مجمع الزوائد ومنبع الفوائد

عبدالرحمان بن بیلمانی بیان کرتے ہیں : میں نے سیدنا عثمان غنی رضی اللہ عنہ کو دیکھا ، وہ مقاعد میں بیٹھے ہوئے تھے اور وضو کر رہے تھے ایک شخص اُن کے پاس سے گزرا ، اُس نے انہیں سلام کیا ، تو انہوں نے اسے جواب نہیں دیا ، وہ وضو کر کے فارغ ہوئے اور مسجد میں آئے تو اس شخص کے پاس آ کر رک گئے اور بولے : میں نے تمہیں جواب صرف اس لیے نہیں دیا کیونکہ میں نے اللہ کے رسول کو یہ ارشاد فرماتے ہوئے سنا ہے : ” جو شخص وضو کرتے ہوئے ، دونوں ہاتھ دھوئے اور پھر تین مرتبہ کلی کرے ، تین مرتبہ ناک میں پانی ڈالے ، اپنے چہرے کو تین مرتبہ دھوئے ، دونوں بازوں کو کہنیوں تک دھوئے ، اپنے سر کا مسح کرے ، اور دونوں پاؤں دھوئے اور پھر کلام کرنے سے پہلے یہ پڑھ لے : ” میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے ، وہی ایک معبود ہے ، اُس کا کوئی شریک نہیں ہے ، اور سیدنا محمد صلی اللہ علیہ وسلم اُس کے بندے اور اس کے رسول ہیں “ ( نبی اکرم صلی اللہ علیہ وسلم نے فرمایا : ) تو اُس شخص کے دو وضوؤں کے درمیان ( کے گناہوں ) کی مغفرت ہو جاتی ہے ۔
یہ روایت امام ابویعلیٰ نے نقل کی ہے ، اس کی سند میں ایک راوی محمد بن عبدالرحمن بن بیلمانی ہے ، جس کے ضعیف ہونے پر اتفاق پایا جاتا ہے ۔

سیدنا ثوبان رضی اللہ عنہ ، جو نبی اکرم صلی اللہ علیہ وسلم کے غلام ہیں ، وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص وضو کرے اور وضو سے فارغ ہونے کے بعد یہ پڑھے : ” میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے ، اور میں اس بات کی گواہی دیتا ہوں کہ سیدنا محمد صلی اللہ علیہ وسلم اللہ کے رسول ہیں ، اے اللہ ! تو مجھے توبہ کرنے والوں میں بنا دے ، اور تو مجھے اچھی طرح سے طہارت حاصل کرنے والوں میں بنا دے “ ( نبی اکرم صلی اللہ علیہ وسلم فرماتے ہیں : ) تو اس شخص کے لئے جنت کے آٹھوں دروازے کھول دیے جاتے ہیں کہ وہ جس ( دروازے ) میں سے چاہے ( جنت میں ) داخل ہو جائے “ ۔
یہ روایت امام طبرانی نے معجم اوسط میں نقل کی ہے اور معجم کبیر میں اختصار کے ساتھ نقل کی ہے ، معجم اوسط میں وہ یہ فرماتے ہیں : مسور بن مورع نامی راوی اس روایت کو نقل کرنے میں منفرد ہے ، ( علامہ ہیثمی فرماتے ہیں : ) میں نے ایسا کوئی شخص نہیں پایا جس نے اس کے حالات بیان کیے ہوں ، اس روایت کی سند میں ایک راوی أحمد بن سہیل وراق ہے ، جس کا ذکر ابن حبان نے كتاب ” الثقات “ میں کیا ہے ، معجم کبیر کی سند میں ایک راوی ابوسعید بقال ہے ، اکثر حضرات نے اسے ” ضعیف “ قرار دیا ہے اور بعض نے اسے ” ثقہ “ قرار دیا ہے ۔

