مجمع الزوائد ومنبع الفوائد

سیدنا ابوایوب انصاری رضی اللہ عنہ اور عطاء کے حوالے سے یہ روایت منقول ہے : نبی اکرم صلی اللہ علیہ وسلم نے ارشاد فرمایا : ” میری امت کے اُن افراد کے کیا کہنے ، جو وضو اور کھانے میں خلال کرتے ہیں “ ۔
یہ روایت امام أحمد نے اور امام طبرانی نے معجم کبیر میں نقل کی ہے ۔

معجم کبیر میں ، صرف سیدنا ابوایوب انصاری رضی اللہ عنہ کے حوالے سے
یہ روایت منقول ہے : وہ بیان کرتے ہیں : ” ایک مرتبہ نبی اکرم صلی اللہ علیہ وسلم ہمارے پاس تشریف لائے ، اور ارشاد فرمایا : میری امت کے خلال کرنے والے افراد کے کیا کہنے ، لوگوں نے دریافت کیا : یا رسول اللہ ! خلال کرنے والے افراد کون ہیں ؟ نبی اکرم صلی اللہ علیہ وسلم نے ارشاد فرمایا : وضو میں خلال کرنے والے اور کھانے کا خلال کرنے والے ، جہاں تک وضو کے خلال کا تعلق ہے ، تو وہ کلی کرتے ہوئے ناک میں پانی ڈالتے ہوئے اور انگلیوں کے درمیان ہو گا ، اور جہاں تک کھانے کے خلال کا تعلق ہے ، تو وہ کھانے کی چیز کے بارے میں ہو گا ، کیونکہ ( انسان کے ساتھ رہنے والے ) دونوں فرشتوں کے لیے کوئی چیز اتنی زیادہ گراں نہیں ہوتی ، جتنی یہ ہوتی ہے کہ وہ دونوں ( فرشتے ) اپنے ساتھ والے شخص کے دانتوں کے درمیان میں ، کھانے کی کوئی چیز دیکھیں ، جبکہ وہ شخص کھڑا ہوا نماز ادا کر رہا ہو “ ۔ ان دونوں روایات کی سند میں ایک راوی واصل رقاشی ہے اور وہ ضعیف ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : میری امت کے خلال کرنے والے افراد کے کیا کہنے ؟ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن ابوحفص انصاری ہے ، میں نے کسی کو اس کے حالات بیان کرتے ہوئے نہیں پایا ہے ۔

سیدہ عائشہ صدیقہ رضی اللہ عنہما بیان کرتی ہیں : نبی اکرم صلی اللہ علیہ وسلم جب وضو کرتے تھے ، تو پانی کے ذریعے اپنی داڑھی کا خلال کرتے تھے ۔
یہ روایت امام أحمد نے نقل کی ہے ، اور اس کے رجال کی توثیق کی گئی ہے ۔

شقیق بیان کرتے ہیں : سیدنا عثمان غنی رضی اللہ عنہ نے وضو کرتے ہوئے ، اپنے پاؤں کی انگلیوں کا خلال کیا ، اور یہ بات بیان کی : میں نے اللہ کے رسول صلی اللہ علیہ وسلم کو ایسا کرتے ہوئے دیکھا ہے ۔
یہ روایت امام ابویعلیٰ نے نقل کی ہے اور اس کے رجال کی توثیق کی گئی ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم جب وضو کرتے تھے ، تو اپنی داڑھی کا خلال کرتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی خالد بن الیاس ہے ، میں نے کسی کو اُس کے حالات ذکر کرتے ہوئے نہیں دیکھا ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم جب وضو کرتے تھے ، تو اپنی داڑھی کا خلال کرتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی صلت بن دینار ہے اور وہ متروک ہے ۔

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم وضو کرتے ہوئے ، وضو کے بچ جانے والے پانی کے ذریعہ اپنی داڑھی کا خلال کرتے تھے ، اور بازؤں ( کو دھونے سے ) بچ جانے والے پانی کے ذریعے اپنے سر کا مسح کرتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی تمام بن نجیح ہے ، جسے امام بخاری رحمہ اللہ اور ایک جماعت نے ” ضعیف “ قرار دیا ہے ، جبکہ یحییٰ بن معین نے اُسے ” ثقہ “ قرار دیا ہے ۔

سیدنا انس بن مالک رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو وضو کروایا ، تو آپ صلی اللہ علیہ وسلم نے اپنا ہاتھ ( داڑھی کے ) نیچے داخل کر کے اپنی داڑھی کا خلال کیا ، میں نے دریافت کیا : یہ کیا ہے ؟ آپ صلی اللہ علیہ وسلم نے ارشاد فرمایا : میرے پروردگار نے مجھے اس کا حکم دیا ہے ۔
یہ روایت امام طبرانی نے معجم اوسط میں نقل کی ہے اور اس کے رجال کی توثیق کی گئی ہے ۔

نافع نے ، سیدنا عبداللہ بن عمر رضی اللہ عنہما کے بارے میں یہ بات نقل کی ہے : جب وہ وضو کرتے تھے ، تو اپنی داڑھی کا اور اپنے پاؤں کی انگلیوں کا خلال کرتے تھے ، اور یہ بات بیان کرتے تھے : کہ انہوں نے اللہ کے رسول صلی اللہ علیہ وسلم کو ایسا کرتے ہوئے دیکھا ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی أحمد بن محمد بن ابوبزہ ہے ، میں نے کسی کو اس کے حالات ذکر کرتے ہوئے نہیں دیکھا ہے ۔

سیدنا عبداللہ بن عکبرہ رضی اللہ عنہ ، جنہیں صحابی ہونے کا شرف حاصل ہے ، وہ فرماتے ہیں : خلال کرنا سنت ہے ۔
یہ روایت امام طبرانی نے معجم اوسط اور معجم صغیر میں نقل کی ہے ، اس کی سند میں ایک راوی عبدالکریم بن ابوالمخارق ہے ، اور وہ ضعیف ہے ۔

سیدنا واثلہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص ( وضو کرتے ہوئے ) پانی کے ذریعے اپنی انگلیوں کا خلال نہیں کرتا ہے ، قیامت کے دن اللہ تعالیٰ آگ کے ذریعے اُن ( انگلیوں ) کا خلال کرے گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی علاء بن کثیر لیثی ہے ، جس کے ضعیف ہونے پر اتفاق پایا جاتا ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” یا تو وضو میں انگلیوں کا خلال کیا جائے گا ، یا پھر آگ ان کا خلال کرے گی “ ۔
یہ روایت امام طبرانی نے معجم اوسط میں نقل کی ہے ، جبکہ معجم کبیر میں ، یہ سیدنا عبداللہ بن مسعود رضی اللہ عنہ پر ” موقوف “ روایت کے طور پر منقول ہے ، اور اس کی سند حسن ہے ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے : وہ فرماتے ہیں : ” پانچوں انگلیوں کا خلال کرو ، تاکہ اللہ تعالیٰ ان میں آگ نہ بھرے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے اور اس کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” خلال کرو ! کیونکہ یہ پاکیزگی کا باعث ہے ، اور پاکیزگی ایمان کی طرف دعوت دیتی ہے ، اور ایمان اپنے ساتھی کے ساتھ جنت میں ہو گا “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابراہیم بن حیان ہے ، ابن عدی کہتے ہیں : اس کی نقل کردہ احادیث ” موضوع “ ہوتی ہیں ۔