مجمع الزوائد ومنبع الفوائد

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جبرائیل نے ، نماز میں میری امامت کی ، انہوں نے ظہر کی نماز اس وقت ادا کی ، جب سورج ڈھل گیا تھا اور عصر کی نماز اس وقت ادا کی ، جب ایک مثل سایہ ہو چکا تھا ، مغرب کی نماز اس وقت ادا کی ، جب سورج غروب ہو گیا تھا ، اور عشاء کی نماز اس وقت ادا کی ، جب شفق غائب ہو گئی تھی ، فجر کی نماز اس وقت ادا کی ، جب صبح صادق ہو گئی تھی ، پھر جب وہ اگلے دن آئے ، تو انہوں نے ظہر کی نماز اس وقت ادا کی ، جب ہر چیز کا سایہ ایک مثل تھا ، عصر کی نماز اس وقت ادا کی ، جب سایہ دو مثل ہو چکا تھا ، مغرب کی نماز اس وقت ادا کی ، جب سورج غروب ہو گیا تھا ، عشاء کی نماز ایک تہائی رات گزرنے کے بعد ادا کی ، اور صبح کی نماز اس وقت ادا کی ، جب سورج نکلنے کے قریب تھا ، پھر انہوں نے یہ بتایا : نماز کا وقت ان دو اوقات کے درمیان ہے ۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، اور اس میں ضعف پایا جاتا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ان لوگوں کو یہ بات بتائی : سیدنا جبرائیل علیہ السلام آپ صلی اللہ علیہ وسلم کے پاس آئے اور تمام نمازیں دو مختلف اوقات میں پڑھائیں ، البتہ مغرب کی نماز کا معاملہ مختلف ہے ( نبی اکرم صلی اللہ علیہ وسلم ارشاد فرماتے ہیں : ) وہ میرے پاس آئے ، انہوں نے مجھے ظہر کی نماز اس وقت پڑھائی ، جب میرا سایہ میرے جوتے کے تسمے کی مانند ہو چکا تھا ، پھر وہ میرے پاس آئے اور انہوں نے مجھے عصر کی نماز اس وقت پڑھائی جب میرا سایہ ایک مثل ہو گیا تھا ، پھر وہ میرے پاس مغرب کی نماز کے لئے آئے تو انہوں نے مجھے یہ نماز اس وقت پڑھا دی جب سورج غروب ہو گیا تھا ، پھر وہ عشاء کے وقت میرے پاس آئے اور اس وقت نماز پڑھائی جب شفق غروب ہوئی تھی ، پھر وہ فجر کی نماز میں میرے پاس آئے ، تو اس وقت نماز پڑھائی ، جب صبح صادق ہوئی تھی ، جب وہ اگلے دن میرے پاس آئے ، تو انہوں نے ظہر کی نماز اس وقت پڑھائی ، جب میرا سایہ ایک مثل ہو گیا تھا ، پھر وہ عصر کی نماز کے لئے میرے پاس اس وقت آئے اور انہوں نے مجھے نماز اس وقت پڑھائی ، جب میرا سایہ دو مثل ہو گیا تھا ، پھر وہ مغرب کی نماز کے لئے میرے پاس آئے ، اور مجھے وہ نماز اس وقت پڑھائی ، جب سورج غروب ہو گیا تھا ، اس نماز میں انہوں نے پہلے وقت سے کوئی تبدیلی نہیں کی تھی ، پھر وہ عشاء کی نماز کے لئے میرے پاس آئے اور مجھے یہ نماز اس وقت پڑھائی جب رات کا ابتدائی ایک تہائی حصہ رخصت ہو چکا تھا ، پھر انہوں نے فجر کی نماز روشنی میں ادا کی ، یہاں تک کہ مجھے آسمان میں کوئی ستارہ دکھائی نہیں دے رہا تھا ، پھر انہوں نے بتایا : ان دونوں کے درمیان ( نمازوں کا مخصوص ) وقت ہے ۔
