مجمع الزوائد ومنبع الفوائد

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص صبح کی نماز ادا کر لیتا ہے ، تو وہ اللہ کی پناہ میں ہوتا ہے ، تو تم اللہ تعالی کی پناہ کی خلاف ورزی نہ کرو ، کیونکہ جو شخص اللہ تعالیٰ کی پناہ کی خلاف ورزی کرے گا ، اللہ تعالیٰ اُس سے حساب لے گا ، یہاں تک کہ اللہ تعالیٰ اسے چہرے کے بل اوندھا کر دے گا“ ۔
یہ روایت امام أحمد ، امام بزار نے اور امام طبرانی نے معجم اوسط میں نقل کی ہے ، اس کی سند میں ایک راوی ابن لہیعہ ہے ، اور وہ ضعیف ہے ، بعض نے اس کی نقل کردہ حدیث کو حسن قرار دیا ہے ۔

امام طبرانی نے ، معجم کبیر اور معجم اوسط میں ، سیدنا عبداللہ بن عمر رضی اللہ عنہما کے بارے میں یہ بات نقل کی ہے : حجاج نے ، سالم بن عبداللہ کو ایک شخص کو قتل کرنے کا حکم دیا ، تو سالم نے اس شخص سے دریافت کیا : تم نے صبح کی نماز ادا کی ہے ؟ اس شخص نے جواب دیا : جی ہاں ! تو سالم نے کہا: تم چلے جاؤ ! حجاج نے ان سے دریافت کیا : تم نے اسے قتل کیوں نہیں کیا ؟ تو سالم نے بتایا : میرے والد ( یعنی سیدنا عبداللہ بن عمر رضی اللہ عنہما ) نے مجھے یہ حدیث بیان کی ہے کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص صبح کی نماز ادا کر لیتا ہے ، وہ دن بھر کے لئے اللہ کی پناہ میں ہوتا ہے “ ۔ تو سالم نے کہا: میں نے اس بات کو ناپسند کیا ، کہ میں ایک ایسے شخص کو قتل کر دوں ، جسے اللہ تعالی پناہ دے چکا ہو ، حجاج نے سیدنا عبداللہ بن عمر رضی اللہ عنہما سے دریافت کیا : کیا آپ نے نبی اکرم صلی اللہ علیہ وسلم کی زبانی یہ بات سنی ہے ؟ تو سیدنا عبداللہ بن عمر رضی اللہ عنہما نے جواب دیا : جی ہاں ! !
اس روایت کی سند میں ایک راوی یحیی بن عبدالحمید حمانی ہے ، جسے امام أحمد نے ضعیف قرار دیا ہے ، یحیی بن معین نے اسے ” ثقہ “ قرار دیا ہے ، اس روایت کی ایک اور سند بھی ہے ، جو اس سے زیادہ طویل ہے ، اور وہ فتنوں سے متعلق باب میں آگے آئے گی ۔

سیدنا انس رضی اللہ عنہ بیان کرتے ہیں : جب سیدنا عتبان بن مالک رضی اللہ عنہ کی بینائی کمزور ہو گئی ، تو انہوں نے نبی اکرم صلی اللہ علیہ وسلم کی خدمت میں پیغام بھیجا ، مجھے یہ بات پسند ہے کہ آپ میرے ہاں تشریف لائیں ، اور میرے گھر میں نماز ادا کریں ، اور میرے لئے برکت کی دعا کریں ، تو نبی اکرم صلی اللہ علیہ وسلم اپنے کچھ اصحاب سمیت تشریف لے گئے ، آپ ان کے ہاں گئے ، وہ لوگ آپس میں بات چیت کرتے رہے ، ان لوگوں نے مالک بن دخشم کا ذکر کیا ، تو ایک شخص بولا: یا رسول اللہ ! وہ منافقین کی پناہ گاہ اور ان کا ٹھکانہ ہے ، ان لوگوں کا اس کے ساتھ بڑا تعلق ہے تو نبی اکرم صلی اللہ علیہ وسلم سلام نے ارشاد فرمایا : کیا وہ نماز ادا نہیں کرتا ہے ؟ لوگوں نے عرض کی : جی ہاں ! یا رسول اللہ ! وہ ایسی نماز ادا کرتا ہے ، جس میں کوئی بھلائی نہیں ہے ، تو نبی اکرم صلی اللہ علیہ وسلم نے ارشاد فرمایا : مجھے نمازیوں کو قتل کرنے سے منع کیا گیا ہے ، یہ بات آپ صلی اللہ علیہ وسلم نے دو مرتبہ ارشاد فرمائی ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عامر بن یساف ہے ، اور وہ منکر الحدیث ہے ۔

سیدنا انس رضی اللہ عنہ بیان کرتے ہیں : سیدنا ابوبکر صدیق نے فرمایا : نبی اکرم صلی اللہ علیہ وسلم نے نمازیوں کو قتل کرنے سے منع کیا ہے ۔ ایک روایت میں یہ الفاظ ہیں : نمازیوں کو مارنے سے منع کیا ہے ۔
یہ روایت امام بزار اور امام ابویعلیٰ نے نقل کی ہے ، تاہم انہوں نے یہ الفاظ نقل کیے ہیں : ” مارنے سے “ اس روایت کی سند میں ایک راوی موسیٰ بن عبیدہ ہے ، اور وہ متروک ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص صبح کی نماز ادا کر لے ، اور پھر اس کی پناہ کو نقصان پہنچایا جائے ، تو اب اللہ تعالیٰ کی چراہ گاہ کو مباح قرار دیا گیا ہے ، اور اس کی پناہ کی خلاف ورزی کی گئی ، تو میں اُس کی پناہ کے حوالے سے حساب لوں گا“ ۔
یہ روایت امام ابویعلیٰ نے نقل کی ہے ، اس کی سند میں ایک راوی یزید رقاشی ہے ، اور وہ ضعیف ہے ، اسے ” ثقہ “ بھی قرار دیا گیا ہے ۔

