مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کی اقتداء میں مغرب کی نماز ادا کر لیتے تھے ، پھر ہم اپنے گھر واپس چلے جاتے تھے ، جو ایک میل کے فاصلے پر ہوتا تھا ، اور میں اُس وقت تیر کے گرنے کی جگہ دیکھ لیتا تھا ۔
یہ روایت امام أحمد ، امام بزار اور امام ابویعلیٰ نے ، عبداللہ بن محمد بن عقیل سے نقل کی ہے ، اس سے استدلال کرنے کے بارے میں اختلاف کیا گیا ہے ، امام ترمذی نے اسے ” ثقہ “ قرار دیا ہے ، امام أحمد اور دیگر حضرات نے اس سے استدلال کیا ہے ۔

سیدنا زید بن خالد جہنی رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کی اقتداء میں مغرب کی نماز ادا کرتے تھے ، پھر ہم بازار واپس چلے جاتے تھے ، اگر ہم میں سے کوئی ایک شخص تیر پھینکتا ، تو تم اس تیر کے گرنے کی جگہ کو دیکھ سکتے تھے ۔
یہ روایت امام أحمد نے ، اور امام طبرانی نے معجم کبیر میں نقل کی ہے ، اس کی سند میں ایک راوی صالح مولی تو امہ ہے ، جو آخری عمر میں اختلاط کا شکار ہو گیا تھا ، یحییٰ بن معین کہتے ہیں : ابن ابوذئب نے اختلاط سے پہلے اس سے سماع کیا تھا ، اور یہ روایت ابن ابوذئب نے اس سے نقل کی ہے ۔

علی بن بلال نے ، کچھ انصار کے حوالے سے یہ بات نقل کی ہے : وہ بیان کرتے ہیں : ہم لوگ نبی اکرم صلی اللہ علیہ وسلم کی اقتداء میں مغرب کی نماز ادا کرتے تھے ، پھر ہم واپس چلے جاتے تھے ، ہم دوڑتے ہوئے جاتے تھے ، یہاں تک کہ ہم اپنے علاقے میں پہنچ جاتے تھے ، تو ہم میں سے کسی ایک پر ، اُس کے تیر کے گرنے کی جگہ مخفی نہیں رہتی تھی ۔ ( یعنی اتنی روشنی ہوتی تھی کہ اتنی دور تک نگاہ کام کرتی تھی ) ۔
یہ روایت امام أحمد نے نقل کی ہے ، اور اس کی سند حسن ہے ۔

سیدنا سائب بن یزید رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت اُس وقت تک فطرت پر گامزن رہے گی ، جب تک وہ ستاروں کے طلوع ہونے سے پہلے ، مغرب کی نماز ادا کرتے رہیں گئے “ ۔
یہ روایت امام أحمد نے ، اور امام طبرانی نے معجم کبیر میں نقل کی ہے ، اس کے رجال کی توثیق کی گئی ہے ۔

سیدنا ابوایوب انصاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مغرب کی نماز اُس وقت ادا کر لو ! جب روزہ دار ، افطار کرتا ہے ، اور اسے ستارے نکلنے سے پہلے ادا کر لو “ ۔
یہ روایت امام أحمد نے نقل کی ہے ، امام طبرانی نے اس میں یہ الفاظ نقل کیے ہیں : ” سورج غروب ہونے کے ساتھ ہی ، مغرب کی نماز ادا کر لو“ ۔ یہ روایت امام أحمد نے یزید بن ابوحبیب کے حوالے سے ، ایک شخص کے حوالے سے ، سیدنا ابوایوب رضی اللہ عنہ سے نقل کی ہے ، اس روایت کے بقیہ رجال ” ثقہ “ ہیں ، اسے امام طبرانی نے یزید بن ابوحبیب کے حوالے سے ، اسلم ابوعمران کے حوالے سے ، سیدنا ابوایوب انصاری رضی اللہ عنہ سے نقل کیا ہے ، اور اس کے رجال کی توثیق کی گئی ہے ۔

