مجمع الزوائد ومنبع الفوائد

سیدنا عبداللہ بن مسعود رضی اللہ عنہ فرماتے ہیں : ہم نے نبی اکرم صلی اللہ علیہ وسلم کی خدمت میں ریت کے گرم ہونے کی شکایت کی ، تو آپ صلی اللہ علیہ وسلم نے ہماری شکایت کو قبول نہیں کیا ۔
یہ روایت امام بزار نے نقل کی ہے ، اس کے رجال ” ثقہ “ ہیں ۔

ان کے حوالے سے امام طبرانی نے معجم کبیر میں یہ روایت نقل کی ہے : ہم نے نبی اکرم صلی اللہ علیہ وسلم کی خدمت میں دوپہر کی نماز کی شکایت کی ، تو آپ صلی اللہ علیہ وسلم نے ہماری شکایت کو قبول نہیں کیا ۔
اس روایت کے رجال بھی ” ثقہ “ ہیں ۔

مسروق بیان کرتے ہیں : سیدنا عبداللہ رضی اللہ عنہ نے ہمیں نماز پڑھائی ، اُس وقت جب سورج ڈھل گیا تھا ، تو میں نے سلیمان سے کہا: یہ ظہر کی نماز ہے ؟ انہوں نے جواب دیا : جی ہاں ! ! سیدنا عبداللہ رضی اللہ عنہ نے فرمایا : اس ذات کی قسم ! جس کے علاوہ اور کوئی معبود نہیں ہے ، یہ اس نماز کا مخصوص وقت ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

خشف بن مالک بیان کرتے ہیں : سیدنا عبداللہ رضی اللہ عنہ ظہر کی نماز اُس وقت ادا کر لیتے تھے ، جب ریت کی تپش کی وجہ سے ” جندب “ ( نام کی ٹڈیاں ) ایک دوسرے پر سوار ہو رہی ہوتی ہیں ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ضرار بن صرد ہے ، اور وہ ” ضعیف“ ہے ۔

سیدنا خباب رضی اللہ عنہ بیان کرتے ہیں : ہم نے نبی اکرم صلی اللہ علیہ وسلم کی خدمت میں ریت کے گرم ہونے کی شکایت کی ، تو آپ صلی اللہ علیہ وسلم نے ہماری شکایت کو قبول نہیں کیا ، نبی اکرم صلی اللہ علیہ وسلم نے ارشاد فرمایا : جب سورج ڈھل جائے ، تو تم لوگ نماز ادا کر لو ! ( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں بھی مذکور ہے ، تاہم اس میں یہ الفاظ نہیں ہیں : ” جب سورج ڈھل جائے ، تو تم لوگ نماز ادا کر لو “ ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا انس رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کی اقتداء میں نماز ادا کرتے تھے ، تو ہم میں سے کوئی ایک شخص کنکریاں اپنے ہاتھ میں رکھتا تھا ، جب وہ ٹھنڈی ہو جاتی تھیں ، تو پھر وہ انہیں رکھ کر اُس پر سجدہ کرتا تھا ۔
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔

سیدنا جابر بن عبدالله رضی اللہ عنہما بیان کرتے ہیں : ہم لوگوں نے نبی اکرم صلی اللہ علیہ وسلم کی خدمت میں ریت کے گرم ہونے کی شکایت کی تو آپ صلی اللہ علیہ وسلم نے ہماری شکایت کو قبول نہیں کیا ، آپ صلی اللہ علیہ وسلم نے ارشاد فرمایا : ” تم لوگ کثرت کے ساتھ لا حول ولا قوة الا باللہ پڑھو ! کیونکہ یہ نقصان کے ننانوے دروازے دور کر دیتا ہے ، جن میں سے سب سے کمتر ، سخت ترین پریشانی ہے “ ۔ ( علامہ ہیثمی فرماتے ہیں : ) میں یہ کہتا ہوں : سیدنا جابر رضی اللہ عنہ سے منقول ایک حدیث ، جو گرمی کی شدت میں نماز ادا کرنے کے بارے میں ہے ، وہ امام ابوداؤد اور دیگر حضرات نے نقل کی ہے ، اور وہ اس روایت کے علاوہ ہے ۔
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں ایک راوی ” بلہط“ ہے ، جسے عقیلی نے ضعیف قرار دیا ہے ، اور ابن حبان نے اسے ” ثقہ “ قرار دیا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب سایہ ڈیڑھ گز سے دو گز تک ہو جائے ، تو تم ظہر کی نماز ادا کر لو “ ۔
یہ روایت امام ابویعلیٰ نے نقل کی ہے ، اور اس کی سند میں ایک راوی اصرم بن حوشب ہے ، اور وہ کذاب ہے ۔

