مجمع الزوائد ومنبع الفوائد

سیدنا عبداللہ بن عباس رضی اللہ عنہما فرماتے ہیں : کسی بھی نبی کو کبھی احتلام نہیں ہوا ، کیونکہ احتلام شیطان کی طرف سے ہوتا ہے ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی عبدالعزیز بن ابوثابت ہے ، جس کے ضعیف ہونے پر اتفاق ہے ۔

سیده سہلہ بنت سہیل رضی اللہ عنہا بیان کرتی ہیں : اُنہوں نے عرض کی : یا رسول اللہ ! ہم عورتوں میں سے کسی ایک کو اگر احتلام ہو جائے ، تو کیا وہ غسل کرے گی ؟ نبی اکرم صلی اللہ علیہ وسلم نے جواب دیا : جی ہاں ! جب وہ پانی ( یعنی احتلام کا نشان دیکھے )
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ۔

اس خاتون کے حوالے سے یہ بات منقول ہے : انہوں نے نبی اکرم صلی اللہ علیہ وسلم سے ایسی عورت کے بارے میں سوال کیا ، جو کوئی ایسا کام کرتی ہے ، جس کے ذریعے وہ اپنے شوہر کو حرام کر لے ، نبی اکرم صلی اللہ علیہ وسلم نے ارشاد فرمایا : یہ دنیاوی فائدہ ہے ، آخرت میں اس کا کوئی حصہ نہیں ہو گا ، اس خاتون نے عرض کی : ایسی عورت کے بارے میں آپ کی کیا رائے ہے ؟ جو خواب میں احتلام دیکھتی ہے ، کیا وہ غسل کرے گی ؟ نبی اکرم صلی اللہ علیہ وسلم نے ارشاد فرمایا : جب وہ پانی ( یعنی احتلام کا نشان دیکھے گی ) تو وہ غسل کرے گی ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : سیدہ ام سلیم رضی اللہ عنہ ، جو سیدنا انس بن مالک رضی اللہ عنہ کی والدہ ہیں ، اُنہوں نے نبی اکرم صلی اللہ علیہ وسلم سے سوال کیا : اُنہوں نے عرض کی : یا رسول اللہ ! اگر عورت بھی وہ چیز دیکھے ، جو مرد دیکھتا ہے ( یعنی اگر عورت کو احتلام ہو جائے ، تو کیا حکم ہے ؟ ) نبی اکرم صلی اللہ علیہ وسلم نے ارشاد فرمایا : جب عورت وہ چیز دیکھے اور اُسے انزال ہو جائے ، تو اُسے غسل کرنا چاہیے ۔
یہ روایت امام أحمد نے نقل کی ہے ، اس کی سند میں ایک راوی عبدالجبار بن عمر ایلی ہے ، جسے یحیی بن معین اور دیگر حضرات نے ” ضعیف“ قرار دیا ہے ، محمد بن سعد نے اسے ” ثقہ “ قرار دیا ہے ، اس روایت کے بقیہ رجال ثقہ ہیں ۔