یہ روایت امام بزار نے نقل کی ہے ، اس کی سند میں ایک راوی ہے ، عمر بن عبدالرحمن بن اسید بن عبدالرحمن بن زید بن خطاب ہے ، جس کا ذکر ابن ابوحاتم نے کیا ہے ، اور یہ بات بیان کی ہے : ابونعیم اور عبداللہ بن نافع نے اس سے سماع کیا ہے ، میں نے اپنے والد کو یہی بات بیان کرتے ہوئے سنا ہے ، امام بزار کے استاد ابراہیم بن نصر ہیں ، میں نے کسی کو ان کے حالات بیان کرتے ہوئے نہیں پایا ہے ، اس روایت کے بقیہ رجال کی توثیق کی گئی ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم ظہر کی نماز اس وقت ادا کر لیتے تھے ، جب سورج ڈھل جاتا تھا اور عصر کی نماز اس وقت ادا کرتے تھے ، جب سورج چمکدار اور روشن ہوتا تھا ، مغرب کی نماز اس وقت ادا کرتے تھے ، جب سورج غروب ہو جاتا تھا اور عشاء اس وقت ادا کرتے تھے ، جب شفق غروب ہو جاتی تھی ، فجر کی نماز آپ بعض اوقات اس وقت ادا کرتے تھے ، جب صبح صادق ہوتی تھی اور بعض اوقات اُسے ذرا تاخیر کر کے ادا کرتے تھے ۔
یہ روایت امام بزار نے نقل کی ہے ، اس کی سند میں ایک راوی یوسف بن خالد سمتی ہے ، اور وہ انتہائی ” ضعیف “ ہے ۔

بیان ( نامی راوی ) بیان کرتے ہیں : میں نے سیدنا انس رضی اللہ عنہ سے کہا: آپ مجھے نبی اکرم صلی اللہ علیہ وسلم کی نماز کے وقت کے بارے میں حدیث بیان کیجئے ! تو انہوں نے بتایا : کہ نبی اکرم صلی اللہ علیہ وسلم ظہر کی نماز سورج ڈھل جانے کے بعد ادا کر لیتے تھے ، اور عصر کی نماز اس درمیانی وقت میں ادا کرتے تھے ، جو تمہارا پہلی ( یعنی ظہر کی ) اور عصر کی نماز کا درمیانی وقت ہے ، آپ مغرب کی نماز سورج کے غروب ہونے کے بعد ادا کرتے تھے ، اور عشاء کی نماز شفق غروب ہونے کے بعد ادا کرتے تھے ، صبح کی نماز آپ صبح صادق ہونے کے بعد ادا کر لیتے تھے ، جب بینائی کو دکھائی دینا شروع ہوتا ہے ، تو ان سب کے درمیان وقت ہے ( راوی کو شک ہے ، شاید یہ الفاظ ہیں : ) نماز ( کی جاتی ہے ۔
یہ روایت امام ابویعلیٰ نے اسی طرح کسی اضافے کے بغیر نقل کی ہے ، اور اس کی سند حسن ہے ۔

حضرت براء بن عازب رضی اللہ عنہ بیان کرتے ہیں : ایک شخص نبی اکرم ﷺ کی خدمت میں حاضر ہوا ، اور آپ سے نمازوں کے اوقات کے بارے میں دریافت کیا : تو نبی اکرم ﷺ نے حضرت بلال رضی اللہ عنہ کو حکم دیا ، انہوں نے تقدیم بھی کی اور تاخیر بھی کی ، تو نبی اکرم ﷺ نے ارشاد فرمایا : ان دونوں کے درمیان ( نماز کا مخصوص ) وقت ہے ۔
یہ روایت امام ابویعلیٰ نے نقل کی ہے ، اس کی سند میں ایک راوی خاتون حفصہ بنت عازب ہیں ، میں نے کسی کو اُن کا ذکر کرتے ہوئے نہیں پایا ہے ۔

سیدنا جابر بن عبداللہ رضی اللہ عنہما بیان کرتے ہیں : ایک شخص نے نبی اکرم صلی اللہ علیہ وسلم سے نماز کے وقت کے بارے میں دریافت کیا : جب سورج ڈھل گیا ، تو سیدنا بلال رضی اللہ عنہ نے ظہر کی اذان دی ، نبی اکرم صلی اللہ علیہ وسلم نے انہیں حکم دیا ، انہوں نے نماز کے لئے اقامت کہی ، تو نبی اکرم صلی اللہ علیہ وسلم نے نماز ادا کر لی ، پھر اُنہوں نے عصر کی نماز کے لئے اذان دی ، اس وقت جب ہم یہ گمان کر رہے تھے کہ آدمی کا سایہ اس سے زیادہ طویل ہو چکا ہے ، نبی