مجمع الزوائد ومنبع الفوائد

سیدنا متکدر رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : ایک رات آپ تشریف لے گئے آپ نے عشاء کی نماز کو اتنا مؤخر کیا کہ رات کا ایک پہر گزر گیا لوگ مسجد میں انتظار کر رہے تھے آپ نے دریافت کیا : تم لوگ کس چیز کا انتظار کر رہے ہو لوگوں نے عرض کی : ہم نماز کا انتظار کر رہے ہیں نبی اکرم صلی اللہ علیہ وسلم نے ارشاد فرمایا : تم لوگ جب سے اس کا انتظار کر رہے ہو ؟ تم لوگ مسلسل نماز کی حالت میں شمار ہوئے ہو پھر آپ نے ارشاد فرمایا : بے شک یہ ایک ایسی نماز ہے ، جسے تم سے پہلے کی امتوں میں سے کسی نے ادا نہیں کیا ہے پھر نبی اکرم صلی اللہ علیہ وسلم نے اپنا سر آسمان کی طرف اٹھایا اور ارشاد فرمایا : ستارے آسمان کے محافظ ہیں جب ستارے بجھ جائیں گے ، تو آسمان پر وہ چیز آ جائے گی ، جس کا وعدہ کیا گیا ہے میں اپنے اصحاب کا محافظ ہوں جب مجھے قبض کر لیا جائے گا ، تو میرے اصحاب پر وہ صورت حال آ جائے گی ، جس کا وعدہ کیا گیا ہے ، اور میرے اصحاب میری امت کے محافظ ہیں جب میرے اصحاب کو قبض کر لیا جائے گا ، تو میری امت پر وہ چیز آ جائے گی ، جس کا ان کے ساتھ وعدہ کیا گیا ہے اے بلال ! تم اقامت کہو ۔
یہ روایت امام طبرانی نے تینوں کتابوں میں نقل کی ہے ، اور اس کے رجال ” ثقہ “ ہیں ۔

سیدنا عبداللہ بن مسعود رضی اللہ عنہ فرماتے ہیں : ایک رات نبی اکرم صلی اللہ علیہ وسلم نے عشاء کی نماز مؤخر دی پھر آپ مسجد میں تشریف لائے تو لوگ مسجد میں نماز کا انتظار کر رہے تھے آپ نے ارشاد فرمایا : تمہارے علاوہ اور کسی بھی دین کے پیرو کار لوگ اس وقت میں اللہ کا ذکر نہیں کرتے ہیں راوی بیان کرتے ہیں : تو یہ آیت نازل ہوئی : ” وہ لوگ برابر نہیں ہیں ، اہل کتاب میں سے ایک امت ہے ، جو کھڑی ہوتی ہے ، اور وہ تلاوت کرتے ہیں “ ۔ ۔ ۔ ۔ ۔ ۔ ۔ ۔ یہ آیت یہاں تک ہے : وہ لوگ جو بھی بھلائی کریں گے ، تو اس کا انکار نہیں کیا جائے گا ، اور اللہ تعالیٰ پرہیزگار لوگوں کے بارے میں علم رکھنے والا ہے “ ۔
یہ روایت امام أحمد امام ابویعلیٰ امام بزار نے اور امام طبرانی نے معجم کبیر میں نقل کی ہے ۔

سیدنا عبداللہ بن مسعود رضی اللہ عنہ فرماتے ہیں : ایک رات نبی اکرم صلی اللہ علیہ وسلم اپنے گھر ٹھہرے رہے ( یہاں راوی کو ایک لفظ کے بارے میں شک ہے ) آپ عشاء کی نماز کی ادائیگی کے لئے ہمارے پاس تشریف نہیں لائے یہاں تک کہ رات کا ایک حصہ گزر گیا تو آپ ہمارے پاس تشریف لائے ہم میں سے کوئی شخص نماز پڑھ رہا تھا کوئی لیٹا ہوا تھا آپ نے ہمیں خوشخبری دیتے ہوئے ارشاد فرمایا : اس وقت میں اہل کتاب میں سے کسی نے بھی نماز ادا نہیں کی تو یہ آیت نازل ہو گئی : ” وہ برابر نہیں ہیں “ ۔
امام أحمد کے رجال ” ثقہ “ ہیں عاصم بن ابونجود کے علاوہ اور کوئی غیر ثقہ نہیں ہے ، اس راوی سے استدلال کرنے کے بارے میں اختلاف کیا گیا ہے امام طبرانی کی سند میں ایک راوای عبیداللہ بن زحر ہے ، اور وہ ” ضعیف “ ہے ۔