سیدنا عمر بن خطاب رضی اللہ عنہ کے بارے میں یہ بات منقول ہے : سیدنا ابومحذورہ رضی اللہ عنہ نے مکہ میں ظہر کی نماز کے لئے اذان دی ، سیدنا عمر رضی اللہ عنہ بھی اس وقت مکہ میں موجود تھے ، انہوں نے آواز کو بلند رکھا ، یہ اس وقت کی بات ہے ، جب سورج ڈھل گیا تھا ، تو سیدنا عمر رضی اللہ عنہ نے فرمایا : اے ابومحذورہ ! کیا تمہیں اس بات کا اندیشہ نہیں ہوا کہ تم ( آواز کو زیادہ بلند کرنے کی وجہ سے ) اپنے گلے کی رگوں کو چیر دو گے ؟ تو انہوں نے کہا: مجھے یہ بات اچھی لگی کہ میں اس کی آواز آپ تک پہنچاؤں ، تو سیدنا عمر رضی اللہ عنہ نے بتایا : کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب گرمی شدید ہو ، تو نماز کو ٹھنڈے وقت میں ادا کرو ، کیونکہ گرمی ، جہنم کی تپش کا حصہ ہے ، جہنم بھڑک رہی ہوتی ہے ، یہاں تک کہ اُس کا ایک حصہ دوسرے کو کھا لیتا ہے ، تو وہ اللہ تعالیٰ سے دو مرتبہ سانس لینے کی اجازت لیتی ہے ، تو اللہ تعالیٰ اسے اجازت دے دیتا ہے ، تو گرمی کی شدت جہنم کی تپش کا حصہ ہے ، اور سردی کی شدت اُس کی ٹھنڈک کا حصہ ہے “ ۔
یہ روایت امام ابویعلیٰ اور امام بزار نے نقل کی ہے ، انہوں نے یہ الفاظ نقل کیے ہیں : ” جہنم نے یہ کہا: میرا ایک حصہ دوسرے کو کھا رہا ہے “ ۔ اس روایت کی سند میں ایک راوی محمد بن حسن بن زبالہ ہے ، جس کی نسبت حدیث ایجاد کرنے کی طرف کی گئی ہے ۔

قاسم بن صفوان نے ، اپنے والد کے حوالے سے ، نبی اکرم صلی اللہ علیہ وسلم کا یہ فرمان نقل کیا ہے : ” ظہر کی نماز ٹھنڈے وقت میں ادا کرو ! کیونکہ گرمی کی شدت جہنم کی تپش کا حصہ ہے “ ۔
یہ روایت امام أحمد نے ، اور امام طبرانی نے معجم کبیر میں نقل کی ہے ، اور قاسم بن صفوان نامی راوی کو ابن حبان نے ” ثقہ “ قرار دیا ہے ۔ ابوحاتم کہتے ہیں : قاسم بن صفوان نامی راوی کی شناخت صرف اسی حدیث میں ہو سکی ہے ۔

شعبہ بیان کرتے ہیں : میں نے حجاج بن حجاج اسلمی کو ، جو ان لوگوں کے امام تھے ، انہیں اپنے والد کے حوالے سے یہ حدیث بیان کرتے ہوئے سنا : اُن کے والد نے نبی اکرم صلی اللہ علیہ وسلم کے ساتھ حج کیا تھا ، وہ نبی اکرم صلی اللہ علیہ وسلم کے ایک صحابی کے حوالے سے یہ بات نقل کرتے ہیں : حجاج نامی راوی بیان کرتے ہیں : میرا خیال ہے ، انہوں نے سیدنا عبداللہ رضی اللہ عنہ کے حوالے سے ، نبی اکرم صلی اللہ علیہ وسلم کے بارے میں یہ روایت نقل کی ہے : آپ صلی اللہ علیہ وسلم نے ارشاد فرمایا ہے : ” گرمی کی شدت جہنم کی تپش کا حصہ ہے ، تو جب گرمی شدید ہو ، تو نماز ٹھنڈے وقت میں ادا کرو ! “ ۔
یہ روایت امام أحمد ، امام ابویعلیٰ ، اور امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : “” “” «إِنَّ شِدَّةَ الْحَرِّ مِنْ فَيْحِ جَهَنَّمَ ، فَأَبْرِدُوا بِالصَّلَاةِ» “” “” ۔

سیدنا عمرو بن عبسہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ظہر کی نماز ٹھنڈے وقت میں ادا کرو ! کیونکہ گرمی کی شدت ، جہنم کی تپش کا حصہ ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی سلیمان بن سلمہ خبائری ہے ، اور اس کے ضعیف ہونے پر اتفاق ہے ۔