مجمع الزوائد ومنبع الفوائد

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اگر کتے ایک باقاعدہ قسم کی مخلوق نہ ہوتے ، تو میں اُنہیں مار دینے کا حکم دیتا ، البتہ تم اُن میں سے کالے سیاہ کتے کو مار دو ، جو شخص شکار کے علاوہ ، یا کھیت ، یا بکریوں کی حفاظت کے علاوہ ، کتا پالتا ہے ، تو روزانہ اُس کی طرف احد پہاڑ جتنا گناہ کا قیراط آ جاتا ہے اور جب کتا کسی کے برتن میں منہ ڈال دے ، تو آدمی اُسے سات مرتبہ دھوئے ، جن میں سے ایک مرتبہ مٹی کے ذریعے صاف کرے “ ۔
یہ روایت امام طبرانی نے ” معجم اوسط “ میں ، جارود کے حوالے سے ، اسرائیل سے نقل کی ہے ، جارود نامی شخص سے میں واقف نہیں ہوں ۔

سیدنا ابوہریرہ رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم انصار کے ایک محلے میں تشریف لائے ، جس سے پہلے ایک اور محلہ بھی تھا وہاں کے لوگوں کو یہ بات گراں گزری ، اُنہوں نے عرض کی : یا رسول اللہ ! آپ فلاں محلے میں تشریف لائے ہیں ، اور ہمارے محلے میں تشریف نہیں لائے ، نبی اکرم صلی اللہ علیہ وسلم نے ارشاد فرمایا : اس کی وجہ یہ ہے کہ تمہارے محلے میں کتا تھا ، لوگوں نے عرض کی : تو اُن کے محلے میں بلی ہے ، نبی اکرم صلی اللہ علیہ وسلم نے ارشاد فرمایا : بلی ، ایک درندہ ہے ۔
یہ روایت امام أحمد نے نقل کی ہے ، اس کی سند میں ایک راوی عیسیٰ بن مسیب ہے اور وہ ضعیف ہے ، بلی کے بچائے ہوئے ( یعنی جوٹھے ) پانی کے ذریعے وضو کرنے سے متعلق حدیث پہلے گزر چکی ہے ۔

سیدنا عبداللہ بن عباس رضی اللہ عنہما بیان کرتے ہیں : نبی کریم صلی اللہ علیہ وسلم نے ارشاد فرمایا : ” جب کتا کسی برتن میں منہ ڈال دے ، تو اُسے سات مرتبہ دھویا جائے گا “ ۔
یہ روایت امام طبرانی نے نقل کی ہے ، امام بزار نے اس کی مانند روایت نقل کی ہے ، اس کی سند میں ایک راوی ابراہیم بن اسماعیل بن ابوحبیبہ ہے ، جسے امام أحمد نے ” ثقہ “ قرار دیا ہے اور اس سے استدلال کرنے کے بارے میں اختلاف کیا گیا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب کتا کسی شخص کے برتن میں منہ ڈال دے ، تو آدمی کو اس برتن کو سات مرتبہ دھونا چاہیے “ ۔ راوی کہتے ہیں : میرا خیال ہے : روایت میں یہ الفاظ بھی ہیں : ” جن میں سے ایک مرتبہ مٹی کے ذریعے صاف کیا جائے “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں منقول ہے ، تاہم اس میں یہ الفاظ نہیں ہیں ۔ ” جن میں سے ایک مرتبہ ۔ ۔ ۔ ۔ ۔ ۔ ۔ ۔ “
یہ روایت امام بزار نے نقل کی ہے ، امام بزار کے استاد کے علاوہ ، اس کے تمام رجال ” صحیح “ کے رجال ہیں ۔