ابوزبیر بیان کرتے ہیں : میں نے سیدنا جابر رضی اللہ عنہ سے سوال کیا کیا آپ نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : آدمی نماز کی حالت میں شمار ہوتا ہے ، جب تک وہ نماز کا انتظار کرتا رہتا ہے انہوں نے جواب دیا : ایک مرتبہ ہم نے عشاء کی نماز کے لئے نبی اکرم صلی اللہ علیہ وسلم کا انتظار کیا آپ ہمارے پاس تشریف نہیں لائے یہاں تک کہ جب نصف رات کے قریب کا وقت ہو گیا یعنی نصف رات کا وقت ہو گیا تو نبی اکرم صلی اللہ علیہ وسلم تشریف لائے ہم نے نماز ادا کر لی پھر آپ نے ارشاد فرمایا : تم لوگ بیٹھے رہو پھر نبی اکرم صلی اللہ علیہ وسلم نے ہمیں خطبہ دیا آپ نے ارشاد فرمایا : لوگوں نے نماز ادا کر بھی لی اور وہ سو بھی گئے اور تم لوگ اس وقت تک مسلسل نماز کی حالت میں شمار ہو گے جب سے تم نماز کا انتظار کرتے رہے ۔
یہ روایت امام أحمد اور امام ابویعلیٰ نے نقل کی ہے انہوں نے یہ الفاظ زائد نقل کیے ہیں : ” پھر آپ نے ارشاد فرمایا : اگر کمزور شخص کی کمزوری اور بڑی عمر کے فرد کی عمر کا خیال نہ ہوتا تو میں اس نماز کو نصف رات تک مؤخر کرتا “ ۔ امام ابویعلیٰ کی سند کے رجال ” صحیح “ کے رجال ہیں ۔

امام ابویعلیٰ کی ایک روایت جو سیدنا جابر رضی اللہ ہی کے حوالے سے منقول ہے وہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ تھے میں سو گیا پھر بیدار ہو گیا پھر میں سو گیا پھر میں بیدار ہو گیا مسلمانوں میں سے ایک صاحب کھڑے ہوئے اور بولے : نماز نماز ۔ ۔ ۔ ۔ ۔ ۔ ۔ ۔ اس کے راوی نے پوری حدیث نقل کی ہے ۔
اس روایت میں فرات بن ابوفرات ہے ، جسے یحیی بن معین اور ابن عدی نے ضعیف قرار دیا ہے ، جب کہ ابوحاتم نے اسے ” ثقہ “ قرار دیا ہے ۔

