مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ تمہیں برہنہ ہونے سے منع کرتا ہے ، تم لوگ اللہ تعالیٰ کے ان فرشتوں سے حیاء کرو ، جو تم سے جدا نہیں ہوتے ہیں ، صرف تین صورتوں میں جدا ہوتے ہیں ، پاخانہ کے وقت ، جنابت کی حالت میں ، اور غسل کے وقت ، جب کوئی شخص کھلی جگہ پر غسل کرنے لگے ، تو اسے کپڑے کے ذریعے پردہ کر لینا چاہیے ، یا دیوار کی ، یا اپنے اونٹ کی اوٹ میں ہو جانا چاہیے ۔
یہ روایت امام بزار نے نقل کی ہے ، وہ فرماتے ہیں : سیدنا عبداللہ بن عباس رضی اللہ عنہما کے حوالے سے ، یہ صرف اسی سند کے ساتھ منقول ہے ، جعفر بن سلیمان نامی راوی کمزور ہے ۔ ( علامہ ہیثمی فرماتے ہیں : ) میں یہ کہتا ہوں : جعفر بن سلیمان ” صحیح “ کے رجال میں سے ایک ہے ، اس روایت کے بقیہ رجال کا بھی یہی معاملہ ہے ، باقی اللہ بہتر جانتا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” آدمی چار صورتوں میں عاری ( یعنی فرشتوں سے الگ ہو جاتا ہے ) جب وہ چیت لیٹ کر سو جائے ، جب وہ اکیلا ہو جائے ، جب وہ معصفر لحاف میں سو جائے ، یا جب وہ کھلی جگہ پر غسل کرے ، جو شخص استطاعت رکھتا ہو ، وہ کھلی جگہ پر غسل نہ کرے ، اگر اس نے ضرور ایسا کرنا ہو ، تو وہ زمین پر لکیر لگا لے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی مروان بن سالم ہے اور وہ منکر الحدیث ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کے بارے میں یہ بات نقل کرتے ہیں : آپ صلی اللہ علیہ وسلم نے سیدنا علی رضی اللہ عنہ کو حکم دیا ، تو انہوں نے آپ کے لئے غسل کا پانی رکھا ، پھر آپ صلی اللہ علیہ وسلم نے انہیں کپڑا دیا اور فرمایا : اس کے ذریعے میرے لیے پردہ کر دو ، اور اپنی پیٹھ میری طرف کر لو ۔
یہ روایت امام أحمد نے اور امام طبرانی نے معجم کبیر میں نقل کی ہے اور اس کے رجال ” صحیح “ کے رجال ہیں ۔

سیدہ ام ہانی رضی اللہ عنہا بیان کرتی ہیں : فتح مکہ کے دن ، نبی اکرم صلی اللہ علیہ وسلم مکہ کے بالائی علاقے میں پڑاؤ کیے ہوئے تھے ، میں آپ کی خدمت میں حاضر ہوئی ، سیدنا ابوذر غفاری رضی اللہ عنہ بڑا برتن لے کر آئے ، جس میں پانی موجود تھا ، سیدہ ام ہانی رضی اللہ عنہا بیان کرتی ہیں : میں نے اس میں آٹے کا نشان دیکھا ، وہ بیان کرتی ہیں : سیدنا ابوذر غفاری رضی اللہ عنہ نے آپ کے لیے پردہ کیا ، پھر آپ صلی اللہ علیہ وسلم نے سیدنا ابوذر غفاری رضی اللہ عنہ کے لئے پردہ کیا ، تو انہوں نے بھی غسل کر لیا ۔
یہ روایت امام أحمد نے نقل کی ہے اور اس کے رجال ”صحیح“ کے رجال ہیں ،
یہ روایت ” صحیح “ میں بھی منقول ہے ، تاہم اس میں سیدنا ابوذر غفاری رضی اللہ عنہ کا واقعہ نہیں ہے ، اور یہ نہیں ہے کہ دونوں میں سے ہر ایک نے دوسرے کے لئے پردہ کیا تھا ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سیدنا موسیٰ علیہ السلام جب پانی میں داخل ہوتے تھے ، تو اپنے کپڑے اس وقت تک نہیں اتارتے تھے ، جب تک ان کی شرمگاہ پانی میں چھپ نہیں جاتی تھی “ ۔
یہ روایت امام أحمد نے نقل کی ہے اور اس کے رجال کی توثیق کی گئی ہے ، البتہ علی بن زید نامی راوی سے استدلال کرنے کے بارے میں اختلاف کیا گیا ہے ۔

سیده زینب بنت ابوسلمہ رضی اللہ عنہا بیان کرتی ہیں : وہ نبی اکرم صلی اللہ علیہ وسلم کی خدمت میں حاضر ہوئی ، آپ اس وقت غسل کر رہے تھے ، آپ نے چلو میں پانی لے کر میرے چہرے پر مارا اور فرمایا : پیچھے چلے جاؤ اے لڑکی !
یہ روایت امام طبرانی نے معجم کبیر اور معجم وسط میں نقل کی ہے ، اس کی سند حسن ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم دیواروں کے پیچھے غسل کرتے تھے اور کسی نے کبھی آپ کی شرمگاہ نہیں دیکھی ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی مسلم ملائی ہے ، جو عمر کے آخری حصے میں اختلاط کا شکار ہو گیا تھا ۔

عبداللہ بن عامر بن ربیعہ ، اپنے والد کے بارے میں یہ بات نقل کرتے ہیں : وہ ہمارے پاس تشریف لائے ، ہم لوگ اکٹھے غسل کر رہے تھے ، اور ایک دوسرے پر پانی ڈال رہے تھے ، انہوں نے فرمایا : کیا تم لوگ پردہ کیے بغیر غسل کر رہے ہو ؟ اللہ کی قسم ! مجھے یہ اندیشہ ہے کہ تم میرے بعد میں آنے والے برے لوگ ہو گے ، اُن کی مراد یہ تھی کہ ایسے بعد میں آنے والے لوگ ہو جن میں برائی پائی جاتی ہے ۔
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے اس بات سے منع کیا ہے کہ کوئی شخص اپنے بھائی کی شرمگاہ کی طرف دیکھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی علاء بن سلیمان ہے اور وہ ضعیف ہے ۔ ( علامہ ہیثمی فرماتے ہیں : ) میں یہ کہتا ہوں : نماز کے دوران پردہ پوشی کے بارے میں احادیث آگے آئیں گی ۔