختیار کی ہے ، تو سیدنا عبداللہ بن مسعود رضی اللہ عنہ نے فرمایا : نہ تو میرے پاس امیرالمؤمنین کی طرف سے کوئی حکم آیا ہے ، اور نہ ہی میں نے بدعت اختیار کی ہے ، لیکن اللہ اور اس کے رسول نے ہمیں اس کی اجازت نہیں دی ہے کہ ہم اپنی نماز کے لئے تمہارا انتظار کرتے رہیں اور تم لوگ اپنے کام کاج کر رہے ہو ۔
یہ روایت امام أحمد نے اور امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا شداد بن اوس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عتقریب میرے بعد ایسے حکمران ہوں گے جو نماز کو ان کے مخصوص اوقات سے تاخیر سے ادا کریں گے ، تو تم نماز اس کے مخصوص وقت میں ادا کر لینا اور ان لوگوں کے ساتھ اپنی نماز کو نفل قرار دے دینا“ ۔
یہ روایت امام أحمد نے امام بزار نے اور امام طبرانی نے معجم اوسط میں نقل کی ہے اس کی سند میں ایک راوی راشد بن داؤد ہے ، جسے امام دارقطنی رحمہ اللہ نے ضعیف قرار دیا ہے یحییٰ بن معین ، دحیم اور ابن حبان نے اسے ” ثقہ “ قرار دیا ہے ۔

سیدنا عبادہ بن صامت رضی اللہ عنہ کی اہلیہ کے صاحبزادے بیان کرتے ہیں : ہم لوگ نبی اکرم صلی اللہ علیہ وسلم کے پاس موجود تھے آپ نے ارشاد فرمایا : عنقریب ایسے حکمران آئیں گے کہ کچھ چیزیں انہیں مصروف رکھیں گی یہاں تک کہ وہ لوگ نماز اس کے مخصوص وقت پر ادا نہیں کریں گے راوی کہتے ہیں : ہم نے عرض کی : یا رسول اللہ ! تو اس بارے میں آپ کی کیا رائے ہے ؟ نبی اکرم صلی اللہ علیہ وسلم نے ارشاد فرمایا : تم لوگ نماز کو اس کے مخصوص وقت پر ادا کر لینا اگر تم ان حکمرانوں کے ساتھ اس نماز کو پاؤ تو ان کے ساتھ ادا کی جانے والی اپنی نماز کو نفل قرار دے دینا ۔
روایت کے یہ الفاظ امام طبرانی نے معجم کبیر نقل کیے ہیں : اسے امام أحمد نے بھی روایت کیا ہے انہوں نے اس کے حالات بھی بیان کیے ہیں ، اور یہ بات بیان کی ہے یہ ابوابی کی نقل کردہ حدیث ہے انہوں نے اس راوی کے حوالے سے یہ حدیث ذکر کی ہے یہی روایت امام ابوداؤد نے اور دیگر حضرات نے ان کے حوالے سے سیدنا عبادہ بن صامت رضی اللہ عنہ سے نقل کی ہے ۔ سیدنا ابوالی رضی اللہ عنہ کو صحابی ہونے کا شرف حاصل ہے باقی اللہ بہتر جانتا ہے ، اس روایت کے رجال ” صحیح“ کے رجال ہیں ۔

سیدنا سعد بن ابی وقاص رضی اللہ عنہ بیان کرتے ہیں : میں نے نبی اکرم صلی اللہ علیہ وسلم سے اللہ تعالیٰ کے اس فرمان کے بارے میں دریافت کیا : ” وہ لوگ جو اپنی نمازوں سے غفلت کا شکار تھے “ ۔ تو آپ نے فرمایا : یہ وہ لوگ ہیں جو نماز کو اس کے مخصوص وقت سے تاخیر سے ادا کرتے ہیں ۔
یہ روایت امام بزار نے اور امام ابویعلیٰ نے ” مرفوع “ روایت کے طور پر نقل کی ہے ، اور اسے ” موقوف “ روایت کے طور پر بھی نقل کیا ہے ، اس کی سند میں ایک راوی عکرمہ بن ابراہیم ہے ، جسے ابن حبان اور دیگر حضرات نے ضعیف قرار دیا ہے امام بزار کہتے ہیں : حافظان حدیث نے اسے ” موقوف “ روایت کے طور پر نقل کیا ہے ، اس راوی کے علاوہ کسی اور نے اسے ” مرفوع “ نقل نہیں کیا ۔

مصعب بن سعد بیان کرتے ہیں : میں نے اپنے والد سے دریافت کیا : اے ابا جان اللہ تعالیٰ کے اس فرمان کے بارے میں آپ کی کیا رائے ہے ؟ ( ارشاد باری تعالی ہے : ) ” وہ لوگ جو اپنی نمازوں سے غافل ہوتے ہیں “ ۔ تو ہم میں سے کسے سہو لاحق نہیں ہوتا ہے ، اور ہم میں سے کون اپنے خیال میں گم نہیں ہو جاتا ہے ، تو انہوں نے فرمایا : اس سے مراد یہ نہیں ہے ، اس سے مراد وقت ضائع کرنا ہے کہ آدمی دوسری چیزوں میں مصروف رہے ، یہاں تک کہ ( نماز کا مخصوص ) وقت ضائع ہو جائے ۔ ایک اور روایت میں یہ الفاظ ہیں : سیدنا سعد رضی اللہ عنہ نے فرمایا : کیا ہم میں سے ہر ایک ایسا نہیں کرتا ہے ۔
یہ روایت امام ابویعلیٰ نے نقل کی ہے ، اور اس کی سند حسن ہے ۔

سیدنا عبداللہ بن عمرو رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے پاس موجود تھے آپ نے ارشاد فرمایا : عنقریب میرے بعد ایسے حکمران آئیں گے جو نماز کو تاخیر سے ادا کریں گے میں نے عرض کی : یا رسول اللہ ! جو شخص ان کا زمانہ پائے اسے کیا کرنا چاہیے ۔ نبی اکرم صلی اللہ علیہ وسلم نے فرمایا : تم لوگ نماز کو اس کے مخصوص وقت میں ادا کر لینا اور اگر تم لوگ ان کی نماز میں شریک ہو ، تو پھر نماز ادا کر لینا ۔
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی سالم بن عبداللہ خیاط ہے ، جسے یحیی بن معین اور امام نسائی رحمہ اللہ نے ضعیف قرار دیا ہے ، جب کہ امام أحمد ابن حبان اور امام ابو أحمد بن عدی نے اسے ” ثقہ “ قرار دیا ہے ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عنقریب میرے بعد فاسق حکمران آئیں گے جو نماز کو اس کے مخصوص وقت کے علاوہ ادا کریں گے جب وہ ایسا کریں تو تم نماز کو اس کے مخصوص وقت میں ادا کر لینا اور ان لوگوں کے ساتھ اپنی نماز کو نفل بنا لینا“ ۔
یہ روایت امام طبرانی نے معجم اوسط میں نقل کی ہے امام ابویعلیٰ نے نقل کی ہے ، اور اس کی سند میں ایسا راوی ہے ، جس کی شناخت نہیں ہو سکی ۔