سیدنا عبداللہ بن عمر رضی اللہ عنہما کے حوالے سے یہ بات منقول ہے : ایک رات نبی اکرم صلی اللہ علیہ وسلم نے عشاء کی نماز مؤخر کر دی یہاں تک کہ ہم لوگ سو گئے پھر ہم بیدار ہو گئے پھر ہم سو گئے پھر ہم بیدار ہو گئے نبی اکرم صلی اللہ علیہ وسلم ایک وفد کی وجہ سے مصروف رہے تھے جو آپ کی خدمت میں حاضر ہوا تھا پھر آپ صلی اللہ علیہ وسلم تشریف لے آئے ( علامہ ہیثمی فرماتے ہیں : ) یہ کہتا ہوں : یہ حدیث ” صحیح “ میں مذکور ہے ، تاہم اس میں یہ الفاظ نہیں ہیں : نبی اکرم صلی اللہ علیہ وسلم نے ایک وفد کی آمد کی وجہ سے نماز کو مؤخر کیا تھا ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عمر رضی اللہ عنہما کے حوالے سے امام بزار نے یہ روایت نقل کی ہے : ایک مرتبہ نبی اکرم صلی اللہ علیہ وسلم نے عشاء کی نماز مؤخر کر دی سیدنا عمر رضی اللہ عنہ نے آپ کو بلند آواز میں پکارا خواتین اور بچے سو چکے ہیں تو نبی اکرم صلی اللہ علیہ وسلم نے ( تشریف لانے کے بعد ) ارشاد فرمایا : اہل زمین میں تمہارے علاوہ اور کوئی اس نماز کا انتظار نہیں کر رہا ہے - اس روایت کے رجال ” ثقہ “ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے عشاء کی نماز مؤخر کی یہاں تک کہ مسجد میں موجود افراد واپس چلے گئے صرف سیدنا عثمان بن مظعون رضی اللہ عنہ اور نبی اکرم صلی اللہ علیہ وسلم کے کچھ اصحاب جن کی تعداد پندرہ یا سولہ تھی سترہ نہیں تھی وہ رہ گئے تو سیدنا عثمان رضی اللہ عنہ نے کہا: میں آج رات مسجد سے باہر نہیں جاؤں گا جب تک نبی اکرم صلی اللہ علیہ وسلم تشریف نہیں لے آتے اور میں آپ کی اقتداء میں نماز ادا نہیں کر لیتا اور میں یہ بات نہیں جان لیتا کہ آپ کو کیا معاملہ درپیش آیا ہے ۔ نبی اکرم صلی اللہ علیہ وسلم ایک تہائی رات کے قریب تشریف لائے آپ کے ساتھ سیدنا بلال رضی اللہ عنہ تھے آپ نے مسجد میں کسی شخص کو نہیں دیکھا اسی دوران مسجد کے گوشے سے ان افراد کی آواز سنائی دی تو آپ چلتے ہوئے ان کے پاس تشریف لائے آپ نے انہیں سلام کیا اور دریافت کیا : تم لوگ اس وقت تک کیوں رکے ہوئے ہو ؟ انہوں نے عرض کی : اے اللہ کے نبی ہم آپ کا انتظار کر رہے ہیں تاکہ آپ کی اقتداء میں نماز میں شریک ہوں تو نبی اکرم صلی اللہ علیہ وسلم نے ارشاد فرمایا : تمہاری یہ نماز تم سے پہلے کسی امت نے ادا نہیں کی اور تم مسلسل نماز کی حالت میں شمار ہوئے ہو پھر آپ نے ارشاد فرمایا : ستارے آسمان کی امان ہیں جب ستارے بجھ جائیں گے ، تو اہل آسمان پر وہ چیز آ جائے گی ، جس کا ان کے ساتھ وعدہ کیا گیا ہے میں اپنے اصحاب کی امان ہوں جب میں رخصت ہو جاؤں گا ، تو میرے اصحاب پر وہ صورت حال آ جائے گی کہ جس کا ان کے ساتھ وعدہ کیا گیا ہے ، اور میرے اصحاب میری امت کے لئے امان ہیں جب میرے اصحاب رخصت ہو جائیں گے ، تو میری امت پر وہ چیز آ جائے گی ، جس کا ان کے ساتھ وعدہ کیا گیا ہے ۔ ( علامہ ہیثمی فرماتے ہیں : ) ان صحابی کے حوالے سے ” صحیح “ میں بھی ایک حدیث منقول ہے ، جو عشاء کی نماز تاخیر سے ادا کرنے کے بارے میں ہے ، لیکن وہ اس روایت کے علاوہ ہے -
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا عبداللہ بن مستودر رضی اللہ عنہ بیان کرتے ہیں : ایک رات نبی اکرم صلی اللہ علیہ وسلم ٹھہرے رہے ، یہاں تک کہ مسجد میں دس سے کچھ زیادہ افراد باقی رہ گئے نبی اکرم صلی اللہ علیہ وسلم ان کے لوگوں کے پاس تشریف لائے اور آپ نے ارشاد فرمایا : تمہارے علاوہ اس نماز کا انتظار کرنے والا اور کوئی نہیں ہے بے شک اللہ تعالیٰ نے ستاروں کو اہل آسمان کے لئے امان بنایا ہے ، جب وہ بجھ جائیں گے ، تو اہل آسمان کے قریب وہ چیز آ جائے گئی ، جس کا وعدہ کیا گیا ہے ، اور میرے اصحاب کو اللہ تعالیٰ نے میری امت کے لئے امان بنایا ہے ، جب میرے اصحاب رخصت ہو جائیں گے ، تو میری امت پر وہ چیز آ جائے گی ، جس کا ان لوگوں کے ساتھ وعدہ کیا گیا ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، اور وہ ” ضعیف “ ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اگر کمزور شخص کی کمزوری اور بیمار کی بیماری کا خیال نہ ہوتا تو میں عشاء کی نماز تاخیر سے ادا کرتا“ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن کریب ہے ، اور ” ضعیف“ ہے ۔