سیدنا انس بن مالک رضی اللہ عنہ بیان کرتے ہیں ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : جو شخص صبح کی نماز ادا کر لیتا ہے ، وہ اللہ تعالیٰ کی پناہ میں ہوتا ہے ، تو تم لوگ اس چیز سے بچنے کی کوشش کرنا ، کہ اللہ تعالیٰ اپنی پناہ کے حوالے سے ، تم سے کسی بارے میں حساب لے “ ۔
یہ روایت امام ابویعلیٰ ، امام بزار اور امام طبرانی نے معجم اوسط میں نقل کی ہے ، اس کی سند میں ایک راوی صالح بن بشیر مری ہے ، اور وہ ” ضعیف “ ہے ۔

سیدنا ابوبکرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص صبح کی نماز با جماعت ادا کر لے ، وہ اللہ تعالیٰ کی پناہ میں ہوتا ہے ، اور جو شخص اللہ تعالیٰ کی پناہ کی خلاف ورزی کرتا ہے ، تو اللہ تعالیٰ اُسے اوندھا کر کے چہرے کے بل جہنم میں ڈالے گا “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح“ کے رجال ہیں ۔

سیدنا ابوبکرہ رضی اللہ عنہ کے حوالے سے ، معجم کبیر ہی میں ،
یہ روایت منقول ہے : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص صبح کی نماز ادا کر لے ، وہ اللہ تعالی کی پناہ میں ہوتا ہے ، تو اے آدم کی اولاد ! اللہ تعالیٰ اپنی پناہ کے حوالے سے ، تم سے حساب نہ لے “ اس کی سند میں کلام کی گنجائش ہے ۔

ابومالک اشجعی ، اپنے والد کے حوالے سے ، نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص صبح کی نماز ادا کر لیتا ہے ، وہ اللہ تعالی کی پناہ میں ہوتا ہے ، اور اس کا حساب اللہ تعالیٰ کے ذمہ ہے “ ۔
یہ روایت امام طبرانی نے معجم کبیر میں اور اوسط میں نقل کی ہے ، اس کی سند میں ایک راوی ہیثم بن یمان ہے ، جسے ازدی نے ضعیف قرار دیا ہے ، اس روایت کے بقیہ رجال ، صحیح کے رجال ہیں ۔

حارث ، جو سیدنا عثمان غنی رضی اللہ عنہ کے غلام ہیں ، وہ بیان کرتے ہیں : ایک دن سیدنا عثمان غنی رضی اللہ عنہ تشریف فرما تھے ، ہم بھی ان کے ہمراہ بیٹھے ہوئے تھے ، اس دوران مؤذن آیا ، تو سیدنا عثمان غنی رضی اللہ عنہ نے پانی کا برتن منگوایا ، راوی کہتے ہیں : میرا خیال ہے : اس برتن میں ایک ” مد “ پانی تھا ، انہوں نے وضو کیا ، پھر انہوں نے یہ بات بیان کی : میں نے نبی اکرم صلی اللہ علیہ وسلم کو اپنے اس وضو کی طرح ، وضو کرتے ہوئے دیکھا ، پھر آپ صلی اللہ علیہ وسلم نے ارشاد فرمایا : ” جو شخص میرے اس وضو کی طرح وضو کرے ، اور پھر کھڑا ہو کر ، ظہر کی نماز ادا کرے ، تو اس شخص کے صبح کی نماز سے لے کے ظہر تک کے ، درمیان کے گناہوں کی مغفرت ہو جاتی ہے ، پھر جب وہ عصر کی نماز ادا کر لے ، تو اس شخص کے ظہر سے لے کر عصر تک کے درمیانی گناہوں کی مغفرت ہو جاتی ہے ، پھر جب وہ مغرب کی نماز ادا کر لے ، تو اس کے عصر سے لے کر مغرب تک کے درمیانی گناہوں کی مغفرت ہو جاتی ہے ، پھر جب وہ عشاء کی نماز ادا کر لے ، تو اس کے مغرب سے لے کر عشاء تک کے درمیانی گناہوں کی مغفرت ہو جاتی ہے ، اور پھر وہ ایسی حالت میں رات بسر کرتا ہے کہ لوٹ پوٹ ہوتا ہے ، پھر اگر وہ کھڑا ہو کر وضو کر کے صبح کی نماز ادا کرتا ہے ، تو اس شخص کے عشاء کی نماز سے لے کر صبح تک کے درمیانی گناہوں کی مغفرت ہو جاتی ہے ، یہ وہ ” حسنات “ ( یعنی نیکیاں ) ہیں ، جو گناہوں کو ختم کر دیتی ہیں“ ۔ لوگوں نے عرض کی : اے سیدنا عثمان ! یہ ” حسنات “ ہیں ، تو ” باقیات “ سے کیا مراد ہو گی ؟ تو سیدنا عثمان رضی اللہ عنہ نے فرمایا : وہ یہ کلمات ہیں : ” اللہ تعالیٰ کے علاوہ اور کوئی معبود نہیں ہے ، اللہ تعالیٰ کی ذات ہر عیب سے پاک ہے ، ہر طرح کی حمد ، اللہ تعالیٰ کے لیے مخصوص ہے ، اللہ تعالیٰ سب سے بڑا ہے ، اللہ تعالیٰ کی مدد کے بغیر کچھ نہیں ہو سکتا “ ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا کچھ حصہ منقول ہے ۔
یہ روایت امام أحمد ، امام ابویعلیٰ اور امام بزار نے نقل کی ہے ، اور اس کے رجال ” صحیح “ کے رجال ہیں ، صرف حارث بن عبداللہ کا معاملہ مختلف ہے ، جو سیدنا عثمان غنی رضی اللہ عنہ کا غلام ہے ، ویسے وہ ” ثقہ “ ہے ۔