اکرم صلی اللہ علیہ وسلم نے انہیں حکم دیا ، انہوں نے نماز کے لئے اقامت کہی ، تو نبی اکرم صلی اللہ علیہ وسلم نے نماز ادا کر لی پھر انہوں نے مغرب کی نماز کے لئے اس وقت اذان دی ، جب سورج غروب ہو گیا تھا ، نبی اکرم صلی اللہ علیہ وسلم نے انہیں حکم دیا انہوں نے نماز کے لئے اقامت کہی ، تو نبی اکرم صلی اللہ علیہ وسلم نے نماز ادا کر لی ، پھر انہوں نے عشاء کی نماز کے لئے اس وقت اذان دی ، جب دن کی سفیدی رخصت ہو گئی تھی ، ( راوی بیان کرتے ہیں : ) اس سے مراد شفق ہے ، پھر نبی اکرم صلی اللہ علیہ وسلم نے انہیں حکم دیا ، انہوں نے نماز کے لئے اقامت کہی ، تو نبی اکرم صلی اللہ علیہ وسلم نے نماز ادا کر لی ، پھر انہوں نے فجر کی نماز کے لئے اس وقت اذان دی ، جب صبح صادق ہوئی تھی نبی اکرم صلی اللہ علیہ وسلم نے انہیں حکم دیا ، انہوں نے نماز کے لئے اقامت کہی ، تو نبی اکرم صلی اللہ علیہ وسلم نے نماز ادا کر لی ، پھر اگلے دن سیدنا بلال رضی اللہ عنہ نے ظہر کی نماز کے لئے اس وقت اذان دی ، جب سورج ڈھل گیا تھا ، نبی اکرم صلی اللہ علیہ وسلم نے اس نماز کو مؤخر کیا ، یہاں تک کہ ہر چیز کا سایہ ایک مثل ہو گیا ، تو نبی اکرم صلی اللہ علیہ وسلم نے انہیں حکم دیا ، انہوں نے نماز کے لئے اقامت کہی ، تو نبی اکرم صلی اللہ علیہ وسلم نے نماز ادا کر لی ، پھر انہوں نے عصر کی نماز کے لئے اذان دی ، تو نبی اکرم صلی اللہ علیہ وسلم نے اس نماز کو مؤخر کیا ، یہاں تک کہ ہر چیز کا سایہ اس سے دو مثل ہو گیا تھا ، نبی اکرم صلی اللہ علیہ وسلم نے انہیں حکم دیا ، انہوں نے اقامت کہی تو نبی اکرم صلی اللہ علیہ وسلم نے نماز ادا کر لی ، پھر انہوں نے مغرب کی نماز کے لئے اس وقت اذان دی ، جب سورج غروب ہو گیا تھا ، نبی اکرم صلی اللہ علیہ وسلم نے اس نماز کو مؤخر کیا ، یہاں تک کہ قریب تھا کہ دن کی سفیدی یعنی شفق رخصت ہو جاتی ، جو ہمیں نظر آ رہا تھا ، پھر نبی اکرم صلی اللہ علیہ وسلم نے انہیں حکم دیا ، انہوں نے نماز کے لئے اقامت کہی ، تو نبی اکرم صلی اللہ علیہ وسلم نے نماز ادا کر لی ، پھر انہوں نے عشاء کی نماز کے لئے اس وقت اذان دی ، جب شفق غروب ہوئی تھی ، پھر ہم سو گئے ، پھر ہم بیدار ہوئے ایسا کئی مرتبہ ہوا ، یہاں تک کہ نبی اکرم صلی اللہ علیہ وسلم ہمارے پاس تشریف لائے ، اور آپ صلی اللہ علیہ وسلم نے ارشاد فرمایا : تمہارے علاوہ لوگوں میں سے کوئی بھی اس نماز کا انتظار نہیں کر رہا ہے ، اور تم لوگ جب سے نماز کا انتظار کر رہے ہو ، تم نماز کی حالت میں شمار ہو گے ، اگر مجھے اس بات کا اندیشہ نہ ہوتا کہ میں اپنی امت کو مشقت کا شکار کر دوں گا ، تو میں انہیں یہ نماز نصف رات ، یا نصف رات کے قریب تک مؤخر کر کے ادا کرنے کا حکم دیتا ( راوی بیان کرتے ہیں : ) پھر انہوں نے فجر کی نماز کے لئے اذان دی ، تو نبی اکرم صلی اللہ علیہ وسلم نے اسے مؤخر کیا ، یہاں تک کہ سورج طلوع ہونے کے قریب ہو گیا ، تو نبی