مجمع الزوائد ومنبع الفوائد

سیدنا عبداللہ بن مسعود رضی اللہ عنہ فرماتے ہیں : سورج ، جہنم سے ، شیطان کے سینگ میں ( راوی کو شک ہے ، شاید یہ الفاظ ہیں : ) شیطان کے دو سینگوں کے درمیان طلوع ہوتا ہے ، جیسے ہی وہ ایک قصبہ ( پیمائش کا مخصوص پیمانہ ) جتنا بلند ہوتا ہے ، تو جہنم کے دروازوں میں سے ایک دروازہ کھول دیا جاتا ہے ، یہاں تک کہ جب تک گرمی شدید ہو جائے ، تو اُس وقت اس کے تمام دروازے کھول دیے گئے ہوتے ہیں ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ، یہ ایک اور سند کے ساتھ بھی منقول ہے ، اور وہ روایت اس باب میں آئے گی ، جس میں اُن اوقات کا تذکرہ ہے ، جن میں نماز ادا کرنا مکروہ قرار دیا گیا ہے ۔

سیدنا عبدالرحمن بن جاریہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” ظہر کو ٹھنڈے وقت میں ادا کرو ! “ ۔
یہ روایت امام طبرانی نے معجم کبیر میں ابن سلیط کی سیدنا عبدالرحمن رضی اللہ عنہ سے نقل کردہ روایت کے طور پر نقل کی ہے ، میں نے کسی کو ابن سلیط کا ذکر کرتے ہوئے نہیں پایا ہے ، اس روایت کے رجال ” صحیح“ کے رجال ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم گرمی میں ظہر کی نماز اس وقت ادا کرتے تھے کہ ہمیں اندازہ نہیں ہو پاتا تھا ، کہ دن کا زیادہ حصہ گزر چکا ہے ، یا باقی رہ گیا ہے ؟ ( علامہ ہیثمی فرماتے ہیں : ) میں یہ کہتا ہوں : سیدنا انس رضی اللہ عنہ کے حوالے سے منقول حدیث امام ابوداؤد نے نقل کی ہے ، جس میں یہ بات ذکر کی گئی ہے : کہ جب نبی اکرم صلی اللہ علیہ وسلم نے سفر کے دوران روانہ ہونا ہوتا تھا ، تو آپ صلی اللہ علیہ وسلم اس نماز کو جلدی ادا کر لیتے تھے ۔
یہ روایت امام أحمد نے موسیٰ ابوالعلاء کی نقل کردہ روایت کے طور پر نقل کی ہے ، میں نے کسی کو اس کے حالات بیان کرتے ہوئے نہیں پایا ہے ۔