سیدنا ابوظریف رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ تھا ، جب آپ صلی اللہ علیہ وسلم نے طائف کا محاصرہ کیا تھا ، آپ نے ہمیں ” نصر “ ( یہاں درست لفظ عصر ہے ) کی نماز پڑھائی ، یہاں تک کہ اگر کوئی شخص تیر پھینکتا ، تو وہ تیر کے گرنے کی جگہ کو دیکھ سکتا تھا ۔
یہ روایت امام أحمد نے نقل کی ہے ، اس کی سند میں ایک راوی ولید بن عبداللہ بن شمیلہ ہے ، میں نے کسی کو اس کا ذکر کرتے ہوئے نہیں پایا ہے ، اس مقام پر ” مسند “ کے رجال میرے ذہن میں نہیں ہیں ، یہ روایت امام طبرانی نے معجم کبیر میں نقل کی ہے ، اور انہوں نے لفظ ” نصر “ کی جگہ ” عصر “ روایت کیا ہے ، اور یہ وہم ہے ، باقی اللہ بہتر جانتا ہے ۔ میں یہ کہتا ہوں : ولید نامی یہ راوی ولید بن عبداللہ بن سمیرہ ہے ، جیسا کہ امام طبرانی نے یہ روایت نقل کی ہے ، ابن حبان نے اس راوی کا ذکر کتاب ” الثقات “ میں کیا ہے ، انہوں نے اس راوی کی سیدنا ابوظریف رضی اللہ عنہ سے نقل کردہ روایت کا ذکر کیا ہے ، اُن کے دادا کے نام کے بارے میں اختلاف کیا گیا ہے ، باقی اللہ بہتر جانتا ہے ۔

سیدنا کعب بن مالک رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کی اقتداء میں مغرب کی نماز ادا کر لیتے تھے پھر ہم بنو سلمہ کے محلے میں آتے تھے تو بنو سلمہ کے محلے میں جو مدینہ کا منورہ کا سب سے دور کا علاقہ تھا وہاں پہنچ کر ہم اپنے تیروں کے گرنے کی جگہ دیکھ سکتے تھے ۔
یہ روایت امام طبرانی نے معجم کبیر اور معجم اوسط میں نقل کی ہے ، تاہم انہوں نے اس میں یہ الفاظ نقل کیے ہیں : نبی اکرم صلی اللہ علیہ وسلم مغرب کی نماز ادا کر لیتے تھے آپ کی اقتداء میں بنو سلمہ سے تعلق رکھنے والے کچھ افراد نماز ادا کر لیتے تھے پھر وہ بنوسلہ کے محلے کی طرف واپس چلے جاتے تھے تو وہ تیر کے گرنے کی جگہ دیکھ سکتے تھے اس روایت کی سند میں ایک راوی عمر بن محمد قاضی ہے ، جسے یحیی بن معین امام بخاری رحمہ اللہ امام نسائی رحمہ اللہ اور دیگر حضرات نے ضعیف قرار دیا ہے زکریا بن یحیی ساجی بیان کرتے ہیں : یہ صدوق تھا تاہم علم حدیث کے ماہرین میں سے نہیں ہے ۔ ابن عدی کہتے ہیں : یہ حسن الحدیث ہے ، اس کی نقل کردہ حدیث کو اس کے ضعیف ہونے کے باوجود نوٹ کیا جائے گا ۔