عامر بن سعد بن ابی وقاص بیان کرتے ہیں : میں نے سیدنا سعد رضی اللہ عنہ کو ، اور نبی اکرم صلی اللہ علیہ وسلم کے کچھ اصحاب کو یہ بیان کرتے ہوئے سنا ہے : نبی اکرم صلی اللہ علیہ وسلم کے زمانہ اقدس میں دو افراد تھے ، وہ دونوں بھائی تھے ، اُن میں سے ایک دوسرے سے فضیلت رکھتا تھا ، اس شخص کا انتقال ہو گیا ، جو فضیلت رکھتا تھا ، اس کے انتقال کے بعد اس کے دوسرے بھائی کو مزید کچھ زندگی نصیب ہوئی ، پھر اُس کا بھی انتقال ہو گیا ، نبی اکرم صلی اللہ علیہ وسلم کے سامنے پہلے بھائی کی دوسرے پر فضیلت کا ذکر کیا گیا ، تو نبی اکرم صلی اللہ علیہ وسلم نے ارشاد فرمایا : کیا وہ ( یعنی جو بھائی بعد میں فوت ہوا ہے ) وہ بعد میں نماز ادا نہیں کرتا تھا ؟ لوگوں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے ارشاد فرمایا : ” تمہیں کیا پتہ ؟ کہ اس کی نماز نے اسے کہاں تک پہنچا دیا ہے ؟ “ پھر اس وقت نبی اکرم صلی اللہ علیہ وسلم نے یہ بات ارشاد فرمائی : ” نماز کی مثال ، اس نہر کی مانند ہے ، جو کسی شخص کے دروازے کے پاس سے گزرتی ہے ، وہ میٹھے اور صاف پانی کی نہر ہوتی ہے ، وہ شخص اُس میں پانچ مرتبہ ڈبکی لگاتا ہے ، تو کیا تم یہ سمجھتے ہو کہ اس کا میل باقی رہ گیا ہو گا ؟ “ ۔
یہ روایت امام أحمد نے ، اور امام طبرانی نے معجم اوسط میں نقل کی ہے ، تاہم انہوں نے یہ الفاظ نقل کیے ہیں : ” اُس کے بعد ، دوسرے بھائی کو ، چالیس دن تک مزید زندگی ملی “ ۔ امام أحمد کے رجال ” صحیح“ کے رجال ہیں ۔

ابوعثمان بیان کرتے ہیں : میں ، سیدنا سلمان فارسی رضی اللہ عنہ کے ساتھ ، ایک درخت کے نیچے موجود تھا ، انہوں نے ایک خشک شاخ کو پکڑا ، اُسے ہلایا ، تو اس کے پتے گر گئے ، پھر انہوں نے فرمایا : اے ابوعثمان ! کیا تم مجھ سے دریافت نہیں کرو گے ؟ کہ میں نے ایسا کیوں کیا ہے ؟ انہوں نے بتایا : کہ ایک مرتبہ نبی اکرم صلی اللہ علیہ وسلم نے بھی ایسا ہی کیا تھا ، میں اُس وقت آپ صلی اللہ علیہ وسلم کے ساتھ ایک درخت کے نیچے موجود تھا ، آپ صلی اللہ علیہ وسلم نے ایک خشک شاخ پکڑی ، اُسے ہلایا ، یہاں تک کہ اُس کے پتے گر گئے ، تو آپ صلی اللہ علیہ وسلم نے ارشاد فرمایا : اے سلمان ! کیا تم مجھ سے یہ نہیں پوچھیں گے کہ میں نے ایسا کیوں کیا ہے ؟ میں نے عرض کی : آپ نے ایسا کیوں کیا ہے ؟ تو نبی اکرم صلی اللہ علیہ وسلم نے ارشاد فرمایا : ” جب کوئی مسلمان وضو کرتے ہوئے ، اچھی طرح وضو کرے اور پھر پانچ نمازیں ادا کرے ، تو اُس کے گناہ یوں گر جاتے ہیں جس طرح یہ پتے گر گئے ہیں “ ۔ پھر آپ صلی اللہ علیہ وسلم نے یہ آیت تلاوت کی : ” دن کے دونوں حصوں میں ، نماز قائم کرو ، اور رات کے کچھ حصے میں بھی ، بے شک نیکیاں ، برائیوں کو ختم کر دیتی ہیں ، اور یہ چیز نصیحت حاصل کرنے والوں کے لئے نصیحت ہے “ ۔
یہ روایت امام أحمد نے ، امام طبرانی نے معجم اوسط اور معجم کبیر میں نقل کی ہے ، امام أحمد کی سند میں ایک راوی علی بن زید ہے ، اس سے استدلال کرنے کے بارے میں اختلاف کیا گیا ہے ، اس روایت کے بقیہ رجال ” صحیح“ کے رجال ہیں ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” پانچ نمازوں کی مثال ، صاف پانی کی نہر کی مانند ہے ، جو کسی شخص کے دروازے سے گزرتی ہے ، اور وہ روزانہ اس میں پانچ مرتبہ غسل کرتا ہے ، تو اس پر کوئی میل باقی نہیں رہ جاتا “ ۔
یہ روایت امام ابویعلیٰ اور امام بزار نے نقل کی ہے ، اس کی سند میں ایک راوی داؤد بن زبرقان ہے ، اور وہ ” ضعیف“ ہے ۔