اکرم صلی اللہ علیہ وسلم نے انہیں حکم دیا ، انہوں نے نماز کے لئے اقامت کہی تو نبی اکرم صلی اللہ علیہ وسلم نے نماز ادا کی ، پھر آپ صلی اللہ علیہ وسلم نے ارشاد فرمایا : ( نمازوں کا مخصوص ) وقت ان دو کے درمیان ہے ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا ابومسعود انصاری رضی اللہ عنہ ( راوی کو شک ہے ، شاید یہ الفاظ ہیں : ) سیدنا بشیر بن ابومسعود انصاری رضی اللہ عنہ ، یہ دونوں صحابی ہونے کا شرف حاصل رکھتے ہیں وہ بیان کرتے ہیں : سیدنا جبرائیل علیہ السلام نبی اکرم صلی اللہ علیہ وسلم کی خدمت میں حاضر ہوئے ، اُس وقت جب سورج ڈھل گیا تھا ، انہوں نے کہا: اے سیدنا محمد ! آپ ظہر کی نماز ادا کر لیں ، تو نبی اکرم صلی اللہ علیہ وسلم کھڑے ہوئے ، آپ صلی اللہ علیہ وسلم نے ظہر کی نماز ادا کر لی پھر سیدنا جبرائیل علیہ السلام آپ صلی اللہ علیہ وسلم کے پاس اس وقت آئے ، جب ہر چیز کا سایہ اس کی مثل ہو چکا تھا ، انہوں نے کہا: اے سیدنا محمد ! آپ عصر کی نماز ادا کر لیں ، نبی اکرم صلی اللہ علیہ وسلم کھڑے ہوئے اور آپ نے نماز ادا کر لی ، پھر سیدنا جبرائیل نبی اکرم صلی اللہ علیہ وسلم کے پاس اس وقت آئے جب سورج غروب ہو گیا تھا انہوں نے کہا: اے سیدنا محمد ! آپ مغرب کی نماز ادا کر لیں ، نبی اکرم صلی اللہ علیہ وسلم نے نماز ادا کر لی پھر وہ نبی اکرم صلی اللہ علیہ وسلم کے پاس اس وقت آئے جب شفق یعنی سرخی غروب ہو گئی تھی اور بولے : اے سیدنا محمد ! آپ اُٹھیں اور عشاء کی نماز ادا کر لیں ، نبی اکرم صلی اللہ علیہ وسلم اٹھے اور عشاء کی نماز ادا کر لی ، پھر وہ آپ کے اس وقت آئے جب صبح صادق ہوئی تھی ، انہوں نے کہا: اے سیدنا محمد ! آپ اٹھیں اور صبح کی نماز ادا کر لیں ۔ نبی اکرم صلی اللہ علیہ وسلم کھڑے ہوئے اور آپ نے نماز ادا کر لی ۔ پھر اگلے دن وہ نبی اکرم صلی اللہ علیہ وسلم کی خدمت میں حاضر ہوئے اس وقت جب ہر چیز کا سایہ ایک مثل ہو چکا تھا ، انہوں نے کہا: آے سیدنا محمد ! آپ انھیں اور ظہر کی نماز ادا کر لیں ۔ نبی اکرم صلی اللہ علیہ وسلم اٹھے اور آپ نے ظہر کی نماز کر لی پھر وہ آپ کے پاس اس وقت آئے جب ہر چیز کا سایہ دو مثل ہو گیا تھا انہوں نے کہا: اے سیدنا محمد ! آپ عصر کی نماز ادا کر لیں ، نبی اکرم صلی اللہ علیہ وسلم اٹھے اور آپ نے عصر کی نماز ادا کر لی ، پھر وہ آپ کے پاس اس وقت آئے جب سورج غروب ہو گیا تھا ، ( دونوں دنوں میں ) یہ ایک ہی وقت ہے ، انہوں نے کہا: اے سیدنا محمد ! آپ مغرب کی نماز ادا کر لیں ، نبی اکرم صلی اللہ علیہ وسلم اٹھے اور آپ نے مغرب کی نماز ادا کر لی ، پھر وہ آپ کے پاس اس وقت آئے ، جب رات کا کچھ حصہ گزر چکا تھا ، انہوں نے کہا: اے سیدنا محمد ! آپ اٹھیں اور عشاء کی نماز ادا کر لیں ، پھر وہ نبی اکرم صلی اللہ علیہ وسلم کے پاس اس وقت آئے جب صبح روشن ہو چکی تھی ، انہوں نے کہا: اے سیدنا محمد ! آپ صبح کی نماز ادا کر لیں ’ نبی اکرم صلی اللہ علیہ وسلم اٹھے اور آپ نے صبح کی نماز ادا کر لی ، پھر انہوں نے بتایا : ان دو کے درمیان ( نمازوں کا مخصوص ) وقت ہے ۔ ( علامہ ہیثمی فرماتے ہیں : ) ” صحیح “ میں اس کی اصل موجود ہے ، جس میں ابتدائی اور آخری وقت کا بیان نہیں ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ایوب بن عتبہ ہے ، جسے علی بن مدینی ، امام مسلم اور ایک جماعت نے ضعیف قرار دیا ہے ، جب کہ ایک روایت کے مطابق عمرو بن علی نے اسے ” ثقہ “ قرار دیا ہے ، ایک روایت کے مطابق یحیی بن معین نے بھی اسے ” ثقہ “ قرار دیا ہے ، جب کہ دیگر روایات کے مطابق انہوں نے اسے ضعیف قرار دیا ہے ، تاہم اکثر محدثین نے اسے ضعیف کہا: ہے ۔

مجاہد بیان کرتے ہیں : میں اپنے آقا سیدنا قیس بن سائب رضی اللہ عنہ کے سواری کے جانور کو لے کر چل رہا تھا ، انہوں نے دریافت کیا : سورج ڈھل گیا ہے ؟ جب میں نے جواب دیا : جی ہاں ! تو انہوں نے ظہر کی نماز ادا کر لی ، اور یہ بات بتائی : نبی اکرم صلی اللہ علیہ وسلم بھی اسی طرح کیا کرتے تھے ، نبی اکرم صلی اللہ علیہ وسلم عصر کی نماز اُس وقت ادا کرتے تھے جب سورج روشن اور چمکدار ہوتا تھا ، نبی اکرم صلی اللہ علیہ وسلم مغرب کی نماز اس وقت ادا کرتے تھے ، جب روزہ دار اس شبہ کا شکار ہوتا تھا کہ شاید اس کی افطاری کا وقت ہو گیا ہے ، اور نبی اکرم صلی اللہ علیہ وسلم صبح کی نماز اس وقت ادا کرتے تھے ، جب روشنی آسمان کو ڈھانپ لیتی تھی ۔ یہ روایت امام طبرانی نے معجم کبیر میں اسی طرح نقل کی ہے ، البتہ معجم اوسط میں انہوں نے یہ الفاظ زائد نقل کیے ہیں : ” آپ صلی اللہ علیہ وسلم عشاء کی نماز تاخیر سے ادا کرتے تھے “ ۔
اس روایت کی سند میں ایک راوی مسلم ملائی ہے ، جس سے شعبہ اور سفیان نے روایات نقل کی ہیں ، باقی لوگوں نے یعنی امام أحمد ، یحییٰ بن معین اور ایک جماعت نے اسے ضعیف قرار دیا ہے ۔

علقمہ بیان کرتے ہیں : ایک شخص نے سیدنا عبداللہ رضی اللہ عنہ سے ظہر کی نماز کے وقت کے بارے میں دریافت کیا : تو انہوں نے فرمایا : یہ کہ آدمی کا سایہ جب اس کے پاؤں میں ہو ، اُس وقت سے لے کر جب تک ہر چیز کا سایہ ایک مثل نہیں ہو جاتا ، اُس کے درمیان ( کا وقت ہے ) اُس شخص نے ان سے عصر کے وقت کے بارے میں دریافت کیا : تو انہوں نے فرمایا : تم یہ نماز اس وقت ادا کرنا ، جب سورج روشن اور چمکدار ہو ، اس شخص نے ان سے مغرب کے وقت کے بارے میں دریافت کیا : ، تو انہوں نے فرمایا : جب سورج غروب ہو جائے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابونعیم ضرار بن صرد ہے ، اور وہ ” ضعیف “ ہے ۔

قتادہ بیان کرتے ہیں : سیدنا عبداللہ بن مسعود رضی اللہ عنہ فرماتے ہیں : حج کے مخصوص وقت کی طرح ، ہر نماز کا مخصوص نام وقت ہے ۔
یہ روایت امام طبرانی نے معجم کبیر میں نقل کی ہے ، قتادہ نامی راوی نے سیدنا عبداللہ بن مسعود رضی اللہ عنہ سے سماع نہیں کیا ہے ، اس روایت کے رجال کی توثیق کی گئی ہے ۔