عبدالرحمن بن عبداللہ بن کعب بن مالک بیان کرتے ہیں : نبی اکرم صلی اللہ علیہ وسلم کے ایک صحابی نے انہیں یہ بات بتائی کہ وہ لوگ نبی اکرم صلی اللہ علیہ وسلم کی اقتداء میں مغرب کی نماز ادا کرتے تھے ، اور پھر بنو سلمہ کے محلے میں واپس چلے جاتے تھے تو تیر کے گرنے کی جگہ دیکھ سکتے تھے اگر تیر کو پھینکا جاتا -
یہ روایت امام طبرانی نے معجم کبیر میں نقل کی ہے وہ یہ بیان کرتے ہیں : یونس نے ابن شہاب کے حوالے سے ابن کعب سے یہ روایت اسی طرح نقل کی ہے وہ کہتے ہیں : ایک صاحب نے مجھے یہ بات بتائی ہے ، اس روایت کے رجال ” ثقہ “ ہیں ۔

سیدنا ابومحذورہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب تم مغرب کے لئے اذان دو تو جلدی دو ، جب سورج غروب ہو جائے “ ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

ان کے حوالے سے معجم کبیر میں یہ روایت بھی منقول ہے وہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مغرب کے وقت ( اذان ) جلدی دے دو جب سورج غروب ہو جائے “ ۔
اس کی سند حسن ہے ۔

سیدنا حارث بن وہب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” میری امت اسلام ( کی تعلیمات ) پر اس وقت تک گامزن رہے گی جب تک وہ مغرب کو اتنا مؤخر نہیں کرے گی کہ ستارے چمکنے لگیں جو یہودیوں کا طریقہ ہے ، اور جب تک وہ فجر کی نماز کو اتنی جلدی ادا نہیں کریں گے جو عیسائیوں کا طریقہ ہے ، اور جب تک وہ جنائز کو اس کے اہل کے سپرد نہیں کریں گے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی مندل بن علی ہے ، جس میں ضعف پایا جاتا ہے ۔ اس سے پہلے درمیانی نماز سے متعلق باب میں اس کی فضیلت سے متعلق حدیث گزر چکی ہے ۔

سیدنا صنابحی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” میری امت دین کی تعلیمات پر اس وقت تک گامزن رہے گی ، جب تک وہ مغرب کے لئے ستاروں کے چمکنے کا انتظار نہیں کریں گے جو یہودیوں کا طریقہ ہے ، اور جب تک وہ فجر کو اتنا مؤخر نہیں کریں گے جو عیسائیوں کا طریقہ ہے “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

عبدالرحمن بن یزید بیان کرتے ہیں : ہم لوگ مکہ کے راستے میں سیدنا عبداللہ رضی اللہ عنہ کے ساتھ تھے جب سورج غروب ہو گیا تو انہوں نے فرمایا : یہ غسق الیل ہے پھر انہوں نے اذان دی اور پھر یہ کہا: اس ذات کی قسم جس کے علاوہ اور کوئی معبود نہیں ہے یہ اس نماز کا وقت ہے ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

ان کے حوالے سے ہی یہ بات منقول ہے : وہ بیان کرتے ہیں : ہم لوگ سیدنا عبداللہ بن مسعود رضی اللہ عنہ کے ساتھ تھے جب سورج غروب ہو گیا تو انہوں نے فرمایا : اس ذات کی قسم ! جس کے علاوہ اور کوئی معبود نہیں ہے یہ وہ وقت ہے کہ جب سورج غروب ہو گیا ہے ، اور نماز کا وقت شروع ہو گیا ہے ۔
اس روایت کی سند صحیح ہے ۔

سیدنا عبداللہ رضی اللہ عنہ فرماتے ہیں : سورج کے ” دلوک “ سے مراد اس کا غروب ہونا ہے عرب جب سورج غروب ہو جائے تو اس کے لئے یہ کہتے ہیں : دلکت
اس روایت کی سند حسن ہے ۔

سیدنا عبداللہ رضی اللہ عنہ فرماتے ہیں :« الي غسَقِ اللَّيْلِ» اس سے مراد عشاء کی نماز ہے ۔
اس روایت کی سند میں ایک راوی جابر بن یزید جعفی ہے ، اور وہ ” ضعیف ہے “ شعبہ اور سفیان نے اسے ” ثقہ “ قرار دیا ہے ۔