سیدنا ابوایوب انصاری رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک ہر نماز اپنے سے پہلے کے گناہوں کو ختم کر دیتی ہے “ ۔
یہ روایت امام أحمد نے نقل کی ہے ، اور اس کی سند حسن ہے ۔

ابورصافہ ، جن کا تعلق اہل شام سے ہے ، اور وہ باہلہ قبیلے سے تعلق رکھنے والے ایک دیہاتی ہیں ، انہوں نے سیدنا ابوامامہ رضی اللہ عنہ کے حوالے سے نبی اکرم صلی اللہ علیہ وسلم کا یہ فرمان نقل کیا ہے : ” جس بھی مسلمان شخص کے سامنے فرض نماز کا وقت آ جائے ، اور وہ اُٹھ کر وضو کرے اور وہ اچھی طرح وضو کرے ، اور نماز ادا کرے تو اچھی طرح نماز ادا کرے ، اُس شخص کے اس نماز اور اس سے پہلے والی نماز کے درمیان کے گناہوں کی مغفرت ہو جاتی ہے “ ۔
یہ روایت امام أحمد نے اور امام طبرانی نے معجم اوسط میں نقل کی ہے ، ابورصافہ نامی راوی کے بارے میں ، میں نے کوئی جرح یا کوئی تعدیل نہیں دیکھی ہے ۔