اسحاق بن عبداللہ بن ابوطلحہ ، اپنی دادی سیدہ ام سلیم رضی اللہ عنہا کا یہ بیان نقل کرتے ہیں : وہ نبی اکرم صلی اللہ علیہ وسلم کی زوجہ محترمہ سیدہ ام سلمہ رضی اللہ عنہا کے پڑوس میں رہتی تھیں ، سیدہ ام سلیم رضی اللہ عنہ نے عرض کی : یا رسول اللہ ! اس بارے میں آپ کی کیا رائے ہے ؟ کہ اگر کوئی عورت خواب میں یہ دیکھتی ہے کہ اس کا شوہر اس کے ساتھ صحبت کر رہا ہے ، تو کیا وہ عورت غسل کرے گی ؟ سیدہ ام سلمہ رضی اللہ عنہا نے فرمایا : اے ام سلیم ! تمہارے ہاتھ خاک آلود ہوں ، تم نے اللہ کے رسول کے سامنے عورتوں کو شرمندہ کر دیا ہے ، سیدہ ام سلیم رضی اللہ عنہا نے کہا: بے شک اللہ تعالیٰ حق بات سے حیاء نہیں کرتا ہے ، ہمیں جس معاملے میں الجھن درپیش ہوتی ہے ، اُس کے بارے میں ، ہم اللہ کے رسول سے سوال کر لیں ، یہ اس سے بہتر ہے کہ ہم اُس کے حوالے سے اندھیرے میں رہیں ، نبی اکرم صلی اللہ علیہ وسلم نے ارشاد فرمایا : اے ام سلمہ ! بلکہ تمہارے ہاتھ خاک آلود ہوں ، ایسی عورت پر غسل لازم ہو گا ، جب وہ پانی ( یعنی احتلام کا نشان ) پاتی ہے ، سیدہ ام سلمہ رضی اللہ عنہا نے دریافت کیا : یا رسول اللہ ! کیا عورت کا بھی پانی ( یعنی احتلام کا مواد ) ہوتا ہے ؟ نبی اکرم صلی اللہ علیہ وسلم نے فرمایا : پھر اُس ( عورت ) کا بچہ کس وجہ سے اُس سے مشابہت رکھتا ہے ؟ یہ عورتیں بھی مردوں کی طرح ہوتی ہیں ۔
یہ روایت امام أحمد نے نقل کی ہے ، یہ ” صحیح “ میں اختصار کے ساتھ منقول ہے ، اسحاق نامی راوی نے سیدہ ام سلیم سے سماع نہیں کیا ہے ۔

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم سے ایسی عورت کے بارے میں دریافت کیا : جسے احتلام ہو جاتا ہے ، کیا اس پر غسل لازم ہو گا ؟ نبی اکرم صلی اللہ علیہ وسلم نے فرمایا : جی ہاں ! جب وہ پانی ( یعنی احتلام کا نشان ) دیکھے ، تو اُسے غسل کرنا چاہیے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن عبدالرحمن قشیری ہے ، ابوحاتم بیان کرتے ہیں : یہ جھوٹ بولتا ہے ۔

سیدنا انس بن مالک رضی اللہ عنہ بیان کرتے ہیں : انصار سے تعلق رکھنے والی ایک خاتون نے نبی اکرم صلی اللہ علیہ وسلم سے ، ایسی عورت کے بارے میں دریافت کیا ، جو خواب میں وہ چیز دیکھتی ہے ، جو مرد دیکھتا ہے ، تو نبی اکرم صلی اللہ علیہ وسلم نے ارشاد فرمایا : جب عورت یہ چیز دیکھے ، تو اُسے غسل کرنا چاہیئے ، سیدہ عائشہ رضی اللہ عنہا نے کہا: اے فلانہ ! تم نے عورتوں کو شرمندہ کر دیا ہے ، نبی اکرم صلی اللہ علیہ وسلم نے فرمایا : اسے رہنے دو ! انصار کی خواتین دینی احکام کے بارے میں سوال کرتی ہیں ۔
یہ روایت امام بزار نے نقل کی ہے ، اس کی سند میں ایک راوی محمد بن عبید طفاوی ہے اور وہ ضعیف ہے ، اس کے بارے میں یہ کہا: گیا ہے : یہ صرف تدلیس کرتا ہے ، اور
یہ روایت بھی اُس نے ” عنعنہ “ کے طور پر نقل کی ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم سے ایسی عورت کے بارے میں سوال کیا گیا : جو خواب میں وہ چیز دیکھتی ہے ، جو مرد دیکھتا ہے ، اور اس عورت کو احتلام ہو جاتا ہے ، تو نبی اکرم صلی اللہ علیہ وسلم نے ارشاد فرمایا : اگر اسے اسی طرح انزال ہو جاتا ہے ، جس طرح مرد کو انزال ہوتا ہے ، تو اُس پر غسل واجب ہو گا ؟ اور اگر اُسے انزال نہیں ہوتا ، تو اُس پر کوئی چیز لازم نہیں ہو گی ۔
یہ روایت امام طبرانی نے معجم اوسط میں نقل کی ہے ، یہ ” صحیح “ میں اختصار کے ساتھ منقول ہے ، اس کی سند میں ایک راوی عبدالله بن عیسیٰ خزاز ہے اور وہ ضعیف ہے ۔