معاویہ بن قرہ ، اپنے والد کے حوالے سے ، اپنے دادا کا یہ بیان نقل کرتے ہیں : ” نبی اکرم صلی اللہ علیہ وسلم نے ایک ، ایک مرتبہ وضو کیا ، اور پھر ارشاد فرمایا : یہ وہ وضو ہے ، جس کے بغیر اللہ تعالیٰ نماز قبول نہیں کرتا ، پھر آپ صلی اللہ علیہ وسلم نے دو ، دو مرتبہ وضو کیا ، اور ارشاد فرمایا : جو شخص اس طرح وضو کرتا ہے ، اللہ تعالیٰ اسے دُگنا ثواب عطا کرتا ہے ، پھر آپ صلی اللہ علیہ وسلم نے تین مرتبہ وضو کیا اور ارشاد فرمایا : یہ اچھی طرح وضو کرنا ہے ، اور یہ میرا ، اور اللہ تعالیٰ کے خلیل سیدنا ابراہیم علیہ السلام کا وضو کا طریقہ ہے ، جو شخص اس طرح وضو کرتا ہے اور پھر یہ پڑھتا ہے : ” میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے ، وہی ایک معبود ہے ، اس کا کوئی شریک نہیں ہے ، اور سیدنا محمد صلی اللہ علیہ وسلم اس کے بندے اور اس کے رسول ہیں “ ( نبی اکرم صلی اللہ علیہ وسلم فرماتے ہیں : ) تو اُس کے لئے جنت کے آٹھوں دروازے کھول دیے جاتے ہیں ، کہ وہ جس میں سے چاہئے ، اندر داخل ہو جائے ۔
یہ روایت امام طبرانی نے معجم اوسط میں نقل کی ہے ، وہ فرماتے ہیں : مرحوم نامی راوی نے
یہ روایت اسی طرح عبدالرحیم بن زید کے حوالے سے ، ان کے والد کے حوالے سے ، معاویہ بن قرہ کے حوالے سے ، اُن کے والد کے حوالے سے ، اُن کے دادا سے نقل کی ہے جبکہ دوسرے راوی نے اسے معاویہ بن قرہ کے حوالے سے ابن عمرو سے نقل کیا ہے ، اور معاویہ بن قرہ کے حوالے سے عبید بن عمیر کے حوالے سے سیدنا ابی بن کعب رضی اللہ عنہ سے نقل کیا ہے ، عبدالرحیم بن زید نامی راوی متروک ہے ، اور اس کے باپ کے بارے میں اختلاف کیا گیا ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص سورہ کہف کی تلاوت کرے گا ، تو قیامت کے دن اُس کے لئے اتنا نور ہو گا ، جتنا اُس کی رہائش گاہ سے مکہ تک کا فاصلہ ہے ، اور جو شخص اس سورت کی آخری دس آیات کی تلاوت کرے گا ، تو اگر دجال بھی خروج کرے ، تو وہ بھی اُسے کوئی نقصان نہیں پہنچا سکے گا ، اور جو شخص وضو کرنے کے بعد یہ کلمات پڑھے : ” تو ہر عیب سے پاک ہے ، اے اللہ ! تیری حمد کے ہمراہ ( ہم تیرے پاک ہونے کا اعتراف کرتے ہیں ) ، تیرے علاوہ اور کوئی معبود نہیں ہے ، میں تجھ سے مغفرت طلب کرتا ہوں ، اور تیری بارگاہ میں توبہ کرتا ہوں “ نبی اکرم صلی اللہ علیہ وسلم فرماتے ہیں : تو ایک صحیفے پر ، یہ کلمہ نوٹ کر کے اُس پر مہر لگا دی جائے گی ، جو قیامت تک نہیں توڑی جائے گی “ ۔
یہ روایت امام طبرانی نے معجم اوسط میں نقل کی ہے اور اس کے رجال ” صحیح “ کے رجال ہیں ، البتہ امام نسائی رحمہ اللہ نے اپنی کتاب ” الیوم واللیلہ “ ہمیں اس روایت کو نقل کرنے کے بعد یہ بات کہی ہے : یہ غلط ہے ، درست یہ ہے کہ
یہ روایت موقوف ہے ، پھر انہوں نے اس روایت کو سفیان ثوری اور غندر کے حوالے سے ، شعبہ سے موقوف روایت کے طور پر نقل کیا ہے ۔