سیدنا ابوسعید خدری رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” پانچ نمازیں ، اپنے درمیان کے گناہوں کا کفارہ بن جاتی ہیں ، پھر نبی اکرم صلی اللہ علیہ وسلم نے ارشاد فرمایا : اس بارے میں تمہارا کیا خیال ہے ؟ کہ اگر کوئی شخص کام پر جاتا ہو ، اور اس کی رہائش گاہ اور کام کی جگہ کے درمیان پانچ نہریں آتی ہوں ، جب وہ اپنے کام کی جگہ پر آئے ، تو جو اللہ کو منظور ہو ، وہ کام کر لے ، تو اُسے میل لگ جائے اور پسینہ آ جائے ، پھر وہ جس بھی نہر کے پاس سے گزرے تو وہ غسل کر لے ، تو کیا اُس کا کوئی میل باقی رہے گا ؟ نمازوں کی مثال بھی اسی طرح ہے ، جب بھی انسان خطا کرتا ہے ، تو پھر دعا کرتا ہے ، اور مغفرت طلب کرتا ہے ، تو اُس کے پہلے والے گناہوں کی مغفرت ہو جاتی ہے “ ۔
یہ روایت امام بزار نے ، امام طبرانی نے معجم اوسط اور معجم کبیر میں نقل کی ہے ، انہوں نے اس میں یہ الفاظ زائد نقل کیے ہیں : ” پھر وہ نماز ادا کرتا ہے ، اور مغفرت طلب کرتا ہے ، تو اللہ تعالیٰ اس کے پہلے والے گناہوں کی مغفرت کر دیتا ہے “ ۔ اس روایت کی سند میں ایک راوی عبداللہ بن قریظ ہے ، جس کا ذکر ابن حبان نے کتاب ” الثقات “ میں کیا ہے ، اور اس روایت کے رجال ” صحیح“ کے رجال ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” یہ پانچ نمازیں حق ہیں ، اور ( ان کے ) درمیان کیے جانے والے گناہوں کا کفارہ ہیں ، جب کہ کبیرہ گناہوں سے اجتناب کیا گیا ہو “ ۔
یہ روایت امام بزار نے ، اور امام طبرانی نے معجم کبیر میں نقل کی ہے ، اس کی سند میں ایک راوی صالح بن موسیٰ ہے ، اور وہ منکر الحدیث ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” پانچ نمازیں ، اور ایک جمعہ دوسرے جمعے تک ، یہ درمیان میں ہونے والے گناہوں کا کفارہ بن جاتے ہیں ، جب کہ کبیرہ گناہوں سے اجتناب کیا گیا ہو ، نبی اکرم صلی اللہ علیہ وسلم نے یہ بات بھی ارشاد فرمائی ہے : جمعہ میں ایک گھڑی ایسی ہوتی ہے ، جس میں کوئی مسلمان مرد ، یا مسلمان عورت ، اللہ تعالیٰ سے جو بھی بھلائی مانگتا ہے ، اللہ تعالیٰ وہ ( بھلائی ) اُسے عطا کر دیتا ہے “ ۔ راوی بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” پانچ نمازوں کی مثال ، صاف پانی کی اس نہر کی مانند ہے ، جو کسی شخص کے دروازے کے پاس موجود ہو ، اور وہ شخص روزانہ اس میں پانچ مرتبہ غسل کرے ، تو کیا اس کا میل باقی رہ جائے گا ؟ “ ۔
یہ روایت امام بزار نے نقل کی ہے ، اس کی سند میں ایک راوی زائدہ بن ابورفاد ہے ، اور وہ ” ضعیف“ ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تم جل جاتے ہو ، تم جل جاتے ہو ، جب تم صبح کی نماز ادا کر لیتے ہو ، تو وہ اُسے دھو دیتی ہے ، پھر تم جل جاتے ہو ، تم جل جاتے ہو ، جب تم ظہر کی نماز ادا کر لیتے ہو ، تو وہ اُسے دھو دیتی ہے ، پھر تم جل جاتے ہو ، تم جل جاتے ہو ، جب تم عصر کی نماز ادا کرتے ہو ، تو وہ اسے دھو دیتی ہے ، پھر تم جل جاتے ہو ، جل جاتے ہو ، جب تم مغرب کی نماز ادا کرتے ہو ، تو وہ اُسے دھو دیتی ہے ، پھر تم جل جاتے ہو ، جل جاتے ہو جب تم عشاء کی نماز ادا کرتے ہو ، تو وہ اسے دھو دیتی ہے پھر تم سو جاتے ہو ، تو تمہارے خلاف کوئی بات نوٹ نہیں کی جاتی ، جب تک تم بیدار نہیں ہو جاتے “ ۔
یہ روایت امام طبرانی نے تینوں کتابوں میں نقل کی ہے ، تاہم معجم کبیر میں یہ روایت ” موقوف “ روایت کے طور پر منقول ہے ، اور ” موقوف “ روایت کے رجال ” صحیح“ کے رجال ہیں ، ” مرفوع “ کے رجال میں ، ایک راوی عاصم بن بہدلہ ہے ، اور اس کی نقل کردہ حدیث حسن ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ کا ایک فرشتہ ہے ، جو ہر نماز کے وقت یہ اعلان کرتا ہے : اے بنی آدم ! اپنی آگ کی طرف اُٹھ کر جاؤ ! جسے تم نے اپنی ذات کے خلاف جلایا ہے ، اور اسے بجھا دو ! “ ۔ یہ روایت امام طبرانی نے معجم اوسط اور معجم صغیر میں نقل کی ہے ، انہوں نے یہ بات بیان کی ہے : یحیی بن زہیر قرشی اسے نقل کرنے میں منفرد ہے ، میں یہ کہتا ہوں : میں نے کسی کو اس کا ذکر کرتے ہوئے نہیں پایا ہے ، البتہ اس نے ازہر بن سعد سمان سے روایت نقل کی ہے ، جب کہ اس سے یعقوب بن اسحاق مخرمی نے روایات نقل کی ہیں ،
اس روایت کے بقیہ رجال ” صحیح“ کے رجال ہیں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ہر نماز کے وقت ایک منادی کو بھیجا جاتا ہے ، جو یہ کہتا ہے : اے اولاد آدم ! تم اُٹھو ! اور اپنے خلاف تم نے جو کچھ جلایا ہے ، اسے بجھا دو ! لوگ اٹھتے ہیں طہارت حاصل کرتے ہیں ، تو ان کی آنکھوں سے ان کے گناہ گر جاتے ہیں ، وہ لوگ نماز ادا کرتے ہیں ، تو ان کے دو نمازوں کے درمیان کے گناہوں کی مغفرت ہو جاتی ہے ، پھر وہ اگلی نماز تک کے درمیان کے عرصے میں آگ جلاتے ہیں ، جب اگلی نماز کا وقت ہوتا ہے ، تو فرشتہ پکار کر کہتا ہے : اے اولاد آدم ! اُٹھو اور اس چیز کو بجھا دو ! جو تم نے اپنی ذات کے خلاف بجھائی ہے ، وہ اٹھتے ہیں طہارت حاصل کرتے ہیں ، نماز ادا کرتے ہیں ، تو ان کے دونوں نمازوں کے درمیان کے گناہوں کی مغفرت ہو جاتی ہے ، جب عصر کی نماز کا وقت ہوتا ہے ، تو ایسا ہی ہوتا ہے ، جب مغرب کی نماز کا وقت ہوتا ہے ، تو ایسا ہی ہوتا ہے ، جب عشاء کی نماز کا وقت ہوتا ہے ، تو بھی ایسا ہی ہوتا ہے ، پھر جب وہ لوگ سوتے ہیں ، تو ان کی مغفرت ہو چکی ہوتی ہے ، پھر نبی اکرم صلی اللہ علیہ وسلم نے یہ بات ارشاد فرمائی : ” تو کوئی بھلائی کے عالم میں رات کرتا ہے ، اور کوئی برائی کے عالم میں رات کرتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابان بن ابوعیاش ہے ، جسے ایوب اور سلم علوی نے ” ثقہ “ قرار دیا ہے ، جب کہ شعبہ ، امام أحمد ، یحیی بن معین اور ابوحاتم نے اسے ضعیف قرار دیا ہے ۔