جہینہ قبیلے سے تعلق رکھنے والے ایک صاحب بیان کرتے ہیں : میں نے نبی اکرم صلی اللہ علیہ وسلم سے دریافت کیا : میں عشاء کی نماز کب ادا کروں ۔ نبی اکرم صلی اللہ علیہ وسلم نے ارشاد فرمایا : جب رات ہر وادی کے نشیبی حصے کو بھر دے ۔
یہ روایت امام أحمد نے نقل کی ہے ، اور اس کے رجال کی توثیق کی گئی ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم سے عشاء کی نماز کے وقت کے بارے میں دریافت کیا گیا تو آپ نے ارشاد فرمایا : جب رات ہر وادی کے نشیبی حصے کو بھر دے ۔
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح “ کے رجال ہیں ۔

سیدنا نعمان بن بشیر رضی اللہ عنہ بیان کرتے ہیں : نبی اکرم صلی اللہ علیہ وسلم عشاء کی نماز تاخیر سے ادا کیا کرتے تھے
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدہ ام انس رضی اللہ عنہا بیان کرتی ہیں : میں نے عرض کی : یا رسول اللہ ! عشاء کی نماز کے وقت میری آنکھ لگ جاتی ہے ، تو نبی اکرم صلی اللہ علیہ وسلم نے ارشاد فرمایا : اے ام سلیم اسے جلدی ادا کر لیا کرو جب رات ہر وادی کے نشیبی حصے کو بھر دے تو نماز کا وقت شروع ہو جاتا ہے تم نماز ادا کر لیا کرو تم پر کوئی گناہ نہیں ہو گا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عنبسہ بن عبدالرحمن ہے ، اور وہ متروک الحدیث ہے ۔

سیدنا ابوبکرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے نو راتوں تک عشاء کی نماز تاخیر سے ادا کی یہاں ابوداؤد نامی راوی نے یہ الفاظ نقل کیے ہیں : آٹھ راتوں تک ایسا کیا آپ نے اسے ایک تہائی رات گزرنے تک مؤخر کیا سیدنا ابوبکر رضی اللہ عنہ نے آپ کی خدمت میں عرض کی : یا رسول اللہ ! اگر آپ اسے جلدی ادا کر لیں تو یہ ہمارے رات کے نوافل کے لئے زیادہ موزوں ہو گا ۔ راوی بیان کرتے ہیں : تو اس کے بعد نبی اکرم صلی اللہ علیہ وسلم اس کو جلدی ادا کر لیتے تھے ۔
یہ روایت امام أحمد نے اور امام طبرانی نے معجم کبیر میں اس کی مانند نقل کی ہے ، اس کی سند میں ایک راوی علی بن زید ہے ، جس سے روایت کرنے کے بارے میں اختلاف کیا گیا ہے ۔