مجمع الزوائد ومنبع الفوائد

سیدنا محمود بن لبید انصاری رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” صبح کی نماز روشن کر کے ادا کرو کیونکہ یہ زیادہ اجر کے حصول کا باعث ہے “ ۔
یہ روایت امام أحمد نے نقل کی ہے ، اس کی سند میں ایک راوی عبدالرحمن بن زید بن اسلم ہے ، اور وہ ” ضعیف“ ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” میری امت اس وقت تک فطرت پر گامزن رہے گی جب تک وہ فجر کی نماز روشنی میں ادا کرتے رہیں گئے “ ۔
یہ روایت امام بزار نے اور امام طبرانی نے نقل کی ہے ، اس کی سند میں ایک راوی حفص بن سلیمان ہے ، جسے یحیی بن معین امام بخاری رحمہ اللہ ابوحاتم اور ابن حبان نے ضعیف قرار دیا ہے ۔ ابن خراش کہتے ہیں : یہ حدیث ایجاد کرتا تھا ایک روایت کے مطابق امام أحمد نے اسے ” ثقہ “ قرار دیا ہے ، اور ایک روایت کے مطابق انہوں نے اسے ضعیف قرار دیا ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” فجر کی نماز روشنی میں ادا کرو کیونکہ یہ زیادہ اجر کا باعث ہے ( راوی کو شک ہے شاید یہ الفاظ ہیں : ) یہ تمہارے لئے زیادہ اجر کا باعث ہے “ ۔
یہ روایت امام بزار نے نقل کی ہے وہ فرماتے ہیں : اس میں زید بن اسلم پر اختلاف کیا گیا ہے ۔ ( علامہ ہیثمی فرماتے ہیں : ) میں یہ کہتا ہوں : اس کی سند میں ایک راوی یزید بن عبدالملک نوفلی ہے ، جسے امام أحمد امام بخاری رحمہ اللہ امام نسائی رحمہ اللہ اور ابن عدی نے ضعیف قرار دیا ہے ایک روایت کے مطابق یحیی بن معین نے اسے ” ثقہ “ قرار دیا ہے ، اور دوسری روایت کے مطابق انہوں نے اسے ضعیف قرار دیا ہے ۔

سیدنا بلال رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” فجر کی نماز روشن کر کے ادا کرو کیونکہ یہ زیادہ اجر کا باعث ہے “ ۔
یہ روایت امام بزار نے اور طبرانی نے معجم کبیر میں نقل کی ہے ، اس کی سند میں ایک راوی ایوب بن سیار ہے ، اور وہ ” ضعیف“ ہے ۔

عاصم بن عمر بن قتادہ اپنے والد کے حوالے سے اپنے دادا کا یہ بیان نقل کرتے ہیں ۔ نبی اکرم صلی اللہ علیہ وسلم نے ارشاد فرمایا ہے : ” فجر کی نماز روشن کر کے ادا کرو کیونکہ یہ تمہارے لئے زیادہ اجر کا باعث ہے ۔ ( راوی کو شک ہے شاید یہ الفاظ ہیں : ) یہ زیادہ اجر کا باعث ہے ۔
یہ روایت امام بزار نے نقل کی ہے ، اور اس کے رجال ” ثقہ “ ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” صبح کی نماز روشن کر کے ادا کرو کیونکہ یہ زیادہ اجر کا باعث ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی معلی بن عبدالرحمن واسطی ہے امام دارقطنی رحمہ اللہ کہتے ہیں : یہ کذاب ہے لوگوں نے اسے ضعیف قرار دیا ہے ۔ ابن عدی کہتے ہیں : مجھے یہ امید ہے کہ اس میں کوئی حرج نہیں ہو گا میں یہ کہتا ہوں : اس شخص سے موت کے وقت یہ کہا: گیا کہ کیا تم اللہ تعالیٰ سے مغفرت طلب نہیں کرو گے اس نے کہا: کیا میں اس بات کی امید نہ رکھوں کہ میری مغفرت ہو جائے گی جب کہ میں نے سیدنا علی رضی اللہ عنہ کے فضائل کے بارے میں ستر احادیث ایجاد کی ہوئی ہیں ۔

ابن بجید نے اپنی دادی سیدہ حواء رضی اللہ عنہما جو بیعت کرنے والی خواتین میں سے ایک ہیں ( یعنی جنہوں نے نبی اکرم صلی اللہ علیہ وسلم کے دست اقدس پر اسلام قبول کرنے کا شرف حاصل کیا ہے ) وہ بیان کرتی ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” فجر کی نماز روشن کر کے ادا کرو کیونکہ یہ زیادہ اجر کا باعث ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی اسحاق بن ابراہیم حنینی ہے ، اسے امام نسائی رحمہ اللہ اور دیگر حضرات نے ضعیف قرار دیا ہے ۔ ابن حبان نے اس کا تذکرہ کتاب ” الثقات“ میں کیا ہے ۔

عبدالرحمن بن یزید بیان کرتے ہیں : سیدنا عبداللہ بن مسعود رضی اللہ عنہ فجر کی نماز روشنی میں ادا کرتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

حارث بن سوید بیان کرتے ہیں : سیدنا عبداللہ رضی اللہ عنہ فرماتے ہیں : نماز کو مختصر ادا کیا کرو کیونکہ تمہارے پیچھے عمر رسیدہ کام کاج والے لوگ ہوتے ہیں ہم جب اپنے امام کی اقتداء میں فجر کی نماز ادا کرتے ، تو ہمارے کپڑے ہمارے جسم پر ہوتے ، اور پھر امام دو سو آیتوں والی سورت پڑھنی شروع کر دیتا ، پھر ہم سیدنا عبداللہ رضی اللہ عنہ کے پاس جاتے تو انہیں نماز کی حالت میں پاتے ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

سیدنا رافع بن خدیج رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا بلال رضی اللہ عنہ سے فرمایا صبح کی نماز میں روشنی ہونے دو یہاں تک کہ لوگ روشنی کی وجہ سے یہ دیکھ سکیں کہ تیر جہاں گرتا ہے ( یعنی اتنی دور تک کی چیز انہیں نظر آئے ) ۔ میں یہ کہتا ہوں : سیدنا رافع رضی اللہ عنہ کے حوالے سے روشنی میں نماز ادا کرنے سے متعلق ایک اور حدیث بھی ہے ، جو اس کے علاوہ ہے ۔
یہ روایت امام طبرانی نے معجم کبیر میں نقل کی ہے ۔

امام طبرانی نے معجم کبیر ہی میں ، سیدنا رافع رضی اللہ عنہ کے حوالے سے یہ بات نقل کی ہے کہ وہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” صبح کی نماز اتنی روشنی میں ادا کرو کہ لوگ اتنی دور تک دیکھ سکیں کہ جتنی دور تیر جا کے گرتا ہے “ ۔
یہ دونوں روایات ہریر بن عبدالرحمن بن رافع بن خدیج نے نقل کی ہیں ان دونوں راویوں کا ذکر ابن ابوحاتم نے کیا ہے ، اور ان دونوں نے ان میں سے کسی ایک کے بارے میں کوئی جرح یا تعدیل نقل نہیں کی ہے ( علامہ ہیثمی فرماتے ہیں : ) میں یہ کہتا ہوں : کہ ہریر نامی راوی کا تذکرہ ابن حبان نے کتاب ” الثقات “ میں کیا ہے ، اور یہ بات بیان کی ہے ، اس نے اپنے والد سے روایات نقل کی ہیں ۔