سیدنا عبداللہ بن مسعود رضی اللہ عنہ فرماتے ہیں : ” بے شک نمازیں ہی نیکیاں ہیں ، اور پہلی نماز ( یعنی ظہر کی نماز سے لے کر عصر کی نماز کے درمیان کا کفارہ عصر کی نماز بن جاتی ہے ، عصر کی نماز سے لے کر مغرب کی نماز کے درمیان کے گناہوں کا کفارہ مغرب کی نماز بن جاتی ہے ، مغرب سے لے کر عشاء تک کے درمیان کے گناہوں کا کفارہ عشاء کی نماز بن جاتی ہے ، پھر مسلمان بستر پر آتا ہے ، تو اس کا کوئی گناہ نہیں ہوتا ، یہ اس وقت ہوتا ہے ، جب کبیرہ گناہوں سے اجتناب کیا گیا ہو ، پھر انہوں نے یہ آیت تلاوت کی : ” ” بے شک نیکیاں ، گناہوں کو ختم کر دیتی ہیں “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ضرار بن صرد ہے ، اور وہ متروک ہے ۔

سیدنا ابومالک اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” نمازیں درمیان میں کیے جانے والے گناہوں کا کفارہ بن جاتی ہیں ، اللہ تعالیٰ نے ارشاد فرمایا ہے : ” بے شک نیکیاں ، گناہوں کو ختم کر دیتی ہیں“ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن اسماعیل بن عیاش ہے ، امام ابوحاتم بیان کرتے ہیں : اس نے اپنے والد سے کوئی چیز نہیں سنی ہے ۔ میں یہ کہتا ہوں : یہ روایت اس نے اپنے والد سے نقل کی ہے ، اس روایت کے بقیہ رجال کی توثیق کی گئی ہے ۔

طارق بن شہاب بیان کرتے ہیں : ایک مرتبہ وہ رات کے وقت سیدنا سلمان فارسی رضی اللہ عنہ کے ہاں ٹھہرے ، تاکہ اُن کی رات کی عبادت کا جائزہ لیں ، راوی بیان کرتے ہیں : وہ رات کے آخری حصے میں اُٹھ کر نماز ادا کرنے لگے ، تو یہ چیز ان کی توقع کے برخلاف تھی ، تو انہوں نے سیدنا سلمان فارسی رضی اللہ عنہ کے سامنے اس بات کا تذکرہ کیا ، تو سیدنا سلمان فارسی رضی اللہ عنہ نے فرمایا : تم لوگ ان پانچ نمازوں کی حفاظت کرو ! کیونکہ یہ ان زخموں ( یعنی گناہوں ) کا کفارہ بن جاتی ہیں ، جب کہ قتل کا ارتکاب نہ کیا گیا ہو ، جب لوگ عشاء کی نماز ادا کر لیتے ہیں ، تو وہ تین حیثیتوں میں واپس آتے ہیں ، ان میں سے کچھ لوگ وہ ہوتے ہیں ، جن کے ذمہ کچھ ہوتا ہے ، اور ان کے حق میں کچھ نہیں ہوتا ، کچھ وہ ہوتے ہیں جن کے حق میں کچھ ہوتا ہے ، اور ان کے خلاف کچھ نہیں ہوتا ، اور کچھ وہ ہوتے ہیں ، جن کے حق میں کچھ نہیں ہوتا ، اور جن کے خلاف بھی کچھ نہیں ہوتا ، تو جو شخص رات کی تاریکیوں اور لوگوں کی غفلت کو غنیمت شمار کرے گا ، وہ گناہوں کے بارے میں اپنے گھوڑے پر سوار ہو جائے گا ، یہ وہ شخص ہے ، جس کے خلاف کچھ ہوتا ہے ، اس کے حق میں کچھ نہیں ہوتا ، اور جس شخص کے حق میں کچھ ہوتا ہے ، اور اس کے خلاف کچھ نہیں ہوتا ، وہ ایک ایسا شخص ہے ، جو رات کی تاریکی اور لوگوں کی غفلت کو غنیمت شمار کرتا ہے ، اور اٹھ کر نماز ادا کرتا ہے ، تو یہ وہ شخص جس کے حق میں کچھ ہوتا ہے ، اور اس کے خلاف کچھ نہیں ہوتا ، اور کچھ ایسے لوگ ہیں کہ جن کے حق میں کچھ نہیں ہوتا اور ان کے خلاف بھی کچھ نہیں ہوتا ، تو یہ وہ شخص ہے ، جو نماز ادا کر کے سو جاتا ہے ، تو یہ وہ شخص ہے کہ جس کے حق میں کچھ نہیں ہوتا اور اس کے خلاف بھی کچھ نہیں ہوتا ، تو تم انتہاء پسندی سے بچنے کی کوشش کرو ! اور میانہ روی اور باقاعدگی کو اختیار کرو !
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا ابوامامہ باہلی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” فرض نماز ، اُس سے پہلے کی دوسری نماز کے درمیان کے گناہوں کا کفارہ بن جاتی ہے ، اور جمعہ اُس سے پہلے والے جمعہ کے درمیان کے گناہوں کا کفارہ بن جاتا ہے ، اور رمضان کا مہینہ اُس سے پہلے والے رمضان کے مہینے تک کے گناہوں کا کفارہ بن جاتا ہے ، اور حج اس سے پہلے والے حج کے درمیان کے گناہوں کا کفارہ بن جاتا ہے “ ۔ پھر نبی اکرم صلی اللہ علیہ وسلم نے یہ بات ارشاد فرمائی : کسی مسلمان عورت کے لئے یہ بات جائز نہیں ہے کہ وہ حج کے لئے جائے ، البتہ اگر اُس کا شوہر ، یا کوئی محرم عزیز ساتھ ہو ، تو حکم مختلف ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی مفضل بن صدقہ ہے ، اور وہ متروک الحدیث ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” پانچ نمازوں کی مثال ، صاف پانی کی اس نہر کی طرح ہے ، جو کسی شخص کے دروازے کے پاس بہتی ہے ، اور وہ شخص روزانہ اس میں پانچ مرتبہ غسل کرتا ہے ، تو کیا اس کا میل باقی رہ جائے گا ؟ “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عفیر بن معدان ہے ، اور وہ انتہائی ” ضعیف“ ہے ۔

ابومسلم بیان کرتے ہیں : میں سیدنا ابوامامہ باہلی رضی اللہ عنہ کی خدمت میں حاضر ہوا ، وہ اس وقت مسجد میں جوئیں نکال رہے تھے ، اور جوؤں کو کنکریوں میں دفن کر رہے تھے ، میں نے کہا: اے سیدنا ابوامامہ ! ایک شخص نے مجھے آپ کے حوالے سے یہ حدیث بیان کی ہے کہ آپ نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص وضو کرتے ہوئے اچھی طرح وضو کرے ، اور اپنے دونوں ہاتھوں اور چہرے کو دھو لے ، اور اپنے سر اور اپنے کانوں کا مسح کر لے ، اور پھر اُٹھ کر فرض نماز ادا کرے ، تو اللہ تعالیٰ اس شخص کے ، اُس دن کے ان گناہوں کی مغفرت کر دیتا ہے ، جس کی طرف اس کے پاؤں چل کر گئے ہوں ، یا جنہیں اُس کے ہاتھوں نے پکڑا ہو ، یا جس کو اُس کے کانوں نے سنا ہو ، یا جس کی طرف اُس کی آنکھوں نے دیکھا ہو ، یا جو اُس نے اپنے من میں بُرا سوچا ہو “ ۔ تو سیدنا ابوامامہ رضی اللہ عنہ نے فرمایا : اللہ کی قسم ! میں نے نبی اکرم صلی اللہ علیہ وسلم کی زبانی یہ بات کئی مرتبہ سنی ہے ۔
یہ روایت امام طبرانی نے معجم کبیر میں ابومسلم ثعلبی کی اُن سے نقل کردہ روایت کے طور پر نقل کی ہے اور میں نے کسی کو اس راوی کا ذکر کرتے ہوئے نہیں دیکھا ہے ، اس روایت کے بقیہ رجال کی توثیق کی گئی ہے ۔

سیدنا ابوبکرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” پانچ نمازیں ، ایک جمعہ ، دوسرے جمعہ تک ، اُن کے درمیان میں ہونے والے گناہوں کا کفارہ بن جاتے ہیں ، جب کہ کبیرہ گناہوں سے اجتناب کیا گیا ہو “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی خلیل بن ذکریا ہے ، اور وہ متروک اور کذاب ہے ۔

سیدنا سلمان فارسی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مسلمان جب نماز ادا کرتا ہے ، تو اس کے گناہ اُس کے سر پر رکھ دیے جاتے ہیں ، جب بھی وہ سجدے میں جاتا ہے ، تو وہ اس سے گر جاتے ہیں ، جب وہ نماز پڑھ کر فارغ ہوتا ہے ، تو اس کے گناہ اس سے گر چکے ہوتے ہیں“ ۔
یہ روایت امام طبرانی نے معجم کبیر میں اور معجم صغیر میں ، جب کہ امام بزار نے بھی نقل ہے ، اس کی سند میں ایک راوی اشعث بن اشعث سعدانی ہے ، میں نے کسی کو اس کے حالات بیان کرتے ہوئے نہیں پایا ہے ۔

سیدنا سلمان فارسی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مومن بندہ ، جب نماز ادا کرنے کے لئے اُٹھتا ہے ، تو اس کے گناہ اُس کے سر پر رکھ دیے جاتے ہیں ، اور پھر وہ گناہ اس سے یوں الگ ہو جاتے ہیں ، جس طرح درخت کی شاخیں دائیں بائیں ہو جاتی ہیں “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابان بن ابوعیاش ہے ، جسے شعبہ ، امام أحمد اور دیگر حضرات نے ضعیف قرار دیا ہے ، مسلم علوی اور دیگر حضرات نے اُسے ” ثقہ “ قرار دیا ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” بندہ جب نماز ادا کرنے کے لئے کھڑا ہوتا ہے ، تو اُس کے گناہ اکھٹے کر کے اُس کی گردن پر رکھ دیے جاتے ہیں ، اور جب وہ رکوع میں جاتا ہے ، تو وہ ( گناہ ) گر جاتے ہیں “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی مروان بن سالم ہے ، اور وہ انتہائی ” ضعیف “ ہے ۔

سیدنا حذیفہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بندہ کسی بھی حالت میں ، اللہ تعالیٰ کے نزدیک اُس سے زیادہ محبوب نہیں ہوتا کہ اللہ تعالیٰ اس بندے کو سجدے کی حالت میں دیکھے ، کہ اُس نے اپنی پیشانی مٹی میں رکھی ہوئی ہو “ ۔
یہ روایت امام طبرانی نے معجم اوسط میں ، عثمان بن قاسم کے حوالے سے ، اُن کے والد سے نقل کی ہے ، اور یہ بات بیان کی ہے : عثمان نامی راوی اسے نقل کرنے میں منفرد ہے ۔ ( علامہ ہیثمی فرماتے ہیں : ) میں یہ کہتا ہوں : عثمان بن قاسم نامی راوی کا تذکرہ امام ابن حبان رحمہ اللہ نے کتاب ” الثقات “ میں کیا ہے ، اور اس کے نسب میں اس کے باپ سے اوپر کا تذکرہ نہیں کیا ، تو میں اس سے واقف نہیں ہوں ۔

حارث نے ، سیدنا علی رضی اللہ عنہ کا یہ بیان نقل کیا ہے : ” ہم مسجد میں نبی اکرم صلی اللہ علیہ وسلم کے ساتھ موجود تھے ، اور نماز کا انتظار کر رہے تھے ، ایک شخص کھڑا ہوا اور بولا: میں نے گناہ کا ارتکاب کیا ہے ، نبی اکرم صلی اللہ علیہ وسلم نے اُس سے منہ موڑ لیا ، جب نبی اکرم صلی اللہ علیہ وسلم نے نماز مکمل کی ، تو وہ شخص کھڑا ہو گیا اور اس نے اپنی بات دہرائی ، تو نبی اکرم صلی اللہ علیہ وسلم نے دریافت کیا : کیا تم نے ہمارے ساتھ یہ نماز ادا نہیں کی ہے ؟ اور کیا تم نے اس کے لئے اچھی طرح وضو نہیں کیا تھا ؟ اُس نے جواب دیا : جی ہاں ! تو نبی اکرم صلی اللہ علیہ وسلم نے فرمایا : یہ تمہارے گناہ کا کفارہ ہے “ ۔
یہ روایت امام طبرانی نے معجم صغیر اور معجم اوسط میں نقل کی ہے ، حارث نامی راوی ” ضعیف“ ہے ۔

یوسف بن عبداللہ بن سلام بیان کرتے ہیں : میں شام میں ، سیدنا ابودرداء رضی اللہ عنہ کی خدمت میں حاضر ہوا ، انہوں نے دریافت کیا : اے میرے بیٹے ! تم اس شہر میں کس سلسلے میں آئے ہو ؟ اور یہاں آنے کے حوالے سے تمہارا مقصد کیا ہے ؟ تو یوسف نے جواب دیا : میں صرف اس لئے آیا ہوں ، تاکہ اُس تعلق کا خیال رکھوں ، جو آپ کے اور میرے والد کے درمیان تھا ، تو سیدنا ابودرداء رضی اللہ عنہ نے میرا ہاتھ پکڑا ، اور مجھے اپنے سامنے بٹھا لیا اور بولے : وہ گھڑی بری ہو ، جس میں نبی اکرم صلی اللہ علیہ وسلم کی طرف کوئی جھوٹی بات منسوب کئی گئی ہو ، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : جو بھی مسلمان کسی گناہ کا ارتکاب کرتا ہے اور پھر وضو کر کے دو رکعات یا چار رکعات ادا کر لیتا ہے خواہ وہ ( دو یا چار رکعات ) فرض ہوں ، یا فرض نہ ہوں ، اور پھر وہ ( مسلمان ) اللہ تعالیٰ سے مغفرت طلب کرتا ہے ، تو اللہ تعالیٰ اُس کی مغفرت کر دیتا ہے “ ۔
یہ روایت امام طبرانی نے معجم اوسط میں نقل کی ہے ، وہ فرماتے ہیں : صدقہ بن ابوسہل نامی راوی اسے روایت کرنے میں منفرد ہے ، میں یہ کہتا ہوں : میں نے کسی کو اُس کا ذکر کرتے ہوئے نہیں دیکھا ہے ۔

سیدنا عبداللہ بن عمرو رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اور آپ صلی اللہ علیہ وسلم سے سب سے زیادہ فضیلت والے عمل کے بارے میں دریافت کیا : تو نبی اکرم صلی اللہ علیہ وسلم نے ارشاد فرمایا : نماز ، اُس نے دریافت کیا : پھر کون سا ہے ؟ آپ صلی اللہ علیہ وسلم نے فرمایا : نماز ، تین مرتبہ آپ صلی اللہ علیہ وسلم نے نماز فرمایا ، پھر جب اُس نے دوبارہ یہی سوال کیا ، تو نبی اکرم صلی اللہ علیہ وسلم نے اُس سے فرمایا : اللہ تعالیٰ کی راہ میں جہاد کرنا ، اُس شخص نے کہا: میرے والدین موجود ہیں ، نبی اکرم صلی اللہ علیہ وسلم نے ارشاد فرمایا : میں تمہیں والدین کے ساتھ بھلائی کا حکم دیتا ہوں ، اُس شخص نے کہا: اس ذات کی قسم ! جس نے آپ کو حق کے ہمراہ نبی بنا کر مبعوث کیا ہے ، میں جہاد میں ضرور حصہ لوں گا ، اور اُن دونوں کو چھوڑ کر چلا جاؤں گا ، تو نبی اکرم صلی اللہ علیہ وسلم نے ارشاد فرمایا : تم زیادہ بہتر جانتے ہو ۔
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے ، اور وہ ضعیف ہے ، امام ترمذی نے اس کے حوالے سے منقول روایت کو حسن قرار دیا ہے ، اس روایت کے بقیہ رجال ” صحیح “ کے رجال ہیں ۔ ( علامہ ہیثمی فرماتے ہیں : ) نماز کی فضیلت کے بارے میں احادیث ” نفل نماز کی فضیلت “ سے متعلق باب میں بھی آئیں گی ، اگر اللہ نے چاہا ۔